PINGANDAI 7
7
Piminyu Pinganang so Stephen
1Imam Bās siken Stephen, “Sawŭ kah kayuh anŭ adi ngara nang?” 2#Tib 12.1 Stephen nam, “Bara dingan ka bara pimas, dingah pinganang ku ati! Diŭ so babuk ta Abraham bipindah ka Haran, Tapa adi bragah nandŭng di ayŭh di Mesopotamia 3ka nang di ayŭh, ‘Tingge rawang mu samŭn rais mu, ka matak ka tarun tana adi Aku re kiren di kuu.’ 4#Tib 11.31, 12.4 Jadi ayŭh bu so rais-i ka di rŭŭ di Haran. Ripas sama-i kabŭs, Tapa bada ayŭh bipindah ka tarun tana ati adi yŭn ngan rŭŭ madin. 5#Tib 12.7, 13.15, 15.18, 17.8 Nganŭ Tapa gibayuh nggen tana ati di Abraham, mati papah kaja dŭh gŭh-I nggen, pak Tapa ko bijanji an nggen-i di ayŭh; ka-i re tung jangi samŭn bara sesang-i. Gi-mating anak Abraham di andu Tapa ndai janji anŭ. 6#Tib 15.13-14 Sakati inŭh Tapa minyu ngga ayŭh: ‘Bara sesang mu re rŭŭ di rais tami, di yŭn ngara re jadi urun ka dog kinanyuh sitian pat ratus sawa. 7#Pyh 3.12 Pak Aku re ngukum bangsa anŭ adi piurun ngara. Ka komŭnŭ ngara re ruah so rais anŭ ka nyambah Aku di tarun tana ati.’ 8#Tib 17.10-14, 21.2-4, 25.26, 29.31—35.18 Ka Tapa nggen adat sunat di Abraham, jadi tandā simanya anŭ. Abraham nyunat Isaac, ndi minggu ripas-i dog biranak; Isaac nyunat anak-i Jacob, ka Jacob nyunat simŭng-duwŭh madis anak-i, adi bara tayung-babuk bangsa ta adi timagah.
9 #
Tib 37.11, 28, 39.2, 21 “Bara anak Jacob sina di Joseph adi jurud ngara ka jua ayŭh da jadi urun di Egypt. Pak Tapa agi ngga ayŭh 10#Tib 41.39-41 ka pirupas ayŭh so sopŭrŭg pinyusah-i. Kan Joseph mijog di sirung jawin raja daya Egypt, Tapa nggen di ayŭh pinyibijak adi bada raja rasu rindu ayŭh ka bada ayŭh jadi gabenor adi nguasa rais samŭn istana. 11#Tib 42.1-2 Komŭnŭ apag timbur di ndi tarun tana Egypt ngga di Canaan, adi mbŭh jadi pinyusah bās. Tayung-babuk ta dŭh tungang dapŭd pinguman, 12pak kan Jacob dingah gandom agi di Egypt, ayŭh pait bara anak-i, tayung-babuk ta, da di kamanŭ adi sibungas saba-i. 13#Tib 45.1, 16 Di pimandŭg ngara adi piduwŭh saba, Joseph kidaan asi adŭp-i di bara jurud-i, ka raja daya Egypt piguru puan rawang Joseph. 14#Tib 45.9-10, 17-18, 46.27 Jadi Joseph pait pinganang ka sama-i Jacob, bada ayŭh samŭn sopŭrŭg darŭm rawang-i, ju puru-rimŭh naan sopŭrŭg-i, mandŭg ka Egypt. 15#Tib 46.1-7, 49.33 Jadi Jacob bipindah ka Egypt, di yŭn-i ngga bara anak-i anŭ kabŭs. 16#Tib 23.3-16, 33.19, 50.7-13; Jos 24.32 Tadang ngara dog taban ka Shechem, di yŭn ngara dog kubur di tana kubur adi Abraham ko miris so bara anak Hamor ngga mua kiang duit pirak.
17 #
Pyh 1.7-8
“Kan tipuh-i mbŭh sindŭk yŭn Tapa ndai anŭ adi-I ko bipayu an ndai yŭn Abraham, bangsa ta di Egypt mbŭh bitambah rabis bagŭ. 18Pak pinŭbŭn-i raja adi bŭkŭn adi dŭh puan Joseph piguru mritah Egypt. 19#Pyh 1.10-11, 22 Ayŭh nipu tayung-babuk ta buang gaok ngga ngara; ayŭh takan ngara da tagan anak-pira ngara di sapa tarun, da kabŭs. 20#Pyh 2.2 Di tipuh anŭ inŭh Moses dog biranak. Ayŭh pira adi raru ramus, adi dog mira pimas-i sitian taruh buran di arŭn. 21#Pyh 2.3-10 Ka kan ayŭh dog tagan di sapa tarun, anak dayung raja ngakat ayŭh ka kudip ayŭh ndŭg baga, keya ka anak adŭp-i. 22Ayŭh dog ngajar sopŭrŭg pinyibijak daya Egypt, ka ayŭh jadi daya bās darŭm piminyu ngga darŭm pingandai.
