Matius Uram 2
2
Yaletam aryi kuboka inibdob dinyi liliboka bingna nang aryi, “Weik sienyi ukuryok deibmar,” tenen bikmaici, Yesus bisi diryanmai uram
2:1-12
1Yudea mutuk Herodes weik sienyi kuramwe talak aryi Er Yesus sirya deibmou ara Yudea mutuk aryi kuboka atei si Betlehem deibmou. Sirya deibmou ura, Yaletam aryi kuboka inibdob dinyi liliboka bingna nang ton ara sien atei Yerusalem yanmai. 2Sirya yanmai ura, sunci ato eboka asibdenin yibinmai, “Sun Yahudi yala nang weik sienyi ukuryok deibmaranyi bira dantam deibmar do? Nunci dinmoubwe uca, ilila kurya ara Yaletam aryi kuboka anabmou ba, asing eibmoubwe. Ilila kurya asing eibmoubwe deib aryi nunci, ‘Weik sienyi ukuryok deibmar ati lak kibmasir,’ tenen bikmoubwe. Ati, nunci, ‘Weik sienyi ukuryok deibmaranyi bisi bindoka Er si weik ebtibyi,’ tenen yanmab,” ebmai.
3Ato ebmai asi weik sienyi Herodes kekebmouci, lukdanmou. Tonda, sun Yerusalem atei nang nirya ababyi a uram kekebmai ura, sunbabyi lukdanmai. 4Ura, weik sienyi Herodes biryi Er Imtamnyi kan ninyi kan noutam kuboka antanirdeirin deyok nang ab Musa kerek sengna etereramnyi nang ab naboka bulubdeibmouci, ato ebmou, “Kristus bira, ‘Ninyi Lebkwande Weik Sienyi,’ erandumnyi bira dantam deibkwande ena bingdarur do?” eboka asibdenmou. 5Uca, sunci ersi ato ebmai, “Er Imtamnyi Uram ebdeibmaci to lak etereramunyi biryi a deyok ati kerek sekeibmou deyok aryi, nunci, ‘Yudea mutuk atei si Betlehem dam deibkwande,’ eboka sekdeibwe asi bingnub.
6Ara, minob talak ara nabi biryi ato eboka kerek sekdeiamwe,
‘Sun Yehuda mutuk aryi kuboka Betlehem atei nang se.
Sunda sun mutuk aryi kuboka kalingna nang kankan aryi kurandum cok, amwetam bun nang kum kurandum.
Sunda yuk atei nang bisibkaboka weik sien nang ato kurandum ati ebman.
Sunda Betlehem atei nang kankan aryi Iya Erebdob Sienyi anabkwande ura, Erda sun Israel yala nang ara Er Imtamnyi biryi wibdeibmou nang ati, “Ni domba,” tenen kalikwande.
A deyok aryi atei Betlehem ara Yehuda mutuk aryi kuboka yuk atei nirya bisibkaboka iya sien atei kurur.’ (Mikha 5:1)
Ato eboka nabi biryi lak ebdeiamwe ba, kerek sekdeiamwe,” ebmai.
7A lak ena uram sirya kekebmou ura, Herodes biryi iniboka a Yaletam aryi kuboka inibdob dinyi liliboka bingna nang asi nabmouci, bita-bita sunsi asibdenmou. Ara, “Una talak aryi a kurya anabmou do?” eboka asibdenmou. Asibdenmou uca, sunci ersi, “Ato-ato talak aryi anabmou asi asing eibmoubwe,” ebmai. 8Sirya asibdenmou ura, erci sun Yaletam nang asi Betlehem atei dam bokdonokmouci, ato ebmou, “Sunci anaboka a mi ingkiringbindarur. Ingkiringmamunyi ani, sirya eibmunyi ura, tamuboka ni dam eryankwandarur! Ba, nibabyi a mi si weik erbinkwan ati, eryankwandarur,” ebmou.
9-10Ura, Yaletam nang aryi weik sienyi ebmou uram sirya kekebmai ura, anabmai. Ura, dinmai uca, sun Yaletam aryi kuboka diblilibde yangaramnyi kurya ara tubto menengmou asi asing eibmai ura, sun kanya teleb mitik kum kubmou. A kurya banmou ani, a Mi deiamwe ai dub bindoka toblobmou. 11Ba, barabyi ani, akai dam binmai ura, ai umbura wengbinmaici, a Mi ab Er kwin Maria ab eibmai ura, sun kutam ikdongoboka Er si weik ebmai. Ura, sunci mil limliming en keil si Emas ab, tong teleb erande dinyi si Kemenyan ab, tong teleb erande dinyi si Mur ab boamnyi asi a Mi ati karebmai. 12Ura, mabmai talak aryi, Er Imtamnyi biryi lengdera deib aryi sunsi, “Sunda Herodes bisi tamuboka bimunyei,” ebmou. Ba, sun Yaletam nang ara tamuboka Yerusalem atei bisik kum binmai. Eda, yuk bisik kuboka sun atei bindobmai.
