Matiyu 23

Yesu u dansukai aza a gbagbaꞋin o yoku

(Mar. 12:38-40; Luk. 11:43, 46; 20:45-46)

1Ɗaɗa Yesu u danai ka̱bunda̱i ka uma ka m mukumitoni n ni, 2“Nlum n Wila̱ n Afarishi i ta̱ n utsura a dana ɗa̱ ili i na Wila̱ u Musa u danai. 3Adama a nannai, tonoi ili dem i na i o kuyotsongusu ɗa̱, amma ka̱ta̱ i yaꞋan uteku u na i a kuyaꞋan ba. Adama a na ele a tsu dansa ta̱, amma a ci yaꞋan ili i na a dansai ba. 4A ci shiya ta̱ ucanuku wa̱ a̱miki u na uma i a kufuɗa kuɗika ba, ko n nannai a tsu zuwaka uma ekiye ko kenu adama a na a̱ ɓa̱nka̱ le kucanuku ucanuku wa ba.

5“A ci yaꞋan ta̱ ili i singai adama a na uma e ene le. Yaba dem vu na u buwai u ci shiya ta̱ alaꞋwin wuntsukpi n iɗani i Katagarda ka Ciɗa, amma alaꞋwin a Afarishi a tsu laꞋa ta̱ m gbagbaꞋin. Uteku u na kpamu a tsu zuwa tsuzogu tsu ntogu n le u tsu laꞋa ta̱ m gbagbaꞋin. 6A ci ciga ta̱ ili yi ida̱shi i na i laꞋi n kugaꞋan a̱ ubuta̱ u ka̱ɗiva̱ n ida̱shi i kelime a̱ ubuta̱ u koɓolo. 7I baci kpamu e kuden, a ci ciga ta̱ uma a̱ kuɗa̱ngu a̱ kya̱sa̱ le n kula ku tsugbayin, ‘Malum.’

8“Ka̱ta̱ i ka̱sa̱kpa̱ vuza u ɗeke ɗa̱ ‘Malum’ ba, adama a na Malum me te ma yi m maꞋa koci, adama a na a̱ɗa̱ kpamu vi te ɗa yi dem. 9Ka̱ta̱ i ɗeke vuza a aduniyan n kula ku tsugbayin ‘Dada’ ba, adama a na Dada vi te ɗa yi n vu ɗa, a̱yi na wi gaɗi. 10Ka̱ta̱ kpamu vu ka̱sa̱kpa̱ vuza u ɗeke wu ‘Vuzagbayin’ ba, adama a na Vuzagbayin vi te ɗa yi n vu ɗa, a̱yi ɗa Kishi. 11Vuza na baci u laꞋi m gbayin a̱ ka̱tsuma̱ ka̱ ɗa̱, wo okpo kagbashi ka aza a̱ ni. 12Vuza na baci u bonokoi ka̱ci ka̱ ni vuzagbayin, i ta̱ o kugoyo yi. Vuza na baci u goyoi ka̱ci ka̱ ni, i ta̱ o kubonoko yi vuzagbayin.

13“Ili ya atakaci i ɗa wa̱ ɗa̱ nlum n Wila̱ n Afarishi. A̱ɗa̱ aza a kapalaka̱shi! Adama a na a̱ɗa̱ yi a̱ kuka̱sa̱kpa̱ uma a uwa o tsugono tsu Ka̱shile ba. A̱ɗa̱ a̱ ka̱ci ka̱ ɗa̱ i uwa ba, ɗa yi a̱ kusa̱nka̱ aza a na i a kuciga kuꞋuwa feu. [ 14Ili ya atakaci i ɗa wa̱ ɗa̱ nlum n Wila̱ n Afarishi. A̱ɗa̱ aza a kapalaka̱shi! I tsu doro ta̱ agapa ka̱ta̱ yi isa iꞋuwa i le, ka̱ta̱ i yaꞋan avasa a ugaɗi adama a na uma e ene ɗa̱. Adama a nan lo, yi ta̱ a kulaꞋa n kutakacika.]#23:14 Atagarda a̱ kuku o yoku i n kabaꞋin ka nam pa 14 ba.