23 #
Pyh 2.11-15
“Kan Moses mbŭh pat puru sawa umbur-i, agi timbur darŭm asŭng-i ayŭh an di munan bangsa adŭp-i daya Israel. 24Ayŭh kiris ndi naan so ngara dog kinanyuh daya Egypt, ka-i di turung ka siŭ daya Egypt anŭ. ( 25Ayŭh pikir bangsa adŭp-i mirati Tapa re an pakai ayŭh da pirupas ngara, pak ngara dŭh.) 26Andu anŭ ndi ayŭh kiris duwŭh naan daya Israel bikaii, ka suba bada ngara duwŭh bidamai. ‘Angān duwŭh samah bangsa, mani angān bikaii?’ 27Pak sianŭ adi kandam dingan-i turak Moses ka bŭngŭn, buang-i nang, ‘Asi bada kuu jadi pinguasa ka akim ami?’ ayŭh nang. 28‘Kuu an siŭ aku kah, nimun kuu ko siŭ daya Egypt mijah?’ 29#Pyh 18.3-4 Kan Moses dingah sakanŭ, ayŭh bu so Egypt ka di rŭŭ di tarun tana Midian. Diginŭ ayŭh biyŭn duwŭh anak dari.
30 #
Pyh 3.1-10
“Kan pat puru sawa mbŭh ripuan, malaikat nandŭng di Moses darŭm jireb apui di anak tŭngŭn kayuh di tarun tana-pajam sindŭk Darŭd Sinai. 31Moses mbŭh inga inga buang bipikir da kayuh adi-i kiris, ka-i di nyindŭk anak tŭngŭn kayuh anŭ an nakit tingga. Pak ayŭh dingah sirŭŭn Tuhan: 32‘Aku ati Tapa tayung-babuk mu, Tapa Abraham, Isaac, ka Jacob.’ Moses kimŭtŭr buang taru ka dŭh birani tingga. 33Tuhan nang di ayŭh, ‘Kadi kasut mu, amai tarun yŭn mu mijog inŭh tana kudus. 34Aku mbŭh kiris munki masam sangsara daya Ku di Egypt. Aku mbŭh dingah sidaing ngara; ka Aku mbŭh mandŭg an pirupas ngara. Ja madin, Aku pait kuu ka Egypt.’
35 #
Pyh 2.14
“Moses ati inŭh daya adi dŭh daya Israel an trima kan ngara nang, ‘Asi bada kuu jadi pinguasa ka akim ami?’ Ayŭh inŭh sianŭ adi Tapa pait da jadi pinguru ngara ka pirupas ngara ngga pinurung malaikat adi nandŭng di ayŭh di anak tŭngŭn kayuh adi bijagu apui dieh. 36#Pyh 7.3, 14.21; Pkg 14.33 Ayŭh taban bangsa Israel ruah so Egypt, ndai pingandai-nginga ngga pingandai-saruh di Egypt ka di Rawŭt Bireh ka sitadŭn pat puru sawa di tarun tana-pajam. 37#Dit 8.15, 18 Moses inŭh adi nang di daya Israel, ‘Tapa re pait ka angān ndi naan nabi, nimun Ayŭh mbŭh pait aku;#7.37 nimun Ayŭh mbŭh pait aku; puan kah: mun aku. ka ayŭh re so bangsa adŭp ngan.’ 38#Pyh 19.1—20.17; Dit 5.1-33 Moses ati inŭh adi agi ngga daya Israel tikuruk di tarun tana-pajam; ayŭh agi diginŭ ngga tayung-babuk ta ka ngga malaikat adi minyu ngga ayŭh di Darŭd Sinai; ka ayŭh mbŭh kambat pinganang adi nggen udip so Tapa yŭn sopŭrŭg ta.
