Marukusu 9
9
1Ɗa u danai le, “Mi ta̱ a kudana ɗa̱ mayun. Aza o yoku a na i a kashani na e kene ukpa̱ ba, sai e ene tsugono tsu Ka̱shile a̱ kuta̱wa̱ n utsura.”
A sabaꞋi ikyamba i Yesu
(Mat. 17:1-13; Luk. 9:28-36)
2Ana ayin a̱ ta̱li a yaꞋin, ɗa Yesu u ɗikai Biturusu, Yakubu koɓolo n Yahaya a kubana a kusan ku yoku endeꞋen ele. Ɗa ikyamba i Yesu i sabaꞋi e kelime ke le. 3Ɗa aminya a̱ ni o okpoi wa̱ri pushe-pushe, ɗa wa̱ri wa u laꞋi ili i na vi e kene dem wa̱ri aduniyan a nam pa. 4Ubuta̱ wa lo, ɗa Musa koɓolo n Iliya† a̱ uta̱i lo. Ɗa a̱ ka̱na̱i kuyaꞋan kadanshi n Yesu. 5Ɗa Biturusu u danai Yesu, “Malum, u gaꞋan ta̱ a na ci na. Ci yaꞋan a̱pa̱m a tatsu, ke te ka Musa, ke te ka Iliya, ke te tamkpamu ka̱ nu.” 6(U dansa ta̱ ili i nam pa adama a na wi ta̱ a kupana wovon n a̱bunda̱i, u yeve ili i na u kudana ba.)
7Ɗa keleshu ku uta̱i ɗe ɗa ka palai le dem, ɗa ka̱la̱ka̱tsu ku uta̱i punu ka danai, “Na va Maku mu ucigi ma̱ va̱ maꞋa. Zuwai atsuvu i panaka yi.” 8Gogo va lo, ana a̱ la̱na̱ka̱i a̱ ubuta̱ dem, o doku e ene vuza lo koɓolo n ele ba, sai Yesu endeꞋen.
9Ele a̱ kucipa̱ a kusan ka, ɗa u dansukai le. “Ka̱ta̱ i dana vuza ili i na ye enei ba, sai ayin a na Maku ma Vuma ma̱ ɗenga̱i a kasaun.”
10Ɗa a̱ ka̱na̱i kadanshi ka uteku u le e mecenshenei, “Yi ɗa̱i u ciya̱i, sai u ɗenga̱ a kasaun?” 11Ɗa e ecei ni, “Yi ɗa̱i i zuwai ɗa nlum n wila̱ n danai, sai Iliya u gita̱ kuta̱wa̱ kafu Kishi?”
12Ɗa Yesu u danai le, “Mayun ɗa Iliya u gita̱ kuta̱wa̱ adama a na u zuwa ili dem yo okpo mayun. Yi ɗa̱i i zuwai ɗa a ɗanai, ‘Maku ma Vuma wi ta̱ o kusoꞋo atakaci kakau, ka̱ta̱ kpamu o goyo yi?’ 13Amma mi ta̱ a kudana ɗa̱, Iliya u ta̱wa̱ ta̱ ɗe ɗa kpamu a yaꞋankai ni ili i na a cigai, derere a uteku u na a ɗanai adama a̱ ni.”
Yesu u lokoi wunla̱i u gbani-gbani u maku
(Mat. 17:14-21; Luk. 9:37-43)
14Ana o bonoi u mukumitoni n na m buwai, ɗa e enei ka̱bunda̱i ka uma ka̱ ka̱ra̱Ꞌi le, koɓolo n Afarishi nu nlum n wila̱ a kuyaꞋan kanananai n ele. 15Ana uma e enei Yesu, ɗa a yaꞋin mereve n a̱bunda̱i. Ɗa a sumai a banai wa̱ ni, ɗa a̱ kya̱sa̱i ni. 16Ɗa we ecei le, “Adama a̱ iya̱n a ɗai yi a kuyaꞋan kanananai?”
17Vuma vi yoku punu a̱ ubuta̱ u uma wa u danai, “Malum, n tuka̱ ta̱ m maku ma̱ va̱ wa̱ nu, wi ta̱ n wunla̱i u gbani-gbani, wa kufuɗa wa yaꞋan kadanshi ba. 18Ayin a na baci de dem wunla̱i u gbani-gbani u nan lo u gita̱i ni, u tsu ɓasangu yi ta̱ a iɗika. Ka̱ta̱ kapufu ka̱ ka̱na̱ kuta̱ a̱ una̱ u ni. Ka̱ta̱ u lumamgbanai nga. Ka̱ta̱ u ka̱na̱ kugandalasa. N yaꞋanka ta̱ mukumitoni n nu kadanshi a̱ uta̱ka̱ wunla̱i u gbani-gbani wa, amma a fuɗa ba.”
