Màtéwò 11

1Báàyí#ɛ́ Yèésù tsɛ̀kɔ́ fú ɔmatsɛ́‐ɛ̀ ŋa tã́, tsí ó ǹɖe bɛ̀, tsí ó lɔ, tsí wà tsɛ̀kɔ́ fú ɔ̀nyà ŋa, tsí wà dzíkɔ̀ gbo fúnɛ ńǹlú yèé ŋa wà nérè-bɛ̀#ɛ́.

Yòhánà Awɛ̀fúnɛ bɛ ɔmatsɛ́‐ɛ̀ ŋa lɔ fú Yèésù

(Lúkà 7:18-35)

2Ńǹwèrè nyɛ̀ŋɛ̀#ɛ́, à ti mú Yòhánà† Awɛ̀fúnɛ sé nɛ́ɛ̀ŋà si. Tsí kíbí ó wà nɛ́ɛ̀ŋà#á si#ɛ́, ó gbɔ́ ìdzã̀mà-iŋɛ́ yèé Yèésù Kírísítò wà tse ŋa#á, tsí ó bɛ ɔmatsɛ́‐ɛ̀ ŋa lɔ fúu 3ní ká káà bèrèé ní: Òŋu ní dzɛ́ Agbanɛlà yèé bàa#áà?#11:3 Òkpì‐ɛ̀ ní dzɛ́ ní Mɛ̀síyà yèé ɔma-Ìyúɖà ŋa wà wo ɔ̀nà fú ní kó wáa gba àŋa dzɔ̀ɔ́#ɛ́. Nàmí ó wà ní àŋa kó wà ɖóro ɖe olòmírɛ̃̀ ni?

4Tsí Yèésù wà dzɔ́ŋù fú ŋa ní: Ká sɛ̃̀ lɔ, tsí iŋɛ́ yèé à wà gbɔ́, tsí wà rí#ɛ́, ká fɔ̀ɔ́ fú Yòhánà. 5Ká wí fúu ní: Báàyí#ɛ́, afɔ́dzú ŋa wà rírã, tsí arɔ ŋa gbo wà rɛ̃̀, tsí aɖɔ́ɔ̀tɛ̀† ŋa gbo ɖi ɔ̀nyà mímá ŋa, tsí aɖetí ŋa gbo wà gbɔ̃́ɔ̃̀rã̀, tsí òkú ŋa gbo sɛ̃̀ wà dzí wá náyé, tsí adzìyàkú ŋa gbo wà gbɔ́ ikɔ̀ ɖíɖɔ̃̀ ti nára-Ɔ̀ɖáyé. 6Ó ɖi, bí ɔ̀nyà-kã̀ wà rí itsɛ́-ɔwɔ́-òŋu ŋa, tsí òŋu kò dzɛ́ òkúta-àkɔ̀sɛ̀ fúu, ɛnɛ nyɛ̀ŋɛ̀ wɛ éwo-ire.

7Tsí ɔmatsɛ́-Yòhánà ŋa ǹɖe ńɖi-Yèésù, tsí sɛ̃̀ bɔ̀ làkóò. Tsí Yèésù nyí, tsí wà wíìnyɛ̀ ti nára-Yòhánà fú ɛnɛ yèé kpérí si ŋa#á. Ó ní: Kíbí à lɔ nɔ́ɔ̀ɖã̀ ní àŋa kó lɔ káà rí Yòhánà#á fee, kí à rí? Bɛlɛbɛlɛ yèé afɛ́fɛ́ wà fɛ́, tsí ó wà mì#ɛ́ niì? 8Tsí kí à lɔ káà rí ńǹkɛ̀ɛ́ ni? Ɔ̀nyà-kã̀ yèé wɔ ìwɔ̀ra-olówó ŋa si#ɛ́ niì? Fee, ɛnɛ yèé ŋa náa wɔ ìwɔ̀ra-olówó ŋa#á, à náa gbé ńkpáfɛ-ólú ŋa ni. 9Báàyí#ɛ́ fe, kí gìɖì à lɔ káà rí nɔ́ɔ̀ɖã̀#á ńǹkɛ̀ɛ́ ná? Agbáfɔ̀-Ɔ̀ɖáyé fɔ̀†-kã̀ niì? Ɛ̃ɛ̃! Bɛ́ɛ̀ ni. Ó ɖi, òŋu wà wí fú ŋa ní ɛnɛ yèé à rí#ɛ́, ó láre agbáfɔ̀-Ɔ̀ɖáyé fɔ̀ gìɖì gbo. 10Òŋu ní dzɛ́ adzíkɔ̀ yèé à ti kɔ afɔ̀ ti nára‐ɛ̀ si ńǸwé-Ɔ̀ɖáyé†#ɛ́. Ɔ̀ɖáyé ní:

“Màa bɛ adzítsɛ́-mi tsúwádzú-ɛ̀ɛ wá,

tsí nákó lɔ káà tɔ́tse ɔ̀nà-ɛ̀ɛ si fɛ́ɛ.”#11:10 Ìwé-Màlàkí 3:1 (Malachie 3:1)

