Marukusu 14

E sheshei kuna Yesu

(Mat. 26:1-5; Luk. 22:1-2; Yah. 11:45-53)

1Ayin e re a ɗa o okpoi, ana a yaꞋan Ka̱ɗiva̱ ka Kupasamgbanai n Ka̱ɗiva̱ ko Burodi vu Moloko.† Ɗa anan ganu vu gbagbaꞋin n nlum n wila̱, a̱ ka̱na̱i kula̱nsa̱ uteku u na a̱ kuka̱na̱ Yesu usokongi adama a na una yi. 2A danai, “Tsa kuyaꞋan nannai ayin a̱ ka̱ɗiva̱ ba, ta lo uma a̱ kuɗengusa̱ vishili.”

A̱ tsunki Yesu maniꞋin ma̱ ma̱gula̱ni

(Mat. 26:6-13; Yah. 12:1-8)

3Ayin a na Yesu wi a̱ likuci i Bataniya, a kpaꞋa ku Sima Ma̱kutu, a̱yi ɗe a kulyaꞋa ilikulyaꞋa, ɗa vuka vu ta̱wa̱i wa̱ ni n kedele ka maniꞋin ka̱ ma̱gula̱ni mi ikebe ka̱u. Ɗa u tsungi maꞋa a kaci ke Yesu.

4Aza a na i lo ɗa a panai wupa n a̱bunda̱i, ɗa a̱ ka̱na̱i mecenshenei, “Yi ɗa̱i i zuwai ɗa a̱ la̱nga̱sa̱i maniꞋin mi ikebe nahannai? 5Ishi baci e denge maꞋa, mi ta̱ a kuyaꞋan ikebe#14:5 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. n a̱bunda̱i i na i yawai ikebe i kuliva̱ amangatawantatsu (300), ka̱ta̱ e neke ikebe ya aza a unambi.” Ɗa a yaꞋin wupa n vuka va, ɗa a dansukai ni n utsura.

6Ɗa Yesu u danai, “Ka̱sa̱kpa̱i ni. Yi ɗa̱i i zuwai ɗa yi o koꞋuso yi? Ili i singai i ɗa u yaꞋankai mu. 7Ayin tutu yi ta̱ lo koɓolo n aza a unambi, ayin a na baci i cigai dem, yi ta̱ a kufuɗa ya̱ ɓa̱nka̱ le, amma mpa ayin tutu ɗa mi lo n a̱ɗa̱ ba. 8U yaꞋan ta̱ ili i na wi a kufuɗa kuyaꞋan, u tsunku ta̱ ikyamba i va̱ maniꞋin kafu ayin a̱ ka̱ciɗa̱. 9Mi ta̱ a kudana ɗa̱ mayun, i baci a kudana uma Arabali a Singai a nam pa a aduniyan, ili i na vuka vu nam pa vi yaꞋin, i ta̱ a kuciɓasa n i ɗa.”

Yahuza wu ushuki kudenge Yesu

(Mat. 26:14-16; Luk. 22:3-6)

10Ɗa Yahuza Iskaryoti a̱ ka̱tsuma̱ ka Kupanazere u banai a̱ ubuta̱ u anan ganu vu gbagbaꞋin, adama a na u neke le Yesu. 11Ana a panai nannai, ɗa a̱ ka̱na̱i ma̱za̱nga̱, ali ɗa a zuwakpanai e kuneke yi ikebe. Ɗa u ka̱na̱i kula̱nsa̱ uye u na u kuneke le.

Yesu u lyaꞋi ka̱ɗiva̱ ka Kupasamgbanai

(Mat. 26:17-25; Luk. 22:7-14; 22:21-23; Yah. 13:21-30)

12Kanna ku ugiti ka na i a kuyaꞋan Ka̱ɗiva̱ ko Burodi vu Moloko.† Kanna ka kukiɗa nlala n Ka̱ɗiva̱ ka Kupasamgbanai. Ɗa mukumitoni n ni me ecei ni, “Te ɗai vi a kuciga tsu bana tsu foɓusoko wu ilikulyaꞋa i Ka̱ɗiva̱ ka Kupasamgbanai?”

