San Lucas 17
17
Se̱ quiꞌyaj níꞌ se vaa canoco̱ꞌ yuvii̱ chrej chiꞌi̱i̱ maꞌ
1Ga̱a ne̱ cataj Jesús rihaan nij síí tucuꞌyón snana̱ soꞌ a:
―Xa̱ꞌ chumii̱ nihánj, tza̱j ne̱ ma̱n ndoꞌo chrej chiꞌi̱i̱ canoco̱ꞌ yuvii̱, ne̱ vaa yaꞌnúj uxrá rihaan nij yuvii̱ canoco̱ꞌ nij yuvii̱ chrej chiꞌi̱i̱ ado̱nj. Tza̱j ne̱ nique̱ uxrá síí ꞌyaj anocoꞌ yuvii̱ chrej chiꞌi̱i̱ yoꞌ ado̱nj. 2Daj chiha̱a̱ míj se̱ cavii sa̱ꞌ soꞌ maꞌ. Neꞌen soj se vaa sese tocoꞌ vaj nii yuvej xi̱j váj ꞌnúú trigó man chihá ꞌo̱ soꞌ, ne̱ sese tagüéj nii man soꞌ rque na yaꞌa̱nj, ne̱ nij uxrá vaa ranꞌ síí ꞌanj ni̱j rque na yaꞌa̱nj yoꞌ na̱nj ado̱nj. Tza̱j ne̱ nij doj quira̱nꞌ síí quiꞌyaj chiꞌi̱i̱ nimán ꞌo̱ tuviꞌ soj síí nica̱ꞌ nimán na̱nj á.
3’Tu̱mé uxrá soj man soj da̱j quiꞌya̱j soj á. Sese quiꞌyaj tinúú so̱ꞌ cacunꞌ, ne̱ cata̱j so̱ꞌ rihaan soꞌ se vaa nij ndoꞌo quiꞌyaj soꞌ, ne̱ sese ca̱nica̱j nimán soꞌ ta̱náj soꞌ chrej chiꞌi̱i̱, ne̱ cara̱a̱ xꞌnaa so̱ꞌ cheꞌé cacunꞌ tumé soꞌ á. 4Dan me se caꞌve̱e se chi̱j ya̱ quiꞌya̱j soꞌ cacunꞌ rihaan so̱ꞌ rque o̱rúnꞌ güii, tza̱j ne̱ sese chi̱j cuchi̱ꞌ soꞌ rihaan so̱ꞌ ne̱ cata̱j soꞌ se vaa canica̱j nimán soꞌ cheꞌé cacunꞌ quiꞌyaj soꞌ rá soꞌ, ne̱ cara̱a̱ xꞌnaa so̱ꞌ rihaan soꞌ á ―taj Jesús rihaan nij síí tucuꞌyón snana̱ soꞌ a.
Cataj Jesús se vaa cuchuma̱n rá níꞌ ni̱ꞌyaj níꞌ man Yaꞌanj a
5Ga̱a ne̱ nij síí cuneꞌ Jesús roꞌ, cataj nij soꞌ rihaan maꞌa̱n Jesús Si̱j ꞌNi̱j Raꞌa man níꞌ a:
―Cata̱j xnaꞌanj so̱ꞌ rihaan núj da̱j quiꞌya̱j núj, ga̱a ne̱ doj a̱ cuchuma̱n rá núj ni̱ꞌyaj núj Yaꞌanj á ―taj nij soꞌ rihaan Jesús a.
6Ga̱a ne̱ cataj Síí ꞌNi̱j Raꞌa man níꞌ rihaan nij soꞌ a:
―Sese da̱j se ꞌo̱ sꞌnii̱ cuchuma̱n rá soj ni̱ꞌyaj soj man Yaꞌanj, ne̱ sese ase vaa caân cuêj mostazá xlá ga̱a̱ cuchuma̱n rá soj, ne̱ cata̱j soj rihaan chruun nihánj se vaa cu̱riha̱nj chruun yoꞌóó rej nicu̱nꞌ yoꞌ ne̱ caꞌa̱nj chruun canicu̱nꞌ yoꞌ rque na yaꞌa̱nj, ne̱ cuno̱ chruun rihaan soj ado̱nj ―taj Jesús rihaan nij soꞌ a.
