San Lucas 20
20
Xnáꞌanj nii man Jesús me síí caꞌneꞌ suun rihaan soꞌ quiꞌya̱j soꞌ nda̱a vaa ꞌyaj soꞌ a
1Dan me se ꞌo̱ güii nicu̱nꞌ Jesús rej ya̱nj nuvií noco̱o, tucuꞌyón Jesús rihaan yuvii̱, ne̱ nataꞌ soꞌ snana̱ Yaꞌanj nana̱ sa̱ꞌ, ne̱ nicu̱nꞌ nij xrej ata̱ suun noco̱o doj nicu̱nꞌ nij síí naquiꞌyaj cu̱u stucua̱nj Moisés nicu̱nꞌ nij síí uun chij nicu̱nꞌ rej tucuꞌyón Jesús a. 2Ga̱a ne̱ cataj nij soꞌ rihaan Jesús a:
―Me síí caꞌneꞌ suun rihaan so̱ꞌ qui̱ꞌyáá so̱ꞌ nda̱a vaa ꞌyáá so̱ꞌ ga̱ ―taj nij soꞌ, xnáꞌanj nij soꞌ man Jesús a.
3Ga̱a ne̱ cataj Jesús rihaan nij soꞌ a:
―Ne̱ vaa ꞌo̱ nana̱ me raj xna̱ꞌanj ꞌu̱nj man nij soj, ne̱ cata̱j soj rihanj á. 4Dan me se me síí caꞌneꞌ suun rihaan Juan se vaa cuta̱ꞌ ne soꞌ man yuvii̱, rá soj ga̱. Yaꞌanj naꞌ. Ase nij yuvii̱ xa̱ꞌ ―taj Jesús rihaan nij soꞌ a.
5Ga̱a ne̱ nuchruj ra̱a̱ ndoꞌo nij soꞌ ga̱ tuviꞌ nij soꞌ a:
―Ne̱ sese cata̱j níꞌ se vaa Yaꞌanj caꞌneꞌ suun rihaan Juan cuta̱ꞌ ne soꞌ man yuvii̱, ne̱ cata̱j Jesús rihaan níꞌ me cheꞌé ne cuchuma̱n rá níꞌ nana̱ caꞌmii Juan, cata̱j soꞌ a. 6Tza̱j ne̱ sese cata̱j níꞌ se vaa né si̱j caꞌneꞌ Yaꞌanj suun rihaan me Juan, ne̱ go̱ꞌ cunuda̱nj nij yuvii̱ yahij man níꞌ a. ꞌO̱ se amán rá nij yuvii̱ se vaa síí nataꞌ snana̱ Yaꞌanj me Juan a ―cataj nij soꞌ ga̱ tuviꞌ maꞌa̱n nij soꞌ a.
7Ga̱a ne̱ cataj nij soꞌ rihaan Jesús se vaa ne neꞌen nij soꞌ me síí caꞌneꞌ suun rihaan Juan cuta̱ꞌ ne soꞌ man yuvii̱ a.
8Ga̱a ne̱ cataj Jesús rihaan nij soꞌ a:
―Cheꞌé dan se̱ cataj xnaꞌanj ꞌu̱nj rihaan nij soj me síí caꞌneꞌ suun rihanj qui̱ꞌyáj nda̱a vaa ꞌyáj maꞌ ―taj Jesús rihaan nij soꞌ a.
