Matyu 14
14
Amam matopa' bagato'w ma Jon, aman anama napisi'as embeli afuna
(Mk 6:14-29; Lu 3:19-20, 9:7-9)
1Nemaf anama anona aman agilinama Herot nape dembinai gavmana etap hiagoma Galili. Anan name' basefa maol bu'unai Jisas nanda'anai, ea' name' safela agel Jisasi nafe' lu'una. 2Ea' Herot na'ipa isima sanda'mana maol na'i, “Aman anama Jon napisi'as embeli dei' nohafel wapoti' nape la'ifina nanda' maol si'i God nanda'anai.”
3-4Fowa' basef amama mape na'ama. Herot owalomana Filip waulu'mana anani'wi agili'wa Herodias. Ea' sahalomana Herot nandalombana'w. Ea' Jon na'ipa Herot na'i, “Ine' naso' nemata'w sahalomenai, ea' nawala mi'uli Godi. Na'ama ina andeande', owa'.”
Ea' Herot nandaiwa'ma neali'amona'w ea' na'ipa amam soldia mombalo' Jon mofa'ana mafe' manda'ana nanda' kalabus. 5Herot na'i nohana noga', ea' owa'etin. Dei' main, anan umbamahanama amam nematawa hiesi sa'i Jon anona profet. Na'ama Herot ina nahana, owa'. 6-7Nafe' ma anona nemaf Herot nofala epes hiesi safi'i sandakolas etifigin nandanifela ma nemaf mama'wana kolanai. Nemaf anama Herodias nogama'w kwafi'i kwawisi nomon kwaitu kwalemb. Esis hiesi satolo'w ea' Herot nandanifela ma akwa'w na'i basef la'ifimi endilisi gani ilif na'iam na'i, “Endilisi ae' a'ipina, i'i ine' ni'ipa ae' ma ease'ena anom amamaga ae', ese'enam.”
8Ea' akwa'w kwafe'ma mama'wakw kwahali'akw kwafe' kwa'ipa Herot kwa'i, “Dei' etef ae' a'i ine' neha aman anama Jon napisi'as embeli neaga' netopa' balaga nola anona plet nefa'anai nese'eana.”
9-11Akwa'w kwa'iam na'ama, opaf Heroti nimanina endilisi. Ea' anan okom na'i basef endilisi gani ilif na'iam la'ifimi, ea' amam nematawa hiesi isima same'ana. Ea' nasapa' anona aman soldia nafe' ipat kalabusanai natopa' bagato'w Joni nala balaga nala anona plet nafi'i naso' Herodias nogama'w kofa'ana kwafe' kwaso' mama'wakw. 12Ea' amam alupumi Joni mafi'i mofa' alop si'ina mafe' mawana hi'agif. Ea' mafe' ma'ipa Jisasa amamaga amama.
Jisas nase'asa gwa'aimi amam nematawa hiesi 5,000-peleis
(Mk 6:31-44; Lu 9:10-17; Jo 6:1-13)
13Jisas name' basef amama, anan atona nafe' nakwaha wambel anama nofa' bot nafe' anagon wafiguma epes a'agoma. Ea' amam nematawa hiesi same' basefa Jisas nafe', sakwaha wambel hiagoma asasima sailana safe' eaf sa'i sotolona. 14Jisas nafe' nataga akata nati esis hiesi nati uwahipis. Ea' nati epes asasisi awes nanda'asi nanda'as sataga bo'wes wapoti'.
15Wambomota felefele'ma owamb alupumi ananimi mafi'i ma'ipana ma'i, “Afa' wape na'ae wafiguma ea' wambomota felefele'ma owamb. Ine' nesapa'as sofo'o wambel asasima setala gwa'aimi sonda'am sea'am.”
16Ea' Jisas nagwamam na'ipam na'i, “Ae' ina esapa'as sefe', owa'. Ipe' etipa pese'as gwa'aimi.”
17Ea' amam ma'ipana ma'i, “Afa' gwa'aimi ina hiam. Bret lagel wa'ana atona naloma agof biam ea' ma'um ma'omafa.”
