Lucas 15
15
Parábola de la canhona perdida i de la moneda achada
(Mateus 18,12–14)
1Achegában-se a el todos ls arrecolhedores de la décima i ls pecadores pa lo oubíren. 2Ls fariseus i ls scribas falában mal antre eilhes, dezindo: «Este recibe ls pecadores i bibe cun eilhes.» 3El aperpuso-le esta parábola, dezindo-le: 4«Qual ye l home, de todos bós, que tenendo cien canhonas i habendo pedido ũa deilhas, nun deixa ne l campo las nobenta i nuobe i se bai a saber de la perdida até que adregue a achá-la? 5Mal apenas la ache, pon-la als ombros, mui cuntento. 6Al chegar a casa, chama ls amigos i bezinos, dezindo-le: “Cuntentai-bos cumigo, puis yá achei la canhona que se m’habie perdido.” 7Digo-bos you que tamien assi haberá alegrie ne l cielo por un pecador que s’arrepende, mais do que por nobenta i nuobe justos que nun percísan de s’arrepender.
8Ou, anton, qual ye la mulhier que, tenendo dieç monedas, se perdir ũa deilhas, nun acende la candela i barre la casa cun todo l cuidado até que la ache? 9Mal apenas la ache, chama las amigas i las bezinas, dezindo-le: “Cuntentai-bos cumigo, porque yá achei la moneda que habie perdido.” 10Digo-bos you que tamien assi hai alegrie delantre de ls anjos de Dius por un pecador que s’arrepende.»
Parábola de l filho pródigo
11Dixo-le tamien: «Habie un home que tenie dous filhos. 12L mais moço de ls dous, dixo-le al pai: “Pai, dá-me la parte de ls bienes que me toca.” El, anton, repartiu por eilhes ls bienes. 13Poucos dies apuis, l filho mais nuobo ajuntou todo i fui-se pul mundo, por ende dando cuonta de ls sous bienes nũa bida sien tino. 14Apuis de el haber gastado todo, houbo na tierra adonde staba ũa fame mi grande i el ampeçou a passar mal. 15Un die fui a serbir para ũa persona desse lhugar que l mandou pa las tierras cun ũa bezeira de cochinos. 16El bien querie anchir la barriga culas belhotras que ls cochinos quemien, mas naide le daba nada. 17Un die, botou-se de cuontas i dixo: “Quanto oubreiro de miu pai ten pan a la farta i you eiqui a morrer a la fame! 18Bou-me mas ye a tener cun miu pai i digo-le: Pai, pequei contra l cielo i contra ti; 19Yá nun mereço que me chames tou filho, trata-me cumo un de ls tous oubreiros.” 20Apuis, alhebantou-se i fui-se a tener cul pai. Quando inda benie loinge, l pai biu-lo, quedou cheno de pena del i botou-se a fugir, atirando-se-le al cachaço i beisando-lo. 21L filho dixo-le: “Pai, pequei contra l cielo i contra ti, yá nun mereço que me chames tou filho.” 22Mas l pai dixo-le als sous criados: “Traiei debrebe la melhor roupa i besti-se-la, ponei-le un anielho na mano i alparagatas ne ls pies; 23i traiei l bitelo mais cebado i matai-lo; bamos a quemer i a quedar mui cuntentos; 24puis este miu filho staba muorto i tornou a bibir, habie-se perdido i tornou-se a achar.” I ampeçórun a quedar mui cuntentos.
25L filho mais bielho andaba pul campo i, quando chegou a casa, oubiu la música i l baile. 26Anton, chamou un de ls criados i preguntou-le l que se passaba. 27El cuntou-le: “Bieno tou armano i tou pai matou l bitelo cebado, porque chegou salbo i cun salude.” 28El quedou mui anrabiado i nun querie antrar. Anton, l pai saliu a la rue a ber se l cumbencie. 29Mas el respundiu-le al pai, dezindo: “Yá stou a trabalhar para ti bai para tanto anho, sien nunca deixar de fazer l que me mandeste i nunca me deste sequiera un chibo para fazer ũa fiesta culs mius amigos. 30Mas a este tou filho, que dou cuonta de la tue fazienda cun putas, mal apenas chegou, mateste-le l bitelo cebado.” 31I el dixo-le: “Filho, tu stás siempre cumigo i todo l que ye miu, ye tou; 32Mas era perciso que quedáramos cuntentos i fazíramos ũa fiesta, porque tou armano staba muorto i tornou a bibir, habie-se perdido i achou-se.”»
Pilihan Saat Ini:
Lucas 15: EM14
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Evangelhos em Mirandês © Sociedade Bíblica, 2014.
