San Mateo 15

Jesús an ñamin kamtam watchi kiztu

(Mr 7.1-23)

1Suasne mɨnpazha Fariseo awaruzkas Moisés kaizta aizpa kamtamtuzkas Jerusalén pɨpuluras puzat kit Jesústa tukin aat kit mɨmaara.

2—Up kammuruzne ¿Chikishma ñamin iarɨt kamtamtuz kainara aizpa mɨamtuchi? Kuamɨztune, uspane chihtɨ kittarazi, uspa kwail kiarɨt aizpa kihana.

3Jesúsne sɨnkanat kit mɨmanara:

—Une ¿Chikishma Dios kaizta aizpa mɨamtuchi? Umin u ɨlaparuz manta kiamtu aizpa minñamtu, Dios uruza manta kinamtu aizpa kiamanapa. 4Diosne awaruza ɨninnat kit ka kaiznara: “Une papihshtakas akkuhshtakas wat nɨjkulat kit wat kiarawa.”#Éx 20.12; Dt 5.16 Kawarain “Mɨnpazha papihshtakas akkuhshtakas kwail paramtune, awa ussa piantarawa, inapa.”#Éx 21.17; Lv 20.9 5Kancha umin papihshtuzpakas akkuhshtuzpakas ka kamtanamtu: “Papihshtakas akkuhshtakas mɨlanashimtukine, une ka kizarawa: ‘Nane na papihshtakas akkuhshtakas mɨlasachish, na wan mɨj aizpa Diosta mɨlat akwa.’ 6U sun kamtamtu akwa, une ‘au papihshtuzakas au akkuhshtuzakas kiwainsachimakpas’ minñamtu. U sunkana kamtaamtune, u kwalta kiwaintuchine, une Dios manta kimtu aizpa kiamtuchi. U ɨlaparuz kamtanamtu aizpa mɨashimtu akwa, une kwail kiamtu. 7U papihshtakas u akkuhshtakas kiwainamtuchi akwa, une we nɨjkulamtu, Dios kaizta aizpa kiamtuchi akwa. Isaíasne, Dios kainammmikane, ñamin uruzpa nil kaiznara:

8‘An awa uspa pitkasain nawa wat kizamtukas,

uspane nawa wat nɨjkulamtuchi.

9Nawa wakpuj wainñamtukas, uspane nawa piankamamtuchi.

Kamtanamtuasmin, uspane “au kamtamne Diospa kamtam i” kizamtu.

Sunkana chi. Uspane uspain kamtam kamtanamtu.’ ”#Is 29.13

10Sun kiztawane, Jesúsne akkwan awaruza wanmakninnat kit kaiznara:

—Na kaiztu aizpa mɨrain, piankamanapa. 11Chiwazha kumira kumtukas, kumira kumtumikasha kwail namninmanazi. Me kwail pit kaiztamikane kwail kimmikakana namnazi.

12Suasne Jesúspa kammuruzne us tukin aat kit kaizara;

—Nu kaizta aizpa akwa, Fariseo awane nukasa aliz kulaarɨt. ¿Sun piankamtukish? kizara.

13Usne sɨnkanara:

—Ap chiyuras Taittane paiña kamtam chɨhkanara. Usne nil chi kamtamtuzakas nilchi nɨjkultuzakas pailnintɨnazi. Awane usparuza kwail tɨkana puhstɨnazi. 14Usparuza kurunnaman. Sun we pian kamtamtuzne mamaz we piantuza kamtanamtu. Wan karɨnazi. Sun kwail kamtamtuzne kasu izsachiruzkana mai. Kasu izsachimika kai izsachimikasha taintane, paasas kulkin taiziltɨnazi.

15Pedrone Jesústa kaizta:

—An kamtam kwinta aumɨza piankamninchain.

16Jesúsne mɨmanara:

—Une we piankaamtu. ¿Une mɨsachimakkiwas? 17¿Kumira kwat aizpa pianchimakkiwas? Wan kumira kwat aizpa pusunmal wa. Kwiztane awaras puztu. 18Awa chiwazha ayuk kaijchira minñamtukas, kwiztane awane pitkasa paramtu. Kwail pit kaiztamikane kwail kimtu. 19Wan kwailne kaijchuras puzamtu. Kwail mintumikakas, awara piantamtumikakas, mamazpa ashampakasa pittumikakas mamazpa ampukasa pittumikakas, walkumtumikakas, pɨrail kaiztumikakas, mamazta kwail pit paramtumikakas kaijchukin min kit chiwazha kwail kimtu. 20Sunpawa kwail kimtumikane, Dios iztakin kwail kit kit ayukta sɨnam chi namnazi. Chihtɨ kittuchi kwatmikane Dios iztakin kwail kimtuchi. Usne ayukta sɨnam i.