13Ɗa u suki mukumitoni n ni aza e re, ɗa u danai le, “Uwai a̱ likuci yi ta̱ a kugasa n vuza m ma̱diki ma̱ mini ucanuki, ka̱ta̱ i tono yi. 14KpaꞋa ku na baci de dem u uwai i dana vuza kpaꞋa va, Malum ma danai, ‘Te ɗai ubuta̱ u na n kulyaꞋa ilikulyaꞋa i Ka̱ɗiva̱ ka Kupasamgbanai m mukumitoni n va̱?’ 15Wi ta̱ o kuyotsongu ɗa̱ kunu ku gaɗi ku singai wadani, ta ɗe i kufoɓusoko tsu.”

16Ɗa mukumitoni ma n ɗenga̱i, ɗa a uwai a̱ likuci. Ɗa ta na a yawai a cinai uteku u na u danai le. Ɗa a foɓusoi Ka̱ɗiva̱ ka Kupasamgbanai lo.

17Ana kulivi ku yaꞋin, ɗa u yawai koɓolo n Kupanazere a. 18Ele a kulyaꞋa ilikulyaꞋa, ɗa Yesu u danai, “Mayun mi ta̱ a kudana ɗa̱, vuza te a̱ ka̱tsuma̱ ka̱ ɗa̱ vu na u kudenge mu ci ta̱ a kulyaꞋa ilikulyaꞋa e mevene me te koɓolo na.”

19Ɗa a̱ na̱mgba̱i a̱tsuma̱, ɗa a̱ ka̱na̱i kece yi vuza te vi te, “Mpa ɗa wo?”

20Ɗa u danai, “Vuza te a̱ ka̱tsuma̱ ka Kupanazere a̱ ɗa̱, vuza na ci a kulyaꞋa e mevene me te. 21Ta ta na nannai, mayun ɗa Maku ma Vuma† mi ta̱ a̱ kukuwa̱ uteku u na wi uɗani ɗe a kadanshi ka̱ Ka̱shile, amma vuma vu na u kuneke Maku ma Vuma wi ta̱ o kokpo ili ya asuvayali. Wi ishi a kulaꞋa n kugaꞋan a matsa yi ba.”

IlikulyaꞋa yu ukocishi

(Mat. 26:26-30; Luk. 22:14-20; 1 Kor. 11:23-25)

22Ele a kulyaꞋa ilikulyaꞋa, ɗa Yesu u ɗikai burodi vi yoku. U cikpai Ka̱shile ɗa u wansai vu ɗa wawaꞋa. Ɗa u nekei mukumitoni n ni ɗa u danai, “Isai burodi vu nam pa ka̱ta̱ i takuma vu ɗa, adama a na ikyamba i va̱ i ɗa.”

23Ɗa u ɗikai mataꞋan ɗa u cikpai Ka̱shile adama maꞋa, ɗa u nekei le. Ɗa dem vi le ɗa o soꞋi. 24Ɗa u danai le, “Na va mpasa n va̱ n ɗa n na mo okpoi agisana a uzuwakpani† u na Ka̱shile ka yaꞋin n uma a̱ ni adama a na u cinukpaka le unushi u le. 25Mi ta̱ a kudana ɗa̱ mayun, mi a kudoku mo soꞋo ma̱kya̱n ba, sai kanna ka na n kudoku mo soꞋo o tsugono tsu Ka̱shile.”

26Ana a yaꞋin vishipa vu kucikpa Ka̱shile, ɗa uta̱i a lazai a kubana a Kusan ku Zaitun.

