San Juan 6
6
Rqué Jesús se chá ꞌu̱nꞌ míj (5,000) snóꞌo a
1Cachén doj, ga̱a ne̱ cavii Jesús caꞌanj soꞌ rej xco̱ na laguaná cuꞌna̱j Galilea a. Tiberias cuꞌna̱j ꞌó se‑chuvi̱i na laguaná yoꞌ a. 2Dan me se ri̱i̱ uxrá yuvii̱ canocoꞌ rej xco̱ soꞌ, cheꞌé se a̱j queneꞌen nij yuvii̱ nu̱ꞌ nij suun sa̱ꞌ noco̱o quiꞌyaj Jesús, se vaa nahuun sa̱ꞌ ndoꞌo síí ranꞌ, quiꞌyaj soꞌ a. 3Dan me se cavii soꞌ raa̱ tacaan, ne̱ caꞌanj ca̱yáán soꞌ rihaan yoꞌóó ga̱ nij síí tucuꞌyón snana̱ soꞌ a. 4Dan me se da̱j doj güii achiin ca̱nuû Chaꞌanj Pascuá chaꞌanj navij rá nij yuvii̱ israelitá a. 5Dan me se naxca̱j Jesús rihaan Jesús, ne̱ queneꞌen soꞌ se vaa caꞌnaꞌ ri̱i̱ uxrá yuvii̱ rihaan soꞌ, ne̱ cataj soꞌ rihaan síí cuꞌna̱j Felipé a:
―Me rej quira̱a̱n níꞌ rachrúún cha̱ ta̱ranꞌ nij yuvii̱ nihánj, rá so̱ꞌ ga̱ ―taj soꞌ, xnáꞌanj soꞌ man Felipé a.
6Da̱nj caꞌmii soꞌ rihaan Felipé, cheꞌé se me rá soꞌ queneꞌe̱n soꞌ da̱j cata̱j Felipé a. Tza̱j ne̱ a̱j neꞌen soꞌ da̱j quiꞌya̱j maꞌa̱n soꞌ na̱nj ado̱nj.
7Dan me se cataj Felipé rihaan Jesús a:
―A̱ saꞌanj vaa tuꞌvee yuvii̱ ꞌyaj suun tu̱nj yavii se̱ quisíj quiri̱ꞌ nij soꞌ do̱j rachrúún cha̱ nij soꞌ a̱ maꞌ ―taj soꞌ a.
8Dan me se ꞌo̱ síí tucuꞌyón snana̱ soꞌ síí cuꞌna̱j Andrés tinúú Simón Pedró me se cataj soꞌ rihaan Jesús a:
9―Nihánj me nicunꞌ ꞌo̱ xnii, ne̱ nica̱j xnii nihánj ꞌu̱nꞌ gue̱e̱ rachrúún ꞌnúú cebada, ne̱ vi̱j gue̱e̱ xcuaj leꞌe̱j nica̱j soꞌ, tza̱j ne̱ asa̱ꞌ caꞌve̱e quisi̱j do̱j tzínꞌ nihánj cha̱ ta̱ranꞌ nij yuvii̱ nihánj ga̱ ―taj Andrés yoꞌ a.
10Ga̱a ne̱ cataj Jesús a:
―Caꞌa̱nj ca̱yáán nij yuvii̱ rihaan coj chri̱nꞌ, quiꞌya̱j nij soj á ―taj Jesús rihaan nij síí tucuꞌyón snana̱ soꞌ a.
Dan me se ma̱n uxrá coj chri̱nꞌ rej yoꞌ, ne̱ caꞌanj ca̱yáán nij yuvii̱ rihaan coj chri̱nꞌ yoꞌ, ne̱ ꞌu̱nꞌ míj snóꞌo me nij soꞌ a.