19Ɗa Yesu u danai le, “A̱ɗa̱ uma o gogo na a nam pa, aza a na i babu uneki wa̱ a̱ɗu. Ali wana ɗai ma kufuɗa mo yongo n a̱ɗa̱? Ali wana ɗai kpamu ma kufuɗa me reme ka̱ɗu n a̱ɗa̱? A̱ɗa̱ tuka̱i mu m maku ma na.” 20Ɗa a bankai ni m maku ma.
Ana wunla̱i u gbani-gbani we enei Yesu, ɗa u lapai maku ma u vakangi a iɗika, ɗa u ka̱na̱i kujeꞋeke ikyamba. Ɗa u ka̱na̱i kagandalasa, una̱ u ni kpamu n kapufu. 21Ɗa Yesu we ecei esheku a maku a, “Wana ɗai ili i nam pa i gita̱i ni?”
Ɗa esheku a a̱ ushuki, “Ali a̱yi maku kenu. 22Ayin tutu o ci yongo ta̱ a kuvakangu yi a akina ko a̱ mini, adama a na a una yi. Vi baci a kufuɗa va yaꞋan ili, yaꞋan, adama a na vu ɓa̱nka̱ tsu.”
23Ɗa Yesu u danai ni, “Mi baci a kufuɗa? I ta̱ a kufuɗa a yaꞋanka yi ili dem, vuza na baci u nekei ka̱ɗu a̱ ubuta̱ u Ka̱shile.”
24Gogo lo a̱ ubuta̱ wa, ɗa kesheku ka maku ka̱ ɗengusa̱i ka̱la̱ka̱tsu, “N neke ta̱ ka̱ɗu ka̱ va̱. Lokoko mu ukpa̱ɗi u kuneke u ka̱ɗu u va̱.”
25Ana Yesu we enei ka̱bunda̱i ka uma a̱ kuta̱wa̱ m moloko, ɗa u dansukai wunla̱i u gbani-gbani wa, u danai, “Avu wunla̱i u gbani-gbani u tsubebe, n dana wu ta̱, ka̱sa̱kpa̱ yi, ka̱ta̱ vu bana vu doku vu kumba yi ba.”
26Ana wunla̱i u gbani-gbani wo orukpoi, ɗa a gbashangi maku ma a iɗika ka̱u, ɗa ikyamba i ni i ka̱na̱i kujeꞋe, ɗa a̱ ka̱sa̱kpa̱i ni. Ɗa maku ma mo okpoi an ka̱kuwushi. Ali uma o yoku a danai, “Maku ma ma̱ kuwa̱ ta̱.” 27Amma ɗa Yesu u ka̱na̱i ni kukiye ɗa u ɗengusa̱i, ɗa ta na u ɗenga̱i kashani.
28Ana Yesu u uwai a kpaꞋa, ɗa mukumitoni n ni me ecei ni endeꞋen ni. A danai, “Yi ɗa̱i i zuwai ɗa tsu kpa̱ɗa̱i kufuɗa kuloko le?”
29Ɗa u danai le, “Ili i nan lo ya̱ kuta̱ ba, sai koɓolo n kavasa.”
Yesu u doku u dansai ukuna wu ukpa̱ u ni
(Mat. 17:22-23; Luk. 9:43-45)
30A̱ ka̱sa̱kpa̱i ubuta̱ u nan lo, ɗa a pasamgbanai a uɓon u Ga̱lili. U ciga ta na vuza u yeve ba. 31Adama a na wi ta̱ o kuyotsongusu mukumitoni n ni, ɗa u danai le, “I ta̱ e kuneke Maku ma Vuma e ekiye a uma, i ta̱ kpamu a kuna yi, amma u yaꞋan baci ayin a tatsu wi ta̱ a̱ kuɗenga̱.”
32Amma ele ta na e yeve kadanshi ka ba. I ta̱ kpamu a kupana wovon u kece yi.
