Mateu 14
14
Ioni Tau Bapitaiso Yan' Aniga
(Marika 6:14‐29; Luke 9:7‐9)
1Tuta tanoi wayahina Erodi, tauna Galili a tau veimea, Iesu yana dewa vaneana nononi, 2e Erodi tauna ya tau paisewa wayahia Iesu ya dewaia voneyei, ivona, “Onoto‑nana vivane Ioni Tau Bapitaiso, ka tauna avaha anigea mini‑havine! Wayahina ya bagibagi ananina nui dewadewa.”
3Erodi ipuipupu Ioni Tau Bapitaiso yan' aniga wayahina deina, iuna nonova tauna Ioni poy'‑avini, ka yohoni, ka manua yohona nihenina boui. Ka dewaia ivin'‑omo Ioni wayahina, iuna aitam vavine ai wava Erodiasa wayahi. Naona Erodiasa Erodi vaneina ana wava Pilipi awana,#Lev 18:16; 20:21; Luk 3:19-20. 4kate Erodi ya nuanua namoiana. Wayahina, epei, tavinei. Iakwa, e Ioni Tau Bapitaiso omo Erodi wayahina, haeyei, ivona, “Yam dewa taina eha dewa ahiahina. Avaha vaneim awana etavinei, ka dewana vivane kenene.” 5Wayahina, Erodi nua‑goyo ka nuanuana Ioni na‑nau‑vi‑anigi, kate tomotau habuhabui iawaehei Ioni vivane tau apa‑taputapu aitam. Wayahina, Erodi matamatauta, ka eha Ioni ta‑nau‑vi‑anigi.#Mat 21:26.
6Ka munia, Erodi yan' auyewa tupua a pai nua‑vi‑avina toneina wayahina, yoko inau‑hohona, ka Erodiasa natuna vavinena yoko mataia tavona, e Erodi vo‑vi‑dewa‑haiawi. 7Ka tavona iakwa, e Erodi ahabanana wayahina vona‑nua‑kabubu. Ivona, “Aviani yam nuanua, avenem. Avona‑dabadaba wayahima.”
8Ka ahabanana omo ayona wayahina, e ainua iaipupu. Iakwa, e ahabanana mavina, e Erodi vonei, ivona, “Nuanuau Ioni Tau Bapitaiso unununa nau‑kai nihenina ena‑uani, eveneu adueyei.” 9Ka Erodi avaha ahabanana ya viamana nononi, e nuana ivita ananina. Ka akanai ya vona‑dabadaba nuani, kadu yaiana inau‑hohona matana avaha yana vona inononi, wayahina awaehei. 10Ka ya tau paisewa aitam manua yohona vi‑tunei, e Ioni magana upwei, 11e unununa nau‑kaia uani, omanei, e ahabanana venei. Ka ahabanana epei, e neiei ayona wayahia.
12Ka Ioni a tau vi‑muni‑waiwai iomo, e Ioni tau matena iepei, ka ineiei itavuni. Ka munia, iomo Iesu wayahina, e dewana ihaeyei.
Iesu Tomotau Ai Yau 5000 Vi‑am‑neiei
(Marika 6:30‐44; Luke 9:10‐17; Ioni 6:1‐14)
13Ka avaha Iesu dewana nononi, aitam wae igenu, inei aitam papani eha meagai, vivane anata. Ka yoko Iesu yana nae vaneana inononi, wayahina yai meagai ini‑tawanei, e etawana iomo Iesu wayahina. 14Ka tutana Iesu waea iopu tania, yoko ananina dueyei, e ate‑nuanuaiei, e tau kwanakwanaha wayahia vo‑vi‑aiaiei.
15Ka vinanavi a tau vi‑muni‑waiwai iomo, e Iesu ivonei, ivona, “Kauvea, papani taina anata, ka eha ani‑hoina vi‑novane. Wayahina, nau‑wawanim yoko taina evi‑tunei, imavina, e ai ma' ivi‑maiei meagai nepeia wayahia.”
16Ka Iesu vonei, ivona, “Taui eha nau‑wawani ini‑tawaneka. Akanai, itomi uvenei in'‑am.”
17Ka ivonei, ivona, “Ia! Medeina adewe? Ama ma' eha habuhabuna, vivane palaua nima papanina, ka iana ainuata.”
