San Lucas 20

1Ve'lha pa nalhu ti yiôcji pa Jesús ja vatishjanjavat yeyjatsjanôcji papi nivacle pa nifaclem pa ya'clishesh pa vatnilhjenjayash. Pa namey papi lhanvacles papi vatcasinôc shi' papi vanqu'eyjatsjanesh pava lhfanishlhavach, tanaôycheelh shta papi nitaôvclasaesh ti lhcaanvaclesesh, 2Pa yit'esha ts'ivee:

—Anfacleelhyam papi t'unaj ti lhech afanishesh'avach côque. ¿She papi yijut'ay nôque vat'unaj?

3Pa lhechesh pa yit'esha pa Jesús:

—C'aniôseshelh jayu t'em vitsha pa ve'lha. Istaa ca asculhe'shelh: 4¿She papi nichen ja Juan ti vancanajayan? ¿lhech ja Dios, ja't'ajesha napi nivacle?

5Pa tasinôych'evatam pa yit'esh ts'ivee: “¿Ta shtat'eshjulh jayu? Ca shtat'esh lhôn ti nichen pa Dios, pa shiculhesh jayu: ‘¿Ta lhayaash ti lhcacueshelh?’ 6Shi' shta ca shtat'esh: tôlha japi nivacle, pa lhacôm'a ti shinclônsha'ne jayu, pa shinôôtjatesh'in jayu pava utes, lhayaash ti yijô'em ts'ivee ti lhech pa Juan tôlhesha pa Dios pava tasinô'yesh.”

7Pa yiculhesh ts'ivee ti nintô'yish ti she papi nichen lhapesh pa Juan ti vancanajayan. 8Pa lhechesh pa yit'esha pa Jesús:

—Vooy yivaatsha shta tanca nifaclelh'am na jatôlhesh'e na yifanishyivach.

Na vatovalhjayasheyjop papi vatcumjayash lhavos niysisa

(Mt 21.33-44; Mr 12.1-11)

9Pa lhechesh pa tasinôyc'oya pa Jesús papi lhech nivacle, yit'eshemc'oya pa vatovalhjayasheyjop atesha pa yit'esh:#20.9 Is 5.1.

—“Ve'lha pa nivacle yit'iyjatch'e pava ôtjayetacuy lhanus yanshi' pa lhcôvjiyanjavat, pa lhechesh pa yiclôvalhchiyinesh atesha papi ôtjayetacuy lhavos, vooy lhavaatsha yichey paelh yitsaat pa cajuqu'e ti mônlheeen. 10Meelh ti yameyjop pa t'aplhu' ti yôquench'e pa ôtjayetachat, pa yicheney pa lhcavo papi ôtjayetacuy lhavos jaspa nit'aalhsha pava ca nivenchatem. Lhan'e papi lhech pa yiclônsham'in pa yichen atesha, ampa ca nichajchiyinesh. 11Pa lhechesh pan yitsôt'ajesh pa yichen shta paelh lhcavo; taj ti lhech lha lhfanishesh yiclôyit shta, pa ampa ca nichajchiyinesh shta. 12Pa lhechesh pa yichen shta paelh, taj ti yivomatansha'ne shta pa yit'ufach'ee papi ôtjayetacuy lhavos.

13Pa lhechesh pa yit'esh pan yitsôt'ajesh pa ôtjayetachat: ¿Naô t'e pa yifanisheesh jayu? Jacheney jayu na yaôs yenach; ama ca lhecha ca nivijatanjulh jayu.' 14Meelh ti yi'van papi vatcumjayash lhavos pa yit'esh lhôn ts'ivee: ‘Lhech nôque chiyjuteem jayu navôque; istaa ca shtaclôn, pa jaspa shtantsôt'ajshelh jayu.’ 15Pa lhechesh pa yitojonfach'eec'oya pa ôtjayetachat pa yiclôn.

Lhechesh pa niyôsesh pa Jesús: ¿Ta lhfanishesh jayu nôqueesh pan yitsôt'ajesh pa ôtjayetachat papi lhech? 16Pa lhech nachey jayu papi ôtjayetachat lhavos ca niclônsha'ne jayu, pa nijuta pap'elh pa lhavôtjayetachat.”

