JOHAN 10
10
Belamchingpa Gentehna
1“Chihtaktak in, chihtaktak in ka hon hilh ahi, kuapeuh belam huang kongkhak a lut lou a, lampi dang a kahlutmi guta leh suamhat ahi. 2Kuapeuh kongkhak a lut belamchingpa ahi. 3Kongkhak ngakpa'n amah ana honsak a; belamte'n a-aw aza uh; ama'n belamte amin un asam chiat a, apikhe zel hi. 4Amah a tengteng apawtsaktak in, ama uh akai a, belamte'n amah azui zel ua, a-aw athei uhi. 5Midang azui kei ding ua, ataimangsan zaw ding uh; midangte aw atheih louh ziak un,” achi hi.
6Hiai gentehna Jesu'n akiang uah agen hi; himahleh bang thu ahia akiang ua agen chih athei kei uhi.
Jesu Belamchingpa Hoih
7Huchi in Jesu'n akiang uah agen nawn a, “Chihtaktak in, chihtaktak in ka hon hilh ahi, kei belam kongkhak ka hi. 8Ka ma a hong pai tengteng gutate leh suamhatte ahi vek uh; himahleh belamte'n athu uh angaihsak kei uh. 9Kei kongkhak ka hi; keimah a mi alutleh, humbit in a-om ding a, alut in apawt dia, nek ding leng amu ding hi. 10Guta zaw, gu ding leh that ding leh hihse ding lou in ahong pai kei; kei ka hihleh hinna aneihna ding ua, tampitak aneihna ding ua hong pai ka hi.
11“Kei belamchingpa hoih ka hi; belamchingpa hoih in abelamte a ding in ahinna apia hi. 12Kilohmi, belamchingpa tak hilou, belamte amah a hilou in, ngia hong pai amuh in belamte ataisan a; huan ngia in amau akei a, huchi in belamte ahihdalh hi. 13Kilohmi ahi a, belamte a ding a deihsakna himhim aneih louh ziak in ataimang hi. 14Kei zaw belamchingpa hoih ka hi. 15Pa in ahon theih bang in ke'n leng Pa ka thei hi, huan belamte a ding in ka hinna ka pia hi. 16Hiai belam huang a lou belam dangte ka nei hi; amau leng ka hon pi ding a, ka aw aza ding ua, hon khat in chingpa khat toh a-omkhawm ding uhi.
17“Hiai ziak in Pa'n kei ahon it ahi; lak nawn ding a ka hinna ka piak ding ziak in. 18Kuamah in hon laksak kei ding, keimah thuthu in ka pe zaw ding hi. Pe thei ka hi a, la nawn thei leng ka hi. Hiai thupiak ka Pa a pan ka muh ahi,” achi hi.
19Hiai thu ziak in Judate akikhen ua, akilang nawnta uhi. 20Akhen tampi in, “Dawi zawl ahi, ahai ei ve; bangziak a athu ngaikhia na hi ua?” achi uhi.
21Akhen in, “Hiai dawi zawl thute hi kei e. Dawi in mittaw mit ahihvak thei a hia?” achi uhi.
Jesu Nawlkhin In A-om
22Huan Jerusalem a Latna Ankuanglui lai ahi a, huai hun phalbi lai ahi. 23Tempul, Solomon inlim ah Jesu akivialleh hi. 24Judate'n hong umkual ua, akiang ah, “Bang tan lakloh tak a hon koih ding na hia? Khrist na hihleh chiantak in hon hilh in,” achi uhi.
25Jesu'n akiang uah, “Ka hon hilhta a, na gingta tuan kei uh; ka Pa min a thil ka hih hiaite'n ka tanchin atheisak uhi. 26Himahleh na gingta kei uhi, ka belam lak a mi na hih louh ziak un. 27Ka belamte'n ka aw aza uh, ke'n leng amaute ka thei a, amau ahon zui uhi. 28Akiang uah tangtawn hinna ka pia; tangtawn in amangthang himhim kei ding ua, kuamah in ka khut a kipan hon sut sam kei ding hi. 29Amau hon pepa ka Pa, mi tengteng sang a thupizaw ahi; kuamah in Pa khut a kipan asut thei kei ding hi. 30Kei leh Pa lah pum khat ka hi uh,” chi in adawng hi.
Judate'n Jesu Ahua Uh
31Huan Judate'n adenna ding in suang atawm nawn uhi. 32Jesu'n amau ahoupih a, “Pa a kipan nasep hoih tampi ka hon ensak a, huai nasepte lak ah bang nasep ziak in ahia suang a na hon den dek uh?” achi hi.
33Judate'n akiang ah, “Nasep hoih ziak in suang in ka hon dengdek kei uh; Pathian na gensiat ziak leh nang mihing hi ngal a, Pathian a na kibawl ziak ahi zaw,” chi in adawng uhi.
34Jesu'n akiang uah, “Na dan uah, ‘noute pathiante na hi uh ka hon chi,’ chih gelh ahi kei a hia? 35Pathian thu tunnate bawn pathiante achihleh Laisiangthou bohsiat theih ahi kei hi. 36Pathian Tapa ka hi, ka chih ziak in Pa'n aseh a, khovel a asawlpa Pathian na gensia hon chi na hi uh maw? 37Ka Pa nasem ka hih keileh hon gingta kei un. 38Himahleh sem ka hihleh kei hon gingta kei mah le uchin ka nasepte bek gingta un; huchi a keimah ah Pa a-om chih leh kei Pa ah ka om chih na theihna ua, na theihsiamna ding un,” chi in adawng hi.
39Huaitak in mat atum nawn ua, himahleh akhut ua kipan asuakta hi.
40Jordan lui gal ah Johan in atung a mi abaptisna lam ah apaimang nawn a, huai ah a-om nilouh hi. 41Huan akiang ah mi tampi ahong pai ua, “Johan in thillamdang bangmah ahih kei a; himahleh Johan in hiai mi tungtang thu agen peuhmah ana dik mahmah hi,” achi uhi. 42Huan huai ah mi tampi in amah agingta uhi.
Pilihan Saat Ini:
JOHAN 10: PAITBSI
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