18Ka Iesu vonei, ivona, “Palaua ka iana uomaneu.” 19Ka tauna yoko vonei, ivona, “Wetau wayahina umanuena,” e imanuena. Ka palaua nima papania ka iana ainua epei, ka dune‑vane wahuma, nau‑kaiwei. Ka munia, gibui, e a tau vi‑muni‑waiwai venei, e tomotau ivo‑patai.#Mat 15:35-39; Mar 8:6-10. 20Ka habuhabui iam‑iaua, ka aniani kamukamumuna inau‑gwaugwaui venuana ai yau 12 ivi‑nau‑vi‑anai. 21Ka taui iam‑iaua ononotoi ai heta ai yau 5000 deina, ka kadu vaivine ka yahehei habuhabui eha ai yau ita‑iavi.
Iesu Navu Hetana Ni‑awana
(Marika 6:45‐52; Ioni 6:15‐21)
22Ka vo‑kwayavoni tauna a tau vi‑muni‑waiwai veimeyei wae igenu ivi‑ata, ieta‑naoi mani papania, ka tuta aitamoata wayahina tauna tomotau yoko nui mamaei, ka habuhabui vonei iyavuta, imavina yai megeia. 23Ka avaha yoko iyavuta deina, Iesu ana heta ivane oya na‑viama Yaubada wayahina. Ka avaha ioyoma, ka Iesu ana heta mamaei.#Luk 6:12; 9:28. 24Ka a tau vi‑muni‑waiwai avaha yai wa' ivoiei, itana‑opu ana, ka yahina ananina ivaniahei. Ka yai wa' nau‑vinevinei, kadu ibebebewa, iuna yahina tepaia hunahuna.
25Ka mata‑hamwahamwanina Iesu navu hetana omomo, e a tau vi‑muni‑waiwai nepeia vin'‑omo. 26Ka tanoi wayahina a tau vi‑muni‑waiwai Iesu idueyei hawana hetana omomo, ka avaha idueyei imatamatauta ananina, e igagada. Ka ivona, “Aioi! Unupa!”#Luk 24:37.
27Akaka Iesu vonei, “Eha umatamatauta. Un'‑ate‑vatu. Iuna yauke taua.”
28Wayahina, Pita ivona, “Kauvea, aituhu vona ahiahina wamke, akanai evoneu hawana hetana aopu, an'‑omo wayahima.”
29Akaka Iesu ivona, “Ahiahina. Ena‑opu, en'‑omoi.”
Ka Pita waea iopu, e hawana hetana omomo Iesu wayahina. 30Kate tutana venavenau, yahina ananina tepana dudueyei, e matamatauta, e hawana gavivina, e vi‑hone, “Kauvea, eivaiteu!”
31Ka Iesu vo‑kwayavoni Pita vo‑vi‑avini, akaka ivona, “Yam vitumahana aya‑kituna. Aviani iuna eva‑hamwahamwana?”#Mat 8:26; Mar 4:39.
32Ka tutana ainua waea igenu, yahina iakwa ka mana gomana. 33Ka taui wae a tau ma' iaiwaodu Iesu wayahina, akaka ivona, “Vona ahiahina, wamke Yaubada Natu‑hoina.”
Iesu Tau Kwanakwanaha Papani Genesareta Wayahina Vo‑vi‑aiaiei
(Marika 6:53‐56)
34Iakwa, iaubo‑tamana papani Genesareta wayahina, e iduduna tania. 35Ka papani‑nana a tau ma' avaha Iesu ianamanei, ka tuyeha ivi‑tunei iomo yai meagai habuhabui wayahia, e yai tau kwanakwanaha habuhabui Iesu wayahina iomanei. 36Ka iviamei, ivona, “Kauvea, memeanina tau kwanakwanaha taina am kwama awaniana ivo‑dadana‑ohoi? Aina ana pata ividoha.”
Ka Iesu awaeha, e aviyaivia yokoia wayahia ana kwama ivo‑dadani, habuhabui ividoha.#Mat 9:20-21.
Pilihan Saat Ini:
Mateu 14: MVN
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2008, Wycliffe Bible Translators, Inc. All rights reserved.
