San Lucas 18
18
Nanó Jesús cuentó cheꞌé chana̱ caviꞌ nica̱ cachíín niꞌya̱j ndoꞌo rihaan cuese̱ a
1Ne̱ nanó Jesús cuentó nihánj rihaan nij síí tucuꞌyón snana̱ soꞌ, cheꞌé se guun rá soꞌ xca̱j nij síí tucuꞌyón snana̱ soꞌ cuentá se vaa no̱ xcúún nij soꞌ niga̱nj cachi̱nj niꞌya̱j nij soꞌ rihaan Yaꞌanj, ne̱ se̱ guun rmi̱i̱ nij soꞌ maꞌ. 2Dan me se cataj Jesús a:
―ꞌO̱ cuese̱ cayáán rque ꞌo̱ chumanꞌ me ꞌo̱ soꞌ, ne̱ né si̱j amán rá niꞌya̱j man Yaꞌanj do̱ꞌ, né si̱j aráj cochro̱j rihaan yuvii̱ do̱ꞌ, me cuese̱ yoꞌ a. 3Ne̱ yáán ꞌo̱ chana̱ caviꞌ nica̱ chumanꞌ yoꞌ, ne̱ síj queꞌe̱e̱ cachíín niꞌya̱j noꞌ rihaan soꞌ se vaa caꞌne̱ꞌ soꞌ cacunꞌ cheꞌé noꞌ ga̱ síí quiꞌyaj sayuun man noꞌ a. 4Ne̱ a̱ doj ne caꞌve̱j rá soꞌ ra̱cuíj soꞌ man noꞌ a̱ maꞌ. Tza̱j ne̱ ꞌo̱ güii me se guun rá maꞌa̱n cuese̱ yoꞌ a: “Caꞌve̱e se ne amán raj niꞌya̱j ꞌu̱nj Yaꞌanj do̱ꞌ, caꞌve̱e se ne aráj co̱chrój rihaan yuvii̱ do̱ꞌ, 5tza̱j ne̱ cheꞌé se guun rmi̱i̱ ndoꞌoj ꞌyaj chana̱ caviꞌ nica̱ nihánj, ne̱ cheꞌé dan caꞌne̱ꞌ ca̱chríí ꞌu̱nj cacunꞌ cheꞌé síí ꞌyaj sayuun man noꞌ, ne̱ caꞌve̱e a. Se taj, ne̱ gu̱un rmi̱i̱ xréé ꞌu̱nj, quiꞌya̱j noꞌ vaa güii ado̱nj”, guun rá cuese̱ yoꞌ a ―taj Síí ꞌNi̱j Raꞌa man níꞌ a.
6Ne̱ cataj uún soꞌ a:
―Xca̱j soj cuentá da̱j caꞌmii cuese̱ vaa qui̱j nimán yoꞌ á. 7Ne̱ dan me se táá a̱ nij síí narii Yaꞌanj, ne̱ nuvi̱i niga̱nꞌ aguáj ndoꞌo nij soꞌ, achíín niꞌya̱j nij soꞌ rihaan Yaꞌanj a. Ne̱ Yaꞌanj, tza̱j ne̱ se̱ caꞌneꞌ Yaꞌanj cacunꞌ cheꞌé nij síí ꞌyaj sayuun man nij soꞌ, rá soj naꞌ. Gu̱un ra̱a̱n ndoꞌo Yaꞌanj caꞌne̱ꞌ soꞌ cacunꞌ, rá soj naꞌ. 8ꞌO̱ se cata̱j xnaꞌanj ꞌu̱nj rihaan soj cuano̱ se vaa raꞌya̱nj uxrá caꞌne̱ꞌ Yaꞌanj cacunꞌ cheꞌé nij síí ꞌyaj sayuun man nij síí narii soꞌ maan ado̱nj. Tza̱j ne̱ dan me se asa̱ꞌ caꞌnaꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj, ne̱ me daj yuvii̱ amán rá niꞌya̱j man Yaꞌanj nari̱j ga̱ ―taj Jesús rihaan nij síí tucuꞌyón snana̱ soꞌ a.
Nanó Jesús cuentó cheꞌé vi̱j síí cachíín niꞌya̱j rihaan Yaꞌanj a
9Ga̱a ne̱ nanó Jesús cuentó nihánj rihaan taꞌa̱j yuvii̱ guun rá se vaa si̱j sa̱ꞌ ina̱nj me maꞌa̱n nij soꞌ ne̱ nachriꞌ nij soꞌ niꞌya̱j nij soꞌ man ꞌó yuvii̱ a:
10―Caꞌanj vi̱j snóꞌo nuvií noco̱o, cachíín niꞌya̱j ro̱j soꞌ rihaan Yaꞌanj a. ꞌO̱ soꞌ roꞌ, me síí fariseo, ne̱ ꞌó soꞌ roꞌ, me síí tihaꞌ yuꞌunj man yuvii̱ cheꞌé impuestó a.
