GENESIS 15
15
Abram Toh Pathian Thukhun
1Huai thilte nung in, “Abram, lau ken, kei na phaw leh na kipahman thupitak ka hi” chi’n, Toupa thu Abram kiang ah mengmuhna in a hongtung hi.
2Abram in, “Aw, Toupa Pathian, bang n’on pedia, ta neilou a ka om na mu a, ka goukempa lah Damaska khua a Eliezer ahi ngal a” a chi hi. 3Abram mah in, “Ngai in, chi lah n’on suahsak kei a; en in, ka inn a piang ka gouluah ding ahi” a chi hi.
4“Ngai in, huai mi na gouluah ding ahi kei. Nangmah gil a hong gah ding ngei, na gouluah ahizaw ding” chi’n, Toupa thu a kiang ah a hongtung hi. 5Amah inn pua ah a pikhia a, “Vanlam en inla, aksite na sim theih leh sim him in” a chi hi. Amahmah in a kiang ah, “Na suante huchibang ahi ding uh” a chi hi.
6Aman Toupa a gingta a, huchi in, aman huai a diktatna in a seh sakta hi.
7A kiang ah, “Hiai gam na luah ding a honpe dia Kaldaite khua Ur a kipan hon pikhia Toupa ka hi” a chi hi.
8Aman “Toupa Pathian aw, ka luah ding, chih bangchi’n ka thei dia?” a chi hi.
9Aman, a kiang ah, “Bawngla kum thum a upa, kelpi kum thum a upa, vakhu leh vapal nou honla in” a chi hi. 10Huai teng a honla a, a laitak ah a phelkhap chiat a, a phel khat, a phel khatlam doh in a koih chiat a; vasate bel a phelkhap kei hi. 11Sasialne vasate saluangte tung a a tuk chiang un Abram in a hawlkhe zel hi.
12Nitum dia a kisak sialsial lai in, Abram a ihmu hithit hi. Ngai in, a mial a mial, thil mulkimhuai petmah in amah a honkhuh hi. 13Hiai thilte nung in Pathian in Abram kiang ah, “Na suante amau gam hilou ah mikhual in a om ding ua, a na uh a sepsak ding uh, chih teltak in thei in. Kum za li sung hih gentheih in a om ding uhi. 14A nna uh a sepsak nam uh ka vaihawm khum ding. Huaikhit chiang in thil tampi nei in a hong paikhe ding uhi. 15Nang na pipute kiang ah lungmuangtakin na pai ding a; na lu a kelsam pouvek in a honvui ding uhi. 16Himahleh, suan lina ah hiai ah a hongpai nawn ding uh. Amorte khelhnate lah a kim nai ngalkei a” a chi hi.
17Hichi ahi a, nitum a, khua a hong mial in, ngai in, halzulna meikhu lunglung leh meisel kuang luahluah huai sa kiphelkhapte kal a paipai a hongom hi. 18Huai ni’n Toupa’n hiai gam, Aigupta lui a kipan lui lian, Euphrates lui, pha in, na suante kiang ah ka peta. 19Kente, Kenizte, Kadmonte, 20Hitte, Perizte, Rephaimte, 21Amorte, Kanante, Girgahte leh Jebuste toh leng ka pelai hi, chi in Abram toh thu a khungta hi.
Pilihan Saat Ini:
GENESIS 15: PAITBSI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.