Matyu 11
11
Jon nasapa' alupumi maila basef ananimi mafe'ma Jisas
(Lu 7:18-35)
1Jisas na'ipama basef amama alupumi ananimi 12-peleim ma hi'alam, nohafel nakwaha wambel anama nafe' taun wambel hiagoma etap hiagoma Galili nawalipa amam nematawa hiesi na'ipasa basef Godi. 2Jon napisi'as embeli nape nanda' kalabus, ea' name' basefa maol hianai Krais nanda'anai. Ea' dei' Jon nasapa' anom alupumi ananimi mafe'ma Krais. 3Ea' mahali'ana ma'i, “Ine' aman ma'wina nafi'i ea', o ata' mope mohafa anona?”
4Ea' Jisas nagwamama basef na'i, “Ipe' pitanima pefe' pi'ipa Jona amamaga amama dei' patolomi pami'ami. 5Isima naep mase'asi asati wapoti', bo'wagah awamisi safe' andeande', awes aonai nanda' alop asasinai nambu'wi ambo'wes, aligah mase'asi same' basef andeande', saga'i sotanima sohafel wapoti' ea' kwahusi same' basef bu'wami Godi. 6Emi egafis ukup etifim sombale'efa ae', isima sandanifel endilisi.”
7Ea' alupumi amama Joni mafe' etin, Jisas na'ipa esis amam nematawa hiesi ma Jon na'i, “Fowa' ipe' pafe' anona etap fatauguma wafiguma, pafe' pati main? Pafe'ma pati anona aman ina nembale'ef andeande'i si'i anona elifita uf nefa'ana nonda' felifal nalimbi? Owa'etin. 8Pafe' pati main? Pafe' pati anona aman nala luwaguf bu'wami atumi? Owa'etin. Epes isima sala luwaguf bu'wami atom esis sape ifagw bu'wami king dambami atom mapeimi. 9Dei' ipe' pafe' pati main? Pafe' pati anona aman profet? Ae' a'ipipa, anan profet dembinai nikila' profet hiami hi'alam. 10Aman anama ea' ma'una anan atona si'i basef mape Baibeli na'iam. God fowa' gani na'ipa Jisas na'i,
‘Ine' neme', anona nemaf ae' esapa' anona aman nofa' basef ae'ami nili' nefe' nendondombamena eaf ine'inai.’
11Ae' a'ipipa endilisi. Aman anama Jon napisi'as embeli nikila' amam hiami ma etap anae'. Ea' emi egafis dei' siowis kingdom heveni, epes isima dembesi sikila' Jon. I'i epes isima agof a'asi ma kingdom heveni, esis wapoti' dei' sape dembesi sikila'ana. 12Nogota anama fowa' Jon napisi'as embel ea' nafi'i nagata dei', anom amam la'ifimi ma'i mohambombaga waf epes siowis kingdom heveni. Ea' anom amam la'ifimi dei' mawis mape kingdom anama heveni. 13Amam mawalipasa basefa mi'uli Godi maloma basef amam profeti mawalipasam mape mafi'i mataga nogota Jon nataganai. 14I'i ipe' pi'i a'e ma pembale'efa basef amamumi, dei' pegawa Jon anan si'i Elaija, aman anama fowa' amam profet ma'i niefi'i. 15Ipe' emi egafipa aligah magalipei, peme' basef amama andeande'.
16Ae' indila'wifa ipe' amam nematawa dei' pape etap anae'i i'imama? Ipe' pape si'i awasi sandatama etifigin sapoma sofala enis awasi sa'i,
17‘Ape' mandani mufapula batagwa ipe', ea' ipe' ina palemb. Ape' manda' awalef malef matamea, ea' ipe' ina palef.’
Ipe' epes dei' pape etap anae' patotopa' basef si'i awasi isima owa' sealemb selef seatasea,
18Aman anama Jon napisi'as embeli nafi'i ina na' gwa'aimi embel wainim, owa'. Ea' pa'i ambal aonai napeina. 19Ae' ataga epen endillisiwei afi'i a' gwa'aimi maloma embel wain, ea' patolowe pa'i, ‘Piti aman anama na' gwa'aimi hiami na' embel wain hianai endilisi. Anan alupunai ma amam mefa' takisi maloma amam manda' waf aonai!’
