Matiyu 24

A̱Ꞌisa̱ a Gbayin i ta̱ a̱ kuyikpa̱

(Mar. 13:1-2; Luk. 21:5-6)

1Yesu u ka̱sa̱kpa̱i A̱Ꞌisa̱ a Gbayin a, a̱yi a nwalu, ɗa mukumitoni n ni n ta̱wa̱i adama a na o yotsongi imashi ya̱ A̱Ꞌisa̱ a Gbayin a. 2Amma ɗa u danai le, “Ye ene ta̱ imashi i nam pa ya ra̱ka̱? N dana ɗa̱ mayun, ko katali ke te a̱ kuka̱sa̱kpa̱ umatyamgbani a gaɗi vu toku ba. I ta̱ a̱ kufa̱da̱ le ra̱ka̱ sai a iɗika.”

Ayin a atakaci i ta̱ a̱ kuta̱wa̱

(Mar. 13:3-13; Luk. 21:7-19)

3M megeshe kenu Yesu lo ida̱shi a Kusan ku Zaitun, ɗa mukumitoni n ni n ta̱wa̱i adama a na o yongo n a̱yi uteku u le. A danai, “Dana tsu, wana ɗai ili i nam pa ya i kuyaꞋan? Yi ɗa̱i kpamu i kokpo urotu u na u kuyotsongu tsu a na ayin a yawai a na vo kudoku va̱ ta̱wa̱, koɓolo kpamu n ayin a na aduniyan o kukotso?”

4Yesu u danai le, “Ka̱ta̱ i ka̱sa̱kpa̱ vuza u ya̱nsa̱ ɗa̱ ba. 5Uma n a̱bunda̱i i ta̱ a̱ kuta̱wa̱ n kula ku va̱, i ta̱ a kudana ele ɗa Kishi ka. I ta̱ kpamu a̱ kuya̱nsa̱ uma n a̱bunda̱i. 6Yi ta̱ a kupana ukuna u kuvon n arabali o kuvon a na i lo a̱ kuta̱wa̱, amma ka̱ta̱ i pana wovon ba. Ili i nam pa yi ta̱ a kuyaꞋan nannai, kafu kukotso ka aduniyan ku ta̱wa̱. 7Iɗika i kushilika̱ ta̱ n iɗika i yoku; tsugono kpamu ci ta̱ a̱ kushilika̱ n tsugono ci yoku. I ta̱ a kuyaꞋan ayin a kambulu ka̱ a̱bunda̱i. Iɗika i kuyongo ta̱ a̱ kugba̱ɗa̱sa̱ a̱ ubuta̱ kakau. 8Ili i nam pa ra̱ka̱ yi ta̱ an ka̱giti ka̱ a̱ga̱nda̱ a limata.

9“Ka̱ta̱ uma a̱ ka̱na̱ ɗa̱, ka̱ta̱ e neke ɗa̱ a̱ ubuta̱ u na a takacika ɗa̱, ka̱ta̱ a una ɗa̱. Uma ra̱ka̱ i ta̱ a kuꞋiwan ɗa̱ adama a na i nekei a̱ɗu nu mpa. 10Ka̱ta̱ uma n a̱bunda̱i a̱ ka̱sa̱kpa̱ kutono mu. I ta̱ a kuyaꞋan tsurala n itoku i le ka̱ta̱ a iwanai. 11Eneki a aꞋuwa n a̱bunda̱i i ta̱ a̱ kuta̱wa̱ ka̱ta̱ a zuwa uma n a̱bunda̱i a̱ ushuku n aꞋuwa. 12Kagbani-gbani ka̱ ka̱ra̱Ꞌa̱ ta̱, ka̱ta̱ ka zuwa uma n a̱bunda̱i a̱ ka̱sa̱kpa̱ maciganai. 13Amma aza a na a gbamai asuvu ali sai uteku, i ta̱ a̱ kuciya̱ wishi. 14Ayin a na baci a danai Arabali a Singai† o tsugono tsu Ka̱shile a aduniyan ra̱ka̱, ɗa u kokpo an urotu wi iɗika ra̱ka̱. A ayin a nan lo a ɗa kukotso ka aduniyan ka̱ kuta̱wa̱.