Meelh ti yipeyeesh ts'ivee papi lhech pa yit'esh:

—¡Ninteetajesh jayu pa Dios!

17Taj ti yovalhey pa Jesús pa yit'esh:

—¿Ta t'ônashesh nava Vani'sesh'e? ti yit'esh:

‘Lhja utej lhjan yapun papi jpôyjey lhavos

yalhpan'e pa chiyan'e

lhpa t'afcatoesh pa jpôyich.*xa*

18Papu ca ninataj'apee anôque utej pa yipôcjetsha'ne jayu; vooy ca nancôôtajsha'ne lha utej ca nataj'apee papu, pa tsi'sha lhcamôqu'eesh. #20.17 Sal 118.22.

Pa lhjunash ti chiycufay'ôcji pa chiytsôt'ajesh

(Mt 22.15-22; Mr 12.13-17)

19Papi vatcasinôc lhanvacles shi' papi vanqu'eyjatsjanesh pava lhfanishlhavach uj ti yeetajesh ca natcum'e tatsha pa Jesús, lhayaash ti yitôych'e ti lhech ti t'ajuya navôque vatovalhjayasheyjop; taj ti nijovayem papi nivacle. 20Pa lhechesh pa yicheney papi yinôôlhjônchataj ca ninvo'yeeshch'e pava ca lhfanishalhavach pa vo'tajeyjop pa ya'clish ca lhech nitôlh'e ca natjuyja pa lhcaanvacle ca jaspa nicha'jey. 21Côque yisnateshjop ts'ivee pa niyôsesh, pa yit'esh:

—Vanqu'eyjatsjan, tsitôôyshelh ti uj ti navo'yeshch'e nava lhteesh, pa tanca ivalha pa lhjunash pa nivacle. Yajatesh ti lhavanqu'eyjatsjanesh pa yijô' Dios lhnôyish. 22¿Tajulhey t'e ca chincufay'ôcji pava yitsôt'ajesh pa uj lhcaanvacle Roma lhavo', ja't'ajesha ca ama?

23Taj ti yitô'ya tatsha pa Jesús pa lhjôtsôclônjayashesh ti nisa' pa lhaychavalhjayash ts'ivee, pa yit'esha:

—¿Ta lhayaash ti lhanc'alhtantajelhyiy? 24Anchajeelhyiy lhpa tinshanja ca ja'van. ¿She t'e papi lhtaco nôque, shi' na lhey ti chiyi'sesh'e?

Papi lhech yicuulh pa yit'esh:

—Vooy ja lhcaanvacle César.

25Pa lhechesh pa yit'esh:

—Ajutelhem ja César ti yitsôt'ajesh ja César, vooy ja Dios ajutelhey nava yitsôt'ajesh ja Dios.

26Pa nisaemjop t'ôyish'e pa ca nasnatesh ca jaspa nicôjôsjatesh ts'ivee pa Jesús pava yit'esh'in ti yie' t'ajuyish papi nivacle; pa uj ti nitôyiyjat pa nintasinôych'e ts'ivee.

Pa vatcôy'ôtsjayashesh pa lhneetshamjayash papi vafsha'ne

(Mt 22.23-33; Mr 12.18-27)

27Pa yichey papi napu' saduceos pa Jesús jaspa yi'van. Papi saduceos yilheclôjesh ca nineachisham papi vafsha'ne; papi lhech yit'esha ts'ivee pa Jesús:#20.27 Hch 23.8.

28—Vanqu'eyjatsjan, yit'eshjoom cava Moisés lhcaniscôtey ca nivaf lhôn pa nivacle ca vo'ya lhpa lhjaya ca mônlhaa ca amtajeem shta papi lhcles, lhpa lhech isjop lhôn ca lhjayaeesh pa lhash'aa, jaspa nactsôyanem lhavaatsha pa lhchecla' pan vaf.*xc* 29Pa caaj lhôn papi napu'yama lhtatvelheyech. Pa c'utsa'jesh pa lhjayaesh, taj ti nintactsôyelh ti vaf. 30Vooy lhpa ôsch'acche lhjayaesh shta pa ve'lha lhash'aa, taj ti nintactsôyelh shta, jaalhpa vaf atesha. 31Pa lhechesh pa lhjayaesh paelh lhash'aa, lhech lha lhjunash lhacôm'a papi napu'yama, taj ti nintactsôyelhsha'ne, jaalhpa nôj'e atesha. 32Pa yôjesh'esha'ne vaf vitsha lhpa ôsch'acche. 33C'oya ca neetshamtajshi papi vafsha'ne, ¿she t'e papi yitsôt'ajshi jayu lhpa ôsch'acche, lhayaash ti tifesh'e papi napu'yama lhtatvelheyech ti lhjayastajesh? #20.28 Dt 25.5.

