Amatie 7

Da zɛrgra-ya taaba

(Aluki 6:37-38,41-42)

1«Da zɛrgra-ya taaba, tɩ Nawẽnnɛ mẽ da zɛrgɛ ya. 2Se'ere n soe la, yan wʋn zɛrgɛ nẽrba se'em na, Nawẽnnɛ mẽ wʋn zɛrgɛ ya la bɛla. La sɛla tɩ ya dɩkɛ makɛ bɔ nẽrba la, ẽŋa tɩ Nawẽnnɛ wʋn dɩkɛ makɛ bɔ ya. 3Bẽm tɩ fʋ bɩsra sɔkɔ n boe fʋ sɔbia nifum, dee ka bɩsra dɔɔgɔ n boe fʋ mẽŋa nifum na? 4Fõn ẽŋɛ la wãne yɛta fʋ sɔbia yetɩ, a basɛ tɩ fʋ yese sɔkɔ a nifum, dee tɩ dɔɔgɔ bɔna fõn mẽŋa nifum? 5Pʋlibsum dãana, dẽŋɛ yese dɔɔgɔ la fʋ mẽŋa nifum, dee yãŋa tã'agɛ yẽ sõŋa yese sɔkɔ la n boe fʋ sɔbia nifum na.

6Da dɩkɛ-ya Nawẽnnɛ bõn-sõma bɔ baasɩ, la ya da dɩkɛ sɛla n tarɩ yõorɔ zozo'e lobge kurkurdõma nẽŋam, tɩ ba wʋn nẽ ba mɛ la ba nãma, dee tɩ baasɩ la wẽrgɛ dõn ya zõrzõrʋm.»

Azezi zãsʋm pʋ'ʋsgɔ yelle

(Aluki 11:9-13)

7«Sose-ya Nawẽnnɛ, tɩ a wʋn bɔ ya. Ɛ-ya, tɩ ya wʋn yẽ. Wẽ-ya kʋlɩŋa, tɩ a wʋn yo'oge bɔ ya. 8Se'ere n soe la, nẽr-sɛka woo n sosrɩ Nawẽnnɛ, a wʋn bɔ ẽ. La nẽr-sɛka woo n eerɩ, wʋn yẽ. La nẽr-sɛka n wẽ'erɩ kʋlɩŋa, ba wʋn yo'oge bɔ ẽ. 9Ãne n boe yãma pʋam tɩ a bia wʋn sose ẽ borborɩ, tɩ a bɔ ẽ kugre? 10Bɩɩ a sãn sose zũfo, tɩ a bɔ ẽ bõnsɛla? 11Yãma nẽrsaalba n de tõon-be'ero dõma la sãn mina tɩ ya bɔ ya kɔma bõn-sõma, ya Sɔ Nawẽnnɛ n boe saazuum kãn bɔ yãma sɛba n sosrɩ ẽ na bõn-sõma n gãnnɩ bɛla?

12Yãma n boorɩ tɩ nẽrba ɩta se'em bɔ'ɔra ya la, yãma mẽ ɩta bɛla bɔ'ɔra ba. Ẽna de la Nawẽnnɛ lɔɔ, la a nõtɔ'ɔsrɩba n gʋlsɛ se'em n bɛla.»

Sorɔɔrɔ bayi yelle

(Aluki 13:24)

13«Doose-ya zanõrɛ n ãn mika kẽ, se'ere n soe la, zanõ-yalŋa, la so-kãtɛ la we'esɩ la sã'aŋɔ zẽ'am, la nẽrba zozo'e dolɩ la bilam. 14La zanõ-mika, la so-bãalga we'esɩ la vɔm zẽ'am. La de la nẽrba fẽe n dolɩ ẽ.»

