Lucas 23
23
Mateus 27.1,2,11-14; Marcos 15.1-5; João 18.28-38
1Ha'e gui ijaty okuapy va'ekue opu'ãmba vy ogueraa Jesus huvixa Pilatos-a py.
2Ha'e py ju hexe ijayvu vy aipoe'i okuapy:
— Kova'e ava ma rojou heta va'e kuery ombo'e vaikue rei rã, mba'eta aipoe'i huvixa César pegua imposto repy rome'ẽ ve'ỹ aguã. Aipoe'i avi Cristo huvixave oikoa rami — he'i okuapy.
3Ha'e rami rã Pilatos oporandu ixupe:
— Ndee ma nhi'ã judeu kuery pegua huvixave?
Jesus ombovai:
— Ndee ae ma aipo're — he'i.
4Pilatos aipoe'i sacerdote yvatekueve va'e ha'e heta va'e kuery ijaty va'e pe:
— Xee ma mba'eve py ndajoui kova'e ava otekoavyague.
5Ha'e ramo ha'e kuery aipoe'ive tema:
— Ha'e rami avi ojapo heta va'e kuery opa marã rei ikuai aguã rami, Judéia ha'e javi rupi ombo'e vy, Galiléia py omboypya gui apy peve — he'i okuapy.
6Ha'e rami Pilatos oendu vy oporandu Galiléia pygua paa re.
7Ha'e vy huvixa Herodes openaa pygua oikoa oikuaa vy ha'e va'e pe ju omboaxa, mba'eta ha'e jave py Jerusalém py oĩ avi ramo.#23.6-7 Huvixa Herodes ma Galiléia yvy re opena va'e (Lucas 9.7-9). Ha'e nunga rupi ixupe ju Pilatos omboaxa Jesus.
Herodes renonde ju Jesus ojexa ukaague
8Herodes ma Jesus oexa vy ovy'a vaipa, mba'eta yma ma oexaxe, hekokue oendu rire. Oexaxe avi hexa pyrã ojapo rã.
9Ha'e rami vy opa marã re oporandu teĩ Jesus mba'eve py nombovai.
10Sacerdote yvatekueve va'e ha'e lei re nhombo'e va'ety kuery ha'e py ikuai avi va'e ma hekokue ramigua omombe'u okuapy ijayvu rei vy.
11Ha'e rami rã Herodes oguereko vaikue rei oxondaro kuery reve. Ha'e vy peteĩ ao iporãve va'e py omonhemonde vy Pilatos-a katy ju omondouka.
12Ha'e va'e ára guive Herodes ha'e Pilatos joayvu, joe nda'ija'ei ete va'ekue ri.
Mateus 27.15-26; Marcos 15.6-15; João 18.39–19.16
13Ha'e gui ma Pilatos omboatypa sacerdote yvatekueve va'e ha'e huvixa kuery heta va'e kuery reve.
14Ha'e vy aipoe'i:
— Kova'e ava ma peẽ kuery peru kuri penetarã kuery opa marã rei ombo'ea rami peikuaa vy. Ha'e gui ma pendua py xee amboayvu teĩ mba'eve rei ndaikuaai pendeayvuague ramigua.
15Neĩ huvixa Herodes voi ndoikuaai kuri. Ha'e rami vy ae xea py ju ombou. Ha'e nunga rupi xee aikuaa rã mba'eve ndojapo vai omano aguã.
16Ha'e rami vy ainupã uka ta, ha'e gui ma apoi uka ju 'rã — he'i.
17[Mba'eta ngaru oikoa ára nhavõ opoi jepi 'rã peteĩ nhuã py oĩ va'e.]
18Ha'e rami rã heta va'e kuery ha'e javi ojapukai vy
— Eraa upe va'e, ha'e vy epoi Barrabás orevy — he'i okuapy.
