GENESIS 27
27
Isak In Jakob A Vualzawl
1Huan, hichi ahi a, Isak a hongtek a, khua mutheilou khop in a mit a hong mialta hi. A tapa upazaw Esau a sam a, a kiang ah, “Ka tapa” a chi hi. Aman a kiang ah, “Hiai ah ka om” a chi hi.
2Aman, “Ngai in, ka tek mahmahta a, ka sih ni ding lah ka theikei hi. 3Tuin hehpih in na vanzat, na thaltang leh na thalpeu tawi inla, va gamvak inla, sakhi hon va matsak in. 4Ka sih ma a k’on vualzawl theihna ding in, ka deihlam tak in meh ding in limtakin hon bawlsak inla, ka nek ding in ka kiang ah hontawi in” a chi hi.
5Isak in a tapa Esau a houpih lai Rebekah in a naza hi. Esau sakhi benga honpaw ding in a gamvakta hi. 6Rebekah in a tapa Jakob kiang ah, “Ngai in, na pa’n na u Esau kiang a a thugen ka za hi. 7Sakhi honpuak in, ka nek a, ka sih ma a Toupa ma a k’on vualzawlna ding in, meh limtakin hon bawlsak in” a chi hi. 8“Ka tapa, tuin k’on thupiak bang in ka thu zui in. 9Ganhon lak ah va hoh inla, kelnou nih hoih tak, huai a kipan honla in. Huai a deihlam tak in na pa ading in meh limtakin ka na bawl ding. 10A sih ma a hon vualzawlsak ding in, a nek ding in na pa kiang ah na va paipih ding ahi” a chi hi.
11Jakob in a nu Rebekah kiang ah, “Ngai in, ka u Esau mi mulhau ahi a, kei mi nel ka hi 12Ka pa’n a hon na zawt vialvial kha ding a, amah ading in khempa ka honghi ding a, vualzawl gentak louh hamsiat kizon lel ka hi kei ding maw” a chi hi.
13A nu’n, a kiang ah, “Ka tapa, na hamsiat muh ding ka tung ah om hen. Ka thu zui inla, hon valak in” a chi hi. 14A kuan a, a va la a, a nu kiang ah a hon paipih hi. A nu’n a pa deihlam tak in meh limtakin a bawl hi. 15Rebekah in a tapa upapen Esau puansilh hoihtak, a kiang a inn a om a la a, a tapa naupang zaw Jakob a silhsak hi. 16Huaiban ah kelnou vun leng a khut leh a ngawng nelna mun ah a phah hi. 17Mehlim tak leh tanghou a bawlte a tapa Jakob khut ah a pia hi.
18Amah a pa kiang ah a hoh a, “Pa aw” a chi a; aman, “Hiai ah ka om, ka tapa, kua zaw pen na hia?” a chi hi.
19Jakob in, a pa kiang ah, “Na tapa upa zaw Esau ka hi; n’on sawl bang in ka hihkhinta. Hehpih in thou inla, hon vualzawl ding in tu inla, ka sakhi sa ne in” a chi hi.
20Isak in, a tapa kiang ah, “Ka tapa, bangchidan ahia, hong man gang na tel chia?” a chi hi.
21Isak in Jakob kiang ah, “Ka tapa, hehpih in hongnai dih, k’on zawt vialvial ding, ka tapa Esau na hina hiam” a chi hi. 22Jakob in a pa Isak a va naih a; aman a na zawt vialvial a, “A aw Jakob aw hiven, a khutte lah Esau khutte hiven” a chi hi. 23A u Esau khut bang a, a khut a mul ziak in amah a theikei hi. Huchi in amah a vualzawlta hi. 24“Ka tapa Esau ngei na hi maw?” a chi a; aman, “Hi e” a chi hi.
25Aman, “Hontawi nai in, k’on vualzawlna ding in ka tapa sakhi sa ka ne ding” a chi hi. A hontawi nai a, a neta a, uain leng a honla a, huai leng a dawn hi. 26A pa Isak in a kiang ah, “Ka tapa, hongnai in, hontawp in” a chi hi. 27A vanaih a, a tawp a, aman a puansilh gim a za a, a vualzawl hi.
“En in, ka tapa gim Toupa
vualzawl gam gim bang ahi.