34Lhechesh pa yit'esh pa Jesús ti yicuulh:

—Nôque cotsjaat papi yitsjôy shi' papi ôcjeeclôy vanijayachisha'ne. 35Taj ti papi chiysavalhac'oya ca namey paelh cotsjaat ca ne'tajchishamshi papi vafsha'ne, taj ti lhech yie' pa tanca nijayachi t'ôyish'e pa tanca chinjayayan jayu shta. 36Lhayaash ti tanca t'ôyish'e ca nivafsha'ne. Pa lhjunashjulh jayu japi ángeles, lhclesesh ja Dios lhayaash ti nitshamch'e. 37Tô'lha shta ja Moisés ti nifac pa shintôyjata pa lhneetshamjayash papi vafsha'ne ti yiey lhca yichesh c'utjaniyuc ti yit'esh ja Lhcaanvacle lh'Diosesh ja Abraham, shi' ja Isaac, shi' ja Jacob.*xd* 38Lhayaash ja Dios tanca lh'Diosaesh papi vafsha'ne, lh'Diosesh papi mônlhasha'ne; taj ti vooy ja Dios mônlhaemsha'ne lhacôm'a papi lhech. #20.37 Ez 3.6.

39Pa lhechesh pa caaj papi yit'esha papi lhech vanqu'eyjatsjanesh pava lhfanishlhavach:

—Isis nava lhteesh, Vanqu'eyjatsjan.

40Pa ampapu ca niyôs t'ôyish'e.

¿She t'e papi lhaôs pa Cristo?

(Mt 22.41-46; Mr 12.35-37)

41Pa yit'esh pa Jesús:

—¿Ta t'e lhayaash ti chiyit'esha ca lhô'sa na Cristo ja David? 42Vooy lhavaatsha ja David yit'esha ja yi'shi' java Salmos:

‘Yit'esha ja Lhcaanvacle ja Yinvacle:

Vee'cum na yifayishey,

43vooy ca janamjatajey afoc

japi nacôvfachi pa lhech jan'eajop.’*xe*

44Lhech lhavaatsha na apee ja David ti lhqueyesh Lhcaanvacle, ¿pa ta t'e lhayaash ti chiytatayanesh'in ja David? #20.42-43 Sal 110.1.

Yiyôvtanesha pa Jesús papi vanqu'eyjatsjanesh pava lhfanishlhavach

(Mt 23.1-36; Mr 12.38-40; Lc 11.37-54)

45Meelh ti tasinôyem pa Jesús japi t'eyjatsjanjas, pa lhechesh pa tach'ansha papi aclôj nivacle, pa yit'esh: 46“Anujumatsenelhjulh napi vanqu'eyjatsjanesh pava lhfanishlhavach, napi lhech yen java pitesch'e t'uyjatshiyis ti t'ota'yesh, lhayaash ti vataanvacleyanesh. Yen shta ca chinacju' ti chiyvan'e pa vatcasha'vat, jô'tajesh ti yench'een java vatc'oovtes java tavaya pa vatvanqu'eyjatsjanjavat, yench'een shta pava ya'shesh ti isis vatc'oovtes ti tsaccun. 47Japi lhech nijôclesh papi ôsch'acchey pava lhajpôyjey pa yip'otajesh'e pavôque ti cajueshch'e ti t'aalh. Japi lhech lhfanishlhavach chiyequetsenesh jayu pa uj ti nisa' lhnivalhcheyash.”

Lhpa lhtinshanja lhpa ôsch'acche

(Mr 12.41-44)

Pilihan Saat Ini:

San Lucas 20: NIVA

Sorotan

Berbagi

Salin