39“Pak tayung-babuk ta abah dingah pinganang-i. Ngara tirawan ayŭh buang an pari ka Egypt. 40#Pyh 32.1 Jadi ngara nang di Aaron, ‘Ndai tapa yŭn ta da nguru ata. Moses taban ata ruah so Egypt, pak ata dŭh puan ani mbŭh jadi di ayŭh madin.’ 41#Pyh 32.2-6 Jadi ngara ndai tibudo nunda gayŭn pŭrŭng anak sapi, jugan sadis dieh, ka ndai gawai ngga nyibragah kayuh adi adŭp ngara mbŭh ndai. 42#Amo 5.25-27 Jadi Tapa nyipunok ngara ka tagan ngara da nyambah bitang bitang di rangit, nimun adi dog nang di surat nabi:
‘Daya Israel! Dŭh-i yŭn Ku
angān simareh ka nyadis dāng
sitadŭn pat puru sawa di tarun tana-pajam.
43Bari tapa Molech inŭh adi
angān gŭrŭng,
ka tibudo Rephan, tapa bitang ngan;
sopŭrŭg-i mbŭh tibudo adi angān ndai ka nyambah.
Ngapŭi Aku re taran angān kamajeh Babylon.’
44 #
Pyh 25.9, 40 “Tayung-babuk ta biyŭn Bari Tuhan adi Yŭn Tapa agi ngga ngara di tarun tana-pajam. Bari anŭ mbŭh dog ndai so pinyibada Tapa di Moses, nanyam suto adi mbŭh dog kiren di ayŭh. 45#Jos 3.14-17 Ripas anŭ, tayung-babuk ta adi kambat bari anŭ so bara nyamba ngara, taban-i ngga ngara darŭm ngara tunda Joshua ka sirabut tana daya bangsa bŭkŭn adi Tapa pibu darŭm-I panu diŭ di jawin ngara. Bari anŭ agi ngga ngara ndŭg jaman David. 46#2Sa 7.1-16; 1Kr 17.1-14 David pimunos asŭng Tapa ka mite pinyibandar so Tapa an ndai ramin yŭn Tapa Jacob. 47#1Ra 6.1-38; 2Kr 3.1-17 Pak Solomon inŭh adi pijog ramin anŭ yŭn Tapa.
48“Pak Tapa adi Sambu Sopŭrŭg, dŭh-I rŭŭ di ramin adi manusia ndai; sak adi nang nabi,
49 #
Isa 66.1-2
‘Rangit inŭh takta Ku, Tuhan nang,
ka ong inŭh bangan kaja Ku.
Ramin adi munki an ngan pijog
yŭn Ku?
Diki meh tarun yŭn Ku re rŭŭ?
50Dŭh kah sopŭrŭg anŭ
Aku ndai?’
51 #
Isa 63.10
“Angān daya adi paŭh baking! Nimun ngara adi dŭh biguna di Tapa, angān dŭh an kuka atin ngan di pinganang Tapa! Angān mbŭh mun tayung-babuk ngan, ari rawan Roh Kudus! 52Agi kah nabi adi dŭh tayung-babuk ngan kisiis? Ngara siŭ bara pinyisung Tapa, adi ko jah-i piagah pimandŭg Urun Tapa adi tŭnggŭn. Madin, angān mbŭh jua ka siŭ Ayŭh. 53Angān inŭh adi mbŭh biyŭn ukum-adat Tapa adi malaikat ko nggen di angān, pak angān bŭn sita-i!”
Stephen Dog Manjan ngga Batuh
54Kan bara daya Kunsil dingah pinganang Stephen, ngara mbŭh raru triyŭn buang baji di ayŭh. 55Pak Stephen, brisi ngga Roh Kudus, nyigura ka rangit ka kiris bragah Tapa ka Jesus mijog tura ka tauh Tapa. 56“Tingga!” ayŭh nang, “aku kiris shorga tikuka ka Anak Manusia mijog tura ka tauh Tapa!”
57Bara daya Kunsil nyirais buang mapot kajit-i. Nganŭ gŭh ngara samah samah nyurong ka Stephen, 58ka batak ayŭh ka sapa kupo, ka manjan ayŭh ngga batuh. Bara saksi na jipo ngara di sindŭk kaja ndi naan dari bujang dŭn Saul. 59Darŭm ngara manjan ayŭh ngga batuh, Stephen bidua, “Tuhan Jesus, kambat simangi ku.” 60Ka ayŭh sidikang ka nyirais nang, “Tuhan, apun dosa ngara!” Ko-i nang sakanŭ, ayŭh kabŭs.
Pilihan Saat Ini:
PINGANDAI 7: TBVONT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Hakcipta - Today's Biatah Version New Testament © The Bible Society of Malaysia, 2003.
