Marukusu 8

Yesu u nekei uma a̱kpa̱n a̱ na̱shi ilikulyaꞋa

(Mat. 15:32-39)

1Ayin a nan lo, ɗa ka̱bunda̱i ka uma ko oɓolongi, i ta na n ilikulyaꞋa ba. Ɗa Yesu u ɗekei mukumitoni n ni, ɗa u danai le, 2“Mi ta̱ a kupana asuvayali a uma a nam pa, adama a na anana ɗa ayin a tatsu i koɓolo nu mpa, a buwa ta na n ilikulyaꞋa ba. 3N dana le baci a laza o kubono a kpaꞋa nannai n kambulu, aza o yoku a kufuɗa a bana a kpaꞋa ba. Adama a na aza o yoku uta̱ ta̱ daꞋin.”

4Ɗa mukumitoni n ni me ecei ni, “Te ɗai tsa̱ kuciya̱ ilikulyaꞋa i na i kuyawa ka̱ta̱ ci neke le a kakamba ka nam pa?”

5Ɗa we ecei le, “Burodi vi yain ɗai yi lo n vu ɗa?”

Ɗa a̱ ushuki, “Vi cindere.”

6Ɗa Yesu u danai uma a, a̱ da̱sa̱ngu a iɗika. Ana u ɗikai burodi vi cindere vu nan lo va, ɗa u cikpai Ka̱shile, ɗa u wansai. Ɗa u nekei mukumitoni n ni adama a na e peceke uma a, ɗa a̱ ka̱na̱i kupeceke le. 7I ta̱ kpamu n adan e kenkeꞋen kenu. Ana u cikpai Ka̱shile, ɗa u danai a ɗika e peceke le. 8Ɗa a lyaꞋi ali ɗa a̱ cuwa̱i, ɗa mukumitoni m ɓolongi alyashi a na a buwai, ɗa a shatangi mbana n cindere. 9Uma a na a lyaꞋi ilikulyaꞋa ya i ta̱ uma a̱kpa̱n a̱ na̱shi (4,000). Ɗa u danai le a laza a kubana a kpaꞋa. 10Gogo lo, ɗa u uwai a kpantsu m mukumitoni n ni, ɗa u lazai a kubana a iɗika i Dalamanuta.

Afarishi a na i a̱ kula̱nsa̱ urotu

(Mat. 16:1-4; Luk. 11:29-32)

11Ɗa Afarishi a̱ ta̱wa̱i a̱ ka̱na̱i kanananai n Yesu, i a̱ kula̱nsa̱ yi adama a na o kondo yi u yotsongu le urotu u na wi ɗe gaɗi. 12Ɗa Yesu wu ura̱i n ka̱tsuma̱ ka̱u ɗa u danai le, “Yi ɗa̱i i zuwai ɗa uma o gogo na a nam pa i a̱ kula̱nsa̱ e ene urotu? N dana ɗa̱ mayun, urotu wi lo u na o kuyotsongu uma o gogo na ba.”

13Ubuta̱ wa lo, ɗa u ka̱sa̱kpa̱i le, ɗa u doku u uwai a kpantsu u lazai a kubana upashi.

Kusasu ku burodi ka Afarishi n ku Hiridu

(Mat. 16:5-12)

14Kanna ka nan lo, mukumitoni† n ni a cinukpa ta̱ kuɗika ilikulyaꞋa, i ta̱ m burodi vi te koci punu asuvu a kpantsu. 15Ɗa u dansukai le, “Ka̱ta̱ i yaꞋan cicoꞋo n kusasu ka Afarishi n ku Hiridu.”

16Ɗa a̱ ka̱na̱i kuyaꞋankpanai kadanshi, a danai, “U dana tsu ta̱ ili i nam pa adama a na ci m burodi ba.”

17Ana Yesu u yevei ili i na i a kudansa, ɗa we ecei le, “Yi ɗa̱i i zuwai ɗa yi a kudana a̱ɗa̱ yi m burodi ba? I dana a̱ɗa̱ kpamu i yeve ili i na mi a kudansa ba? A̱ɗu a̱ ɗa̱ i ta̱ udyanuki? 18Yi ta̱ n a̱shi, amma ye ene ba. Yi ta̱ n atsuvu, amma yi a kupana ba. I ci ciɓa feu ba? 19Ana n wansai burodi vu tawun, n nekei uma a̱kpa̱n a tawun (5,000). Mbana n yain n ɗai i pura̱i alyashi a?”

Ɗa a̱ ushuki, “Kupa n i re.”

20“Ana n doku n wansai burodi vi cindere, n nekei uma a̱kpa̱n a̱ na̱shi (4,000), mbana n yain n ɗai i ɓolongi alyashi a?”

Ɗa a̱ ushuki, “N cindere.”

21Ɗa we ecei le, “Ali n gogo na, ka̱ta̱ i yeve ba?”