Nanó Jesús cuentó cheꞌé yuvii̱ chiꞌi̱i̱ ꞌyaj suun rihaan naa̱ a
9Ga̱a ne̱ guun cheꞌe̱ Jesús nanó soꞌ cuentó nihánj rihaan nij yuvii̱ a:
―Dan me se cuchruj ꞌo̱ soꞌ ꞌo̱ naa̱ chruj uvá a. Ga̱a ne̱ tanáj soꞌ man naa̱ yoꞌ rihaan síí quiꞌya̱j suun naa̱ yoꞌ, ne̱ curiha̱nj soꞌ caꞌanj soꞌ ga̱nꞌ, ne̱ guun ra̱a̱n ndoꞌo soꞌ a. 10Ne̱ tiempó uta nii chruj uvá caꞌnéé soꞌ man ꞌó se‑mo̱zó soꞌ caꞌa̱nj soꞌ rihaan nij síí nu̱u̱ tumé xnaa̱ soꞌ a. ꞌO̱ se me rá soꞌ rque̱ nij síí nu̱u̱ tumé naa̱ taꞌa̱j chruj uvá rihaan ꞌó mozó yoꞌ, tza̱j ne̱ a̱ doj chruj ne rque̱ nij síí nu̱u̱ tumé naa̱ rihaan ꞌó mozó yoꞌ maꞌ. Ma̱an se goꞌ ndoꞌo nij soꞌ xráá soꞌ, ne̱ quirii nij soꞌ man soꞌ rque naa̱ yoꞌ a. 11Cheꞌé dan caꞌnéé síí toꞌo̱j naa̱ yoꞌ man ꞌó mozó uún, tza̱j ne̱ nij síí nu̱u̱ tumé naa̱ roꞌ, goꞌ uún nij soꞌ xráá mozó yoꞌ, ne̱ ni̱j uxrá quiꞌyaj nij soꞌ man soꞌ, ne̱ quirii nij soꞌ man soꞌ rque naa̱, ne̱ a̱ doj chruj ne rque̱ nij soꞌ man mozó yoꞌ a̱ maꞌ. 12Ga̱a ne̱ caꞌnéé uún síí xna̱a̱ yoꞌ ꞌó mozó uún, tza̱j ne̱ quiranꞌ chiꞌii̱ ndoꞌo soꞌ, quiꞌyaj nij síí nu̱u̱ tumé naa̱, ne̱ quirii nij soꞌ man soꞌ xeꞌ a.
13’Ga̱a ne̱ guun rá síí xna̱a̱ yoꞌ a: “Da̱j qui̱ꞌyáj ya̱j ga̱. ꞌO̱ se caꞌne̱j ꞌu̱nj maꞌa̱n taꞌníj síí ꞌe̱e̱ raj man na̱nj á. Cara̱a̱ cochro̱j nij soꞌ rihaan taꞌníj sese caꞌa̱nj taꞌníj tza̱j xe̱e̱”, guun rá síí xna̱a̱, ne̱ caꞌnéé soꞌ man taꞌníí maꞌa̱n soꞌ caꞌa̱nj yoꞌ a. 14Dan me se queneꞌen nij síí nu̱u̱ tumé naa̱ se vaa ꞌnaꞌ taꞌníí síí xna̱a̱, ga̱a ne̱ nuchruj ra̱a̱ nij soꞌ ga̱ tuviꞌ nij soꞌ da̱j quiꞌya̱j nij soꞌ, taj nij soꞌ a: “Síí nihánj me síí gu̱un xna̱a̱ man naa̱ nihánj vaa güii na̱nj á. Cheꞌé dan ticavi̱ꞌ níꞌ man soꞌ, ne̱ vaa güii, ne̱ gu̱un xna̱a̱ maꞌa̱n níꞌ man naa̱ nihánj chugua̱nj”, taj nij soꞌ rihaan tuviꞌ nij soꞌ a. 15Ga̱a ne̱ quirii nij soꞌ man taꞌníí síí xna̱a̱ yoꞌ xeꞌ, ne̱ ticaviꞌ nij soꞌ man soꞌ na̱nj ado̱nj.
’Cheꞌé dan da̱j quiꞌya̱j síí xna̱a̱ yoꞌ man nij síí nu̱u̱ tumé xnaa̱ soꞌ, rá soj ga̱. 16ꞌO̱ se caꞌna̱ꞌ soꞌ vaa güii, ne̱ ticavi̱ꞌ soꞌ man nij síí nu̱u̱ tumé naa̱ yoꞌ, ne̱ ta̱cuachén soꞌ xnaa̱ soꞌ rihaan ꞌó síí tu̱mé man xnaa̱ soꞌ na̱nj ado̱nj ―taj Jesús rihaan nij yuvii̱ a.
Ga̱a cuno nij yuvii̱ nana̱ nihánj, ne̱ cuchuꞌviꞌ ndoꞌo nij soꞌ, ne̱ cataj nij soꞌ a:
―O̱rúnꞌ ra̱a̱ Yaꞌanj me síí naca̱j man núj rihaan sayuun yoꞌ na̱nj chugua̱nj ―taj nij soꞌ rihaan Jesús a.
