San Lucas 18
18
Na vatovalhjayasheyjop lhpa ôsch'acche shi' pa tcaasclanchaysha'ne
1Pa Jesús yisnatshem ja vatovalhjayasheyjop, jaspa yeyjatsjanesh ca ya aj ca chinvômeshjop ti chit'aalh. 2Pa yit'esh:
“Yiey pa yitsaat caaj pa ve'lha tcaasclanchaysha'ne, pa lhech ninanjova'yem pa Dios, ninanjova'yem shta pap'elh. 3Caaj shta lhpa ve'lha ôsch'acche yie' pa lhech yitsaat, yajatesh ti yamey pa lhech tcaasclanchaysha'ne jaspa nasclaneelhvatjulh pa nilhc'utsfaa. 4Acloj pava nalhus ninteesh pa lhech tcaasclanchaysha'ne ca nefenesh, taj ti nôqueesh yaychavalh'in pa yit'esh: ‘Ninasjova'yem pa Dios,tanca nasjova'yem shta pap'elh, 5taj ti vooy lha ôsch'acche uj ti tsivijatayan, istaa ca janiyiteshem jayu ca c'efenesh jaspa tanca ninamyiy t'ôyish'e, lhayaash ti jalhpa namjey ca suya'yi.’ ”
6Pa yit'esh pa Lhcaanvacle:
“Nôque yit'esh pa tcaasclanchaysha'ne ojey. 7¿Vooy ja Dios tanca t'e ca niyiteshem vitsha jayu papi vooyshi, ti t'alhe nava nalhus shi' nava tulhis? ¿Cajuach'e jayu ca ninefeneesh? 8Jayeetshelh'am ti tatsha jayu ca nefenesh. Taj ti ca namtaj na Nivacle Lhô'sesh, ¿pa nivan t'e pa nivatcacujayasha yiey na cotsjaat?”
Na vatovalhjayasheyjop pa fariseo shi' pa yivoyanesh pava lhpesoc pa lhanvacle
9Pa Jesús yisnatesh shta paelh vatovalhjayasheyjop, t'ajuya papu vatlheclôôjtaj ca isa' ti yapun pap'elh. Pa yit'esh:
10“Napu' papi nivacle yichey pa vatishjanjavat jaspa t'aalh: ve'lha pa fariseo, vooy paelh yivoyanesh pava pesoc pa lhanvacle. 11Pa lhech fariseo pa vatsôôtjat ti t'aalh pa yit'esh: ‘Dios, jajut'ay na yishamiash ti niyjunashajulh pap'elh nivacle cutsjanjas, shi' papi ninvo'yeshch'e pava lhfanishlhavach, shi' papi yivôôm papi lhjayas; niyijunashajulh shta nôque yivoyanesh pava pesoc pa lhanvacle. 12Napu'esh ti jatayipcuyan ja ve'lha yameyc'oya, jacatsônjat shta java napu'nôjesh jayits'ôteyesh pa c'avenchatesh ja ve'lheesh t'ya'esh.' 13Vooy pa yivoyanesh pava pesoc pa lhanvacle tojey pa mônlhee, pa nifiiyshi ca novalhesheychisham na vôôs, yipôcôj'e t'oot pa yit'esh: ‘¡Dios, acavts'aclayish, lhayaash ti yav'ojey!’ 14Jayeetshelhaam nôque yovalhc'oya pava pesoc ti vapecley pa lhajpôyich chiyvômjatemch'e pava lhfanishlhavach, vooy pa fariseo tanca chiyvômjatemch'e. Lhayaash papu ca nunataj pa lhecha papi chinachajshicham, vooy papi vanits'aclayan pa lhecha ca chinashjatchisham.#18.14 Pr 29.23; Mt 23.12; Lc 14.11.
Pa Jesús yit'eshema pa is papi taôvclas
(Mt 19.13-15; Mr 10.13-16)
15Chiychajey shta papi tiqu'icsha'ne taôvclas pa Jesús jaspa t'ajaya jayu; meelh ti yi'van japi t'eyjatsjanjas capuque pa yicônitshiesh papi nicha'jey'in. 16Taj ti vooy pa Jesús tôney pa yit'esh:
—An'ateelh napi taôvclas ca nachyiy, istaa ca ya aj ca acônitshielh; lhayaash na Dios lhanvacleyash t'ajuya papu lhjunashjulh papi lhech. 17Yijô' ti jayeetshelh'a, papu ca ninatcuumtajajulh na Dios lhanvacleyash nan lhjunashesh na taôvclaj, papu lhech ninamjam jayu.
Pa nich'ayech acôjjiin tasinôyelh pa Jesús
(Mt 19.16-30; Mr 10.17-31)
18Ve'lha pa lhcaanvacle tasinôyelh pa Jesús pa yit'esh:
—Na issha'ne vanqu'eyjatsjan, ¿ta yifanishyivach jayu jaspa jam'apee pa vatmônlhajayash ôyjôlhôyech?
19Pa yit'esh pa Jesús:
—¿Ta lhayaash ti lhteeshyi ti ya issha'ne? Ampapu caelhchaa ca isa'sha'ne, ve'lha ja Dios. 20Lhantôfa'clesh cava Dios lhayôjijates ti yit'esh: ‘Ya aj ca avatvô'melh lhpa ach'acfa; ya aj ca aclôn papu; ya aj ca acut; ya aj ca anôôlhjônchatem papu pa'na; asclaneshi pa atata shi' lhpa amimi.’*xn* *xñ* *xo* *xp* #18.20 Ex 20.14; Dt 5.18. #18.20 Ex 20.13; Dt 5.17.,#18.20 Ex 20.15; Dt 5.19.,#18.20 Ex 20.16; Dt 5.20.,#18.20 Ex 20.12; Dt 5.16.