11Ó ɖi, òŋu wà wí òtítɔ́ fú ŋa ní ńǹtalɛ̀ yèé fee, ɔ̀nyà-kã̀ kpókpó kò wà, tsí láre Yòhánà Awɛ̀fúnɛ. Ó ɖi, nóyè-Ɔ̀ɖáyé†#ɛ́, ńǹtá-ɛnɛ yèé ŋa Ɔ̀ɖáyé wà dzoyè si#ɛ́, ɛnɛ yèé gìɖì dzɛ́ tsígíɖí náàŋírĩ-ŋa#á, ó láre Yòhánà. 12Tsí ti títí ńǹwèrè yèé Yòhánà Awɛ̀fúnɛ kpé ikɔ̀-Ɔ̀ɖáyé dzídzɛ́ fú ɔ̀nyà ŋa títí wáa fú òní#ɛ́, ɔ̀nyà-odzú líle ŋa, à wà mú oyè-Ɔ̀ɖáyé† ńkpá,#11:12 À nákó nyáa fɔ̀ gbo ní: “Oyè-Ɔ̀ɖáyé wà lɔ ńwádzú ńkpá.” tsí à wà wò ní àŋa kó kpàkpàtìí tse tàŋa. 13Ó ɖi, títí wáa fú ìwèrè-Yòhánà#á, à wà gba afɔ̀-Ɔ̀ɖáyé fɔ̀ fúnɛ ńǹwé-agbáfɔ̀-Ɔ̀ɖáyé fɔ̀ ŋa kpó òŋu ńǹwé-ɛkpa-Mɔ̀ɔ́sè† ŋa. 14Tsí bí à wà wò ní ká gbà si ńǹtá‐ɛ̀#ɛ́, Yòhánà ní dzɛ́ Èlíyà† yèé à ti fɔ̀ si ní nákó wáa sɛ̃̀ wá#á. 15Ɛnɛ yèé nɛ́ etí-ìgbɔ̃́ɔ̃̀rã̀ ni kó gbɔ́.

16Tsí ó fɔ̀ máa ró ní: Nɛ̀ɛ́ òŋu nákó mú ɔma-ìsɛ̃̀ɛ̃́ ŋa, tsí ń sàwé ná? À wà kíbí maɖé ŋa náa kpérí si náàbɔ̀ɔ́mɛ̀ ŋa bɛ́#ɛ́ ni. Tsí ɔ̀kã̀ ŋa wà ɖúgbe fú enìkéèdzì-ŋa ní: 17Àŋa fɔ̃ fèrè, tsí à kò dzó bá àŋa! Tsí àŋa kɔ̃rĩ-àḿbɛ́rɛ́ ŋa gbo, tsí à kò rã́ã̀bo bá àŋa! 18Ó ɖi fee, kíbí Yòhánà wá#á, kò wà dzɛ, kò wà mɔ, tsí ɔ̀nyà ŋa wà fɔ̀ ní: Edzò†-kã̀ wà ɖɔ́kpɔ fúu. 19Tsí òŋu, Ɛnɛ yèé ɔ̀nyà bí#ɛ́†, òŋu wá, tsí òŋu wà dzɛ, tsí wà mɔ, tsí ɔ̀nyà ŋa wà fɔ̀ ní: Òŋu dzɛ́ adzèsè, tsí dzɛ́ àmɔ̀tíŋɔ́ gbo, tsí òŋu náa ɖídza agbalómbà ŋa òŋu olòmírɛ̃̀ yèé ŋa kà nyɛ̀wɔ̀-Ɔ̀ɖáyé#ɛ́. Ó ɖi, bí à sì rí iŋɛ́ yèé ɛnɛ yèé ŋa wà tse si ńǹtá-ifɛ̀ɛ́nɔ́-Ɔ̀ɖáyé#ɛ́ wà tse#ɛ́, náa wà nyà ɖíre ní ifɛ̀ɛ́nɔ́-Ɔ̀ɖáyé ni òtítɔ́ ni.

Ìlú kã̀ŋa kɔ̀ ní àŋa kàkó nyíìlò kpaɖà

(Lúkà 10:13-15)