Ili yu unata i na i tsu la̱nga̱sa̱ ili

(Mar. 13:14-23; Luk. 21:20-24)

15“Ayin i ta̱ lo a̱ kuta̱wa̱ ana i kene ili i na keneki Daniyan u yaꞋin kadanshi: ‘Ili yu unata i na i tsu la̱nga̱sa̱ ili ra̱ka̱’ i na yi punu o Mololo ma Ciɗa.#Dan. 9:27; 11:31; 12:11. (U gaꞋan ta̱ vuza vu kukece, u yeve n ka̱ci ka̱ ni.) 16A ayin a nan lo, uma a na i Yahuda ko a ciga ko a iwan sai a suma a kubana a nsasan adama a na a laꞋaka n wuma u le. 17Vuza na wi pulai ɗevu m kpaꞋa, ka̱ta̱ u bono asuvu adama a na u taɓula ucanuku u ni ba.#24:17 Matiyu u danai, “uma a gaɗi vu kunu.” Ubuta̱ u na Yesu u yongoi, iꞋuwa ya a yaꞋan ta̱ i ɗa n ubuta̱ u na vuza u kukumba gaɗi adama a na u yongo ɗe a kuvuka. 18Vuza na wi a kashina, ka̱ta̱ u bono a kpaꞋa adama a na u taɓula aragbatali a̱ ni ba. 19A ayin a nan lo, ili ya atakaci i ɗa a̱ ubuta̱ wa̱ a̱ma̱ci a na i n ikyamba i kure ko aza a na i nu nreɓu!

20“YaꞋin avasa u Ka̱shile ka̱ta̱ ilaɗi i ɗa̱ i yaꞋan a ayin a̱ lyushi ko kanna ka Ashibi ba! 21Na va ɗaɗa atakaci a na a laꞋi n kuyaꞋan wuya-wuya ali n ayin u ugiti wa aduniyan. Ili yi lo i wuya-wuya tsu nam pa i na i kudoku ya yaꞋan nannai kpamu ba. 22Amma Ka̱shile ke jebe ta̱ ɗe ayin a, wi ishi baci u yaꞋan nannai ba, vuza wi lo a kulaꞋa ba. Amma Ka̱shile ki ta̱ e kujebe ayin a adama a uma a na u zagbai.

23“A ayin a nan lo, vuza yoku u kudana ɗa̱ ta̱, ‘Indanai, Kishi ka ɗa na!’ Ko vuza yoku u dana, ‘A̱yi ɗa na ɗe!’ Amma ka̱ta̱ yu ushuku ba. 24Eneki a aꞋuwa n Ishi a aꞋuwa i ta̱ a̱ kuta̱wa̱, ka̱ta̱ a yaꞋan ili i mereve i gbagbaꞋin. I ta̱ a kudakaka adama a na a̱ ciya̱ uma a na o kutono le, ali n aza a na Ka̱shile ka zagbai, ki baci a kufuɗa kuyaꞋan nannai. 25Gogo na m ɓarangu ɗa̱ ta̱ ɗe adama a kakuna ka nam pa kafu ka̱ gita̱.

26“Adama a nannai, vuza yoku u dana ɗa̱ baci, ‘Indanai, Kishi ka̱ ɗa̱ kaꞋa na ɗe e mere mu une,’ ka̱ta̱ i bana i la̱nuku ba. Ko a dana ɗa̱ baci, ‘Indanai, a̱yi ɗa na usheɗeki,’ ka̱ta̱ yu ushuku ba! 27Ayin a na baci Maku ma Vuma ma̱ ta̱wa̱i, yaba dem wi ta̱ e kene yi, uteku u na i ce ene kutashi ku ulaɗi ku na ku tsa akana gaɗi ra̱ka̱. 28Uteku u na asakali a̱ tsu ɓolongu ka̱ci ke le a̱ ubuta̱ wa agifa, nannai ɗa feu urotu u nam pa wa wi ta̱ o kuyotsongu a na kukotso ka aduniyan ku yawa ta̱ ɗevu.

Kubono ku Maku ma Vuma

(Mar. 13:24-27; Luk. 21:25-28)

29GogoꞋo va lo ayin a wuya-wuya o kotso baci,

‘Kanna ki ta̱ o kubono ka̱yimbi,

wotoi kpamu u kudoku wa kakana ba.

Azangata i ta̱ a̱ kuyikpa̱,

utsura u na kpamu wi a̱ a̱da̱nga̱shile wi ta̱ a̱ kugba̱ɗa̱.’#Ish. 13:10.

30“Ayin a nan lo, i ta̱ e kene urotu u Maku ma Vuma wi ta̱ a̱ kuta̱ gaɗi. Ka̱ta̱ uma ra̱ka̱ a aduniyan a̱ shika̱ adama o wovon. I ta̱ e kene Maku ma Vuma a̱ kuta̱wa̱ gaɗi ve eleshu n utsura n tsugbayin tsu gbangam. 31Wi ta̱ a̱ kusuku alingata a̱ ni kelime n izumgbi i gbayin i kavana, ka̱ta̱ o ɓolongu a̱ ubuta̱ u te aza a na u zagbai, ele na i daꞋin a̱ ubuta̱ dem a uteku wi iɗika ya aduniyan.