11’Dan me se nicunꞌ síí fariseo yoꞌ, ne̱ cachíín niꞌya̱j soꞌ, ne̱ cataj soꞌ nana̱ nihánj rihaan Yaꞌanj a. ꞌO̱ se caꞌmii soꞌ rihaan maꞌa̱n soꞌ, cataj soꞌ a: “Guun niꞌya̱j uxrá níꞌ, Ata̱j Yaꞌanj. Guun niꞌya̱j uxrá níꞌ se vaa ne ꞌyáá ꞌu̱nj nda̱a vaa ꞌyaj ꞌó nij yuvii̱ maꞌ. Dan me se xa̱ꞌ nij soꞌ, tza̱j ne̱ si̱j itu̱u̱ do̱ꞌ, si̱j tumé cacunꞌ do̱ꞌ, si̱j otoj ga̱ nica̱ ꞌó yuvii̱ do̱ꞌ, me nij soꞌ, ne̱ ne ꞌyáá ꞌu̱nj da̱nj maꞌ. Ne̱ guun niꞌya̱j níꞌ se vaa ne ꞌyáá ꞌu̱nj nda̱a vaa ꞌyaj síí nihánj síí tihaꞌ yuꞌunj man yuvii̱ cheꞌé impuestó a. 12Ne̱ vi̱j ya̱ tocóꞌ ꞌu̱nj xꞌnaa man ma̱ꞌán ꞌu̱nj cheꞌé rej cara̱a̱ gue̱e̱ ꞌu̱nj rihaan so̱ꞌ rque da̱j a̱ tu̱nj güii, ne̱ rqué ꞌu̱nj ꞌo̱ pesó rihaan da̱j a̱ chi̱ꞌ pesó ꞌyaj canaán ꞌu̱nj rihaan so̱ꞌ ado̱nj”, taj síí fariseo yoꞌ rihaan Yaꞌanj a.
13’Ne̱ ga̱nꞌ do̱j tzínꞌ nicunꞌ síí aꞌnéj impuestó man yuvii̱ yoꞌ, ne̱ ne caꞌve̱j rá soꞌ na̱xcaj soꞌ rihaan soꞌ ni̱ꞌyaj soꞌ rej nicu̱nꞌ Yaꞌanj a. Tza̱j ne̱ goꞌ soꞌ se‑cuxru̱ꞌ soꞌ rucua̱a̱ maꞌa̱n soꞌ, ne̱ cataj soꞌ a: “Cunu̱u ꞌe̱e̱ rá so̱ꞌ ni̱ꞌyaj so̱ꞌ manj, Ata̱j Yaꞌanj. ꞌO̱ se si̱j tumé cacunꞌ mej ado̱nj”, taj soꞌ rihaan Yaꞌanj a.
14’Ne̱ cuano̱ nihánj me se cata̱j xnaꞌanj ꞌu̱nj rihaan soj se vaa ga̱a quinanꞌ síí tihaꞌ yuꞌunj man yuvii̱ cheꞌé impuestó yoꞌ tucuá soꞌ, ga̱a ne̱ a̱j cunuu sa̱ꞌ nimán soꞌ rihaan Yaꞌanj na̱nj á. Tza̱j ne̱ ꞌó soꞌ roꞌ, taj maꞌ. ꞌO̱ se xa̱ꞌ síí me rá ta̱cavii sa̱ꞌ man maꞌa̱n, tza̱j ne̱ quiri̱ꞌ soꞌ, ne̱ gu̱un naꞌa̱j soꞌ a. Ne̱ xa̱ꞌ síí naquiꞌyaj nica̱ꞌ nimán, tza̱j ne̱ cavi̱i̱ sa̱ꞌ ndoꞌo soꞌ ado̱nj ―taj Jesús rihaan nij yuvii̱ yoꞌ a.
