Juan 7
7
Ne l die de la Fiesta de la Tiendas ye testado an público
L miu tiempo inda nun chegou
1Apuis, Jasus andaba pula Galileia i nun querie andar pula Judeia puis ls judius buscában un modo de l matar. 2Staba acerca la fiesta de ls judius, Fiesta de las Tiendas. 3Anton, ls armanos del dezírun-le: «Sal deiqui i bai-te pa la Judeia, pa que ls tous deciplos tamien béian las obras que fazes. 4Porque naide, se quejir ser coincido, faç las cousas an segredo. Se fazes estas cousas, amostra-te al mundo.» 5La berdade ye que nien mesmo ls armanos acraditában nel. 6Jasus respundiu-le: «L miu tiempo inda nun chegou, mas para bós qualquiera tiempo ye buono. 7L mundo nun bos puode tener rábia, mas a mi ténen-me rábia porque you amostro-le que las obras deilhes son malas. 8Ide bós a la fiesta. You nun bou a essa fiesta porque l miu tiempo inda nun stá cumprido.»
9I apuis de le dezir estas cousas, quedou na Galileia.
10Adepuis de ls armanos del habéren ido a la fiesta, tamien el se fui até alhá, mas a las scundidas sien que naide dira por el. 11Ls judius andában a saber del pula fiesta i dezien: «Por adonde andará el?» 12Habie un grande falatório del antre to la giente. Uns dezien: «Ye buona pessona!» Mas outros dezien: «Nó, porque solo anda a anduzir las pessonas!» 13Mas naide falaba del a las claras, cun miedo de ls judius.
Jasus entra ne l templo
14Quando la fiesta yá iba a meio, Jasus antrou ne l templo i ampeçou a ansinar. 15Ls judius stában mui admirados, dezindo: «Cumo ye que sabe tanto se nun andubo a studar?» 16Jasus respundiu-le: «La mie doutrina nun ye mie, mas daquel que me ambiou. 17Se houbir quien querga fazer la buntade del, saberá se la doutrina ben de Dius, ou se falo solo por mi. 18Quien fala solo por el mesmo, busca la sue própia glória, mas l que busca la glória de quien lo ambiou, esse diç la berdade i nel nun hai anjustícia. 19Moisés nun bos dou la lei? Mas bós nun cumpris la lei. Porque me quereis matar?» 20L pobo respundiu-le: «Tu tenes l demonho! Quien ye que te quier matar?» 21Jasus respundiu-le: «Solo fiç un milagre i todos quedais admirados. 22Porque Moisés bos dou la circuncison – nó que fura del, mas de ls pais –, al sábado circuncidais ls homes. 23Se un home puode ser circuncidado al sábado, para que se cumpra la lei de Moisés, porque ye que quedais andinados cumigo por haber sano un home al sábado? 24Nun quérgades julgar pulas aparecéncias, mas pul que ye justo.»
Ls judius çcúten a respeito de Jasus
25Anton, habie pessonas de Jarusalen que le preguntában: «Nun ye este l que quieren matar? 26Cumo ye que stá parqui a falar, a las claras, i naide le diç nada? Será que ls príncepes yá se cumbencírun de que el ye l Cristo? 27Este sabemos bien d’adonde ye, mas quando benir l Cristo, naide saberá d’adonde ye.»
28Al ansinar ne l templo, boziaba: «Anton, bós sabeis quien sou i d’adonde bengo? You nun bin por mi mesmo, mas ye berdade que bin por aquel que me ambiou i que bós nun coinceis. 29You conheço-lo porque bengo del i el ambiou-me.»
30Anton, eilhes buscában modo de l prender, mas naide le botou la mano, porque inda nun habie chegado la hora del. 31Muita daqueilha giente acraditou nel i dezien: «Quando l Cristo benir será que bai a fazer mais milagres do que este ten feito?»
32Ls fariseus oubírun l pobo a dezir estas cousas del i mandórun ls xefes de ls saçardotes i de ls fariseus para l prendéren. 33Jasus, anton, dixo-le: «Inda bou a quedar cun bós mais un tempico i apuis bou-me para aquel que me ambiou. 34Nessa altura andareis a saber de mi, mas nun me heis de achar i para adonde you bou bós nun podeis ir.» 35Ls judius preguntában uns als outros: «Para adonde eirá, yá que nun l poderemos achar? Será que se bai culs que eimígran pa ls griegos, para ls ansinar? 36Que quier el dezir cun estas palabras: “Buscareis-me i nun me achareis?” i tamien “Para adonde you bou bós nun podeis benir?”»
Çcuçones feitas antre la giente i ne l tribunal
37Ne l redadeiro die, que era l mais fuorte de la fiesta, Jasus staba de pies a boziar, dezindo: «Quien tubir sede, benga a tener cumigo i beba. 38Quien acradita an mi, cumo diç la Scritura, de la sue barriga han de nacer rius de auga biba.» 39El dezie estas cousas de l Sprito que habien de recebir ls que nel acraditássen. Nesta altura l Sprito inda nun habie sido dado, porque Jasus inda nun fura glorficado.
40Muita giente, quando oubiu estas palabras, dixo: «Este de certeza que ye un porfeta!»; 41outros dezien: «Este ye l Cristo!»; mas outros dezien: «Cumo ye que l Cristo puode benir de la Galileia?» 42Nun ye la Scritura que diç: «L Cristo ben de la família de Dabide i de l lhugar de Belen, la tierra de Dabide?»
43Anton, armou-se un grande çcutimiento antre las pessonas por bias del. 44Alguns deilhes querien prendé-lo, mas naide le botou la mano.
45Ls guardas fúrun-se a tener culs xefes de ls saçardotes i culs fariseus. Estes preguntórun-le: «Porque nun l prendistes?» 46Ls guardas respundírun-le: «Nunca se oubiu un home a falar daqueilha maneira.» 47Ls fariseus dezírun-le: «Tamien bós bos deixestes anduzir? 48Acauso algun de ls xefes ou de ls fariseus acraditou nel? 49Solo essa giente que nun conhece la lei i ye giente maldita!»
50Anton Nicodemos, que era un de ls deilhes i que antes fura a tener cun Jasus, dixo-le: 51«Acauso la nuossa lei julga un home antes de l oubir purmeiro i de saber l que el fizo?» 52Eilhes respundírun-le: «Tamien tu sós de la Galileia? Studa bien i berás que de la Galileia nun bieno un solo porfeta!»
53Apuis, fui-se cada un para sue casa.
Pilihan Saat Ini:
Juan 7: EM14
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Evangelhos em Mirandês © Sociedade Bíblica, 2014.