15“Ili ya atakaci i ɗa wa̱ ɗa̱ nlum n Wila̱ n Afarishi. A̱ɗa̱ aza a kapalaka̱shi! I ci yaꞋan ta̱ nwalu a kubana daꞋin a iɗika m mala adama a na i ciya̱ vuza kutoni vi te. Ayin a na baci i ciya̱i ni, u kulaꞋa ɗa̱ ta̱ n kawuya ka na ka zuwa yi u uwa akina n a̱ɗa̱.

16“Ili ya atakaci i ɗa wa̱ ɗa̱, a̱ɗa̱ aza e kelime a na yi a̱yimba̱! I tsu dana ta̱, ‘Ko vuza u kucina n A̱Ꞌisa̱ a Gbayin a̱ Ka̱shile a ayin a na baci a yaꞋin uzuwakpani ɗa i koɗoi uzuwakpani u nan lo, ili yi punu ba. Amma a yaꞋan baci akucina n azanariya a na i a̱ A̱Ꞌisa̱ a Gbayin, sai a shatangu uzuwakpani u nan lo.’ 17A̱ɗa̱ alau a̱ a̱yimba̱ a ɗa! Yi ɗa̱i i laꞋi m gbayin: azanariya ko A̱Ꞌisa̱ a Gbayin a na o bonokoi azanariya a ciɗa? 18Ɗa kpamu i danai, ‘Uma a kucina baci n katalikalyuka a yaꞋan baci uzuwakpani ɗa i koɗoi uzuwakpani u nan lo, ili yi punu ba. Amma a kucina baci n kuneꞋe ku na ki a katalikalyuka ka, sai a shatangu uzuwakpani u nan lo.’ 19Indanai biꞋi uyimba̱ u ɗa̱! Yi ɗa̱i i laꞋi m gbayin: kuneꞋe ka ko katalikalyuka ka na ko bonokoi kuneꞋe ka ciɗa? 20Adama a nannai, vuza u kucina baci n katalikalyuka, wi ta̱ a kuyaꞋan a kucina n katalikalyuka ka n kuneꞋe ku na ki a katalikalyuka ka ra̱ka̱. 21Ɗa baci kpamu u kucinai n A̱Ꞌisa̱ a Gbayin, wi ta̱ a kuyaꞋan akucina n A̱Ꞌisa̱ a Gbayin n Ka̱shile ka na ki ida̱shi punu. 22Ɗa baci kpamu vuza u kucinai n gaɗi, wi ta a kuyaꞋan akucina n kakuba ko tsugono tsu Ka̱shile n vuza na wi ida̱shi ɗe.

23“Ili ya atakaci i ɗa wa̱ ɗa̱ a̱ɗa̱ nlum n Wila̱ n Afarishi. A̱ɗa̱ aza a kapalaka̱shi! I ci neke ta̱ Ka̱shile ili i te a̱ ka̱tsuma̱ ka kupa ki ili i na i ciya̱i dem, ali n ili kenkeꞋen i mavaꞋan ma kusan n igeɓetsu. Amma ɗa i kpa̱ɗa̱i kutono kuyotsongusu ku mayun ku gbayin ku Wila̱, ɗaɗa kindana uma derere, n kupana ka asuvayali a uma, n kutono ku Ka̱shile n ka̱ɗu ke te. Ili i nam pa ya i ɗa i yotsoi i yaꞋan ka̱ta̱ i lyaꞋa kelime n kuyaꞋan n ili i yoku i nan lo ya. 24A̱ɗa̱ aza e kelime a na yi a̱yimba̱! Yi ta̱ uteku tsu vuza na wu uta̱ka̱i kayun a̱ mini mo kusoꞋo ma̱ ni m meshere, ɗa u kucikpai u soɗongi karakuma!#23:24 Yesu wi ta̱ a kudana, “Vu dama ta̱ n unushi u kenu amma vu la̱na̱ unushi u gbayin ba.”

25“Ili ya atakaci i ɗa wa̱ ɗa̱ nlum n Wila̱ n Afarishi. A̱ɗa̱ aza a kapalaka̱shi! I tsu za̱Ꞌa̱ ta̱ pulai va ataꞋan nu nkoꞋo, amma punu a asuvu i ta̱ tukpa n ili i na i ciya̱i a̱ ubuta̱ u kudoro uma n kupanaka ka̱ci ka̱ ɗa̱ uyoꞋo koci. 26Afarishi, a̱ɗa̱ a̱yimba̱ a ɗa! Za̱Ꞌi biꞋi asuvu a ataꞋan nu nkoꞋo n ɗa̱ ciɗa a cau, ka̱ta̱ ciya̱ pulai va feu wo okpo ciɗa!