Nataꞌ Jesús me cheꞌé caranꞌ rá soꞌ niꞌya̱j soꞌ man xnii leꞌe̱j a
15Ga̱a ne̱ nica̱j nij yuvii̱ man nij neꞌej caꞌnaꞌ nij yuvii̱ rihaan Jesús a. ꞌO̱ se me rá nij yuvii̱ cuta̱ꞌ Jesús raꞌa soꞌ raa̱ nij neꞌej cheꞌé rej quiri̱ꞌ neꞌej xnaꞌanj niꞌya̱j neꞌej a. Tza̱j ne̱ queneꞌen nij síí tucuꞌyón snana̱ Jesús da̱j quiꞌyaj nij yuvii̱, ga̱a ne̱ caxríj yuva̱a̱ nij soꞌ man nij yuvii̱ yoꞌ a. 16Tza̱j ne̱ canacúún Jesús man nij síí tucuꞌyón snana̱ soꞌ, ne̱ cataj Jesús rihaan nij soꞌ a:
―Caꞌne̱ꞌ rá soj caꞌna̱ꞌ nij xnii leꞌe̱j rihanj á. Se̱ caráán soj chrej rihaan nij xnii leꞌe̱j a̱ maꞌ. ꞌO̱ se nij síí vaa da̱j se vaa xnii leꞌe̱j roꞌ, síí aꞌvej rá gu̱un chij Yaꞌanj nimán me nij soꞌ na̱nj ado̱nj. 17Ya̱ ya̱ cata̱j xnaꞌanj ꞌu̱nj rihaan soj cuano̱ se vaa síí naꞌvej rá gu̱un chij Yaꞌanj nimán, nda̱a vaa aꞌvej rá xnii leꞌe̱j gu̱un chij Yaꞌanj nimán xnii leꞌe̱j roꞌ, daj chiha̱a̱ míj se̱ catúj soꞌ rej uun chij Yaꞌanj a̱ maꞌ ―taj Jesús rihaan nij síí tucuꞌyón snana̱ soꞌ a.
Caꞌmii Jesús ga̱ ꞌo̱ síí me rá ca̱yáán ga̱ Yaꞌanj nu̱ꞌ cavii nu̱ꞌ caꞌanj a
18Dan me se xnáꞌanj ꞌo̱ síí nica̱j suun man Jesús, cataj soꞌ rihaan Jesús a:
―Maestro, síí sa̱ꞌ ina̱nj mé so̱ꞌ ado̱nj. Da̱j qui̱ꞌyáj, ne̱ caꞌve̱e ca̱yánj ga̱ Yaꞌanj nu̱ꞌ cavii nu̱ꞌ caꞌanj ga̱ ―taj síí nica̱j suun yoꞌ, xnáꞌanj soꞌ man Jesús a.
19Ga̱a ne̱ cataj Jesús rihaan soꞌ a:
―Me cheꞌé cataj so̱ꞌ se vaa síí sa̱ꞌ ina̱nj mej ga̱. ꞌO̱ se o̱rúnꞌ Yaꞌanj me síí sa̱ꞌ ina̱nj ado̱nj. 20Ne̱ a̱j neꞌén so̱ꞌ nij suun noco̱o caꞌneꞌ Yaꞌanj cuno̱ níꞌ a. Dan me se nihánj me nij suun yoꞌ a: “Se̱ cotoj so̱ꞌ ga̱ ꞌó yuvii̱ sese né ni̱ca̱ so̱ꞌ me maꞌ. Se̱ ticavíꞌ so̱ꞌ yuvii̱ maꞌ. Se̱ quiꞌyaj itu̱u̱ so̱ꞌ siꞌyaj ꞌó yuvii̱ maꞌ. Se̱ nanó so̱ꞌ cuentó ne̱ cheꞌé yuvii̱ maꞌ. Cara̱a̱ co̱chróó so̱ꞌ rihaan réé so̱ꞌ do̱ꞌ, rihaan nií so̱ꞌ do̱ꞌ á” ―taj Jesús rihaan síí nica̱j suun yoꞌ a.
21―Asi̱j ga̱a mej xnii me veꞌé canocóꞌ ꞌu̱nj nu̱ꞌ nij tucuáán yoꞌ na̱nj á ―taj soꞌ rihaan Jesús a.
22Ga̱a ne̱ cataj Jesús rihaan soꞌ a:
―Da̱j o̱rúnꞌ rasu̱u̱n achiin ya̱ mán so̱ꞌ na̱nj á. Cutuꞌve̱e̱ so̱ꞌ cunuda̱nj siꞌyáá so̱ꞌ, ne̱ saꞌanj quiri̱ꞌ so̱ꞌ roꞌ, caxri̱i̱ so̱ꞌ ston nij síí nique̱, ne̱ cuma̱n ndoꞌo siꞌyáá so̱ꞌ rej xta̱ꞌ, quiꞌya̱j Yaꞌanj na̱nj ado̱nj. Ne̱ dan me se caꞌna̱ꞌ so̱ꞌ, ne̱ ca̱nocóꞌ so̱ꞌ manj, caꞌa̱nj níꞌ á ―taj Jesús rihaan soꞌ a.