Er Yesus alok talak ara Yusuf ab Maria ab aryi Ersi boboka Mesir mutuk inirbinmarei uram
2:13-15
13Yaletam aryi kuboka inibdob dinyi liliboka bingna nang tubto tamuboka sun atei bindobmai ura, Er Imtamnyi Uram eryuryangananyi biryi lengdera deici aryi Yusuf bisi yandoka ato ebmou. “Herodes biryi, ‘A mi obkwan,’ tenen ingkiringmar ati, kanci bukokabminci, anabdobminyi ura, a Mi ab Er kwin ab boboka Mesir mutuk inirbirum. Ba, a bindoka kuramunyi ani, aminda Niryi kansi tubto eryanyi uca, tamuryandarur,” ebmou. 14Ato ebmou ba, Yusuf mabmou ani, bukokmou ura, a tum lukunda aryok a Mi ab Er kwin ab bobdobmouci, Mesir mutuk inirbinkwamai ati anabdobmai. 15Ura, a bindoka kuramnyi ani, Herodes sirya dibmou ura, tamuryanmai. A kubmou ara, Er Imtamnyi biryi minob Er uram ebdeibmaci to lak etereramnyi nang deici ebdeiamwe ba, kerek sekdeiamnyi to kunubmou.
“Mesir mutuk aryi kuboka Nira Imtamnyi biryi Ni Mi nabdobmase,” ebdeiamnyi tok sirya kunubmou. (Hosea 11:1)
Weik sienyi Herodes biryi, “Betlehem atei mabwe obdarur,” eboka arukdeibmou uram
2:16-18
16Ura, Herodes biryi, “Sun Yaletam nang ara tamuryandoka a Mi kubmar ai ati uram eryaniting,” tenen dibde bunmou. Ato tenen dibde bunmou ani, erci, “Tola ati ebneia. Uram ton kum eryankwaning,” tenen bikdobmou ura, er kanya yu mitik kum kubmou. Ura, erci sun Yaletam nang asi, “Una talak aryi kurya anabkalibmou do?” eboka asibdenmou deyok aryi, erci, “A mi ara ukuryok deibmou ara kwalina bitinyi kum kwalibmou,” tenen bikmou. Ati, Herodes biryi, “A mi asi obting,” tenen er yin doun nang asi Betlehem atei bokdonokmou. Ara, erci, “Sun Betlehem atei aryi kuboka ukuryok deinmangnyi mabwe sal ab, yuk alok mabwe sal ara kwalina bitinyi kibmaci mabwe ababyi nirya obdarur,” ebmou. Uca, Herodes biryi arukmou nang ara Betlehem atei bindoka akatei aryi kuboka mitik mabwe nirya obmai. 17Ato kuboka obmai ara Er Imtamnyi biryi Er uram ebdeibmaca bobaramunyi si Yeremia deici ebdeiamwe kerek sekdeiamwe to kunubmou. 18Ara, nabi Yeremia biryi mitik mabwe on deyok ati ato eboka kerek sekeiamwe.
“Rama atei kuraming nang ara engena weik engenmai.
Ara, sun Yahudi yala nerabwe aryi kuboka, ‘Nun mabwe obmasing uca, tuba kum kunung se,’ tenen engena weik ebmai.
Nun tat Rahel er deibdoba nermabwe ara sun boukwe weik aryi kilikman kumto kuboka engenmai.” (Yeremia 31:15)
Nabi Yeremia biryi ato eboka minob ebdeiamwe to, sun Betlehem atei nang ati kunubmou.
Yusuf ab Maria ab ara Yesus bisi borandeici, Mesir mutuk aryi kuboka tamuryanmai uram
2:19-23
19Kuramnyi ani, Er Yesus ab Er kwin ab Yusuf ab Mesir mutuk bindoka kuramnyi talak aryi Herodes dibmou. Ura, Mesir mutuk tuba kuramnyi ba, Er Imtamnyi Uram eryuryangananyi tubto lengdera deici aryi Yusuf bisi eryanmou. 20“Sun, ‘A mi obkwayeb,’ tenenung nang ara sirya dibmang ati, kanci bukokminyi ura, a Mi ab Er kwin ab bobdobminci, tamuboka Israel mutuk birum,” ebmou.
21Ato ebmou deyok aryi Yusuf bukokmouci, a Mi ab Er kwin ab bobdobmou ura, Israel mutuk tubto tamurbinmai. 22Ato kubmou bok, Yusuf biryi kekenmou uca, “Yudea mutuk ara Herodes mi si Arkhelaus er nai iramwe wa weik sienyi unubmar,” ebmai asi kekebmou ura, erci, “Arkhelaus bibabyi a mi obdecei,” tenen Yudea mutuk tamurbana ara er ilil kubmou. Ura, lengdera deici aryi Er Imtamnyi Uram eryuryanganyi biryi, “Galilea mutuk ur bindarur,” ebkarebmou uca, Yusuf biryi er ner ab a Mi ab bobdobmouci, yuk mutuk ara Galilea mutuk bina kuramnyi. 23Ara, Galilea mutuk binmai ura, mitik atei tentok si Nazaret bindoka kuramnyi. Ato kuramnyi ara Er Imtamnyi biryi Er uram ebdeibmaci to lak etereramnyi nang deici ebdeiamwe ba, kerek sekdeiamnyi. Ati, sunci ninyi lebkwansunyi biti, “Nazaret ateinyi ebkwaming,” eboka ebdeiamnyi to sirya kunubmou.
Pilihan Saat Ini:
Matius Uram 2: MTG
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
@LAI 2007 (New Testament), @LAI2022 (Old and New Testament)