Yesu u potsokpoi ka̱yimba̱ a Besaida

22Ana a yawai a Besaida, ɗa uma o yoku a bankai ni n ka̱yimba̱, ɗa o folonoi ni u saꞋwa ka̱yimba̱ ka adama a na u potso. 23Ɗa u ka̱na̱i kukiye ku ka̱yimba̱ ka, ɗa u bankai ni pulai vu likuci. Ana u ciꞋikpa̱i ni ntsa̱n a̱ a̱shi a̱ ni, ɗa u saꞋwai ni n kukiye, ɗa we ecei ni, “Vi ta̱ a kufuɗa ve kene ili gogo na?”

24Ɗa ka̱yimba̱ ka ka gaɗukpai kaci, u danai, “Mi ta̱ e kene uma amma adanshi nɗanga n ɗa mi e kene a̱ kuka̱ra̱Ꞌa̱.”

25Ɗa u doku u ɗikai kukiye ku ni, ɗa u saꞋwai ni a̱ a̱shi, ɗa a̱shi a̱ ni a̱ ɓa̱yuwa̱i, ɗa u ka̱na̱i kene ili dem mayin. 26Ɗa Yesu u danai ni u bono a kpaꞋa. “Amma ka̱ta̱ vu uwa a̱ likuci ba.”

Biturusu u danai Yesu Kishi kaꞋa

(Mat. 16:13-20; Luk. 9:18-21)

27Yesu m mukumitoni n ni a uwai a̱ likuci i wawaꞋa i Kasariya Filibi. A uye wa lo, ɗa we ecei le. U danai, “Yayi uma e ci ɗeke mu?”

28Ɗa a̱ ushuki, “Aza o yoku a danai, avu ɗa Yahaya vu Kusumbu ka Akucina. Aza o yoku a danai, Iliya ɗa vi. Aza o yoku kpamu a danai, avu va keneki ko yoku kaꞋa.”

29Ɗa we ecei le, “A̱ɗa̱ tamkpamu yayi i ci ɗeke mu, yayi i danai mpa mi?”

Ɗa Biturusu wu ushuki, “Avu ɗa Kirisiti† Kishi.”#8:29 Ili i na Biturusu wi a kudansa i ɗaɗa na, “Vi ta̱ o kokpo mogono ma̱ tsu.”

30Ɗa Yesu u kushei le, ka̱ta̱ a dana vuza ko a̱yi ɗa ya ba.

Yesu u danai uteku u na u kukuwa̱

(Mat. 16:21-28; Luk. 9:22-27)

31Ɗa Yesu u ka̱na̱i kuyotsongusu le, u danai, “Mayun ɗa Maku ma Vuma mo kusoꞋo ta̱ atakaci kakau n a̱bunda̱i. Ka̱ta̱ azagbagbaꞋin, n anan ganu vu gbagbaꞋin,† koɓolo nu nlum n wila̱, a iwan mu ka̱ta̱ a una mu. Amma a kanna ka tatsu, mi ta̱ a̱ kuɗenga̱ n wuma.” 32Yesu u yaꞋin kadanshi ka nan lo e keteshe. Ɗa Biturusu u ka̱na̱i ni u bankai ni kakambu ke te, ɗa u ka̱na̱i kuɓarangu yi. 33Ana Yesu u kpatalai, ɗa wi indanai mukumitoni n ni. Ɗa u ɓarangi Biturusu u danai, “Ɗenga̱ lo, malyaꞋi, vu ci yaꞋan kadanshi ki ili i Ka̱shile ba, sai i uma.”

34Ɗa u ɗekei ka̱bunda̱i ka uma ka koɓolo m mukumitoni n ni, ɗa u danai le, “Vuza na baci dem, wi a kuciga wo tono mu, sai u iwan ka̱ci ka̱ ni, ka̱ta̱ u ɗika maɗanga ma atakaci ma̱ ni u tono mu. 35Vuza na baci de dem, wi a kuciga wuma u ni, wi ta̱ a kunamba u ɗa. Vuza na baci de dem u iwain wuma u ni, adama a̱ va̱ n adama a Arabali a Singai feu, wi ta̱ a̱ kuciya̱ u ɗa. 36Yi ɗa̱i vuma u kuɗamgba wa̱ ciya̱ a aduniyan a nam pa ra̱ka̱, amma u namba baci wuma u ni? 37Yi ɗa̱i vuma wa ɗamgba we neke, adama a na wi isa wuma u ni? 38Vuza u pana baci wono u va̱ n akaka a̱ va̱, a ayin a nam pa ana aduniyan i tukpa n kawasasa n kagbani-gbani. Maku ma Vuma feu mi ta̱ a kupana wono u ni, ayin a na baci u yawai e kelime ke esheku, koɓolo n alingata a̱ Ka̱shile.”

Pilihan Saat Ini:

Marukusu 8: asgNT

Sorotan

Berbagi

Salin