Se̱ caꞌmii xta̱ꞌ níꞌ cheꞌé suun quiꞌyaj níꞌ cheꞌé Yaꞌanj maꞌ
7Ga̱a ne̱ cataj uún Jesús rihaan nij síí cuneꞌ soꞌ a:
―Sese vaa mozó nu̱u̱ rihaan ꞌo̱ soj, ne̱ sese uxraꞌ mozó yoꞌóó do̱ꞌ, sese tumé mozó daán soj xcuu do̱ꞌ, ne̱ da̱j cata̱j soj rihaan mozó asa̱ꞌ namán mozó quiꞌya̱j suun soꞌ rej tacaan ga̱. Ne taj soj rihaan mozó se vaa nu̱ꞌ ca̱yáán mozó cha̱ mozó maꞌ. 8Tana̱nj ta̱j soj a: “Quiꞌya̱j chu̱vií so̱ꞌ cha̱ ꞌu̱nj, ne̱ cuta̱ꞌ so̱ꞌ se chá do̱ꞌ, na do̱ꞌ, rihaan mesá rej cha̱ ꞌu̱nj, ne̱ asa̱ꞌ quisíj chaj ga̱a ne̱ caꞌve̱e cha̱ so̱ꞌ ne̱ coꞌo̱ so̱ꞌ na ado̱nj.” Da̱nj caꞌmi̱i̱ soj rihaan se‑mo̱zó soj na̱nj á. 9Ne̱ se̱ caráyaꞌa̱nj soj man mozó sese quiꞌyaj suun ndoꞌo mozó yoꞌ suun caꞌneꞌ soj rihaan mozó yoꞌ maꞌ. 10Ne̱ ase vaa mozó nu̱u̱ rihaan Yaꞌanj vaa soj, ne̱ cheꞌé dan asa̱ꞌ quisíj quiꞌyaj soj nu̱ꞌ suun caꞌneꞌ Yaꞌanj rihaan soj, ne̱ cata̱j soj se vaa mozó rmi̱i̱ me soj, ne̱ ma̱an ina̱nj suun taj Yaꞌanj rihaan soj quiꞌyaj soj na̱nj ado̱nj ―taj Jesús rihaan nij soꞌ a.
Nahuun sa̱ꞌ chi̱ꞌ síí ranꞌ luj riꞌyuj, quiꞌyaj Jesús a
11Dan me se va̱j Jesús chrej caꞌanj chumanꞌ Jerusalén, ne̱ cachéé soꞌ chrej uun ra̱nꞌ estadó Samaria ga̱ estadó Galilea, 12ne̱ dan me se da̱j doj catu̱u̱ soꞌ ꞌo̱ chumanꞌ, ne̱ nariꞌ tuviꞌ soꞌ ga̱ chi̱ꞌ síí ranꞌ luj riꞌyuj a. Ne̱ ga̱nꞌ canicunꞌ nij soꞌ, 13ne̱ nucua̱j canacúún nij soꞌ man Jesús, ne̱ cataj nij soꞌ a:
―Jesús. Cunu̱u ꞌe̱e̱ rá so̱ꞌ man núj, maestro ―taj nij soꞌ, caguáj nij soꞌ a.
14Ga̱a ne̱ queneꞌen Jesús man nij soꞌ, ga̱a ne̱ cataj Jesús rihaan nij soꞌ a:
―Cavi̱i̱ soj caꞌa̱nj soj, ne̱ ti̱haa̱n soj man soj rihaan nij xrej á ―taj Jesús rihaan nij soꞌ a.
Dan me se cuno nij soꞌ nana̱ caꞌmii Jesús, ne̱ cavii nij soꞌ, caꞌanj nij soꞌ, ne̱ ga̱a va̱j nij soꞌ chrej, ne̱ nahuun sa̱ꞌ cunuda̱nj nij soꞌ a. 15Ne̱ ꞌo̱ nij soꞌ roꞌ, xcaj cuentá se vaa nahuun sa̱ꞌ soꞌ, ga̱a ne̱ canica̱j soꞌ caꞌanj soꞌ rej va̱j Jesús, ne̱ nucua̱j ndoꞌo caguáj soꞌ cataj soꞌ se vaa sa̱ꞌ uxrá quiꞌyaj Yaꞌanj ga̱ soꞌ a. 16Ne̱ ga̱a cuchiꞌ soꞌ rihaan Jesús, ga̱a ne̱ caꞌanj ca̱yáán ru̱j soꞌ nda̱a canó rihaan soꞌ rihaan yoꞌóó, ne̱ cataj soꞌ guun niꞌya̱j níꞌ rihaan Jesús a. Ne̱ síí avii rej Samaria síí yaníj ga̱ nij yuvii̱ israelitá me soꞌ a. 17Ga̱a ne̱ cataj Jesús rihaan nij síí chéé ga̱ soꞌ a:
―Nuveé chi̱ꞌ ya̱ yuvii̱ nahuun sa̱ꞌ naꞌ. Ne̱ me rej va̱j ꞌó u̱u̱n nij síí nahuun sa̱ꞌ, rá soj ga̱. 18Ne̱ a̱ ꞌó nij soꞌ ne ca̱nica̱j cata̱j se vaa sa̱ꞌ uxrá quiꞌyaj Yaꞌanj cheꞌé soꞌ a̱ maꞌ. O̱rúnꞌ síí yaníj nihánj me síí guun rá cata̱j da̱j quiꞌyaj Yaꞌanj ga̱ soꞌ a̱ naꞌ ―taj Jesús, xnáꞌanj soꞌ man nij yuvii̱ chéé ga̱ soꞌ a.