17Ga̱a ne̱ niꞌya̱j Jesús man nij soꞌ, ne̱ xnáꞌanj Jesús man nij soꞌ a:
―Dan me se me cheꞌé nó nana̱ nihánj rihaan Danj Yaꞌanj, rá nij soj ga̱:
Yuvej quiriꞌíj nij síí cuneꞌ veꞌ roꞌ, guun yuvej sa̱ꞌ vaa se uun doj
rihaan cunuda̱nj nij yuvej ma̱n tacóó veꞌ yoꞌ na̱nj ado̱nj,
taj Danj Yaꞌanj a. 18Ne̱ ase vaa yuvej yoꞌ vaa ꞌu̱nj, ne̱ ase vaa yuvii̱ acoꞌ cheꞌé yuvej yoꞌ vaa yuvii̱ naꞌvej rá cuno̱ rihaan ꞌu̱nj, ne̱ uxrá quira̱nꞌ nij soꞌ sayuun na̱nj ado̱nj. Ne̱ ase vaa yuvii̱ quinij yuvej yoꞌ xráá vaa nij yuvii̱ qui̱ꞌyáá ꞌu̱nj sayuun man na̱nj ado̱nj ―taj Jesús a.
19Ga̱a ne̱ guun rá nij síí naquiꞌyaj cu̱u stucua̱nj Moisés do̱ꞌ, nij xrej ata̱ suun noco̱o do̱ꞌ, ta̱ꞌaa raꞌya̱nj man Jesús, tza̱j ne̱ chuꞌviꞌ nij soꞌ niꞌya̱j nij soꞌ man nij yuvii̱ a. Queneꞌen nij soꞌ se vaa cheꞌe̱ maꞌa̱n nij soꞌ me cuentó nanó Jesús a.
Caꞌmii Jesús cheꞌé impuestó go̱ꞌ níꞌ rihaan gobiernó do̱ꞌ, cheꞌé se rque̱ níꞌ rihaan Yaꞌanj do̱ꞌ a
20Dan me se tumé ndoꞌo nij síí naquiꞌyaj cu̱u stucua̱nj Moisés do̱ꞌ, nij xrej ata̱ suun noco̱o do̱ꞌ, man Jesús da̱j caꞌmi̱i̱ soꞌ a. Ne̱ caꞌnéé nij soꞌ man do̱j tuviꞌ nij soꞌ síí tihaꞌ yuꞌunj cuchi̱ꞌ nij soꞌ rihaan Jesús, ne̱ quiꞌya̱j nij soꞌ nda̱a vaa ꞌyaj síí vaa sa̱ꞌ síí me rá xna̱ꞌanj nana̱ man soꞌ a. ꞌO̱ se guun rá nij soꞌ cuta̱ꞌ nij soꞌ cacunꞌ xráá Jesús cheꞌé nana̱ caꞌmi̱i̱ soꞌ, ga̱a ne̱ caꞌve̱e ta̱cuachén nij soꞌ man Jesús rihaan tucuá suun gobernador a. 21Dan me se xnáꞌanj nij síí tihaꞌ yuꞌunj yoꞌ man Jesús a:
―Neꞌen núj se vaa nana̱ nica̱ ina̱nj aꞌmii so̱ꞌ ne̱ tucuꞌyón so̱ꞌ do̱ꞌ, maestro. Ne̱ ꞌo̱ cuya̱a̱n vaa cunuda̱nj yuvii̱ rihaan so̱ꞌ chugua̱nj. Ne̱ ya̱ tucuꞌyón so̱ꞌ rihaan yuvii̱ da̱j quiꞌya̱j yuvii̱ canoco̱ꞌ yuvii̱ man Yaꞌanj, maestro. 22Dan me se nó xcúún níꞌ go̱ꞌ níꞌ impuestó rihaan síí nica̱j suun emperador cuꞌna̱j César naꞌ. Ase se̱ goꞌ níꞌ xa̱ꞌ ―taj nij síí tihaꞌ yuꞌunj, xnáꞌanj nij soꞌ man Jesús a.