23Dan me se cuno síí nica̱j suun yoꞌ nana̱ nihánj, ga̱a ne̱ quinanó ndoꞌo rá soꞌ a. ꞌO̱ se síí ruꞌvee ndoꞌo me soꞌ a. 24Dan me se niꞌya̱j Jesús man soꞌ, ne̱ cataj Jesús a:
―Sayu̱u̱n uxrá vaa caꞌve̱j rá nij ruꞌvee gu̱un chij Yaꞌanj nimán nij soꞌ na̱nj ado̱nj. 25Dan me se neꞌen soj se vaa sayu̱u̱n ndoꞌo vaa cache̱n xcuu camelló yuꞌuj ta̱j tacúún cúú nuvá, tza̱j ne̱ caꞌve̱e a̱ doj cache̱n xcuu yoꞌ yuꞌuj ta̱j tacúún cúú nuvá, nda̱a rá se vaa caꞌve̱j rá síí ruꞌvee gu̱un chij Yaꞌanj nimán soꞌ a ―taj Jesús a.
26Ga̱a ne̱ xnáꞌanj nij síí cuno nana̱ nihánj man Jesús, cataj nij soꞌ a:
―Cheꞌé dan me se me síí gu̱un nucua̱j nani̱i̱ rihaan sayuun ga̱ ―taj nij soꞌ, xnáꞌanj nij soꞌ man Jesús a.
27Ga̱a ne̱ cataj Jesús rihaan nij soꞌ a:
―Xa̱ꞌ rasu̱u̱n naꞌvee quiꞌya̱j maꞌa̱n ina̱nj yuvii̱, tza̱j ne̱ Yaꞌanj me síí uun nucua̱j quiꞌya̱j cunuda̱nj ado̱nj ―taj Jesús rihaan nij soꞌ a.
28Ga̱a ne̱ cataj Pedró rihaan soꞌ a:
―Ne̱ núj ga̱. A̱j tanáj núj nu̱ꞌ siꞌyaj núj, ne̱ canocoꞌ núj mán so̱ꞌ na̱nj á ―taj Pedró rihaan Jesús a.
29Ga̱a ne̱ cataj Jesús rihaan nij soꞌ a:
―Cuano̱ nihánj me se cata̱j yá ꞌu̱nj rihaan soj se vaa síí tanáj veꞌ tucuá tanáj nica̱ tanáj tinúú tanáj tuviꞌ tanáj taꞌníí tanáj, cheꞌé rej gu̱un chij Yaꞌanj nimán ꞌó yuvii̱ uún roꞌ, 30quiri̱ꞌ uxrá soꞌ doj a̱ rasu̱u̱n ga̱a vaa iꞌna̱ꞌ soꞌ rihaan chumii̱ nihánj, ne̱ asa̱ꞌ guun chij Yaꞌanj rihaan chumii̱ ga̱a̱ rej rihaan níꞌ me se ꞌo̱ ca̱yáán soꞌ ga̱ Yaꞌanj nu̱ꞌ cavii nu̱ꞌ caꞌanj na̱nj ado̱nj ―taj Jesús rihaan nij soꞌ a.
Síj vaꞌnu̱j cataj xnaꞌanj Jesús se vaa cavi̱ꞌ soꞌ ne̱ cunu̱u iꞌna̱ꞌ uún soꞌ a
31Dan me se nica̱j Jesús chuvi̱j nij síí tucuꞌyón snana̱ soꞌ caꞌanj soꞌ, ne̱ cataj soꞌ rihaan nij soꞌ a:
―Ni̱ꞌyaj soj á. Va̱j níꞌ chumanꞌ Jerusalén, ne̱ asa̱ꞌ cuchiꞌ níꞌ, ne̱ quisi̱j ya̱ nu̱ꞌ nana̱ cachrón nij síí nataꞌ snana̱ Yaꞌanj ga̱a naá cheꞌé ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ a. 32Ne̱ dan me se ta̱cuachén nii manj rihaan nij síí yaníj, ne̱ caꞌnga̱ꞌ naco̱o̱ nij soꞌ ni̱ꞌyaj nij soꞌ manj, ne̱ quiꞌya̱j chiꞌi̱i̱ nij soꞌ manj, ne̱ quiri̱i̱ talúj nij soꞌ manj, 33ne̱ go̱ꞌ nij soꞌ cuartá xráj, ga̱a ne̱ ticavi̱ꞌ nij soꞌ manj a. Tza̱j ne̱ cache̱n vaꞌnu̱j güii, ga̱a ne̱ cunu̱u iꞌna̱ꞌ uún ꞌu̱nj, quiꞌya̱j Yaꞌanj ado̱nj ―taj Jesús rihaan nij soꞌ a.
