Lucas 19
19
Jasus an casa de l publicano Zaqueu
1Habendo antrado an Jericó, iba-la atrabessando. 2Moraba alhá un home que le chamában Zaqueu, que era mui rico i era xefe de ls publicanos. 3Andaba a ber quien era Jasus, mas nun era capaç por bias de la muita giente, porque era mui baixico de altura. 4Botou-se a correr pa la delantreira i chubiu-se a ũa figueira braba, para l ber, puis habie de passar puli. 5Quando chegou a esse sítio, Jasus alhebantou ls uolhos i dixo-le: «Zaqueu, abaixa dende debrebe, que hoije tengo de quedar an tue casa.» 6El abaixou-se lhougo i recebiu-lo todo cuntento. 7Al béren essas cousas, todos falában antre eilhes dezindo: «Bai a quedar an casa de un pecador!» 8Anton, Zaqueu puso-se de pies i dixo-le al Senhor: «Senhor, bou-le a dar metade de ls mius bienes als probes i, se perjudiquei alguien an algũa cousa, darei-le quatro bezes mais.» 9Jasus dixo-le: «Hoije bieno la salbacion a esta casa, puis este tamien ye filho de Abraan; 10porque l Filho de l Home bieno a salbar i a saber de l que staba perdido.»
Parábola de l denheiro antregue
(Mateus 25,14–30)
11Quando stában a oubir estas cousas, Jasus dixo-le inda ũa parábola, porque staba acerca de Jarusalen i por eilhes pensáren que l reino de Dius iba lhougo a benir. 12Dixo-le anton: «Un cierto home nobre fui-se a ũa tierra mui loinge para tomar puosse dun reino i apuis tornar. 13Habendo chamado dieç de ls sous criados, dou-le a cada un dieç minas i dixo-le: “Fazei negócio, até que you benga.” 14Mas l pobo nun gustaba nada del i mandou ũa quemisson atrás del a dezi-le: “Nun queremos que este seia l nuosso rei!” 15Quando tornou, apuis de haber tomado puosse de l reino, mandou chamar ls criados a quien le antregara l denheiro, para saber quanto habie ganho cada un deilhes. 16Apersentou-se l purmeiro i dixo: “Senhor, la tue mina rendiu dieç minas.” 17El dixo-le: “Baliente, criado buono; yá que fuste fiél an cousa tan pequeinha, bás a tener poder subre dieç cidades.” 18Chegou l segundo i dixo-le: “Senhor, la tue mina rendiu cinco minas.” 19I a este dixo-le: “Tu quedas cun l poder subre cinco cidades.” 20Bieno outro i dixo-le: “Senhor, eiqui stá la tue mina, que la guardei nun lhenço; 21tube grima de ti, que sós un home rigoroso, apanhas l que nun poniste i segas l que nun sembreste.” 22El dixo-le: “Pula tue boca te bou a julgar, criado malo! Sabies que sou un home rigoroso, que apanho l que nun pus i sego l que nun sembrei? 23Anton porque nun metiste l denheiro ne l banco? Quando bolbisse, tenerie-lo sacado cun juros.” 24I dixo-le als que stában eilhi: “Tirai-le la mina i dai-se-la al que ten dieç.” 25Eilhes dezírun-le: “Senhor, mas el yá ten dieç minas!” 26Digo-bos you: “Al que ten ha de se le dar, mas al que nun ten até l que ten le tiraran. 27Quanto a esses mius einemigos, que nun quejírun que you reinara subre eilhes, traiei-los acá i matai-los eiqui delantre de mi.”»
REDADEIRO MENISTÉRIO AN JARUSALEN
Çcuçones an Jarusalen
Jasus entra an Jarusalen
(Mateus 21,1–11; Marcos 11,1–11; Juan 12,12–19)
28Quando acabou de dezir estas cousas, cuntinou al palantre chubindo para Jarusalen. 29Al chegar acerca de Betfagé i de Betánia, an pie dun cabeço que le cháman de las Oulibeiras, mandou dous deciplos, 30dezindo-le: «Ide a l’aldé que queda an frente i, mal apenas éntredes neilha, ides a achar un burrico preso, que inda naide se chubiu anriba del; soltai-lo i traei-me-lo. 31I se bos preguntáren: “Porque lo stais a soltar?”, respundereis-le assi: “L Senhor ten percison del.”» 32Alhá se fúrun ls que habie mandado i achórun todo cumo el le dezira. 33Quanto stában a soltar l burrico, ls duonhos dezírun-le: «Porque stais a soltar l burranco?» 34Eilhes respundírun-le: «L Senhor ten percison del.» 35Apuis, lhebórun-se-lo a Jasus i, botando las capas deilhes porriba l burrico, chubírun a Jasus anriba. 36Anquanto iba andando, stendien las capas ne l camino. 37Quando yá staba acerca de la costielha de l Cabeço de las Oulibeiras, todos ls deciplos, mui cuntentos, ampeçórun a dar lhoubores a Dius, boziando muito, por todos ls milagres que habien bido, 38dezindo:
«Bendito l Rei
que ben an nome de l Senhor!
Paç ne l cielo i glória nas alturas!»
39Alguns fariseus dezírun-le, de l meio daqueilha giente toda: «Mestre, reinhe culs tous deciplos!» 40Jasus respundiu-le: «Digo-bos l you: Se eilhes se calháren, boziaran las piedras.»
Anúncio de la çtruiçon de Jarusalen
41Quando se achegou a la borda, al ber la cidade, chorou subre eilha 42dezindo: «Se tamien tu, al menos neste die, coinciras aquel que te puode traier la paç! Mas agora estas cousas stan scundidas de ls tous uolhos. 43Porque bénen ende dies an que ls tous einemigos te ban a arrodiar cun galatones, a deixá-te sien salida i a apertá-te por todos ls lhados; 44ban-te a sbarrulhar a ti i als tous filhos, que stan andrento de ti, i nun ban a deixar piedra anriba de piedra, porque nun coinciste l tiempo an que fuste bejitada.»
Jasus bota ls bendedores para fuora de l templo
(Mateus 21,12–17; Marcos 11,15–19; Juan 2,13–22)
45Adepuis, antrou ne l templo i ampeçou a mandar ambora ls bendedores 46dezindo-le: «Stá screbido: La mie casa será ũa casa de ouraçon. Mas bós fazistes deilha un buraco de lhadrones.» 47Staba todos ls dies a ansinar ne l templo. Ls príncepes de ls saçardotes i ls scribas i ls percipales de l pobo, buscában modo de dar cunta del 48mas nun sabien cumo habien de fazer, puis todo l pobo quedaba ambelado a oubi-lo.
Pilihan Saat Ini:
Lucas 19: EM14
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Evangelhos em Mirandês © Sociedade Bíblica, 2014.
