Génesis 6
6
Thi jianꞌa ncheꞌe chujni
1Are kuexiꞌin kutsjé chujni ngataꞌa nunthe, ko bintheguan xeꞌen na̱ xan nchrii, 2kuthimejan kainxion xeꞌen Ndo Dio bikon xan ngataꞌa nunthe ixin xan nchrii anto chrjuin te xan, ko kjuee xan xan nchrii icha chrjuin te ko binthekaꞌo xan. 3Ko Ndo Dio ndachro Ndo: «Tsajandaꞌa ixin chujni sinthechon na̱ kainxin nchaꞌon, ixin jeꞌe na̱ jeꞌo nthao na̱, mexinxin sechon na̱ jeꞌo naa renkia ko kan nano.»
4Ko ni xeꞌen Ndo Dio bekaꞌo xan nchrii, xeꞌen chujni, ko binthekunkjiꞌi chjan anto yeye bangi. Ko anto binuꞌe xan bakjaaya xan ko anto suji xan ko chujni anto bechunxin na̱ xan.
5Ko Ndo Dio bikon Ndo ixin anto tsjé thi jianꞌa bancheꞌe chujni ngataꞌa nunthe ko juxon thi jianꞌa baxraxaon na̱ ngathe anseen na̱. 6Ko anto kuiin anseen Ndo ko ndachro Ndo: «¡Nchenina ixin binthachjian chujni!» 7Ko ndachro Ndo Dio: «Sinthatjaan kain chujni binthachjian nguixin ngataꞌa nunthe, sinthatjaan kain chujni ko kain kuxiigo yeye, kuxiigo thingajintaon tseꞌe nunthe ko kain kuxiigo tjaganga; ¡nchenina ixin bindachjian chujni!»
8Aro Ndo Dio banchexruxiꞌin thi bancheꞌe Noé.
Noé binchechjian ntha barco
9Jiꞌi thi kuꞌen Noé, naa xii jian ko xruꞌin thi jianꞌa bancheꞌe ngayee chujni bechon are mee, ko bancheꞌe thi baketuꞌan Ndo Dio. 10Ko Noé bechundakaꞌo chriꞌi nii chjan, xan Sem, xan Cam ko xan Jafet.
11Ko Ndo Dio bikon Ndo ixin kainxin chujni anto bancheꞌe na̱ thi jianꞌa ko anto chrintho bancheꞌe na̱. 12Ko Ndo Dio bikon Ndo ixin ngataꞌa nunthe, juxon thi jianꞌa bancheꞌe na̱, 13mexinxin ndachro Ndo ngain Noé: «Jaꞌan sinthatjaan kain thi jichon, ixin nguixin nunthe ndakunchrintho na̱ ixin thi jianꞌa ncheꞌe na̱, ko sinthatjaan kain thi jichon ko sinthaxanthe kain thi jitaꞌa nunthe. 14Nchechjian naa barco kunixin nthaa gofer ko theyexin kunixin chingo saruthe ngaxinxin ko ndujaxin ko nchechjian nchiachjan ngaxiꞌin. 15Ko jaꞌin sinchechjian: Naa renkia ko kan ko thenaꞌo metro jininxin, ko kan ko yoo ko rioꞌo metro tunxin ko thenii metro nuinxin. 16Ko sinchechjian naa ventana jiexin yoo kan ko naꞌo centímetro chringixin thi sejanthe barco. Ko nchechjian thi sixinxin ra, ko thentaunthe nii piso, thi sakjixiꞌin ra. 17Ko jaꞌan rurruaꞌan naa chrin suji ko sinthatjangi nguixin nunthe chringi jinda, ko ndaseꞌen kainxin thi jichon ko kain thi jii ngataꞌa nunthe. 18Aro jaꞌan tsjauthexin ngajin jaꞌa, Noé, ko jaꞌa sixiꞌin ngain barco, ko kain xaꞌan, chriꞌa ko chriꞌi kain xaꞌan. 19Kai xranxiꞌin ngain barco kain kuxiigo, naa kudaꞌa ko naa kunaꞌa ixin sinthegechon ba. 20Xranxiꞌin kain ku chunda nene yoo ko yoo ku xrajeꞌo te ba naa kudaꞌa ko naa kunaꞌa, jañaa kai kain kuxiigo chrji ko te ngagaꞌa jna, kai jañaa ncheꞌe ngain kuxiigo nchekjanii ni ngain nchia, kai xrajeꞌo ngain kain kuxiigo thingajintaon tseꞌe nunthe, ko dixinkoꞌo ba ngain barco ixin senꞌa ba. 21Ko thenchjiꞌan kain thi sine kuxiigo ko thi sinthe ra jaꞌa ra ngaxiꞌin barco.»
22Ko jañaa bincheꞌe Noé ko bithikaon kain thi kuetuꞌen Ndo Dio.
Pilihan Saat Ini:
Génesis 6: plsNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2017, Wycliffe Bible Translators, Inc. All rights reserved.