20Náànyì-bɛ́ɛ̀#ɛ́, Yèésù wà wíìnyɛ̀ ti nára-ìlú kã̀ŋa. Ó tse kpíkpɔ̀-iŋɛ́-àwùsì‐ɛ̀ ŋa bɛ̀. Ó ɖi, ɛnɛ-ìlú nyɛ̀ŋɛ̀ ŋa#á kɔ̀ ní àŋa kàkó nyíìlò kpaɖà, tsí ó wà bá ŋa fɔ̀ ní: 21Ɛnɛ-ìlú-Kòràsĩ ŋa òŋu ɛnɛ-ìlú-Bètsàyìɖá ŋa, àŋa òŋu, ɛ̀rá rá ŋa! Iŋɛ́ yèé tse#ɛ́, òŋu tse iŋɛ́-àwùsì ŋa ńɖi-ŋa, tsí à kò nyíìlò kpaɖà. Ó má dzɛ́ ní ńǹlú-Tíre òŋu ńǹlú-Sìɖɔ̃́nì ní òŋu tse iŋɛ́-àwùsì ŋa bɛ́ɛ̀#ɛ́, ɛnɛ-ìlú ŋa#á má ti nyíìlò kpaɖà lɛ́lɛ́ǹlɛ̀lɛ̀. À má wɔ ìwɔ̀ra-ɔ̀kɛ́, tsí mú érú gbo ɖà néwo, tsí wà ń nyà ɖíre ní àŋa nyíìlò kpaɖà. 22Ó ɖi, òŋu wà fɔ̀ fú ŋa ní nɔ́dzɔ́ yèé Ɔ̀ɖáyé nákó kpɛdzɔ́ fúnɛ#ɛ́, igbè-ɛnɛ-ìlú-Tíre ŋa òŋu ti ɛnɛ-ìlú-Sìɖɔ̃́nì ŋa kàkó le tó tiŋa.

23Tsí ɛnɛ-ìlú-Kàfànàwú ŋa gbo fe, àŋa òŋu, à ɖédzú Ɔ̀ɖáyé nákó kɛ́ àŋa lɔ ńɖɔ-ara‐ɛ̀ nɔ́ɔ̀rɔ̃ niì? Kpɛ́rɛ́! Nákó tse tsí à nákó lɔ títí ńlé-ikú ni. Iŋɛ́ yèé tse#ɛ́, iŋɛ́-àwùsì yèé òŋu tse ńɖi-ŋa#á, òŋu má tseé ńǹlú-Sòɖómì, ìlú-Sòɖómì#ɛ́ má wà si títí wáa fú òní ró. 24Ó ɖi, òŋu wà fɔ̀ fú ŋa ní: Nɔ́dzɔ́ yèé Ɔ̀ɖáyé nákó kpɛdzɔ́ fúnɛ#ɛ́, igbè-ɛnɛ-ìlú-Sòɖómì ŋa kàkó le tó tiŋa.

Yèésù wà fɔ̀ fú ɔ̀nyà ŋa ní ká waà míra ńɖɔ-òŋu

(Lúkà 10:21-22)

25Náànyì-bɛ́ɛ̀ ró#ɛ́, Yèésù tsóŋù ró, tsí wà fɔ̀ ní: Ɔ̀ɖáyé Boba! Olí-ɔ̀rɔ̃ òŋu olí-ilɛ̀, ǹ wà ɖɔ́kpɛ́ fɛ́ɛ, iŋɛ́ yèé tse#ɛ́, iŋɛ́ yèé ò ń ɖúku olí-ifɛ̀ɛ́nɔ́ ŋa òŋu olí-ìrã̀ã́mà ŋa#á, ò nyà ŋá ɖíre fú maɖé ŋa. 26Ɛ̃ɛ̃ Boba! Bɛ́ɛ̀ ní ò wò ní kó dzɛ́#ɛ́ ńnɛ̀ɛ́.

27Tsí ó fɔ̀ ró ní: Ɔ̀ɖáyé Boba-òŋu mú iŋɛ́ ɔ̀kã̀lɔ́ɔ̀kã̀ kpó bɔwɔ́-òŋu. Tsí ɔ̀nyà-kã̀ kpókpó kò ma Ɔma bíbí-Ɔ̀ɖáyé náànyì-Ɔ̀ɖáyé Boba òŋu ká‐ɛ̀. Bɛ́ɛ̀ ké ní ɔ̀nyà-kã̀ kpókpó gbo kò ma Ɔ̀ɖáyé Boba náànyì-Ɔma bíbí-Ɔ̀ɖáyé òŋu níìkã̀ má nára-ɛnɛ yèé ŋa Ɔma bíbí‐ɛ̀#ɛ́ wò ní òŋu kó mú Boba-òŋu ɖíre fú#ɛ́.

28Tsí ó fɔ̀ gbo ró ní: Ɔ̀nyà kpó yèé arù wà kpa, tsí ó ká si#ɛ́, kó wá ńɖɔ̀-òŋu, tsí òŋu kó sɔ̀ɔ́, tsí kó míra. 29Ká dzɛ́ ní òŋu kó dzɛ́ ɔ̀gá-ŋa, tsí òŋu kó wà kɔ́ ŋa gbo. Ó ɖi, òŋu dzɛ́ olínɔ́ tútù, òŋu kà dzára, tsí à nákó míra. 30Ó ɖi, arù yèé òŋu náa tò fúnɛ#ɛ́, kà wówo, náa fɛ́rɛ́ ni.

Pilihan Saat Ini:

Màtéwò 11: ngl

Sorotan

Berbagi

Salin