Biturusu wi ta̱ a kunana Yesu

(Mat. 26:31-35; Luk. 22:31-34; Yah. 13:36-38)

27Ɗa Yesu u danai le, “Ra̱ka̱ vu ɗa̱ yi ta̱ a kusuma ya̱ ka̱sa̱kpa̱ mu, adama a na ta a ɗanai a kadanshi ka̱ Ka̱shile nannai,

‘Mi ta̱ a kulapa maguɓi, ka̱ta̱ tamkpamu nlala n wacuwa.’#Zak. 13:7.

28Amma a̱ ɗengusa̱ mu baci n wuma, mi ta̱ a kulaꞋa ɗa̱ a kuyawa a̱ Ga̱lili.”

29Ɗa Biturusu u danai, “Ko uma ra̱ka̱ a̱ ka̱sa̱kpa̱ wu, mpa ma̱ kuka̱sa̱kpa̱ wu ba.”

30Ɗa Yesu u danai ni, “Mi ta̱ a kudana wu, n kayin ka nam pa kafu motoku ma sala i re, vi ta̱ a kunana mu ali kutatsu.”

31Ɗa Biturusu u ka̱na̱i kudana n utsura, “Ko a dana baci i ta̱ a kuna tsu koɓolo, mpa ma kunana wu ba.”

Ɗa aza a na a buwai dem a danai nannai feu.

Yesu u yaꞋin kavasa endeꞋen ni

(Mat. 26:36-46; Luk. 22:39-46)

32Ɗa a yawai a̱ ubuta̱ u na e ci ɗeke Getsemeni. Ɗa u danai mukumitoni n ni, “Shamgbai na, ali m bana n yaꞋan kavasa.” 33Ɗa u pura̱i Yakubu n Yahaya koɓolo m Biturusu. U na̱mgba̱i ka̱tsuma̱ ka̱u ɗa u panai a̱miki a ikyamba. 34Ɗa u danai le, “Mi ta̱ n una̱mgbi u ka̱tsuma̱ n a̱bunda̱i u na u yawai ɗevu a na wa kuna mu. Vanai mu na ka̱ta̱ i yongo ufoɓushi.”

35Ana u walai u banai kelime kenu, ɗa u yikpa̱i a iɗika, ɗa u vasai, “Ka̱shile, ko vi ta̱ a̱ kushuku, vu takpaka mu atakaci a nam pa a?” 36Ɗa u danai, “Dada, ili ra̱ka̱ wa̱ nu i ɗa yi a kuyaꞋan, takpaka mu atakaci a nam pa, amma vi yaꞋan ili i na n cigai ba, sai i na vi cigai.”

37Ana u bonoi, ɗa u cinai le alavu. Ɗa u ɗekei Biturusu, “Biturusu, alavu a ɗa wu? A̱ɗa̱ ya kufuɗa i yongo n wuma ali viyum vi te ba? 38Yongoi n wuma ka̱ta̱ i yaꞋan kavasa n utsura adama a na ka̱ta̱ i yikpa̱ a̱ ubuta̱ u kukondo ba. Ka̱ɗu ka ciga ta̱ kuyaꞋan ili i na yi derere, amma ikyamba yi ta̱ ram.”

39Ɗa u doku u bonoi a̱ ubuta̱ u kuyaꞋan kavasa, a kudansa ili i te i te i na u dansai cau va. 40Ali n gogo na, ana u bonoi we le, ɗa u doku u cinai le alavu, adama a na alavu a shana ta̱ a̱shi e le. O doku e yeve ili i na a kudana yi ba.

41Ana u doku u bonoi uboni u tatsu, ɗa u danai le, “Ali n gogo na i buwa ta̱ alavu a kuvuka? U yawa ta̱ nannai, ayin a yawa ta̱ e neke Maku ma Vuma e ekiye a aza a unushi. 42Ɗenga̱i tsu walai, enei vuza na u kuneke mu na lo u yawai ɗevu.”

