GENESIS 23
23
Sarah Sihna Leh Abraham In Han Aleina
1Sarah damsung kum zakhat sawmnih-le-sagih ahi. Hiaite Sarah damsung kumte ahi uh. 2Kanaan gam a Kiriath-arba, Hebron kichi ah Sarah asi a, Sarah suun ding leh kah ding in Abraham ahong hi.
3Amisi luang ma a kipan Abraham adingtou a, Heth suante kiang ah, 4“Na lak uah mikhual leh khualtam lel ka hi a; ka misi luang muh louh dia ka vuitheihna ding in vuina mun hon pia un,” chi in angen hi.
5Heth suante'n Abraham adawng ua, akiang ah, 6“Ka toupa, hon ngaikhia in, nang ka lak ua vaihawm thupitak na hi a; ka hante uh lak a na deihna penpen ah na misi vui in. Na misi na vuina ding in ka lak uah kuamah in ka han uh hon piak ka it kei ding uh,” achi uhi.
7Huai gam mite leh Heth suante ma ah Abraham dingtou in akun hi. 8“Ka misi ka muh louh dia ka vui pha na sak uleh, hon ngaikhia unla, Zohar tapa Ephron kiang ah hon ngetsak un. 9Alou taw a om, aneih, Makpelah kokhuk hon pe ding in, na lak ua vuina mun ding ama'n hun asak zahzah la henla, hon pia hen,” achi hi.
10Heth suante lak ah Ephron atu a; Heth mi Ephron in Heth suante theih in akhokulh kong a lut peuhmah nangawn theih in Abraham adawng a, 11“Hilou e, ka toupa, hon ngaikhia in. Lou leh asung a om kokhuk leng ka hon pia hi. Ka chipihte tapate mitmuh in ka hon pia hi. Na misi vui in,” chi in.
12Huchi in huai gam mite ma ah Abraham akun hi. 13Huai gam mite theih in Ephron kiang ah, “Pha na sakleh hehpih in hon ngaikhia in; lou man ka hon pe ding, kei a kipan la in, huai mun kia ah ka misi ka vui ding,” achi hi.
14Ephron in Abraham adawng a, akiang ah, 15“Ka toupa, hon ngaikhia in. Lei mun dangka shekel zali ahi a, huai zaw, nang leh kei a ding in gen tham ahi a hia? Na misi vui mai in,” achi hi. 16Abraham in Ephron thu azuita a; Heth suante theih in Ephron in agen zah, dangka shekel zali, sumsinte zat zel abuk a, Ephron kiang ah apeta hi.
17Ephron lou, Mamre toh kizawn Makpelah gam a om, alou toh, asung a kokhuk om toh, lou a sing om tengteng toh, alou kim a sing om tengteng toh, 18Heth suante mitmuh in, akhokulh kong a om peuhmahte muh in, gou ding in Abraham kiang ah piakkip in a-omta hi.
19Huai nung in Kanaan gam a Mamre toh kizawn, Hebron kichihna, Makpelah lou a kokhuk ah Abraham in azi Sarah avuita hi. 20Lou leh asung a kokhuk om vuina mun ding in Abraham kiang ah Heth suante'n apekipta uhi.
Pilihan Saat Ini:
GENESIS 23: PAITBSI
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.