Genesisy 4
4
Ny amin’i Kaina sy Abela.
1ARY Adama nahalala an’i Eva vadiny; dia nanan-anaka Eva ka niteraka an’i Kaina, ary hoy izy: Efa nahazo zazalahy tamin’i Jehovah aho. 2Ary niteraka an’i Abela#4.2 Abela = Fofonaina, na Zava-poana. rahalahiny koa izy. Ary Abela dia mpiandry ondry, fa Kaina kosa mpiasa tany.
3Ary rehefa afaka elaela, dia nitondran’i Kaina ny vokatry ny tany ho fanatitra ho an’i Jehovah; 4fa nitondran’i Abela kosa ny voalohan-terak’ondriny, dia izay matavy.
Ary Jehovah nankasitraka an’i Abela mbamin’ny fanatiny; 5fa Kaina mbamin’ny fanatiny kosa tsy mba nankasitrahany. Dia tezitra indrindra Kaina, sady nanjombona ny tarehiny.
6Ary hoy Jehovah tamin’i Kaina: Nahoana no tezitra hianao? Ary nahoana no manjombona ny tarehinao? 7Raha tsara toetra hianao, moa tsy ho miramirana va?#4.7 Heb. tsy hisy fisandratana va? Fa raha tsy tsara toetra kosa hianao, dia mamitsaka eo am-baravarana ny ota; ary hianao no kendren’ny faniriany, kanefa hianao no tokony hanapaka azy.
8Ary Kaina niteny#4.8 Heb. nanao hoe. tamin’i Abela rahalahiny; ary nony tany an-tsaha izy mirahalahy, dia nitsangana Kaina nanatona an’i Abela rahalahiny ka namono azy.
9Ary hoy Jehovah tamin’i Kaina: Aiza Abela rahalahinao? Fa hoy izy: Asa; moa mpitandrina ny rahalahiko va aho? 10Ary hoy Izy: Inona no nataonao? Ny feon’ny ran’ny rahalahinao mitaraina amiko avy amin’ny tany. 11Ary ankehitriny dia voaozona hianao hiala amin’ny tany onenana,#4.11 Na: dia hihatra aminao ny ozona avy amin’ny tany. izay nivava hitelina ny ran’ny rahalahinao nalatsaky ny tànanao. 12Raha miasa ny tany hianao, tsy mba hahavokatra ho anao intsony izy; ho mpanjenjena sy mpirenireny eny ambonin’ny tany hianao.
13Dia hoy Kaina tamin’i Jehovah: Lehibe ny valin’ny heloko#4.13 Heb. ny heloko. mihoatra noho izay zakako.#4.13 Na: mihoatra noho ny azo avela. 14Indro, efa noroahinao hiala amin’ny tany onenana aho andro-any; dia hiery#4.14 Na: ka ho takona. ny tavanao aho ary ho mpanjenjena sy mpirenireny eny ambonin’ny tany; koa na iza na iza hahita ahy dia hamono ahy.
15Ary hoy Jehovah taminy: Noho izany na iza na iza hamono an’i Kaina, dia hovaliana fito heny izy. Ary Jehovah nanao famantarana ho an’i Kaina, mba tsy hisy hamono azy izay rehetra hahita azy.
16Ary Kaina dia niala teo anatrehan’i Jehovah ka nonina tao amin’ny tany Noda#4.16 Noda = Firenirenena. tandrifin’i Edena.
Ny taranak’i Kaina, sy ny nahaterahan’i Seta.
17ARY Kaina nahalala ny vadiny, dia nanan-anaka ravehivavy ka niteraka an’i Enoka; ary nanorina vohitra Kaina, ka ny anaran’ny vohitra dia nataony hoe Enoka, araka ny anaran’ny zanani-lahy.
18Ary Enoka niteraka an’Irada; ary Irada niteraka an’i Mehojaela; ary Mehojaela niteraka an’i Metosaela; ary Metosaela niteraka an’i Lameka.
19Ary Lameka nampirafy roa: ny anaran’ny anankiray Ada, ary ny anaran’ny anankiray Zila. 20Ary Ada niteraka an’i Jabala; izy no rain’ny mpitoetra an-day, miandry omby aman’ondry. 21Ary ny anaran’ny rahalahiny dia Jobala; izy no rain’ny mpitendry lokanga sy mpitsoka sodina rehetra. 22Ary Zila kosa niteraka an’i Tobala-kaina, mpanefy fiasana maranitra, na varahina na vy; ary ny anabavin’i Tobala-kaina dia Nama.
23Ary hoy Lameka tamin’ny vadiny:
Ry Ada sy Zila ô, mihainoa ny feoko;
Ry vadin’i Lameka, mitandrema ny teniko:
Efa namono#4.23 Na: mamono. lehilahy aho noho ny feriko,
Ary tovolahy noho ny faharatrako.
24Raha valiana fito heny izay mamono an’i Kaina,
Dia fito amby fito-polo heny kosa izay mamono an’i Lameka.
25Ary Adama nahalala ny vadiny indray, ka dia niteraka zazalahy ravehivavy; ary ny anarany nataony hoe Seta;#4.25 Seta = Nomena (ho solo). fa Andriamanitra hoy izy, efa namome ahy zanaka anankiray koa ho solon’i Abela, satria novonoin’i Kaina izy. 26Ary Seta koa niteraka zazalahy; ary ny anarany nataony hoe Enosy. Tamin’izany no vao niantsoana ny anaran’i Jehovah.
Արդեն Ընտրված.
Genesisy 4: MBP
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Baiboly Protestanta Malagasy © Malagasy Bible Society, 1965, 2019.