A̱ ka̱na̱i Yesu adama a na a una

(Mat. 26:47-56; Luk. 22:47-53; Yah. 18:3-12)

43Yesu biꞋi a kadanshi, ɗa Yahuza vuza te a̱ ka̱tsuma̱ ka Kupanazere a, u yawai koɓolo n ka̱bunda̱i ka uma n otokobi e le nu mgba̱la̱mgba̱la̱m. Anan ganu vu gbagbaꞋin nu nlum n Wila̱ n nkoshi m gba̱ra̱gba̱ra̱ n ɗa a̱ suki uma a nam pa a. 44Yahuza u danai le ta̱ ɗe agisana a na u kuyaꞋanka le m makyan ma ɗe, “Yi ta̱ e kuyeve vuza na i kuka̱na̱ ayin a na baci m banai a̱ ni ɗa n kya̱sa̱i ni n woɓongi.”

45N kuyawa ku ni, ɗa u banai u Yesu. Ɗa u danai ni, “Malum.” Ɗa wo oɓongi ni. 46Ele ta na ɗa a̱ ka̱na̱i Yesu. 47Amma vuza te lo kashani, ɗa u talai kotokobi ka̱ ni. U kapai kagbashi ko mogono ma anan ganu,† ali ɗa u takpai ni kutsuvu.

48Ɗa Yesu we ecei le, “I ta̱wa̱i kuka̱na̱ mu n otokobi nu mgba̱la̱mgba̱la̱m adanshi vuza na u ci shilika̱ n tsugono? 49Ayin tutu mi ta̱ koɓolo n a̱ɗa̱ a kuyaꞋan kuyotsongusu punu a̱ A̱Ꞌisa̱ a Gbayin, amma i ka̱na̱ mu ba. A yaꞋan ta̱ nannai, adama a na a shatangu ili i na kadanshi ka̱ Ka̱shile ka danai.”

50Ubuta̱ wa lo, ɗa mukumitoni n ni dem n sumai n ka̱sa̱kpa̱i ni.

51Ɗa kolobo ko yoku ka̱ ka̱na̱i kutono le, n kalaba ka̱ ni ulapangi. Ana e enei ni, ɗa a̱ ka̱na̱i ni. 52Ɗa u fa̱ta̱tsa̱i u sumai koshomboɗi, u ka̱sa̱kpa̱ka̱i le n kalaba e ekiye.

Yesu e kelime ka aza e Kusheshe

(Mat. 26:57-68; Luk. 22:54-71; Yah. 18:13-24)

53Ubuta̱ wa lo, ɗa a ɗikai Yesu a kubanka a̱ ubuta̱ u Mogono ma anan ganu. Anan ganu vu gbagbaꞋin, nu nkoshi m gba̱ra̱gba̱ra̱ n Yahuda, nu nlum n wila̱ dem a banai o ɓolongi ka̱ci ke le wa̱ ni. 54Biturusu u tonoi a̱ kucina̱ ku le dadaꞋin sapu ɗa a yawai ulanga u kpaꞋa u mogono ma anan ganu ma. Ɗa u da̱sa̱ngi ɗevu n aza a kindi a kpaꞋa ku mogono ɗa u ka̱na̱i kunyashika akina. 55Anan ganu vu gbagbaꞋin, n aza e Kusheshe a a̱ ka̱na̱i kula̱nsa̱ urotu u na a̱ kuka̱na̱ka̱ yi, adama a na a una yi, amma a̱ ciya̱ ba. 56Aza a̱ a̱bunda̱i e le a̱ ka̱na̱i kuyaꞋan ngan ma aꞋuwa, amma una̱ u le wo okpo u te ba.