27“Ili ya atakaci i ɗa wa̱ ɗa̱ nlum n Wila̱ n Afarishi. A̱ɗa̱ aza a kapalaka̱shi! Yi ta̱ an asaun a na a tsu sura n kayalaka̱ri ka̱ta̱ o okpo wa̱ri. Pulai va asaun a nan lo a tsu gaꞋan ta̱ kinda, amma punu a asuvu, i ta̱ tukpa n etele a uma n ili yi unata kakau. 28Ta feu nannai, pulai i tso okpo ta̱ an uma a usuɓi a̱ ubuta̱ u yaba dem, amma punu a asuvu yi ta̱ tukpa n kapalaka̱shi n unushi.

29“Ili ya atakaci i ɗa wa̱ ɗa̱ nlum n Wila̱ n Afarishi. A̱ɗa̱ aza a kapalaka̱shi! I ci yaꞋanka ta̱ eneki asaun a singai, ka̱ta̱ i kala asaun a aza a usuɓi. 30I tsu dana ta̱, ‘Ishi baci ci yaꞋan wuma u tsu a ayin i ikaya i tsu, ci ishi a̱ kuɓa̱nka̱ le a una eneki a ba.’ 31Adama a nannai kadanshi ka̱ ɗa̱ ka kucikpa ta̱ ko polo ɗa̱ ana i danai a̱ɗa̱ ɗa ntsukaya ma aza a na a unai eneki! 32Eneshei, ka̱ta̱ i kotsoso ili i na ikaya i ɗa̱ i gita̱ngi ɗe!

33“A̱ɗa̱ oko m muku ma agbaturu. Nini ɗai i kuyaꞋansa ka̱ta̱ i were kuꞋuwa a kpaꞋa ka akina? 34Adama a nannai mi ta̱ a̱ kusuꞋuku ɗa̱ eneki n aza a ugboji nu nlum. Ele vi yoku yi ta̱ a kuna, ele vi yoku yi ta̱ a kubapa a maɗanga ma atakaci. Ele vi yoku yi ta̱ a kulapa le punu a unu a avasa a̱ ɗa̱, ka̱ta̱ i loko le a̱ likuci i nam pa a kubana likuci i nan ɗe. 35Adama a nan lo, Ka̱shile ka kutakacika ɗa̱ ta̱ adama a uma ra̱ka̱ a babu unushi a na yu unai aza a na a saꞋwai kuyaꞋan wuma a aduniyan a nam pa. Na a cau a̱ɗa̱ yu unai Habila† vuma vu usuɓi, ɗa i lyaꞋi kelime m munaka ali sai Zakariya kolobo ka Barikiya. A̱yi ɗa vuza na yu unai a̱ ka̱tsuma̱ ka̱ A̱Ꞌisa̱ a Gbayin e mere ma katalikalyuka m Mololo ma Ciɗa.† 36N dana ɗa mayun, ili i nam pa ra̱ka̱ yi ta̱ a kucina ɗa̱, a̱ɗa̱ na yi n wuma gogo na.”

Yesu u ciga ta̱ Urishelima

(Luk. 13:34-35)

37Yesu u lyaꞋi kelime n kudana, “A̱ɗa̱ uma a Urishelima! Uma a̱ ɗa̱ a una ta̱ eneki, ɗa a varai aza a na Ka̱shile ka̱ suꞋuki le. N yaꞋan ta̱ kataci m ɓolongu uma a̱ ɗa̱, tsu na motoku mo tsu ɓolongu muku n ni ɗaka ve evelyu a̱ ni. Amma ɗa i iwain. 38Adama a nannai, Ka̱shile ki ta̱ a̱ kuka̱sa̱kpa̱ A̱Ꞌisa̱ a Gbayin a̱ ɗa̱, ka̱ta̱ a ɗa o okpo lekeɗi. 39N dana ɗa̱ ta̱, yo kudoku ye kene mu ba, sai a ayin a nan lo a na i kudana, ‘Ka̱shile ka zuwaka vuza na u ta̱wa̱i n kula ku Vuzavaguɗu una̱singai.’ ”

Pilihan Saat Ini:

Matiyu 23: asgNT

Sorotan

Berbagi

Salin