Matthieu 15
15
Pharisienge deji Jésu tà ɔje dè nyangirkà
(An-in Marc 7.1-13 tɔ)
1Pharisienge se njéndang magtubge in-in Jérusalem reei ra Jésu’t deji nin edi nè:
2– Ké bain á njékuwe-girige ali tà tà nyangirkà’t le kà jéige wa? Ké bain á ei togoi ji de lé kuwe usei nyan wa?
3Nè Jésu deje de ede nè:
– A sei, ké bain á ali tà tà ndukunn’t le Nube tede nyangirkà le si tá wa? 4Oiyo Nube tam ede nè: «Ile koje dè bɔi’t se koin» éké «Nanan ke tam tà ke majelé se bɔ’n éké kon’n ɓaa, d’a d’ade kum’n à udu gar-gar.» 5Nè sei ɓaa, i tami edi nè: «Nanan ke ede bɔ’n éké kon’n ede nè: nyan ke m’ayé ra’n sei nga, m’unn m’unde se ninn’n m’ade Nube ɓá ta.» Doo ke ra titeke bè nga ɓaa, ile koje dè bɔ’n se kon’n lé. 6Titeke bè á sei adi nyangirkà le si tá pujur dè tà le Nube. 7Sei njékede gosge! Tà ke Esaie tam kété mari ɔje’n dè si ede nè:
8«Kosdooge nè nga ɗɔyi man se tà de karè,
nè ɓengre de heb se’m.
9Dé ɗɔi’m ke nonon bè karè,
tede nyan ke dé ndó nan nga, è ndukunnge
ke in ra dooge ke dè nang nè karè.»
Nyange ke ade doo mine’n
(An-in Marc 7.14-23 tɔ)
10Go’t gugu Jésu ɓar doobulege ade reei rann’t. E ede de ede nè:
– Uri mbi si ooi tà nè maje le kade i geri gir’n. 11Nyan ke in nata aw kêm doo’t á tel’n ke doo ke mine lé, nè nyan ke in kêm doo’t tee tànn’t á ke nyan ke ade doo tel mine’n.
12Njékuwe-gir-Jésuge reei rann’t edi nin edi nè:
– Tà ke i tam á Pharisienge ooi nga tuge de jig’t, nè ké i ger bè lé wa?
13Jésu ile de dè’t ede nè:
– Kage ke rara ke Bɔ’m ke danrán man’n lé ɓaa, d’ade d’ɔr’n se ngire’n bere ɓarak kile’n kɔke. 14Inyei de! tede dé njékumtɔge ke njékɔr non njékumtɔ made dege. Ke nè á njèkumtɔ ɔr non njèkumtɔ made’n ɓaa, ei joo mbak à osoi kêm bolè’t.
15Pierre deje Jésu ede nè:
– Ɔrgir gostà nè nga ade jè sei.
16Jésu deje Pierre ede nè:
– Sei géa, ké ɗarinè i geri gir gostà nè nga lé ɓai tɔ wa? 17Nyan malang ke in nata aw kêm tà doo’t nga, tuge gang aw jebelenn’t ade aw ede’n yide. Ké sei geri bè lé wa? 18Nyan ke tee tà doo’t nga in dè ɓengrenn’t. E nè á è nyan ke tel doo ke nyan ke mine. 19Tàgirge ke majelé, tɔl doo, sang dinye le doo, tò se nan ke kaiya’t, mêndé nyan, tête tà kunde tà doo’t, taje ndu a tɔ nga, in-in dè ɓengre doo’t. 20Nyange nè á tel doo ke nyan ke mine, nè kuse nyan anje togo ji à ade doo à mine lé.
Kundekêm le dinye ke è doo ke dɔ
(An-in Marc 7.24-30 tɔ)
21Jésu in loon’t nè aw kêm ɓee-bòge ke Tyr se Sidon. 22An! dinye karé ke kêm ɓee ke Canan unde loo tee tam tà se ndu’n ke bòi beng ede Jésu ede nè:
– Kuwe-ɓee, Ngonn David, an kumtondoo le’m kɔkrɔ karè. Ndil ke majelé ra kum ngonn’m ke dinye ndoo ngain.