57Ɗa aza o yoku u ɗenga̱i a̱ ka̱na̱i kudansa aꞋuwa, 58a danai, “Tsu pana ta̱ u danai, a̱yi wi ta̱ a̱ kufa̱da̱ A̱Ꞌisa̱ a Gbayin a na uma a maꞋi, ka̱ta̱ u maꞋa o yoku n umaꞋi u vuma ba, a̱ ka̱tsuma̱ ka ayin a tatsu.” 59Ko n nannai kadanshi ke le, ka ta̱wa̱ ke te ba.

60Ɗa Mogono ma anan ganu ma̱ ɗenga̱i e mere me le. Ɗa we ecei Yesu, “Vi n ili i na va̱ kushuku adama a ili i na uma a nam pa a dansai adama a̱ nu ba?”

61Amma ɗa u paɗai bini, u dana ili ba. Ɗa Mogono ma anan ganu ma u doku we ecei ni, “Avu ɗa Kirisiti Kishi, Maku ma̱ Ka̱shile† ka na e ci neke tsugbayin ba?”

62Ɗa Yesu u danai, “Mpa ɗa. Yi ta̱ e kene Maku ma Vuma ida̱shi e kukiye ku usingai ku Uba̱nga̱ri a̱ kuta̱wa̱ gaɗi ve eleshu!”

63Ɗa Mogono ma anan ganu ma karai ntogu n ni, ɗa u danai, “Ngan n ne n ɗai kpamu tso kudoku tsa̱ la̱nsa̱ wa̱ ni? 64A̱ɗa̱ i pana ta̱ kadanshi ki ishikushi ka nam pa u Ka̱shile ka na u yaꞋin. A̱ɗa̱ yi ɗa̱i ye enei?”

Ɗa a kiɗakai ni afada, a danai u yawa ta̱ u kuwa̱.

65Ɗa aza o yoku a̱ gita̱i kuciꞋikpa̱ yi ntsa̱n, ɗa a palai ni a̱shi. Ɗa a̱ ka̱na̱i kudukpa̱ yi n ka̱kuꞋun n a danai, “Dana tsu, yayi u lapai nu.” Ɗa aza a kinda A̱Ꞌisa̱ a Gbayin a̱ ka̱na̱i kuɓasa yi.

Biturusu u nanai Yesu

(Mat. 26:69-75; Luk. 22:56-62; Yah. 18:15-27)

66Biturusu lo ida̱shi a ulanga u kpaꞋa wa, ɗa kagbashi ke mekere ko Mogono ma anan ganu, ka yawai. 67Ana u cinai Biturusu a kunyashika akina, ɗa u gbatai ni n a̱shi. Ɗa u danai, “Avu feu vi ta̱ koɓolo n Yesu vu Nazara.”

68Amma ɗa Biturusu u nanai, u danai, “Mpa n yeve ili i na vi a kudansa ba.” Ɗa wu uta̱i punu e kefeku ka, ɗa motoku ma salai.

69Ɗa kagbashi ke mekere ka ko doku ke enei ni, ɗa u danai aza a na i lo kashani a̱ ubuta̱ wa, “Vuma vu nam pa va feu i ta̱ koɓolo.” 70Amma ɗa Biturusu u doku ɗa u nanai.

Ɗa megeshe ma yaꞋin kenu, ɗa aza a na i lo kashani m Biturusu o doku a danai, “Avu feu yi ta̱ koɓolo, adama a na avu vuza vu Ga̱lili ɗa.”

71Ɗa u ka̱na̱i kuyaꞋanka ka̱ci ka̱ ni akucina, u danai, “Mpa feu n yeve vuma vu na i ciya̱i ba.”

72Gogo lo, ɗa motoku mo doku ma salai i re. Ɗa Biturusu u ciɓai n kadanshi ka na Yesu u danai ni, “Kafu motoku ma sala i re, vi ta̱ a kunana mu ali kutatsu.” Ana u ciɓai n ili i na Yesu u danai ni, ɗa u ka̱na̱i ma̱shi.

Pilihan Saat Ini:

Marukusu 14: asgNT

Sorotan

Berbagi

Salin