19Ga̱a ne̱ canica̱j Jesús cataj Jesús rihaan síí samaritano yoꞌ a:
―Na̱xuma̱a̱n so̱ꞌ, ne̱ caꞌa̱nj so̱ꞌ á. Cheꞌé se amán rá so̱ꞌ niꞌya̱j so̱ꞌ Yaꞌanj roꞌ, cheꞌé dan a̱j nahuun sa̱ꞌ so̱ꞌ chugua̱nj ―taj Jesús rihaan soꞌ a.
Caꞌmii Jesús cheꞌé güii gu̱un cheꞌe̱ Yaꞌanj gu̱un chij Yaꞌanj a
20Dan me se xnáꞌanj nij síí fariseo man Jesús me güii gu̱un cheꞌe̱ Yaꞌanj gu̱un chij Yaꞌanj rihaan chumii̱ nihánj a. Ga̱a ne̱ cataj soꞌ rihaan nij síí fariseo a:
―Taj cheꞌé ni̱ꞌyaj ndoꞌo soj maꞌ. Caꞌve̱e se gu̱un chij Yaꞌanj rihaan chumii̱ nihánj, tza̱j ne̱ se̱ queneꞌen yuvii̱ maꞌ. 21Ne̱ se̱ cataj nii: “Ni̱ꞌyaj so̱ꞌ á. Nihánj me uun chij Yaꞌanj chugua̱nj. Yoꞌ me rej uun chij Yaꞌanj ado̱nj.” Se̱ caꞌmii yuvii̱ da̱nj maꞌ. ꞌO̱ se scaꞌnúj maꞌa̱n soj roꞌ, a̱j vaa yuvii̱ uun chij Yaꞌanj nimán ado̱nj ―taj Jesús rihaan nij síí fariseo a.
22Ga̱a ne̱ canica̱j Jesús cataj soꞌ rihaan nij síí tucuꞌyón snana̱ soꞌ a:
―Vaa güii gu̱un ndoꞌo rá soj queneꞌe̱n soj güii nihánj güii va̱j ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj, tza̱j ne̱ se̱ caꞌvee queneꞌe̱n soj manj maꞌ. 23Ga̱a ne̱ cata̱j yuvii̱ rihaan soj a: “Ni̱ꞌyaj so̱ꞌ á. Yoꞌ me rej va̱j Jesús chugua̱nj.” Ne̱ cata̱j uún yuvii̱ a: “Ni̱ꞌyaj so̱ꞌ á. Nihánj me rej va̱j Jesús ado̱nj”, cata̱j yuvii̱ rihaan soj a. Tza̱j ne̱ se̱ cavii soj nano̱ꞌ soj manj maꞌ. 24Dan me se nda̱a rá se uun ga̱a raa̱n rihaan chumii̱ nihánj, ne̱ ꞌo̱ chuguu̱n nu̱ꞌ rihaan chumii̱ nihánj roꞌ, da̱nj gu̱un rá yuvii̱ asa̱ꞌ caꞌnáꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ ado̱nj. 25Tza̱j ne̱ vaa cheꞌé qui̱ránꞌ ꞌu̱nj queꞌe̱e̱ sayuun asino ya̱a̱n, ga̱a ne̱ vaa cheꞌé nachri̱ꞌ nij síí ma̱n rihaan chumii̱ nihánj cuano̱ ni̱ꞌyaj nij soꞌ manj a.