28Pathian in van daitui,
lei hoihna, buh tampi leh uain
tampi honpia hen.
29Nam tuamtuamte’n na nna
sem uhenla, chi tuamtuamte na ma ah kun uhen.
Na unaute tung ah toupa in om inla;
na nu tate na ma ah kun uhen.
Hon hamsiatte hamsiat in om uhenla,
hon vualzawl peuhmah
vualzawl in om hen” a chi hi.
Esau In Jakob Vualzawlna A Ngen
30Hichi ahi a, Isak in Jakob a vualzawl zohtakin, Jakob a pa Isak kiang a kipan a pawtkhe manlel in a unaupa, Esau sabeng a hongtung hi. 31Aman leng mehlimtakin a bawl a, a pa kiang ah, “Pa, thou inla, n’on vualzawlna ding in na tapa sakhisa ne in” a chi hi.
32A pa Isak in, a kiang ah, “Kua na hia?” a chi a; aman, “Na tapa, na tapa upa zaw, Esau ka hi” a chi hi.
33Isak nakpi’n a ling zungzung a, “Sakhi man a, ka kiang a, a sa hontawi, na hong tunma a, ka na nekkhit a, ka vualzawlpa kua ahia? Ahi, amah vualzawl in a om ding” a chi hi.
34Esau in a pa thugen a zak in nakpitak leh khase mahmah in a kapta a, a pa kiang ah, “Pa aw, hon vualzawl in, keileng hon vualzawl mahmah ve aw” a chi hi.
35Aman, “Na nau in a hong zekhem a, na vualzawlnate a hong laksakta hi” a chi hi.
36Aman, “A min Jakob a chih uh dik mahmah hilou hia? Nihvei a hon suanta; ka tamasa hihna a hon laksak a; ngai in, tuin ka vualzawlna a hon laksak nawnta” a chi hi. Amahmah in, “Vualzawlna kei adia honsit saklou maw?” a chi hi.
37Isak in a dawng a, Esau kiang ah, “Ngai in, amah na kumpipa in ka bawl a, a unau tengteng leng a sikha ding in ka pevek a, buh leh uain in leng ka vakta hi, nang ading in, ka tapa, bang hon hihsak ding ka hia?” a chi hi.
38Esau in, a pa kiang ah, “Pa, Vualzawlna khat kia lel leng neilou na maw? Pa aw, keileng hon vualzawl mahmah ve” a chi hi.
39Esau ngaihtak in a kapta a, A pa Isak in a dawng a, a kiang ah,
“Ngai in, na tenna ding lei hoihna tak,
tunglam a kipan van daitui
kiakna mun ahi ding.
40Na namsau in ahi,
na hin ding, na nau nna
leng nasem ding.
Hichi ahi ding a,
na kitutkhiak hun chiang in a hakkol na ngawng a kipan na singkheta ding” a chi hi.
41A pa’n Jakob a vualzawl ziak in Esau in a mudah hi. Esau in a lungsim in, “Ka pa sun ni ding a naita a, huaikhit chiang in ka nau Jakob ka that mai ding” a chi hi.
42A tapa upa zaw Esau thugen Rebekah a hilh ua; mi a sawl a, a tapa naupang zaw Jakob a sam a, a kiang ah, “Ngai in, na u Esau in na tungthu ah, nangmah honthah tum in a ki khamuan hi. 43huaiziak in, ka tapa, tuin ka thu mang in. Thou inla, Haran khua a ka sanggampa Laban kiang ah taimang in. 44Na u hehna a daih mateng a kiang ah ni bangzah hiam va om phot in. 45Na u hehna na tung a a daih a, a tung a na thilhih a mangngilh ma teng. A daih a, a mangngilh chiang in mi k’on sawl dia, huai a kipan ka hong pikhe sak ding. Bangdia ni khat a na nih ua hon tan ding ka hia?” a chi hi.
Isak In Laban Kiang ah Jakob A Sawl
46Rebekah in Isak kiang ah, “Hit tanute ziak in hin ka chimtak mahmah hi. Jakob in hiai gam nungak, hiai Heth tanute lak a mi zi dia a neihnawn ngial in zaw, kei ading in hin bang a phatuam dia?” a chi hi.
Pilihan Saat Ini:
GENESIS 27: PAITBSI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.