Gawa anama gawa bu'unai Godi sonda' waf bu'unai. Epes isima sa'i na'ama, ea' opeh Godi mihi'ambas gawa Ananinai bu'unai endilisi.”
Jisas na'i esis wambel hiagoma uwahipis, esis ina samboma opalefa God, owa'.
(Lu 10:13-15)
20Wambel hiagoma taun fowa' Jisas nali' nafe' nanda' ikwaf naninani la'ifinai esis satolom sogawam ea' esis ina samboma opalef safe'ma God, owa'. Na'ama dei' Jisas okom numbutina 21na'ipas na'i, “Ae' ati ipe' Korasinipei paloma Betsaidaipei uwahipipa endilisi. Nimanimi awami anona nemaf meatagamepa. Epes isima fowa' gani sanda' waf aonai sape wambel biefim Tair naloma Saidon ina sati ikwaf la'ifinai naninani si'i dei' anda'ana wambel ipe'inai, owa'. I'i esis seatolom, fowa' sowaho'am begah pepe'agatami si'i luwaguf tol sope nif agambeh. Ama sihi'amba enis epes esis ea' samboma opalef endilisi safe'ma God. Owa'etin. 22Endilisi ae' a'ipipa. Anona nemaf God nowaloga esis amam nematawa hiesi, anama nimanimi Tairi soloma Saidoni amama ina lu'um endilisi si'i nimanimi anona nemaf meatagamipei, owa'etin. Anona nemaf anan nieti esis uwahipis ea' ipe' owa'. 23Ea' ipe' Kaperneam, anona nemaf esis sefala agof ipe'imi molata ilif? Owa'etin. God nokwahipa pefe' wambel aonai hel. I'i fowa' gani anona aman nonda' anona pepel la'ifinai wambel anama Sodom si'i anda'ana wambel ipe'inai, epes isima Sodom sope etin. Owa'etin. Saga' hi'alas. 24Dei' ae' a'ipipa, nemaf anama lu'unai God nowaloga epesanai, niti esis fowa' sape Sodomi uwahipis. Ea' ipe' anan ina niti uwahipipa, owa'. Ipe' pefa' nimanimi lu'wami awami endilisi.”
Jisas na'i, “Ipe' pifi'mai ae' pepoma noma'w.”
(Lu 10:21-22)
25Nemaf anama Jisas na'iam na'ama na'i, “Ahalome, ine' Dembinai ma ilif etapi. Ine' nambaho' amamaga amama ma esis epes gawaisi sofa' gawa lu'unai, ea' nambomam nihi'ambasam epes isima gawa a'asi falafisi isima sape si'i awasi. 26A'e Ahalome okom ine'inai na'i ea' anama atona. 27Ahalome ae'anai nanda' amamaga hiami hi'alam mape lagel ae'anai. Ina enin epen negawa ae' Nogalomana Godi, owa'etin. Anan atona nogawe. Ea' owa' enin epen negawa Ahalome, owa'etin. Ae' Nogalomana ananiwei atowe egawana. Ea' emi egafis ihi'ambasa Ahalomei, isima wapoti' esis etis sogawana.
28Ipe' epes panda' maol numa'unai noma'w nahipei ipe' hipei ipe' pifi'mai ae', enda'epa pepoma noma'w. 29Peme' basef ae'ami pilam penda' waf ae'anai. Waf anama si'i anona lawag ae' ase'epana pewandefana ekaguf ipe'imi. Ea' pelafa gawa ae'anai ma pegawa ae'. Dei' main? Ae' anda' waf sa'umbilinai ma epes, ae' ina afela agel ae'anai atona, owa'. Ipe' pifi'mai ae' ma nambimb pepoma noma'wa ambagof ipe'imi. 30Dei' main? Maol ae' ese'epana pefa'anai, anama ina amamaga nimanimi, owa'. Maol anama andepenai bu'unai endilisi ma niegiambama ipe' epes hipei.”
Արդեն Ընտրված.
Matyu 11: aojF
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2013, Wycliffe Bible Translators, Inc. All rights reserved.