23Tza̱j ne̱ xcaj Jesús cuentá se vaa me rá nij soꞌ tiha̱ꞌ yuꞌunj nij soꞌ man soꞌ a. Cheꞌé dan cataj Jesús nana̱ nihánj rihaan nij soꞌ a:
24―Ti̱haa̱n soj saꞌanj aga̱ꞌ ni̱ꞌyaj ꞌu̱nj á ―taj Jesús rihaan nij soꞌ a.
Ga̱a ne̱ ga̱a tihaa̱n nij soꞌ saꞌanj aga̱ꞌ yoꞌ rihaan Jesús, ga̱a ne̱ cataj Jesús a:
―Me síí nó rihaan saꞌanj aga̱ꞌ nihánj ga̱. Ne̱ me síí se‑chuvi̱i nó rihaan saꞌanj aga̱ꞌ nihánj ga̱ ―taj Jesús, xnáꞌanj soꞌ man nij síí me rá tiha̱ꞌ yuꞌunj yoꞌ a.
―Síí nica̱j suun emperador cuꞌna̱j César me nó rihaan saꞌanj aga̱ꞌ yoꞌ, ne̱ nó se‑chuvi̱i soꞌ rihaan saꞌanj a ―taj nij soꞌ a.
25Ga̱a ne̱ cataj Jesús rihaan nij soꞌ a:
―Cheꞌé dan go̱ꞌ soj siꞌyaj César rihaan maꞌa̱n soꞌ, ne̱ rque̱ soj siꞌyaj Yaꞌanj rihaan Yaꞌanj á ―taj Jesús a.
26Cuno nij síí tihaꞌ yuꞌunj yoꞌ nana̱ caꞌmii ranga̱ꞌ Jesús, ne̱ caꞌanj rá nij soꞌ a. Dan me se ne gu̱un nucua̱j nij soꞌ cuta̱ꞌ nij soꞌ cacunꞌ xráá Jesús, ne̱ cunuu dínj tuꞌva nij soꞌ na̱nj ado̱nj.
Cataj Jesús se vaa ya̱ cunu̱u iꞌna̱ꞌ uún nij síí caviꞌ a
27Dan me se cuchiꞌ do̱j nij síí saduceo rihaan Jesús a. Nij síí saduceo roꞌ, taj se vaa daj chiha̱a̱ míj se̱ cunuu iꞌna̱ꞌ uún yuvii̱ asa̱ꞌ caviꞌ yuvii̱, taj nij soꞌ a. 28Dan me se xnáꞌanj nij soꞌ man Jesús, ne̱ cataj nij soꞌ nana̱ nihánj a:
―Cachrón síí cuꞌna̱j Moisés nana̱ nihánj rihaan yanj, cheꞌé rej cuno̱ níꞌ a: “Sese caviꞌ ꞌo̱ síí vaa nica̱, ne̱ sese taj va̱j taꞌníí soꞌ, ne̱ no̱ xcúún tinúú soꞌ xca̱j tinúú soꞌ man choco̱ꞌ soꞌ, ne̱ cuchru̱j noꞌ neꞌej, ne̱ gu̱un taꞌni̱j síí caviꞌ man neꞌej yoꞌ a”, taj Moisés ga̱a naá, maestro. 29Dan me se vaa chi̱j nij tinu̱j ꞌo̱ nij soꞌ a. Síí chava̱ꞌ roꞌ, xcaj man chana̱, tza̱j ne̱ caviꞌ soꞌ, ne̱ taj va̱j neꞌej cuchruj chana̱ nica̱ soꞌ, quiꞌyaj soꞌ a. 30Ne̱ cheꞌé dan xcaj scueꞌe̱e̱ síí caviꞌ yoꞌ man choco̱ꞌ soꞌ, tza̱j ne̱ caviꞌ soꞌ uún, ne̱ xcaj scueꞌe̱e̱ soꞌ uún man chana̱, tza̱j ne̱ caviꞌ soꞌ uún a. 31Ne̱ dan me se quisíj xcaj nu̱ꞌ chi̱j nij tinu̱j nij soꞌ man o̱rúnꞌ chana̱ yoꞌ, tza̱j ne̱ taj va̱j a̱ ꞌó neꞌej cuchruj chana̱ yoꞌ, quiꞌyaj nij soꞌ maꞌ. Ne̱ caviꞌ ta̱ranꞌ nij soꞌ na̱nj ado̱nj. 32Síj, ga̱a ne̱ caviꞌ maꞌa̱n chana̱ yoꞌ uún a. 33Dan me se asa̱ꞌ cunuu iꞌna̱ꞌ uún nij síí caviꞌ, ga̱a ne̱ me nij tinu̱j nij soꞌ ni̱caj man chana̱ yoꞌ, rá so̱ꞌ ga̱. ꞌO̱ se ga̱a vaa iꞌna̱ꞌ nij soꞌ, ne̱ nica̱ ta̱ranꞌ nij tinu̱j nij soꞌ guun o̱rúnꞌ noꞌ a ―taj nij síí saduceo, xnáꞌanj nij soꞌ man Jesús a.
