լսել աստծուց ամեն առավոտՕրինակ

Բնակարան Աստծո Հոգու համար

«Որ Քրիստոսը հավատքով բնակվի ձեր սրտերում…»(ԵՓԵՍԱՑԻՆԵՐԻ 3.17):

Եթե դու վերստին ծնված ես, հուսով եմ, գիտես, որ Հիսուսը բնակվում է քո ներսում Սուրբ Հոգու զորությամբ: Հարցը հետևյալն է. արդյո՞ք Աստծուն հարմար է այնտեղ: Արդյո՞ք Նա Իրեն զգում է՝ ինչպես տանը: Թեև Աստծո Հոգին ապրում է քո ներսում, բայց դու կարող ես լցված լինել նաև այլ բաներով, օրինակ՝ վախով, բարկությամբ, նախանձով կամ տրտունջով ու դժգոհությամբ:

Մի անգամ Աստված ինձ օրինակով ցույց տվեց, թե ինչպես է Նա Իրեն զգում, երբ ապրում է տրտունջով, դժգոհությամբ և անհամերաշխությամբ լցված սրտում: Պատկերացրո՛ւ, գնում ես ընկերուհուդ տուն, և նա ասում է. «Օ՜, նե՛րս արի, հիմա քեզ համար սուրճ կպատրաստեմ: Հարմար տեղավորվիր և զգա քեզ՝ ինչպես տանը»: Հետո նա սկսում է բղավել ամուսնու վրա, և երկուսով աղմկում են, վիճում, ափերից դուրս գալիս հենց քո ներկայությամբ: Որքա՞ն հարմարավետ կզգայիր քեզ վիճաբանության այս մթնոլորտում:

Եթե ուզում ենք լինել հարմարավետ «բնակարան» Տիրոջ Հոգու համար, պետք է հրաժարվենք այն ամենից, ինչը ստիպում է մեզ մոռանալ Նրա ներկայության մասին կամ վիրավորում է Նրան: Մենք պետք է վերջ տանք տրտունջին, թույլ չտանք, որ մեր ներսը լցվի խռովությամբ, վիճաբանությամբ կամ չներումով: Փոխարենը, պետք է այնպես անենք, որ մեր ներաշխարհը լցված լինի այնպիսի բաներով, որոնք հաճեցնում են Աստծուն և պատվում Նրա ներկայությունը: Մեր շուրթերից պետք է հնչեն փառաբանություն և գոհություն: Մենք պետք է ամեն օր արթնանանք և մեր սրտում ասենք. «Բարի լո՜ւյս, Տե՛ր: Ես ուզում եմ, որ այսօր իմ ներսում Քեզ զգաս՝ ինչպես տանը»:

Բոլորս կարիք ունենք ժամանակ առ ժամանակ մեր սրտում «գույքագրում կատարելու», որովհետև մեր սիրտը Աստծո բնակության վայրն է: Երբ քննում ենք մեր ներաշխարհը, ստուգում ենք այն սուրբ հողը, որտեղ Աստված ընտրել է բնակվել: Այնպես անենք, որ Նա Իրեն հարմարավետ զգա մեր սրտում:

ԱՍՏԾՈ ԽՈՍՔԸ ՔԵԶ ՀԱՄԱՐ ԱՅՍՕՐ. այնպե՛ս արա, որ հարմարավետ բնակարան լինես Տիրոջ Հոգու համար: