GENESIS 17
17
Thukhun Chiamtehna Zeksum
1Abram kum sawmkua leh kua a upa a hih in, Toupa Abram kiang ah a hong kilak a, a kiang ah, “Kei Pathian bangkim hihthei ka hi; ka ma ah om inla, hoihkim in. 2Nang toh kikal ah thu ka khung dia, nakpitak in k’on pungsak ding” a chi hi. 3Abram a khupboh a; Pathian in amah a houpih hi. 4“Ngai in, ken zaw, ka thukhun na kiang ah ahi, ka khun, chi tampite Pa na hita ding. 5Na min leng Abram ahi nawnta kei dia, na min Abraham ahi zawta ding; chi tampite Pa dia k’on bawltak ziak in. 6Nakpitak in k’on chipha sak ding a, nang ah chichihte ka bawl ding a, nang a kipan kumpipate a hong omkhe ding uh.
7Kei leh nang leh na suante, suan sawnsawnte tan in leng ka thukhun nang ading leh nanung a na suante ading a, a Pathian uh hi ding in, tangtawn thukhun ding in ka hihkip ding hi. 8Na kiang ah leh nanung a na suante kiang ah mikhual na hihna gam, Kanan gam tengteng, tangtawn gou ding un k’on pe ding, Kei, a Pathian uh ka hi ding” a chi hi.
9Pathian mah in Abraham kiang ah, “Nang ka thukhun na zui ding ahi. Na nung a na suante suan sawnsawnte tan in leng a zui ding uhi. 10Hiai kei leh nang leh na suante kal a ka thukhun na zuih ding uh ahi. Na lak ua pasal peuhmah zeksum ding ahi. 11Na zekvun sa uh zeksum in na om ding uhi. Huai nang toh i kal a thukhun chiamtehna ahi ding hi. 12Na lak ua kuapeuh ni giat a upa, na suan sawnsawn tan un leng, na suan hi chitchiat lou leng na inn a piang hiam, mikhual kuapeuh a kipan dangka sum a na lei hiam leng, pasal peuhmah zeksum ding ahi. 13Na inn a piang leh na dangka sum a na leite leng zeksum ngeingei ding ahi. Ka thukhun tangtawn thukhun ding in na sa ah a omta ding hi. 14Pasal zeksumlouh leh a zekvun sa a zeksum a omlou, a chipihte lak a kipan satkhiat ahi ding; aman ka thukhun hihsia ahi” a chi nawn hi.
15Pathian mah in, Abraham kiang ah, “Na zi Sarai, a min Sarai na chi nawnta kei dia, a min Sarah ahi zawta ding. 16Amah ka vualzawl ding a, huai lou leng amah ah tapa k’on pe ding. Ahi, amah ka vualzawl ding a, Namte Nu ahita ding. Nam tuamtuam kumpipate amah a kipan a hongom ding” a chi hi. 17Abraham a khupboh a, a nuia, a lungsim in mi kum za a upa in ta a neiding maw? Sarah kum sawmkua a upain ta a neiding maw? a chi hi. 18Abraham mah in, Pathian kiang ah, Ishmael na ma ah omthei leh aw, a chi hi.
19Pathian in, “Hilou e, na zi Sarah in tapa a hon neihsak taktak ding; a min Isak na sak ding ahi. Ka thukhun, a nung a, a suante ading in tangtawn thukhun ding in a kiang ah ka hihkip ding. 20Ishmael tungthu leng k’on ngaihkhiak sak hi. Ngai in, amah ka vualzawlta a, chi tampi ka suangsak ding hi. Nakpitak in leng ka pungsak ding a, aman kumpipa sawmlehnih a suang ding a, amah chi thupitak in ka bawl ding hi. 21Himahleh ka thukhun, Sarah in nikum hichi hun a a hon neihsak ding Isak kiang ah ahi ka hihkip ding” a chi hi. 22A kiang a thugen a tawp a, Pathian in Abraham a paitouh santa hi.
23Abraham in a tapa Ishmael leh a inn a piang tengteng leh dangka sum a, a lei tengteng, Abraham inkuante lak a pasal peuhmah, a pi a, Pathian in a kiang a a gen bang in, huai ni mah in a zekvun uh a sumsakta hi. 24Abraham zekvun a sumlai in kum sawmkua leh kua a upa ahi. 25A tapa Ishmael a zek vun a sum lai un kum sawmlehthum a upa ahi. 26Huai ni mah in Abraham leh a tapa Ishmael zeksum ahita uh. 27A inkuanpihte lak a pasal tengteng, a inn a piangte leh mikhual a kipan dangka sum a a leite leng, amah toh zeksum ahi vekta uhi.
Pilihan Saat Ini:
GENESIS 17: PAITBSI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.