23Nè Jésu ile’n dè’t lé. Njékuwe-girnge reei edi nin edi nè:
– I rɔyé ade n’aw tede n’non go jéi’t ɗêl-ɗêl ngain.
24Jésu tel ile de dè’t ede nè:
– Man nga Nube ule’m ɔje dè batege ke kêm ɓeekon ke Israel ke ndemi kuwe karé bere.
25Nè dinye nè nga ree ɔse keje’n non Jésu’t ede’n ede nè:
– Kuwe-ɓee, kɔkrɔ karè i ra se’m kuwe.
26Jésu tel ile dinye nè nga dè’t ede nè:
– Kunn mapa le ngann dooge kile kade ngann bisege nga majelé.
27Dinye nè nga ile jésu dè’t ede nè:
– Oiyo Kuwe-ɓee, è kum kuwe. Nè ngann bisege nga, nyon-nyon mapa ke toso nang gir table’t le kuwe dege á usei.
28E á Jésu tel ede dinye nè ede nè:
– Hai! dinye, kundekêm lei tò ɓel ngain. M’a m’ra nyan ke i deje nga le kadi.
Kêm kàdenn’t nè kuwe ra ngonn le dinye nè tel tò karè ndát-ndát.
Jésu aje njératurge gai-gai
29Jésu in kêm ɓee-bòge ke Tyr se Sidon aw kum’n ke ngang ba’t ke ɓeekon ke Galilée. E al aw ndi dè mbal’t. 30Kosdoo-bulege ngain reei rann’t dik-dik. Ei reei se njé njiye metege se njédɔgemetege se njékumtɔge a, se njé ke tami tà lé a tɔ. Kosdoo-bulege nè nga reei se njératurge ke rang bule undei de nang nja Jésu’t ɗêng-ɗêng. E ɔr ratur ra de’t. 31Ndil kosdoo-bulege tee an-in soin-soin. Njé ke tami tà lé unni gir tami tà. Njédɔgemetege teli njiyei ɗáj-ɗáj. Njémetege njiyei awi a, teli a, njékumtɔge géa an-in loo njai-njai a tɔ. Doobulege ɔsi pa ulei ndubra dè Nube’t le Israel.
Jésu ade dooge aru dɔg loo sɔ mapa usei
(An-in Marc 8.1-10 tɔ)
32Jésu ɓar njékuwe-girnge rann’t ede de ede nè:
– Man m’an kumndoo le doobulege nè nga. An-in! ei ndii se’m ase ndɔ mute nè ingei nyan usei lé. Man m’ndige le kinye de kade awi kêm de ɓo lé nè bainléa kumkil à ra de rebe.
33Njékuwe-gir-Jésuge deji nin edi nè:
– Ké j’à j’ingei mapa ra kêm dile loo’t nè le kade ase dooge ke bulei tchaprai nè nga wa?
34Jésu ede de ede nè:
– Ké awi se mapa kandang ji si’t wa?
Dé d’ede’n d’ede nè:
– J’aw se wal mapa ji sejimute se ngann kanjege ndêin a tɔ.
35Jésu unn ndu’n ade doobulege teli ndii nang. 36E unn mapa ke ji sejimute se kanjege nè nga, ra Nube oiyo ɓita uwe tête danné ade njékuwe-girnge. Njékuwe-girnge in-in ke kété adi doobulege. 37Dé malang d’use mapa dé ndann gɔj-gɔj. Dé tann gute nyon-nyon mur ke nain nang janga ji sejimute. 38Dooge malang ke usei mapa nga asi dingemge aru dɔg loo sɔ nal mbɔje dinyege se ngannge. 39Loo ke Jésu inye doobulege ade awi ɓá ɓaa, è al kêm bato’t aw kêm ɓeekon ke Magadan.
Արդեն Ընտրված.
Matthieu 15: GUL04
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Magtub Mann-ra ke Kige ©Alliance Biblique du Tchad, 2004