19Barrabás ma nhuã py oĩ, tetã rupi nhomopu'ãmba rei ha'e jojukaague re.#Atos 3.13,14
20Ha'e gui ma Pilatos ma teĩgue ju aipoe'i Jesus opoixea rami.
21Ha'e rami teĩ ha'e kuery ma hatãve tema ojapukai okuapy:
— Emoĩ kuruxu re, emoĩ kuruxu re! — he'i okuapy.
22Ha'e ramo mboapykuea ma Pilatos oporandu ha'e kuery pe:
— Mba'e nunga py tu ojapo vai raka'e? Xee ma hexe mba'eve ndaikuaai ajuka uka aguã. Ha'e nunga rupi ainupã ukapa rire apoi ju 'rã — he'i.
23Ha'e rami rã katuve ma hatãve tema ojapukai okuapy kuruxu re omoĩ aguã re. Ha'e kuery ojapukaia ipo'aka.
24Ha'e ramo Pilatos ojapo nho ha'e kuery ojerurea.
25Ha'e rami vy opoi nhomopu'ãmba rei va'ety jojukaague py nhuã py oĩ va'e. Ha'e rã Jesus ma omboaxa ha'e kuery oipotaa rami oguereko aguã.
Mateus 27.32; Marcos 15.21
26Ha'e gui ma Jesus reraa kuery ovaexĩ peteĩ ava Cirene pygua Simão hery va'e, mba'ety gui ou va'ekue. Ha'e vy ha'e va'e axi'y áry ju omoĩ kuruxu, Jesus rakykue ogueraa aguã.
Jesus ojuka aguã katy ogueraa ague
27Hakykue heta oje'oi, amongue kunhague voi ipy'a vai vy opexo re oipete-pete oje'oivy.
28Ha'e rami rã Jesus ojere vy aipoe'i ha'e kuery pe:
— Jerusalém memby kuery, pejae'o eme xere, ha'e rã pendejee ha'e penememby kuery re 'rã pejae'o.
29Mba'eta ovaẽ 'rã aipopeje aguã ára: “Ovy'a ete 'rã imemby e'ỹ va'e, noikuavãi, neĩ nomokambui va'e”, peje aguã.
30Ha'e va'e ára aipopeje 'rã yvyty pe: “Pe'a ke ore'áry”, ha'e yvy'ã'i pe “Oreao'i ke” peje 'rã.#Oséias 10.8; Lucas 21.20-24; Apocalipse 6.15-17
31Mba'eta yvyra pyau re ha'e rami ojapoa rire, mba'e tu ojapoa 'rã ipirukue re? — he'i.#23.31 “Yvyra pyau oapya aguã rami e'ỹ opyta va'e” he'ia ma heko porã va'e re ijayvu vy, ha'e rã “Ipirukue” he'ia ma opaga aguã rami ikuai va'e re ijayvu vy (Ezequiel 20.47; 21.3).
32Mokoĩ avi ogueraa joapo vai va'ety hexeve ojuka aguã katy.
Mateus 27.33-44; Marcos 15.22-32; João 19.17-27
33Ha'e gui ma peteĩ henda py ovaẽ Calvário 'epy va'e py. Ha'e py omoĩ kuruxu re, joapo vai va'ety kuery guive: peteĩ ijaxu e'ỹa re, ha'e rã amboae ma ijaxua re.
34Ha'e ramo Jesus aipoe'i:
— Xeru, eperdoa ke, mba'eta ha'e kuery ndoikuaai mba'e pa ojapoa — he'i.
Ha'e gui ma ijao omboja'o-ja'o xortea oexa vy.
35Heta va'e kuery ha'e py ikuai va'e oexa okuapy oiko va'e. Huvixa kuery voi ojojai rei vy aipoe'i:
— Amboae kuery ogueraa jepe rire ha'e ae ju tojereraa jepe, anhetẽ ri Cristo Nhanderuete rembiporavo oiko vy — he'i okuapy.