Mamaz suras ashampane Jesústa nɨjkulta

(Mr 7.24-30)

21Tas puztawane, Jesúsne mamaz sura ɨt kit Tiro pɨpulurakas Sidón pɨpulurakas pianara. 22Cananea suras ashampane sun sura uzta. Usne Judío awa chi. Usne Jesús tukin ɨt kit ka kwianta:

—Anpat. Nawa mɨzha. Nune ñamin ɨnintamika Davidpa kwal i. Nawa kiwaincha. Kwail saliz ap pashura pizta akwa, ap pashune kwisha naizmɨztui, kizta.

23Jesúsne ussa sɨnkarachi. Suasne paiña kammuruzne Jesústa aat kit ka paikuara:

—An ashampa paiña pashu akwa paikumtu akwa, us paikumtu aizpa kit kit ussa attishta ɨninti. Usne au kwizpa tɨnta kwiantu.

24Suasne Jesúsne an ashampara kaizta:

—Diosne nawa Israel awaruza ɨninta. Uspane pɨriku karɨtuzkanain uzamtu, pɨriku izmumika mɨjchi akwa.

25Ashampane kasha ɨt kit us iztakin wakpuj wain kit kaizta:

—Anpat mɨzha. Kiwaincha, kizta.

26Jesúsne ussa sɨnkara:

—Nane Judío awaruza kiwainarawash. Sunkana pashpawa kumira nakasachish, kwizaruza kwinna. Kawarain nane Judío awaruza kiwainnarawash, Judío awachiruza kiwainnarachin.

27Usne kaizta:

—Watcha Anpat. Nu watcha i kaiztukas, kwizakas pamikawa misharɨras pak taizka sak kit kum. Sunkana, na Judío awachi akwa, nawa pitchin kiwaincha, kizta.

28Suasne Jesúsne ussa kaizta:

—Ashampa mɨzha. Nu kwisha wat nɨjkultɨt akwa, nu pashimtu aizpa kinash, kizta.

Sun urain paiña pashune kakultɨt.

Jesúsne akkwan inturuza kakulninnamtu

29Jesúsne tas puz kit Galilea pimamin pianara. Kwiztane maza ɨzara nut kit sua uzta. 30Kwisha akkwan awane us tukin aara. Uspane chasachiruzakas kasu izsachiruzakas pit parasachiruzakas sail puil patturuzakas pimpul kwail mɨjtuzakas an akkwan inturuzakas karaara, Jesús kakulninnanapa.

31Jesús kit aizpa izarawane, awa sun izararuzne iztaspaarɨt. Pit parasachiruzakas paraara. Sail puil patturuzne wat parɨt. Chasachiruzne chaara. Kasu izsachiruzne izara. Watsal iztasparɨt kal izarɨt akwa, uspane Israel awawa Dios kwisha wari kizamɨzta.

Jesúsne ampara mil awara kumira kwinamtu

(Mr 8.1-10)

32Suasne Jesúsne kammuruza akwanat kit kaiznara:

—An awane nakasa kutña payukima chaamtu. Mane uspa kumira mɨjchi akwa, kiwainashimtus. Nane usparuzpa yalta ɨninnashimtuchish, uspa kumira kwatchi akwa, miwara najarɨn akwa.

33Suasne paiña kammuruzne mɨmara. Apain akkwan awa uzamtuchi akwa,

—¿Mɨntama kumira sayanapai? An sukinne mɨnminkas uz chi, chiwazha paina, kizara.

34Jesúsne mɨmanara:

—Une ¿Yawa pan mɨjmakpas? kiznara.

Uspane kaizara:

—Siete pankas akkwan pishkaruchikas mɨjmakpas, kizara.

35Suasne Jesúsne awaruza ɨninnara, pilta uzanapa. 36Usne siete pankas pishkarukas sap kit Diosta aishtaish kizta. Suasne kɨz kit kammuruza nailnara. Uspane awaruza nailnara. 37Wanne tuktakima kuat. Wan kwatpane, uspane tiztɨt aizpa siete tɨmta winñara. 38Ampara mil ampune kuara. Ashampakas pashpakas winñamtachin kuara. 39Kwiztane Jesús awara “ɨru” kiz kit kanuara wat kit Magdala sura ɨmɨzta.

Pilihan Saat Ini:

San Mateo 15: kwi

Sorotan

Berbagi

Salin