San Mateo 14

Juanne, kwazikasa munna kimmikane, irɨt

(Mr 6.14-29; Lc 9.7-9)

1Sun payune Herodesne Jesúspa mɨra. Usne Galilea sura ɨnin kit 2paiña kiwaintuza kaiznara: “Anne Juan munnammika i. Usne irɨttas kuhsta. Katmizna usne an iztasparɨt kal kimɨzta,” kiznara.

3-4Ñamin Herodesne Juanta pizna ɨninta, ussa kuh kit kajchira sɨpna. Herodeskas Felipekas aimpihshtuzpain azi. Herodesne paiña aimpihshpa ashampara mɨltɨt. Sun ashampane Herodías muntɨt. Herodías akwa Herodesne Juanta sɨpninta. Juanne Herodesta kaiztɨt: “Sun ashampara, up kwiñara, mɨlnachi,” kizta.

5Juanta piantashimtukas, Herodesne ussa piantarachi, awa ishkumtu akwa. Wan awane Juan Dios kainammmika azi minñara. 6Herodespa año kapal pishta taizkane, Herodíaspa pashune akwattuza iztakin puz kit kukin ɨrɨt. Herodesne wari min kit 7nimpihsh ashampara kaizta: “Nane nu chiwazha paikumtu aizpa Dios iztakin nua mɨlan namtus,” kizta. 8Nimpihsh ashampane akkuhshta kwinta kin ɨt. Akkuhsh ussa kurunkane, nimpihsh ashampane Herodesta kaizta: “Mamazta ɨninti, Juan munammikawa kɨzpu pɨlattukin karanpa,” kizta.

9Sun pit mɨrawane, Herodesne tayalta. Tayaltukas, usne us paikwat aizpa mɨlat. Pishta akwattuz us mɨlan namta aizpa mɨara akwa, Herodesne mamaztuza ɨninnara, us paikwara aizpa kin. 10Suasne usne mamazta kajchira ɨninta, Juanpa kɨzpura tɨtnapa. 11Suasne uspane pɨlattura karaat kit nimpihsh ashampara mɨlaara. Usne akkuhshta chɨhkara.

12Suasne Juanpa kammuruzne aat kit irɨtta muat kit pilta kamaara. Kwiztane Jesústa kainana ɨara.

Jesúsne cinco mil awaruza pan kwinnamtu

(Mr 6.30-44; Lc 9.10-17; Jn 6.1-14)

13Sun mɨrawane, Jesúsne tas puz kit kanuara wat kit pul sura ɨrɨt. Mazainpain ɨrɨt. Jesúspa tukin piankamarawane, awane pɨpulukis puzat kit mittɨwara pimawara us tukin ɨamɨzta. 14Kanuakis kihshtawane, Jesúsne akkwan awara iznara. Usne usparuza kiwainshinat kit intuza kakulninnara. 15Tɨl pamɨzkane, nashmɨzkane, Jesúspa kammuruzne us tukin aat kit kaizara:

—Nashtɨmtui. Akkine mɨnminkas uzchi. Awaruza pɨpulura ɨrain kiznari, chiwazha painapa kwan.

16Jesúsne sɨnkanara:

—Usparuza ɨninman. Umin usparuza kwinnari, kuanapa.

17Uspane kaizara:

—Akkine aune cinco panminkas paas pishkaruinkas mɨjmakpas.

18Jesúsne kaiznara:

—U mɨj aizpa nawa kararain, kiznara.

19Suasne Jesúsne awaruza pɨtkin uzanapa ɨninnara. Suasne usne cinco pankas paas pishkarukas sap kit chiyura izak kit Diosta aishtaish kizta. Kwiztane pankas pishkarukas kɨz kit kammuruza mɨlanara. Uspane awaruza nailnara. 20Wan kuat kit tukkarɨt. Kwatpane, uspane pitti pitti tiztɨt sakkat kit doce tɨmta winñara. 21Cinco mil ampune kuara. Ashamparuzkas pashparuzkas wiantachin kuara.

Jesúsne pi ɨsalpara chamtu

(Mr 6.45-52; Jn 6.16-21)

22Suasne Jesúsne kammuruza kanuara waanapa ɨninnara, an ñancha pi kwakara piannaanapa. Ɨamtuasmin, Jesúsne awaruza ɨru kiznara. 23Usparuza “ɨru” kiznarawane, usmin malta nura, Diosta paikwan. 24Tɨl pamɨzkane, us suain nukkultuasmin, kammuruzne kanuawara pi paizkakin ɨamtuazi. Ɨamtuasmin, katsa tɨnta inkwa kanuara nuppainmɨzta. Pine tɨnta palakpɨntu. 25Tɨlawain Jesúsne uspa tukin ɨt. Pi ɨsalparain mittɨwara ɨmtuazi. 26Uspa tukin pianamtuasmin, kammuruzne ussa pi ɨsalpara chamtu izara. Uspane ishkuat kit kwianara:

—Irɨt izpul izpuspas, kizara.

27Suasne Jesúsne usparuza parat kit kaiznara:

—Une tɨnta kultain. Na ish. Ishkuman.

28Suasne Pedrone sɨnkara:

—Anpat. ¿Nu kish? Nu sua chamtuasmin, nawa chanpa ɨnincha, nu kuntakima, pi ɨsalpara ɨn.

29Jesúsne kaizta:

—Nawa at, kizta.

Pedrone kanuaras kihsh kit pi ɨsalpara ɨmɨzta, Jesús kuntakima. 30Kwisha tɨnta inkwa iztuasmin, Pedrone ishkwat kit pira unainmɨz kit ka kwianmɨzta:

—Anpat kiwaincha, kizta.

31Ɨrattuin Jesúsne ussa piz kit tainak kit kaizta:

—¿Chitma nawa wat nɨjkulmas?

32Kanuara nuilkane, inkwane pamtuchi parɨt.

33Suasne kanua waruzne Jesús iztukin wakpuj wainñat kit kaizara:

—Watcha. Nune Dios Painkul i, kizara.

Jesúsne Genesaret su imturuza kakulninnamtu

(Mr 6.53-56)

34Uspane pi kwakkat kit Genesaret sura pianaara. 35Sun suras awa Jesúspa piankamarawane, uspane wan awaruza Jesús pianarɨt kainanara. Piankamarawane, uspane Jesús tukin imturuza karaara. 36Uspane Jesústa paikuara, ishturuz paiña pĩnkin paanapa. Wan paiña pĩnkin paararuzne kakularɨt.

Pilihan Saat Ini:

San Mateo 14: kwi

Sorotan

Berbagi

Salin