34Ga̱a ne̱ cataj Jesús rihaan nij soꞌ a:
―Xa̱ꞌ nij yuvii̱ ma̱n rihaan chumii̱ nihánj cuano̱, tza̱j ne̱ xcaj tuviꞌ nij snóꞌo ga̱ nij chana̱, 35tza̱j ne̱ ino̱ quiꞌya̱j nij yuvii̱ cunu̱u iꞌna̱ꞌ uún ca̱yáán ga̱ Yaꞌanj asa̱ꞌ quisíj güii yoꞌ na̱nj ado̱nj. ꞌO̱ se rej ya̱nj Yaꞌanj me se taj yan va̱j síí xcaj tuviꞌ yoꞌ maꞌ. 36ꞌO̱ se da̱nj na̱nj uún, ne̱ taj yan va̱j síí cavi̱ꞌ uún rej yoꞌ maꞌ. ꞌO̱ se ase vaa nij se‑mo̱zó Yaꞌanj roꞌ, da̱nj ga̱a̱ nij soꞌ, ese taꞌni̱j Yaꞌanj me nij soꞌ, ne̱ si̱j a̱j caviꞌ ne̱ cunuu iꞌna̱ꞌ uún me nij soꞌ ado̱nj.
37’Ne̱ maꞌa̱n síí cuꞌna̱j Moisés me síí cataj xnaꞌanj asino ya̱a̱n se vaa caꞌve̱e cunu̱u iꞌna̱ꞌ uún nij síí caviꞌ nda̱a vaa nariꞌ soꞌ ga̱a canicunꞌ soꞌ rej nicu̱nꞌ ꞌo̱ coj acoꞌ yaꞌan raa̱ a. Dan me se cataj soꞌ se vaa Síí ꞌNi̱j Raꞌa man níꞌ roꞌ, me Yaꞌanj noco̱ꞌ nij síí ma̱n ga̱a naá síí cuꞌna̱j Abraham do̱ꞌ, Isaac do̱ꞌ, Jacob do̱ꞌ a. 38Dan me se né Taꞌa̱nj nij xnangá me Yaꞌanj maꞌ. Ina̱nj nij síí vaa iꞌna̱ꞌ aꞌvee nocoꞌ man Yaꞌanj na̱nj ado̱nj. ꞌO̱ se vaa iꞌna̱ꞌ cunuda̱nj yuvii̱ niꞌya̱j Yaꞌanj na̱nj ado̱nj ―taj Jesús rihaan nij soꞌ a.
39Ga̱a ne̱ taꞌa̱j nij síí naquiꞌyaj cu̱u stucua̱nj Moisés roꞌ, cataj rihaan Jesús a:
―Cuna̱j uxrá caꞌmii so̱ꞌ, Maestro ―taj nij soꞌ a.
40Ne̱ ne quisi̱j rá nij soꞌ xna̱ꞌanj nij soꞌ doj nana̱ man Jesús a̱ maꞌ.
