San Lucas 24

1Pa vatjutsa' nalhu ti yameyc'oya, pa vapecley shta papi ôcjeclôy pa nivalhech ti nich'a claaf nalhu. Pa yicha'jesh ts'ivee pava yisclanesha'nejop vatshachivos; tanaôycheelh shta pap'elh ôcjeclôy. 2Meelh ti yama pa yi'van ts'ivee lhpa uj utej, lhap'ot'esh pa nivalhech ti tay'e pa yie'. 3Pa yichtaj'ôcji ts'ivee taj ninvan pa lhavu'vat pa Lhcaanvacle Jesús. 4Pa nitôyiyjat jum ts'ivee pa t'e pa ca lhfanishalhavach ti yi'van papi napu' nivacle, pjumtses pava t'uyjatshiyis. 5Pa uj ti nijovayem ts'ivee pa vancumaja cotsjaat, taj ti yit'esh papu lhech:

—¿Ta lhayaash ti lhavoolhey ja yi'shi' capi vafsha'ne jô lhech mônlha? 6Ampa ca nôque nôv'e'; apis ti nitshaam. Aychavalhelhch'e pan yit'eshelh'a ti yiey ja Galilea, 7yit'esh ti suyshemshi na Nivacle Lhô'sesh ti chiyjuta jayu papu sasch'e lhavos, papi lhech yiclônesh'e jayu lhpa cruz, taj ti pu'jana pava nalhus ti nitshaam jayu shta.#24.6-7 Mt 16.21; 17.22-23; 20.18-19; Mr 8.31; 9.31; 10.33-34; Lc 9.22; 18.31-33.

8Pa lhechesh pa yivoych'e lhcachi' pan yit'esh pa Jesús. 9Meelh ti vapecc'oya pa nivalhech pa nifaclemch'e japi once t'eyjatsjanjas shi' pap'elh pava matas. 10Papi lhech ôcjeclôy papin nifaclemch'e japi t'eyjatsjanjas pava matas navôque lheyis: María Magdalena, Juana, María lhamimi ja Jacobo, shi' pap'elh ôcjeclôy. 11Taj ti japi t'eyjatsjanjas yilheclôjesh ca niclôquiesh pava yit'esha pa ninu'esha ts'ivee.

12Vooy ja Pedro yichfach'ee pa vacumajey tatsha pa nivalhech; pa yovalhch'e pa yivaneyshi pava sivôclôclhayjey chiyan'ôcjilhavooj pa nivalhech, pa vapecley pa lhajpôyich, lhayaash ti nitôyiey pa lhjunash ti yi'van.

Yiey pa nôyish t'ajuyey pa Emaús

(Mr 16.12-13)

13Pa lhech nalhu yichey papi napu' t'eyjatsjanjas pa yitsaat lhey Emaús, once kilómetros pa t'aplheemey ja Jerusalén. 14Yichvatich'e pa tasinôych'een yasinôqui pava matas vaclan. 15Meelh ti tasinôych'e pa nam pa Jesús pa tanaôycheelh. 16Lha'ma yivantaj ts'ivee, taj ti vooy pap'elh lhcajunasheshjulh ca lhecha. 17Pa lhechesh pa niyôsesh pa Jesús pa yit'esh:

—¿She pava lhasinôquielhch'e na nôyish? ¿Ta lhayaash t'em ti nic'useelh'am'in?

18Ve'lha, pa lhey Cleofas, yicuulh pa yit'esh:

—Lhacôm'a papi yiey na cotsjaat yitô'yish java vaclan yiey ja Jerusalén navôque nalhus. ¿Pa avaatsha ave'lheey ninatô'yish?

19Pa lhechesh pa yit'esh:

—¿She t'e pa lhech?

Pa yit'esha ts'ivee:

—Vooy ja lhanfanash ja Jesús, Nazaret lhavo', jô lhech uj ti chiytôyjata pava ti vaclan, t'unesh'in cava ya'clishay shi' java lhfanishlhavach'in yie' t'ajuyish pa Dios shi' japi nivacle. 20Vooy jô lhech yiclôn japi lhanvacles japi vatcasinôc shi' jap'elh lhcaanvacles yiclônesh'e lhja cruz. 21Vooy yivaatsheelh javatjumteeshelhc'oya ca nalhjen jayu japi Israel lhavos. Taj ti nôqueesh pu'jana nava nalhus tavaych'e jô lhech chiyisnatesh. 22Lha'ma taj japi napu' ôcjeclôy yicavecjacloyelh tsitôyiyjateshelh, lhayaash ti nich'a nalhu yichey pa nivalhech. 23Meelh ti ninvan pa lhavu'vat pa yalhalha ti yi'shi' lhôn lhtô'vat papi ángeles, pa yit'esha lhôn ti mônlha ja Jesús. 24Pa lhechesh pa yichey vitsha jap'elh yivelhavot'elh pa nivalhech pa yi'van jan t'ônashesh japi ôcjeclôy, taj ti ja Jesús ninvan lhôn.

25Pa lhechesh pa yit'esh pa Jesús:

—¡Amelhc'oya'am pa atôycheyashelh avaatsheelh, nits'ôômeesh ca u'eshelha nava yit'eshelh'a japi chiytôyjata pava ti vaclan! 26¿Tan t'e ca chinclôyitjop cum na Cristo nava matas ti jôjjeclay ninamey ja t'aplhu' ti chiyôclôj jayu?

27Pa lhech tôlhesh'e pa yinôôclhanitemch'e lhacôm'a pava Vanisesh'e pava chiyasinôquiesh'in pa Jesús, tôlhesha pava lhqu'isjayanjas pa Moisés, pa yamja shta pant'ajôôj pava lhqu'isjayanjas pap'elh chiytôyjata pava ti vaclan.