26’Ne̱ ase vaa quiꞌyaj yuvii̱ ga̱a cayáán síí cuꞌna̱j Noé rihaan chumii̱ roꞌ, da̱nj ga̱a̱ quiꞌya̱j uún yuvii̱ asa̱ꞌ caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj ado̱nj. 27Dan me se chá yuvii̱ do̱ꞌ, coꞌo yuvii̱ do̱ꞌ, xcaj tuviꞌ nij yuvii̱ do̱ꞌ, ne̱ ina̱nj da̱nj quiꞌyaj nij yuvii̱ nda̱a quisíj güii catúj nij tuvi̱ꞌ Noé rque rihoo xi̱j chéé rihaan na a. Ga̱a ne̱ ta̱j niꞌyo̱n camanꞌ ndoꞌo, ne̱ caꞌnaꞌ na yaꞌa̱nj, ne̱ caráán na yaꞌa̱nj xráá cunuda̱nj nij soꞌ, ne̱ caviꞌ nij soꞌ a. 28Ne̱ veé da̱nj quiꞌyaj nij yuvii̱ ma̱n chumanꞌ cuꞌna̱j Sodoma ga̱a cayáán síí cuꞌna̱j Lot ado̱nj. ꞌO̱ se chá nij soꞌ do̱ꞌ, coꞌo nij soꞌ do̱ꞌ, quiránj nij soꞌ rasu̱u̱n cutuꞌvéj nij soꞌ do̱ꞌ, cunô nij soꞌ do̱ꞌ, cuneꞌ nij soꞌ veꞌ do̱ꞌ, 29ne̱ nu̱ꞌ curiha̱nj Lot chumanꞌ Sodoma, ne̱ nu̱ꞌ cavii yaꞌan rej xta̱ꞌ ga̱ yoꞌóó azufré acaa, cayuu yoꞌ rihaan chumanꞌ yoꞌ, ne̱ cacaa nu̱ꞌ chumanꞌ yoꞌ, ne̱ caviꞌ cunuda̱nj nij síí ma̱n chumanꞌ yoꞌ a. 30Ne̱ ase vaa ne xca̱j nij yuvii̱ ma̱n ga̱a naá cuentá se vaa quira̱nꞌ nij soꞌ sayuun roꞌ, da̱nj ga̱a̱ uún yuvii̱ asa̱ꞌ quisíj caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj ado̱nj.
31’Ne̱ güii gu̱un da̱nj me se xa̱ꞌ síí ta̱j xráá veꞌ tucuá me se se̱ caꞌvee catu̱u̱ soꞌ rá veꞌ tucuá soꞌ quiri̱i̱ soꞌ siꞌyaj soꞌ maꞌ. Ne̱ síí nu̱u̱ tacaan ꞌyaj suun roꞌ, se̱ canica̱j soꞌ nano̱ꞌ soꞌ siꞌyaj soꞌ maꞌ. Ma̱an se ꞌo̱ cuna̱nj nij soꞌ á. 32Vaa cheꞌé nanu̱j rá soj da̱j quiranꞌ nica̱ síí cuꞌna̱j Lot ga̱a canica̱j noꞌ niꞌya̱j noꞌ rej xco̱ noꞌ a.
33’Síí tumé uxrá man naꞌvej rá cavi̱ꞌ rihaan chumii̱ nihánj roꞌ, cavi̱ꞌ nu̱ꞌ soꞌ, ne̱ síí caviꞌ roꞌ, soꞌ me síí ga̱a̱ iꞌna̱ꞌ nu̱ꞌ cavii nu̱ꞌ caꞌanj ado̱nj.
34’Cuano̱ nihánj me se cata̱j xnaꞌanj ꞌu̱nj rihaan soj a. Ne̱ güii gu̱un da̱nj me se rej nii̱ roꞌ, quita̱j ro̱j ni̱ca̱ ro̱j soꞌ coto̱j ro̱j soꞌ, ne̱ naca̱j se‑mo̱zó Yaꞌanj man ꞌo̱ soꞌ, ne̱ quina̱j ꞌó soꞌ a. 35Ne̱ cu̱nuû vi̱j ro̱j chana̱ ga̱j ro̱j noꞌ ꞌnúú trigó, ne̱ naca̱j se‑mo̱zó Yaꞌanj man ꞌo̱ noꞌ, ne̱ quina̱j ꞌó noꞌ a. 36Ne̱ cu̱nuû vi̱j ro̱j snóꞌo quiꞌya̱j suun ro̱j soꞌ yoꞌóó, ne̱ naca̱j se‑mo̱zó Yaꞌanj man ꞌo̱ soꞌ, ne̱ quina̱j ꞌó soꞌ na̱nj ado̱nj ―taj Jesús rihaan nij soꞌ a.
37Ga̱a ne̱ xnáꞌanj nij síí tucuꞌyón snana̱ Jesús man soꞌ a:
―Ne̱ me rej caꞌna̱ꞌ so̱ꞌ, ga̱a Seño̱rꞌ ―taj nij soꞌ, xnáꞌanj nij soꞌ a.
Ga̱a ne̱ cataj Jesús rihaan nij soꞌ a:
―Da̱j se vaa nuu chre̱ꞌ yachrúú me rej maꞌa̱n naj nee̱ riꞌyuj roꞌ, da̱nj caꞌne̱j Yaꞌanj sayuun me rej maꞌa̱n yáán yuvii̱ ꞌyaj se chiꞌi̱i̱ ado̱nj ―taj Jesús rihaan nij soꞌ a.
Արդեն Ընտրված.
San Lucas 17: trc
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. 2024 segunda versión electrónica