Síí Caꞌne̱j Yaꞌanj Ti̱nanii man Yuvii̱ rihaan Sayuun roꞌ, né na̱nj yuvii̱ me soꞌ maꞌ
41Ga̱a ne̱ cataj Jesús rihaan nij soꞌ a:
―Me cheꞌé taj nij soj se vaa na̱nj taꞌníí taꞌnij siꞌno̱ rey cuꞌna̱j David síí cayáán ga̱a naá me Síí Caꞌne̱j Yaꞌanj Ti̱nanii man Yuvii̱ rihaan Sayuun ga̱. 42ꞌO̱ se nó snana̱ maꞌa̱n David rihaan yanj cuꞌna̱j Nij Chraꞌ Salmó, se vaa cataj soꞌ a:
Caꞌmii Yaꞌanj Si̱j ꞌNi̱j Raꞌa man níꞌ rihaan Síí ꞌNi̱j Raꞌa manj a:
“Caꞌa̱nj ca̱yáán so̱ꞌ xꞌnúú ꞌu̱nj rej nuva̱ꞌ ꞌu̱nj,
43nda̱a se quisi̱j quiꞌya̱j canaán ꞌu̱nj
rihaan ta̱ranꞌ nij síí ta̱j riꞌyunj mán so̱ꞌ,
ne̱ quiri̱i̱ taꞌngáꞌ so̱ꞌ rihaan nij soꞌ ado̱nj”,
taj David a. 44Dan me se Síí ꞌNi̱j Raꞌa man David me Síí Caꞌne̱j Yaꞌanj, taj David a. Sese ꞌni̱j raꞌa soꞌ man David, ga̱a ne̱ me cheꞌé taj soj se vaa na̱nj taꞌníí taꞌnij siꞌno̱ David me soꞌ ga̱ ―taj Jesús rihaan nij síí naquiꞌyaj cu̱u stucua̱nj Moisés a.
Caꞌmii Jesús cheꞌé cacunꞌ tumé nij síí naquiꞌyaj cu̱u stucua̱nj Moisés a
45Ga̱a ne̱ caꞌmii soꞌ nana̱ nihánj rihaan nij síí tucuꞌyón snana̱ soꞌ, ne̱ cuno cunuda̱nj nij yuvii̱ da̱j caꞌmii soꞌ a:
46―Xca̱j nij soj cuentá da̱j ꞌyaj nij síí naquiꞌyaj cu̱u stucua̱nj Moisés, ne̱ tu̱mé soj man soj se̱ gaa na̱nj quiꞌya̱j soj nda̱a vaa ꞌyaj nij soꞌ á. Dan me se niha̱ꞌ rá nij soꞌ cu̱nuû nij soꞌ yatzíj sa̱ꞌ xca̱a̱n cache̱e̱ nij soꞌ rej queneꞌe̱n yuvii̱ man nij soꞌ, ne̱ aranꞌ rá nij soꞌ se vaa caꞌmi̱i̱ sa̱ꞌ yuvii̱ ga̱ nij soꞌ ga̱a chéé nij soꞌ rihaan yuꞌvee a. Ne̱ aranꞌ rá nij soꞌ quita̱j nij soꞌ chruun xlá sa̱ꞌ doj ga̱a ꞌanj nij soꞌ veꞌ nuu chre̱ꞌ níꞌ tu̱cuꞌyón níꞌ stucua̱nj Moisés do̱ꞌ, ga̱a ꞌanj nij soꞌ chaꞌanj do̱ꞌ a. 47Ne̱ aꞌnéj nij soꞌ veꞌ tucuá chana̱ caviꞌ nica̱, ne̱ yu̱u̱n cheꞌe̱ guun tucua̱ nij soꞌ man veꞌ yoꞌ, ne̱ ꞌyaj xca̱a̱n ndoꞌo nij soꞌ cuentó achíín niꞌya̱j nij soꞌ rihaan Yaꞌanj, cheꞌé rej sa̱ꞌ doj gu̱un nucua̱j nij soꞌ tiha̱ꞌ yuꞌunj nij soꞌ man yuvii̱ a. Xa̱ꞌ nij soꞌ, tza̱j ne̱ cheꞌé se vaa ꞌyaj nij soꞌ roꞌ, cheꞌé dan doj a̱ ga̱a̱ sayuun quira̱nꞌ nij soꞌ quiꞌya̱j Yaꞌanj, asa̱ꞌ caꞌneꞌ Yaꞌanj cacunꞌ cheꞌé yuvii̱ ado̱nj ―taj Jesús rihaan nij síí tucuꞌyón snana̱ soꞌ a.
Արդեն Ընտրված.
San Lucas 20: trc
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. 2024 segunda versión electrónica