Maatiuꞌ 3
3
Jooni Minkinara Daankiarako'na'
(Mak 1:2-8; Luk 3:1-18; Jon 1:19-28)
1Tenang Jiisuu' Nasareti' otoko'nang ee'nang Jooni Minkinara sirakura' tavo'arara daankinang tutumpuu' mee'bora' sirakamaa'koo Judia'navete-koonoo'ke. 2Aa'puma daankiaru', “Bere'dariai paninung muu'koo tuntariaina', ai' tee muu' tee enang due' poing.” 3Aung Jooni tee teie nakaronara Aisaia'ke urikamu' minkuvuu'nung Daari Meekung-koo aa'puu'noo'ka,
“Aurong narung naning-koong mee'bora' sirakamaa'koo bokuma aa'pumaang, ‘Maamu-antaveriaing tee taung Ovoring bakaang. Koompevuriai poainavung.’” (Aisaia' 40:3)
4Tee Jooni Minkinara tee tamung mononopa' kaameli'koong dapo-koo nkonii' kurumparako', ee'noko dopa'noo'ke tokoarako'.#3:4 Teing nakaro-nupoong urikupoong tee' kurumpariko' Eliasi kurumparako'na', aarumo baka kirokai kontevoma. Ooveai 2 Dauraronanka 1:8. Ee'noko bakaang taamang teing aa'ning maa'uriko': ntaa'nanka ee'noko davainta pora'kooning.
5Ee'noko mmau' nantoonanka Jerusalema'keta tee-anko berou', ookara Judia'nameng-nupoong nari', bera ookara Joo'dani-nari-nupoong-koo basi. 6Ee'noko biikaning oraka' nkonanka sira'pariko ntong-koo minkivurima meeka'antavuriko' teie Joo'dani-nari-koo. 7Ee'noko tenang ee'nang tevitu Moosesi bakaang Boto Keperuu'navitu miring Paarisi-navitu ee'noko Noru' Pitunavitu miring Saadiusi-navitu nari' ntong-koo minkivurira meeka'antavurii'naang porou'. Teka Jooni Minkinarai oovurira aa'puriko',
“Dii' borukoporonuka, baie aa'duri dii' tamung minkirarira koo'dariaining Kumponing bakaang iira tavo'kuaing-eta? 8Masika' bere'dariaing tee-koo sinang oro'paravaina'. 9Tamung dii'ka aa'periauka', ‘Eebaraami' tee nii'ke niuma otong,’ ai' masikung ninge naurampimang Kumponinge tee Eebaraami' baurukaa' aing-eta kapananka-ita nkovuripeu' dii' pari'anta-koo, domang iveka'dariko deeko'. 10Teri' marekenari' teri' maamuari otong koi'koo okora'. Dii' teing koi' makosinuka. Dii'koo ookara sinang tampara nkaveriauka'ning tee nokiraarira nta'koo dua'daariaining. 11Ninge tee tamung ntong-koo minkirampima meeka'antarampimaang domang bere'dariko, nka tee ning aa'na' apoo'mui otoing iirakuta mme' pomaang, doonge-taara˜. Tee ee'nara poko aa'na' tampa' taaraveriai, ai' teie tee meeka'antaruriaing dii' Tanuaang Meekung ee'noko nta' ninka. 12Teie, tee simpe'nkoi˜ teing makosinuka bakaang muu'koo kuunga onkeonke'uriaing, ee'noko teing makosinuka deeaing tee-koo nta'koo siri'paa'koo tai-antavuriaing.”
Joonie Jiisuu' Ntong-koo Minkivura Meeka'antavuu'na'
(Mak 1:9-11; Luk 3:21-22)
13Teketa tenang tee Jiisuu' Kaaleli'nameensi'keta Joo'dani-nari-aape pou' Joonie ntong-koo minkivura meeka'antavuu'naang. 14Teka Joonie orokovuma aa'puu', “Ning dake ntong-koo minkimera meeka'anta-koo makosi ee'noko da' arekee'koo ning-anko poi?” 15Teka Jiisuu'ke maku'uma aa'puu', “Emu' nkomeaing. Makosi nee'ke tee' nkoampema dupe-antavampeaing ookara aarumo koonto'nanka.” Tenang tee' minkuvuio' Joonie aroo'uu'. 16Teketa tenang Joonie Jiisuu' ntong-koo minkivura meeka'antavuio' doompeto daa'ario' ntong-eta tonta'arako tee-koo batei-koo paning daate'aru' ee'noko tenang teie tee Tanuaang Meekung Kumponing bakaang, kuukuu'pina' siarara Jiisuu'koo pantoko oovuu'. 17Ee'noko kara auromparu' paning-eta aa'puma, “Aung tee nnuring ninge piaavamaung. Ning aung-koo aa'na' dotumaramaung.”
Pilihan Saat Ini:
Maatiuꞌ 3: nasNTpo
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1994, Wycliffe Bible Translators, Inc. All rights reserved.