34Tza̱j ne̱ ne queneꞌe̱n uxrá nij soꞌ me cheꞌé caꞌmii Jesús da̱nj maꞌ. ꞌO̱ se ase vaa nana̱ yuve̱ vaa nana̱ yoꞌ rihaan nij soꞌ, ne̱ ne caꞌve̱e xca̱j nij soꞌ cuentá cheꞌé nana̱ yoꞌ maꞌ.
Naxraꞌ rihaan ꞌo̱ síí tuchri̱i, quiꞌyaj Jesús a
35Dan me se ga̱a nichrunꞌ Jesús chumanꞌ Jericó, ne̱ yáán ꞌo̱ síí tuchri̱i tuꞌva chrej, ne̱ achíín soꞌ caridad rihaan yuvii̱ a. 36Dan me se cuno síí tuchri̱i yoꞌ se vaa cachén ri̱i̱ yuvii̱ chrej rej ya̱nj soꞌ, ne̱ cheꞌé dan xnáꞌanj soꞌ man yuvii̱ me cheꞌé va̱j ndoꞌo yuvii̱ chrej yoꞌ a. 37Ga̱a ne̱ cataj xnaꞌanj nii rihaan soꞌ se vaa Jesús síí cavii chumanꞌ Nazaret me síí achén rej ya̱nj nij soꞌ a. 38Ga̱a ne̱ caguáj síí tuchri̱i yoꞌ, cataj soꞌ a:
―Taꞌníí Taꞌnij Siꞌno̱ David síí cayáán ga̱a naá mé so̱ꞌ, Jesús. Cunu̱u ꞌe̱e̱ rá so̱ꞌ manj rugua̱nj ―taj soꞌ, caguáj soꞌ a.
39Ga̱a ne̱ caxríj yuva̱a̱ nij síí ta̱j ya̱a̱n se vaa dínj ga̱a̱ tuꞌva síí tuchri̱i yoꞌ a. Tza̱j ne̱ doj a̱ nucua̱j caguáj soꞌ, cataj soꞌ a:
―Taꞌníí Taꞌnij Siꞌno̱ David síí cayáán ga̱a naá mé so̱ꞌ ado̱nj. Cunu̱u ꞌe̱e̱ rá so̱ꞌ manj rugua̱nj ―taj soꞌ, caguáj soꞌ rihaan Jesús a.
40Canicunꞌ Jesús, ne̱ caꞌneꞌ Jesús suun se vaa ra̱cuíj nii man síí tuchri̱i caꞌna̱ꞌ soꞌ rihaan Jesús a. Ne̱ ga̱a nichrunꞌ síí tuchri̱i yoꞌ rihaan Jesús, ne̱ xnáꞌanj Jesús man soꞌ, cataj Jesús rihaan soꞌ a:
41―Da̱j qui̱ꞌyáj mán so̱ꞌ, rá so̱ꞌ ga̱ ―taj Jesús, xnáꞌanj Jesús man soꞌ a.
―Curuvi̱ꞌ rihanj raj ado̱nj ―taj soꞌ rihaan Jesús a.
42Ga̱a ne̱ cataj Jesús rihaan soꞌ a:
―Caꞌve̱e curuvi̱ꞌ rihaan so̱ꞌ á. Ma̱an cheꞌé se amán rá so̱ꞌ niꞌya̱j so̱ꞌ manj roꞌ, cheꞌé dan nahuun sa̱ꞌ so̱ꞌ ado̱nj ―taj Jesús a.
43Ne̱ nu̱ꞌ curuviꞌ rihaan soꞌ, ga̱a ne̱ canocoꞌ soꞌ xcó Jesús, ne̱ nataꞌ soꞌ se vaa sa̱ꞌ uxrá quiꞌyaj Yaꞌanj ga̱ soꞌ a. Ne̱ nu̱ꞌ nij yuvii̱ queneꞌen da̱j quiranꞌ soꞌ cataj se vaa sa̱ꞌ uxrá quiꞌyaj Yaꞌanj a.
Արդեն Ընտրված.
San Lucas 18: trc
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. 2024 segunda versión electrónica