KupiꞋisa ili a̱ ubuta̱ u maɗanga ma̱ ma̱biri

(Mar. 13:28-31; Luk. 21:29-33)

32“Gogo na piꞋisai ili i nam pa a̱ ubuta̱ u maɗanga ma̱ ma̱biri: Ayin a na baci acaka a̱ ni o topoi a̱vuku a savu, i yeve ta̱ lyushi i yawa ta̱ ɗevu. 33Adama a nannai ye ene baci ili i nam pa ra̱ka̱ a kuyaꞋan, i kuyeve ta̱ a na ayin a a yawai ɗevu. 34Ciɓai ili i nam pa ya ra̱ka̱ i kokpo ta̱ nannai kafu uma a na i n wuma gogo na a̱ kuwa̱ ra̱ka̱. 35Gaɗi n iɗika yi ta̱ a kulaza, amma kadanshi ka̱ va̱ ki ta̱ o kokpo ko wanai.

Babu vuza na u yevei ayin a na Yesu u kubono

(Mar. 13:32-37; Luk. 17:26-30, 34-36)

36“Babu vuza na u yevei kanna ko ayin a, ko alingata a gaɗi, ko Maku a̱ ka̱ci ka̱ ni u yeve ba. Esheku endeꞋen a̱yi ɗa u yevei. 37Ayin a na baci Maku ma Vuma mi o kubono, ili yi ta̱ o kokpo tsu na yi a ayin a na Nuhu u yongoi. 38A ayin a nan lo kafu mini ma na ma lyaꞋi uma, uma i ta̱ a kulyaꞋa n o soꞋi n a yaꞋin yolo uteku u na a ci yaꞋansa ali a kubana kanna ka na Nuhu u uwai a kpantsu. 39E yeve ili i na yi a̱ kuta̱wa̱ ya cina le ba, sapu mini ma̱ ta̱wa̱i ɗa ma lyaꞋi le ra̱ka̱. Ta u kokpo nannai ayin a na baci Maku ma Vuma mo kubono. 40Ali e re a kuyaꞋan ta̱ a kashina. I ta̱ a kuɗika vuza te, vuza te kpamu i ta̱ a̱ kuka̱sa̱kpa̱ yi. 41A̱ma̱ci e re a kuyaꞋan ta̱ a kiya. I ta̱ a kuɗika vuza te, vuza te kpamu ka̱ta̱ a̱ ka̱sa̱kpa̱ yi.

42“Adama a nan lo yongoi ufoɓushi, adama a na i yeve kanna ka na Vuzagbayin vu ɗa̱ u kubono ba. 43Vuza vu kpaꞋa wi baci e kuyeve a ayin a na koboki ki a̱ kuta̱wa̱, vi yeve ta̱ mayun wi ta̱ o kuyongo n wuma, ka̱ta̱ u kpa̱ɗa̱ kuka̱sa̱kpa̱ koboki ka ka uwa a kpaꞋa ku ni ka yaꞋan uboki. 44A̱ɗa̱ feu sai i yongo ufoɓushi ayin dem. Adama a na Maku ma Vuma ma kuta̱wa̱ ta̱ ayin a na i zuwai agaꞋin wi a̱ kuta̱wa̱ ba.

Agbashi a na i m ma̱riki

(Luk. 12:41-48)

45“Yayi kagbashi ka na ki m ma̱riki n ugboji? A̱yi ɗa vuza na vuzagbayin vi ni u zuwai wi inda agbashi a na a buwai, ka̱ta̱ u neke le tsuwaꞋa ci le a ayin a na a gaꞋin. 46Vuzagbayin vi ni u bono baci ɗa u cinai kagbashi ka ka yaꞋan ta̱ ulinga u singai, wi ta̱ a̱ kuciya̱ katsupu. 47N dana ta̱ mayun, vuzagbayin va u kuzagba ta̱ kagbashi ka nan lo ka̱ la̱na̱ ili i na wi n i ɗa ra̱ka̱. 48Amma a̱yi kagbashi ka gbani-gbani ka baci wi, u kudana ta̱ ka̱ci ka̱ ni vuzagbayin vi ni u kubono ba, ali ayin n a̱bunda̱i. 49Ka̱ta̱ u gita̱ kulapa otoku a agbashi, ka̱ta̱ u lyaꞋa u soꞋo ali i maka yi n aza o yoku a na i uteku ci ni. 50Vuzagbayin va wi ta̱ a̱ kuta̱wa̱ ayin a na kagbashi ka nan lo ko foɓusoi ba ka̱ta̱ u danda yi. 51Vuzagbayin va u kusukuta̱ yi ta̱ gbani-gbani ka̱ta̱ u loko yi u bana u da̱sa̱ngu n aza a kapalaka̱shi, a̱ ubuta̱ u na uma a̱ kushika̱ n a lumamgbanai ngaꞋan n atakaci.”

Pilihan Saat Ini:

Matiyu 24: asgNT

Sorotan

Berbagi

Salin