36Xondaro kuery voi ha'e rami ojojai rei reve onhemboja vy vinagre ogueru oy'u aguã. Ha'e vy aipoe'i:
37— Judeu kuery pegua huvixave ri reiko vy ejereraa jepe ha'vy ndee ae — he'i.
38Inhakã áry omoĩa avi ipara [grego, romano ha'e hebraico ayvu py]: “Kova'e ma judeu kuery pegua huvixave” he'ia.
Mokoĩ joapo vai va'ety ijayvuague
39Peteĩ joapo vai va'ety kuruxu re oĩ va'e ojojai rei vy aipoe'i ixupe:
— Ndee Cristo e'ỹ ri ty'y? Ejereraa jepe na ndee ae, ore avi.
40Ha'e rã amboae ma oirũ ombovai vy ijayvu ete ixupe. Ha'e vy aipoe'i:
— Nhanderuete renonde teĩ ndee neremoĩ va'e ty'y rejererokyje aguã? Mba'eta peva'e rami nhanembopagaa.
41Ha'e gui nhande ma ha'evea rami jajexavai, jajapoague py japaga aguã. Ha'e rã peva'e ma mba'eve ndojapo vai — he'i.
42Ha'e vy aipoe'ive ju:
— Jesus, nema'endu'a ke xere ndepo'akaa rupi reju jevy ma vy.
43Jesus ombovai:
— Anhetẽ aipoa'e ndevy: Kova'e árave reĩ 'rã xereve 'amba marã e'ỹ py — he'i.
Mateus 27.45-56; Marcos 15.33-41; João 19.28-30
44Kuaray mbyte rai'i jave kuaray naexakãvei. Yvy jave re pytũmba kuaray ojero'a puku peve.
45Ha'e gui henda iky'a e'ỹ va'e ropy ajukue okẽ regua oĩ va'e oxoro mbyte rupi.
46Ha'e gui ma Jesus ojapukai atã:
— Xeru, ndepo py amboaxa xenhe'ẽ — he'i. Po rami ijayvu vyve omano.#Salmo 31.5
47Ha'e nunga xondaro ruvixa oexa vy omboete Nhanderuete. Ha'e vy aipoe'i:
— Anhetẽ ae ra'e kova'e ava heko porã va'ekue — he'i.
48Heta va'e kuery ha'e py mba'emo oiko va'e oexa aguã ijatypa va'ekue ojepe'apa ju, ipy'a vai vy opexo re oipete-pete reve.
49Ha'e rã Jesus rexaaty kuery ha'e kunhague Galiléia guive hupive oje'oi va'ekue ma mombyry'i opytapa okuapy oma'ẽ aguã.
Mateus 27.57-61; Marcos 15.42-47; João 19.38-42
50Peteĩ ava oiko avi José hery va'e, nhomongeta va'ety kuery regua heko porã va'e.
51Ha'e va'e ma ndojou porãi oirũ kuery ojapoague. Ha'e ma judeu kuery rekoa Arimatéia pygua, Nhanderuete po'akaa oarõ oikovy va'e.
52Ha'e va'e ma Pilatos-a py oo vy ojerure Jesus retekue re.
53Ha'e rami vy yvyra gui omboguejy vy onhovã ajukue xiĩ porã va'e py, ha'e peteĩ itaova re ojo'o pyre py onhono porã, avave rei nonhono porãai teria py.
54Ha'e va'e ára ma mba'emo oguereko katupaa ára, ha'e sábado ovaẽ rai'i ma.
55Galiléia gui kunhague Jesus rupive ou va'ekue oje'oi avi oexa aguã itakua hetekue onhono porãague.
56Ha'e vy ojevy ju heakuã porã va'e oguereko katu aguã imoeakuãarã.
Ha'e gui sábado ára ma opytu'u ranhe okuapy ojapo uka pyre rami vy.
Pilihan Saat Ini:
Lucas 23: gunBible
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2004, Sociedade Bíblica do Brasil; © 2014, Wycliffe Bible Translators, Inc.