Vuzagbayin o tsugono tsu gaɗi
(Mat. 18:1-5; Luk. 9:46-48)
33Ɗa a yawai a Kafarnahum, ana u uwai a kpaꞋa, ɗa we ecei le, “Kanananai ka̱ iya̱n kaꞋa i ciya̱i kuyaꞋan a uye?”
34Amma ɗaɗa a paɗai bini, adama a na a uye wa a̱ ka̱na̱ ta̱ kuyaꞋan kanananai ko yayi u kokpo vuza gbayin vi le? 35Ɗa u da̱sa̱ngi u ɗekei Kupanazere a ɗa u danai, “Vuza na baci de dem, wi a kuciga tsugbayin, sai wo okpo vuza kenu, kagbashi ka uma kpamu dem.” 36Ɗa u ɗikai maku me kenu mo yoku ɗa u zuwai e mere me le. Ɗa wo oɓongi maꞋa ɗa u danai, 37“Vuza na baci de dem wi isai maku me kenu tsu nam pa adama a kula ku va̱, mpa ɗa wi isai. Vuza na kpamu wi isai mu, mpa ɗa wi isai koci ba, amma wi isa ta̱ vuza na u suki mu.”
Vuza na u iwain tsu ba, vuza tsu ɗa
(Luk. 9:49-50)
38Ɗa Yahaya u danai ni, “Malum, ce ene ta̱ vuza o kuloko wunla̱i u gbani-gbani n kula ku nu, ɗa tsu sa̱nka̱i ni, adama a na wi o kutono tsu ba.”
39Amma ɗa Yesu u danai, “Ka̱ta̱ i sa̱nka̱ yi ba. Babu vuza na u kuyaꞋan ili i mereve n kula ku va̱, ka̱ta̱ a kubana megeshe u shikasa mu.
40“Vuza na baci de dem wi a tsurala n a̱tsu ba, vuma vu nan lo va vuza tsu ɗa. 41Vuza na baci de dem, u neꞋi ɗa̱ mini mo kusoꞋo adama a na a̱ɗa̱ aza a̱ Kirisiti Kishi a ɗa. Mi ta̱ a kudana ɗa̱, wi a kunamba katsupu ka̱ ni ba.”
Ili i na i tsu zuwa kuyaꞋan ku unushi
(Mat. 18:6-9; Luk. 17:1-2)
42“Vuza na baci de dem, u zuwai muku n wawaꞋa n nam pa n na n nekei ka̱ɗu nu mpa a yaꞋan unushi, u kulaꞋa ta̱ n kugaꞋan a shiyaka yi n kutali e kuɗeku, ka̱ta̱ a vakangu yi a mala. 43Kukiye ku nu ki baci a kuzuwa wu vi yaꞋan unushi, gbatya ku ɗa. U kulaꞋa ta̱ n kugaꞋan vu uwa a kpaꞋa ku Ka̱shile n kukiye ku te, an va uwa a akina a na a̱ kukima̱ ba, n ekiye e re a̱ nu dem. 44[Azun a na o kusovo le punu i a̱ kukuwa̱ ba, akina a na i punu feu a̱ kukima̱sa̱ ba.] 45Kune ku nu ki baci a kuzuwa wu vi yaꞋan unushi, gbatya ku ɗa. U laꞋa ta̱ n kugaꞋan vu uwa a kpaꞋa ku Ka̱shile n kune ku te, an va uwa akina n ene e re. 46[Azun a na o kusovo le punu i a̱ kukuwa̱ ba, akina a na i punu feu a̱ kukima̱sa̱ ba.] 47Ka̱shi ka̱ nu ki baci a kuzuwa wu vu yaꞋan unushi, kongoro kaꞋa. U laꞋa ta̱ n kugaꞋan vu uwa a kpaꞋa ku Ka̱shile n ka̱shi ke te, an va uwa akina n a̱shi e re. 48Azun a na a kutakuma le punu i a̱ kukuwa̱ ba, akina a na i punu feu a̱ kukima̱sa̱ ba.
49“N akina a ɗa a kulapula uma dem, uteku u na a tsu lapula ili nu mkpaɗi.
50“Mkpaɗi mi ta̱ n ugaꞋin, amma n na̱mgba̱ baci, n iya̱n i ɗai a kulapula n ɗa?
“Yongoi tsu mkpaɗi punu a̱ a̱ɗu a̱ ɗa̱, ka̱ta̱ i yongo mayin n uma dem.”
Pilihan Saat Ini:
Marukusu 9: asgNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2012 Wycliffe Bible Translators, Inc. All rights reserved