21Pa yicuulh pa nivacle pa yit'esh:
—Cavôque lhacôm'a ti yifanishyivach ti jôjjeclay ya taôvclaj.
22Meelh ti yipe'yeesh cavôque pa Jesús pa yit'esh:
—Ve'lha ja amc'oyaam: acashayesh lhacôm'a pava lha'van, pa ajutey pa lhasha' papi ts'aclaaysha'ne, pa caaj'am jayu pava acôqueclitôy yi'shi' ja vôôs; pa anach ca shtatanôychi.
23C'oya ti yipe'yach'e cavôque pa nivacle, pa yitacshinjayan'in, lhayaash ti aclôj pava yi'van lhcôqueclitôy. 24Meelh ti yi'van pa Jesús ti yitacshin'in pa lhech, pa yit'esh:*xr* 25—¡Uj ti tavijatayem papi acôsshiin ca namey ja Dios lhanvacleyash! C'ôôjlhatajem pa camello ca nuych'e lhpa c'utjaan lhtôsej, ya'shesh'apee ti tavijatayem pa nivacle acôjjiin ca namey ja Dios lhanvacleyash! #18.24-25 Pr 11.28.
26Pa yit'esh papi yipe'ya cavôque:
—¿Pa naô t'e papi chiyilhjen jayu?
27Pa yit'esha pa Jesús:
—Napi nivacle yisasinatjop pa lhech lhjunash, lhan'e ja Dios nisaseemjop.
28Pa yit'esh pa Pedro:
—Lhcaanvacle, yivaatsheelh javômjelh'ac'oya java matas, jaspa javoelh'ach'esha'ne.
29Pa lhechesh pa yit'esha pa Jesús:
—Yijô' ti jayeetshelh'a lhacôm'a papu ti vômeshemjop ja Dios lhanvacleyash pa lhajpôyich, papi lhnavot, papi lhcheclavot, lhpa lhch'acfa shi' papi lhcles, 30lhecha jayu lhavaatsha ca chinashjatem jayu nava matas yiey nôque cotsjaat, pa nijooylha jayu pa vatmônlhajayash ôyjôlhôyech yie' ja vôôs.
Pa Jesús yachajeyc'oya shta ti nifac pa lhavafjayash
(Mt 20.17-19; Mr 10.32-34)
31Tôney pa Jesús japi doce t'eyjatsjanjas, pa tac'uyelh pa yit'esh:
“Nôqueesh shnôquelhey ja Jerusalén, jan yie' ti vaclan jayu jan t'ônashesh japi chiytôyjata pava ti vaclan jan lhjunash na Nivacle Lhô'sesh. 32Pa lhech'e ti chijuta jayu papi nilhchifasa pa yijuvanvatam jayu pa nanvaclematan'in pa nit'ach'iyaan shta. 33Jô'tajesh ti yic'ôn'in jayu ts'ivee pa jalhpa yiclôn jayu jô; pa nôjeshch'e jayu atesha pava pu'jana nalhus pa nitshaam jayu shta.”
34Japi lhech nintôyc'oya jum cavôque, lhayaash ti nintôych'e pava yit'esh'in, pava lhech nitiqu'in'eesh ca nitôych'e.
Pa Jesús yovalhjat'in pa tacluuc yiey pa Jericó
(Mt 20.29-34; Mr 10.46-52)
35Meelh ti yu'jaa pa Jesús ja yitsaat Jericó, pa yi'van pa tacluuc yi'shi' pa nôyish t'alhjanesh'in pava matas. 36Meelh ti yipe'ya pa tacluuc papi acloj naashjop pa tay'ôtsjanesh pa lhjunash. 37Pa chinfacleem ti naashjop pa Jesús, Nazaret lhavo'. 38Pa lhechesh pa tônesh'in ti yit'esh:
—¡Jesús, David Lhaôs, acavts'aclayish!
39Papi lhech naashjop yitsô'yatajshem'in ti yishanataj'in, pa lhechesh pa yijô' pa yisitsenesh ti tônesh'in:
—¡David Lhaôs, acavts'aclayish!
40Pa lhechesh pa vatsevatc'oya pa Jesús pa tayôjijanesh ca chinantojoney. Meelh ti chiyamjata pa niyôs:
41—¿She pa lhentaj ca yisnatesh'am jayu?
Yicuulh pa tacluuc pa yit'esh:
—Lhcaanvacle, jayeetajesh ca natpec'yiy ja yitô'vat.
42Pa yit'esh pa Jesús:
—¡Vapecl'am na atô'vat! Chinalhjen, lhayaash ti naascacu'.
43Pa tatsha ti yovalh'in pa tacluuctajesh, pa voqu'e' pa Jesús, pa lhechesh pa yôclôj pa Dios. Pa lhacôm'a papi yi'van cavôque yôclôj vitsha pa Dios.
Pilihan Saat Ini:
San Lucas 18: NIVA
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Nivacle Bible © Sociedades Bíblicas Unidas, 1994.