Tɩa woo la a biɛ

(Aluki 6:43-44)

15«Guuse ya mẽŋa la nẽr-sɛba n parnɩ tɩ bãma de la Nawẽnnɛ nõtɔ'ɔsrɩba la. Ba wʋn ẽŋɛ ba mẽŋa wʋ saasaadõma n dɩkɛ piisi gãna fʋrɛ ba mẽŋa wa'am ya zẽ'am wʋ ba de la piisi la, dee tɩ ba pʋam ba sã'ana wʋ saasaadõma la. 16Ba tõoma pʋam tɩ ya wʋn bãŋɛ ba. Bẽm ĩyã, zãaŋa ka tã wʋn wɔm tã'ama, la kẽkɔ ka tã wʋn wɔm kẽnkãma. 17Tɩ-sõŋɔ woo wɔnnɩ na biɛ sõma, la tɩ-be'ego woo wɔnnɩ na biɛ be'ero. 18Tɩ-sõŋɔ ka tã wʋn wɔm biɛ be'ero, la tɩ-be'ego mẽ ka tã wʋn wɔm biɛ sõma. 19Tɩ-sɛka woo n ka wɔnnɩ biɛ sõma, ba wʋn lʋbɛ ẽ mɛ yõ la bugum. 20Bɛla, la de la nẽrba la tõoma pʋam tɩ yãma wʋn bãŋɛ ban de nẽr-sɛba.»

Nẽr-sɛba n sakrɩ Nawẽnnɛ asɩra sɩra

(Aluki 13:25-27)

21Azezi daan le yele yetɩ: «Dagɩ nẽr-sɛka woo n wi'iri mam tɩ ‹Zuudãana, Zuudãana› la n wʋn kẽ Nawẽnnɛ so'olʋm pʋam. La de la nẽr-sɛka n ɩtɩ mam Sɔ Nawẽnnɛ n boe saazuum n boorɩ se'em na n wʋn kẽ.

22Sarɩyadia daarɛ, nẽrba zozo'e wʋn yele mam yetɩ: ‹Zuudãana, Zuudãana, tõma daan dɩkɛ la fõn yʋ'ʋrɛ to'oge Nawẽnnɛ yetɔga tɔgɛ bɔ nẽrba. La fõn yʋ'ʋrɛ tɩ tõma daan dɩkɛ dige kʋlkã'arsɩ, dee daan tõm tõon-yãlma zozo'e la fõn yʋ'ʋrɛ.› 23La mam wʋn yele ba yetɩ: ‹Mam põn ka mina ya, sẽŋɛ-ya fõrgɛ, tõon-be'ero dõma wã.› »

Deto bayi mẽa makrɛ

(Aluki 6:47-49)

24«Nẽr-sɛka woo n wõm mam yetɔga wã, dee ẽŋɛ wʋ yetɔga la n yele se'em na, a dãana ãn wʋ yɛm dãana n mẽ a yire tãmpĩa zuo. 25Tɩ saaga ni, tɩ ko'om pɩrɛ kʋlsɩ zoe wẽ ẽ, tɩ kʋsebgo vuge wẽ ẽ, tɩ a ka lui, se'ere n soe la, a mẽ la tãmpĩa zuo.

26La nẽr-sɛka woo n wõm mam yetɔga wã, dee ka sakɛ ɩta yetɔga la n yele se'em na, a ãn wʋ yalma n mẽ a yire tẽntõnbĩ'isgo zuo. 27Tɩ saaga ni, tɩ ko'om pɩrɛ kʋlsɩ zoe wẽ ẽ, tɩ kʋsebgo vuge wẽ ẽ, tɩ a wuu lui saam saam.»

28La Azezi n tɔgɛ yetɔga la kɩ'ɩlɩm na, zãsŋɔ la di'ige nẽrba la zozo'e mɛ. 29Se'ere n soe la, a zãsŋɔ la tarɩ la pãŋa, la ka ãn wʋ ba lɔɔ karẽnsãandõma n zãsnɩ se'em na.

Pilihan Saat Ini:

Amatie 7: gurDBL

Sorotan

Berbagi

Salin