28Meelh ti yamey pa yitsaat, pa yeetajesh pa Jesús ca lhayishlhaach'e pa nôyish. 29Taj ti papu lhech ujesh ti t'a'lha ca mônlhaajop, pa yit'esha ts'ivee:

—Istaa ca amônlheelhyijop, lhayaash ti lha pa nuut, yujeey ca tulha'in.

Pa lhechesh pa yich'ôcji pa Jesús pa jpôyich pa mônlhajop. 30Meelh ti yich'esha'nejop pa vattsaccunjavat, pa t'acumesh'e pava lhpôcôtôy lhpa yucuve, pa t'aalh pa yic'asatsha'ne pa yijutey papi lhech. 31Pa lhechesh pa chincat'ey pava lhtôsjey pa yalhalhatajesh ti nitôfaclesh pa ninvinshaa ti shan. 32Pa yit'eshvatsham'in ts'ivee:

—¿Ninfayjat'in t'e nava cascachiclelh jô lhechesh ti yiey ja nôyish ti yinôôclhanitch'ejoom lhacôm'a nava Vani'sesh'e?

33Pa lhechesh pa nitshamch'e tatsha pa yuyey pa nôyish pa vapecley ja Jerusalén. Pa lhech yi'van'e japi once t'eyjatsjanjas shi' japi lhc'utsfas ti tc'aelhva'ne. 34Japu lhech yit'esh ts'ivee:

—Yijô' ti apis ti nitshaam jô lhech Lhcaanvacle, yi'van ja Simón.

35Pa lhechesh pa nifaclem shta papu lhech ti yi'van yiey pa nôyish, pa nitôfacjatesh ti yic'asatsha'ne lhpa yucuve pa Jesús.

Pa Jesús tanôclitem papi t'eyjatsjanjas

(Mt 28.16-20; Mr 16.14-18; Jn 20.19-23)

36Meelh ti yasinôqui pava matas papu lhech, pa yalhalhatajesh ti yi'van ti yi'shi' lhcachivat ts'ivee pa Jesús, pa yecju' pa yit'esh:

—Apiiy'eelh avaatsheelh.

37Japu lhech uj ti nitôyiyjat pa nijovayem shta, yaychavalhey ca lhecha pa vatsôc'ôclit. 38Pa yit'esha pa Jesús:

—¿Ta lhayaash ti lhantôyi'shelh? ¿Ta lhayaash t'em ti lhcacueshelh? 39Ovalhelhey nava yipôcôtôy shi' nava yifoc. Ya lhech yivaatsha. Apacunelhyi pa atsovalhelhsha'ne; lhayaash pa vatsôc'ôclit ampa t'asjana ampava lhanusa shta, nan lhjunash nan lhasvaneshelh ti caajyam.

40Meelh ti yit'esh cavôque, pa nôclitem pava lhpôcôtôy shi' pava lhafoc. 41Taj ti jôjjeclay mônlheesh ti yicacuesh, tôlh'ejop ti nishamtajesh, teya ti nitôyiyjat jum, pa yit'esha pa Jesús:

—¿Caaj pa nôque yie' vatôc?

42Pa lhechesh pa yijutey pa sajech t'i'ya chiyucluqui shi' pa acôyech lhayeech; 43pa t'acuumjulh pa lhech pa tuj yiesh'e t'ajuyish japu lhech. 44Pa lhechesh pa yit'esha: —Cava yijunash'in ca num ti jayeetshelh'a ti jôjjeclay jôvelh'atshi avaatsheelh, yôfisch'eyam lhacôm'a ti tsits'isesh'e java lhayôjijates ja Moisés shi' java lhqu'isjayanjas japi chiytôyjata pava ti vaclan shi' java Salmos.

45Pa lhechesh pa yitôyjatc'oya java Vani'sesh'e, 46pa yit'esha:

—Nan t'ônash ti chiyi'sesh'e, ti tajulhemey na Cristo ti vaf, taj ti tajulhemey shta ti nitshaamshi capi vafsha'ne ti pu'jana nava nalhus. 47Chinanfacleem lhacôm'a napi yiey na cotsjaat ca lhey. Atôôlhshelh'e ja Jerusalén ca anfacle'lhem ca nitatvaych'aclajesh pa lhjunash jaspa chinvômjatemch'e pava lhsasch'esha'ne. 48Lhtônyôjijayshelh ca anfacleelh lhacôm'a cavôque matas. 49A'va, janchenelh'ay jayu javan nifaclelh'am ja Tata; taj ti amônlhaaelh'e nôque yitsaat Jerusalén amjelhey ca chinjutajelh'ay pa vat'unaj tôôlhchishamnee.#24.49 Hch 1.4.

Pa Jesús vapecleychisham pa vôôs

(Mr 16.19-20)

50pa lhechesh pa tayelhshi pa Jesús pa yitsaat pa yamey ts'ivee ja Betania, pa lhech yiesh'e ti t'ajayesh'apee pava lhpôcôtôy pa t'a'lhema pa is. 51Meelh ti t'aalh pa yichishaam chiychajeychisham pa vôôs.*xc* 52Japi lhech yôclôj pa lhech, pa vapecley ja Jerusalén pa uj ti nishamesh. 53Pa lhechesh pa mônlhaôcjiin ja vatishjanjavat pa yôclôj'in pa Dios. Amén. #24.50-51 Hch 1.9-11.

Pilihan Saat Ini:

San Lucas 24: NIVA

Sorotan

Berbagi

Salin