JENESIS 6
6
Ziemmename dage Helungriaksiabe ’Ndatpatbe
1Ziemmena kedeirei ge pungpat chu dadege, zai penui na ’mpuimi ramme lungkeu gai dege â 2Hera name ramme mikngau ge ziemmename na heleume heleuyibe ngaupat ti de lei; zai penui ne nei-neime je penui nâu hang lu chu di de lei. 3Chidadege Tingwang ne, “A gu herui ziemmena dage betingbeta ’nnai ze bam bam ra mak lei, pa â hemei pum daseu, kane pa kum haî kat ze ’ngkai ring gu lei,” ze kacheu de lei. 4Chipauting ge, zai bechâng ge du kedeirei ge ziemmena kedime (kaherâme) bam de lei, zai Hera name ’mpeumi ramme benai ziemmena na ’mpuimi ramme ngua gai dege â penui name du lungkeu de lei. Aime bau ze â ’ndâting ge peranchime zai hejidime bau de lei.
5Kedeirei ge ziemmena gu helungriaksiabe tak zene puigit ze bambe zai ziemmena pe lung ka’nningbe ge kesiabe runne ’nningsau mak luisui ze bamdibe Tingwang ne ngau di de lei. 6Zai kedeirei ge ziemmena je pa ne tewgai’ndibe deze Tingwang ne pe lungneu di de lei, zai pe suisia di de lei. 7Chidadege Tingwang ne, “I ne ’ndamgailube ziemmena je kedeirei gene tew’ngga ’ndu de lei, ziemmena zai hekaubena zai liaruabe zat ramme, zai liamruabe ’nruine ramme peireige, I ne penui je ’ndamgailube peireige a lungneu dai di daseu,” ze kacheu de lei. 8Kane Noabe â Tingwang mikngau ge pe lungwângchangbe ngau lu de lei.
Noabe Rasam
9Aize Noabe rehei ting rasam de lei. Noabe â ziemmena kapelingbe kau zai pe gu rehei ting ge heziâkgabe kau lei; Noabe â Hera benai nguapuinakattew ze bam de lei. 10Zai Noabe name ’mpeumi hangchum, Shembe, Hambe, zai Japhethbe bam de lei.
11Kedeirei â Hera mikngau ge sia-desang ze bam di de lei, zai kedeirei ge ’nggî-kahegeibe ne puigit ze bam di de lei. 12Zai Hera ne kedeirei je ngau di de lei, zai pie le lau, kedeirei sia-desang di de lei; ziemmena leine kedeirei ge kesiabe ’mpuî ’mbe tat kai kam di de lei. 13Zai Hera ne Noabe je, “Ziemmena leine je tewbetûn gai ra a lung gene kam lu de lei; penui ziegene kedeirei ge ’nggî-kahegeibe ne puigit ti daseu; pie le lau, ziemmename benai penui lungbe kedei je du I ne tew’nsia kam ’ndu de lei. 14Ning hangge gopher heching yibe ne ’nneikuak teleu le lau; pelung ge pesîam ramme tew gai le lau, zai pelung benai hela ze du mâta ne keniaknam ra lei. 15Aigum ze nang ’nneikuak teleu ra de lei: ’nneikuak gu petâ hangge sâu haî chum, pedit ge sâu rengeu, zai pehut sâu himreu ra lei. 16’Nneiki ge leubaki tew gai ra, zai sâu kat gum ze ’nsak kai ra lei; zai pebia ge ’ngkam tew gai ra, zai set chum tew gai ra lei. 17Pie le lau, I ne tinggîm kehube kangge pechui lu ze ringbe zat leine je tew’nsia ra kedeirei ge hedui naîwang ra tew gai gu daseu; kedeirei ge bambe zat leine chai kam gu de lei. 18Kane ning dage I samria gai gu lei; ’nneikuak lungge nang gut ra de lei, nang benai ning na ’mpeumi ramme, zai ning nâu benai ning name nâu ramme je ngua lu gut ra de lei. 19Zai mâ-keringbe zat leine gene bepui, perie aibe kena ’nneikuak ge teigut kai ra lei, ning dagene penui ringpatchi le ra hangge zeu. 20’Nruine zat leine gene, hekaune zat leine gene, kedei ge liaruabe zat leine gene, kena-na ning dage nguagut kai le lau, penui ringpat le ra hangge zeu. 21Mi hetak zat leine lu lu kaigekua gai le lau; zai chize ne nang benai penui hetak hang chang ra de lei,” ze rang gai bei de lei. 22Noabe chipau luigum ze tew de lei; Hera ne pechu diegaibe leine pa tew de lei.
Pilihan Saat Ini:
JENESIS 6: ZEMEBSI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.