San Lucas 16
16
Na vatovalhjayasheyjop pa chiyôsjat'e vatjuyiish ninvo'yeshch'e pava lhfanishlhavach
1Pa yit'esha shta pa Jesús japi t'eyjatsjanjas:
“Caaj pa ve'lha lhcaanvacle acôjjiin, caaj shta pa ve'lha yôsjat'e t'ajuyish, chinfacleem pa lhanvacle ti tif'inc'oya pava lhavanjas. 2Pa lhechesh pa tôney pa lhanvacle pa yit'esha: ‘¿She t'e ja jaypeycheyesh'a? Anfacyam pa lhjunash na acumjayash, lhayaash ti tanca t'oyisheey ca ôs'e yijuyish.’ 3Pa lhechesh pa yaychavalhey pa lhech t'ôs'e vatjuyiish pa yit'esh: ‘¿Ta yifanishyivach jayu nôqueesh, lhayaash ti tsivômjatesh na yinvacle na yicumjayash? Ninast'un'in ca yicum'e na cotsjaat, jafunsha jayu pap'elh ca yaalhsha pava matas, lhayaash ti javapen'in jayu. 4Tsitô'yish taney jayu pa ca yifanishayivach, ca chinasvômjatajesh na yicumjayash ca nicaajtaj papu ca natcuumtajyijulh yiey pava lhajpôyjey.' 5Pa lhechesh pa yivelhan ts'ivee ti tôney'in papi tpiôyem'in pa lhech lhcaanvacle. Pa niyôsesh pa vatjutsa' pa yit'esh: ‘¿Ta t'ajôôj pa lhatpiôyeshem ja yinvacle?’ 6Pa yicuulh pa yit'esh: ‘Jaypiôyesh java cien'esh java tanquec cava lhapec.’ Pa lhechesh pa yit'esh pa lhech t'ôs'e vatjuyiish: ‘Acuumjulh na vatqu'isjayanach yi'shi' nava apiôc ca i'sesh'e clap pava cincuenta'esh.’ 7Pa niyôsesh shta paelh pa yit'esh: ‘Avaatsha shta, ¿ta t'ajôôjque shta pa apiô? Pa yit'esh: ‘Cien'esh java tapoojqu'e ja trigo’. Pa lhechesh pa yit'esh: ‘Acuumjulh na vatqu'isjayanach yi'shi' nava apiôc ca i'sesh'e pava ochenta pat'ajôôj.’ 8Vooy pa lhcaanvacle yitôôysha pa nisa' yôsjat'e t'ajuyish ti p'alha t'ema ti yivaclhitsham pa lhfanishesh pava yisnatesh. Ya'shesh'apee papi yiey na cotsjaat pava lhfanisheshc'oya pava yisnatshem pap'elh, a'lheeshc'oya papi yi'shi' pa vatqu'isjuyaj.
9“Jayeetshelh'a ca acumelh'e lhôn pava vatcôqueclitôy yiey na cotsjaat yi'shi' pa sasch'e pa jaspa ac'utsfasaeshelh. C'oya ca nôjtaj pava vatcôqueclitôy, pa lhtôts'ôteyshelh'ôcji jayu pava jpôyjey ôyjôlhôyjes.
10“Papu lhech yisclaneshi pava napuqu'e, pa yisclaneshi jayu shta pava aclojqu'e; vooy papi ninasclaneshi pava napuqu'e, ninasclaneshi jayu shta pava aclojqu'e.*xz* 11Ca niasclantajeeshelhshi pava chiacôseshiin yie' na cotsjaat yi'shi' pa sasch'e, ¿she t'e papu ca ajôyshelha pava acôsshelhshiin jô? 12Ca naasclantajeeshelhshi java chinanujumatsenjayanshelh, ¿pa she t'e papu ca nijutelh'ay pava ca nats'ôt'ajeshelh jô? #16.10 Mt 25.21; Lc 19.17.
13“Ampa vatcumjayash lhavo'a ca napua papi lhanvacles ca natcumem'in; lhayaash ti yicônitshi jayu pa ve'lha vooy paelh yen jayu. Ja't'ajesha ca nanc'ashamem pa ve'lha, vooy paelh napun. Saselhjop'am jayu ca acuumtajelhem'in ja Dios ca chia pava pesoc.#16.13 Mt 6.24.
14Meelh ti yipe'ya lhacôm'a cavôque papi fariseos pa yaôytenesh pa Jesús pa tasinôych'evatam, lhayaash ti yijuctsen pava pesoc.
15Pa lhechesh pa yit'esh pa Jesús:
“Vooy avaatsheelh lhavat'isinatelhc'oya japi nivacle, taj ti vooy ja Dios nitôfaclesh nava acachiclelh; papi yilheclôjtajesh japi nivacle ca uja', vooy ja Dios yapun.