18Ea' na'ipam na'i, “Ipe' fa'am fi'i pese' ae'.”
19-20Ea' na'ipa amam nematawa hiesi sape otalef bu'wami etap. Ea' nafela bret anama lagel wa'ana atona naloma agof naniga nati heven ilif nanifela God ea' nawalam naso' alupumi ananimi mafe' mase'as sa'am dende' alihis andeande'. Ea' alupumi ananimi matatama tu'wa'wanimi ma'ihi malo'wam holalef lu'wami 12-peleim si'im endilisi. 21Epes sa' gwa'aimi amama hiesi. Esis seamba amam atom mataga 5,000-peleim. Ea' ina seamba awasi nematawa, owa'.
Jisas natoma nafe' embel ilif walemb batupa'manai lu'unai
(Mk 6:45-52; Jo 6:15-21)
22Ea' Jisas nasapa' alupumi ananimi mofa' bot mali' mafe' walemb batupa'manai lu'unai anama mambo fisana. Ea' nasapa' amam nematawa isima hiesi safe'. 23Safe'ma ea', anan atona nandowasa' halaf nape nanda' beten nahali' God.
Wambomota felefele'ma owamb, anan atona ata' napani halaf ilif. 24Ea' alupumi ananimi mape bot mali' mafe' mape walemb batupa'manai lu'unai la'afen, ea' uf lu'unai naluwi. Ea' naoh fepo mafi'i makwasa bot. Ea' uf wapoti' nalo nakoto'ma bot, nanda'am bumu boma nala.
25Owamb ata' nail etin, felefele'ma lala, Jisas nailam natoma nafe' embel ilif nafe'ma amam. 26Amam mati anan naitu nafi'i embel ilif, umbamaham kwapete' ma'i, anona gamba nailam nafe'. Ea' manda'am wige' ma'oh kwapete'am. 27Ea' Jisas nalomam na'i mehip na'i, “Ipe' la'ifipa umbamehepa owa'. Ae' atowe ma'uwi ailipa afi'i.”
28Ea' Pita nagwamana na'ipana na'i, “Dembinai! I'i ine' ma'wina, ni'ipa ae' itu efe'mago ine' embel ilif.”
29Ea' Jisas na'ipana na'i, “Ine' fi'i.”
Ea' Pita nakwaha bot natoma nafe' embel ilif nafe'ma Jisas. 30Ea' anan nati naoh mohafel lu'um, umbamahana na'i nowala naoh. Ea' nofala Jisas na'i, “Dembinai! Nigiambame.”
31Ea' mehip etin Jisas nowasa' lagel nahapilana na'ipana na'i, “Ine' owa' nembale'ef la'ifina ni'i ae' la'ifiwei, owa'. Dei' maina ine' nomonas mape biefim?”
32Ea' amam biam malata bot, uf naloma embel mandahagas. 33Ea' amam mape boti mati amamaga amama manda' lotuma Jisas mafela agel Godi lu'una ma'i, “Endilisi etis, ine' nogalomana Godi.”
Jisas nanda' amam nematawa hiesi awesisi anagon etap hiagoma Genesaret ambo'wes
(Mk 6:53-56)
34Ea' Jisas naloma alupumi ananimi mowala mambo walemb batupa'manai anama mafe' mataga anagon etap hiagoma Genesaret. 35Ea' enis epes sape etap anama sagawana sa'i anama Jisas. Ea' sasapa' enis safe' sa'ipa enis sape felefele'i hiagoma sofa'ai enis epes awes nanda'asi safi'mai anan. 36Ea' sofa'ai isima awes nanda'asi sa'ipana saisailana sa'i anan ni'i a'e ma isima sohapila lowaf ananinai da'malifina atona. Ea' emi egafis sahapila lowaf ananinai sataga bo'wes wapoti'.
Արդեն Ընտրված.
Matyu 14: aojF
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2013, Wycliffe Bible Translators, Inc. All rights reserved.