Pava vatyôjijates shi' pa Dios lhanvacleyash
16“Cava lhayôjijates ca Moisés, shi' cava vanqu'eyjatsjanesh capi chiytôyjata pava ti vaclan yamja ca Juan Vatnayjayash lhavo'. Pa lhech tôlh'ejop ti chinfacleem nava isis ya'clishay tô'lha ja Dios lhanvacleyash, lhacôm'a papi vaniyitesh jaspa yamjam.#16.16 Mt 11.12-13.
17“C'ôôjlha na vôôs shi' na cotsjaat ca chinvôômtaj, vooy java vatyôjijates tanca chinvôôm lhpa ca ve'lhaa java vatca'niscotey.#16.17 Mt 5.18.
Pa Jesús vanqu'eyjatsjanesh pa lhjunash papu ti nivômcavômjatsutaj
(Mt 19.1-12; Mr 10.1-12)
18“Ca nicaajtaj pa nivacle nivômcavômjatsuesh lhpa lhch'acfa ti lhjayaesh lhap'elh pa yisnatesh pa lhavômcavômjayash. Pa lhech lhjunash shta paelh nivacle ti lhjayaesh lhpa chiyvôôm, pa yisnatesh shta pa lhavômcavômjayash.#16.18 Mt 5.32; 1 Co 7.10-11.
Pa nivacle acôjjiin shi' pa Lázaro
19“Caaj pa ve'lha nivacle acôjjiin, pa yuych'e pava isis t'uyjatshiyis, pava nalhus yisnatesh pa lhtsaccunjayash pa nishamesh'in. 20Caaj shta pa ve'lha ts'aclaay lhey Lázaro, yamqu'e' pava vatvomatachey, yishisha'ne pa lhcashi pa acôjjiin. 21Côque nivacle ts'aclaay yeetajesh ca nituj pava lhcat'iyas nat'ôcji pa lhtsaccunjavat pa acôjjiin; nam pava nuus pa nap'ueshiin pava lhavomatachey. 22Ve'lha pa nalhu pa vaf pa ts'aclaay, c'oya ti nam papi ángeles pa yicha'jey pan yie' ca Abraham pa yiclôôp. Pa vaf shta pa acôjjiin pa chitishc'oya. 23“Meelh ti chiyclôyit pa lhech acôjjiin yiey pan yie'in capi vafsha'ne, pa yovalhchisham pa yivaney ti tojey pa Abraham yi'jop pa Lázaro. 24Pa lhechesh pa tôney pa yit'esh: “¡Tata Abraham, acavts'aclayish, achenyi na Lázaro ca nicla'finateyshi lha lhpasch'e na yinôôt ca nip'aclanesh na yich'aclech; lhayaash ti uj ti tsiclôyit na itôj.' 25Taj ti yit'esha pa Abraham: ‘Yaôs, aychavalhch'e ti lhavan java isis ti yiey jan lhôv'e'in, vooy na Lázaro tsisha'em ja niysa’. Nôqueesh chinshamitjat yiey nôque, vooy avaatsha chinaclôyit. 26Taj ti caaj na tavayelh'a apatoj; ca nicaajtaj papu ca niteesh ca nôquelh'ay, tanca namelh'ay, ca caajtaj shta papu ca niteesh ca nachelhyiy, tanca ninamelhyiy.' 27“Pa lhechesh pa yit'esh pa acôjjiin: ‘Jayalh'a, tata Abraham, ca achenelheyam na Lázaro ja lhajpôyich ja tata. 28Caaj japi lhech'e ve'lhanôjesh yich'injavot, jaspa nitasinôyem, ca ninameey jayu nôque tsitsiclôyit'e.' 29Lhechesh pa yit'esh pa Abraham: ‘Papu lhech caajem java yi'sesh'e ja Moisés shi' japi chiytôyjata pava ti vaclan; ¡istaa ca nach'ana! 30Pa yicuulh pa acôjjiin pa yit'esh: ‘Jech, tata Abraham, taj ti ca nicaajtaj capi vafsha'ne ca nôquey, pa nitatvaych'aclajesh jayu pa lhjunash.’ 31Taj ti yit'esha pa Abraham: ‘Ca ninteetajeesh ca ninach'antajaa ja Moisés shi' japi chiytôyjata pava ti vaclan, pa nicacuesh jayu shta ca nineetshamjop papi ve'lha capi vafsha'ne.
Suyjulh ca chinancôt'esha'ne pa sasch'e
(Mt 18.6-7, 21-22; Mr 9.42)
Pilihan Saat Ini:
San Lucas 16: NIVA
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Nivacle Bible © Sociedades Bíblicas Unidas, 1994.