11Dan me se taꞌaa Jesús rachrúún, ne̱ cataj soꞌ guun niꞌya̱j níꞌ rihaan Yaꞌanj, ne̱ cuxraꞌ taꞌa̱j soꞌ rachrúún caxríj soꞌ ston nij síí tucuꞌyón snana̱ soꞌ a. Ne̱ nij síí tucuꞌyón snana̱ soꞌ roꞌ, rqué nij soꞌ cha̱ ta̱ranꞌ nij síí ya̱nj rihaan coj chri̱nꞌ yoꞌ a. Ne̱ ase vaa quiꞌyaj soꞌ ga̱ rachrúún roꞌ, da̱nj quiꞌyaj uún soꞌ ga̱ nee̱ xcuaj yoꞌ, rqué soꞌ nu̱ꞌ se vaa me rá nij yuvii̱ cha̱ nij yuvii̱ yoꞌ a. 12Ga̱a quisíj caraa rque nij yuvii̱, ne̱ cataj Jesús rihaan nij síí tucuꞌyón snana̱ soꞌ a:
―Naquiꞌya̱j chre̱ꞌ nij soj se quináj tuꞌva nij yuvii̱, ne̱ se̱ guun quiri̱ꞌ u̱u̱n yoꞌ maꞌ ―taj Jesús rihaan nij soꞌ a.
13Cheꞌé dan naquiꞌyaj chre̱ꞌ nij soꞌ nu̱ꞌ se quináj tuꞌva nij yuvii̱, ne̱ caraa cunu̱ꞌ chuvi̱j ya̱ scaa, quiꞌyaj nij xcoꞌ nii rachrúún quináj tuꞌva nij yuvii̱ ga̱a quisíj chá nij yuvii̱ yoꞌ ꞌu̱nꞌ rachrúún yoꞌ na̱nj ado̱nj. 14Dan me se ga̱a queneꞌen nij snóꞌo suun sa̱ꞌ noco̱o quiꞌyaj Jesús, ne̱ cataj nij soꞌ a:
―Síí nihánj roꞌ, ya̱ uxrá síí nataꞌ snana̱ Yaꞌanj, síí naꞌvi̱j níꞌ caꞌna̱ꞌ ya̱ rihaan chumii̱ nihánj me soꞌ chugua̱nj ―taj nij snóꞌo yoꞌ a.
15Tza̱j ne̱ a̱j neꞌen Jesús se vaa caꞌna̱ꞌ nij soꞌ, ne̱ ta̱ꞌaa nij soꞌ man soꞌ, ne̱ cune̱ꞌ nij soꞌ man Jesús gu̱un soꞌ síí nica̱j suun rey gu̱un chij rihaan nij soꞌ, ne̱ cheꞌé dan naxuun soꞌ man soꞌ, ne̱ cavii uún o̱rúnꞌ soꞌ caꞌanj soꞌ quij a.
Cachéé Jesús rihaan na a
16Dan me se rej tiꞌnuu, ne̱ nanij nij síí tucuꞌyón snana̱ Jesús tuꞌva na laguaná, 17ga̱a ne̱ catúj nij soꞌ rihoo, ga̱a ne̱ cavii nij soꞌ caꞌanj nij soꞌ chumanꞌ Capernaum a. Dan me se a̱j guun rmi̱ꞌ rihaan na laguaná yoꞌ, ne̱ ataa nama̱n Jesús rihaan nij soꞌ a. 18Ne̱ cavii nana̱ yuva̱a̱, ne̱ uxrá nariꞌ nucuaj ndoꞌo na laguaná yoꞌ a. 19Ne̱ dan me se ꞌu̱nꞌ kilómetro tucuachéé nij soꞌ rihoo rihaan na, ga̱a ne̱ queneꞌen nij soꞌ se vaa chéé Jesús rihaan na ꞌnaꞌ soꞌ, ne̱ ga̱a nichrunꞌ soꞌ rihaan rihoo yoꞌ, ne̱ cuchuꞌviꞌ ndoꞌo nij soꞌ a. 20Tza̱j ne̱ cataj Jesús rihaan nij soꞌ a:
―ꞌU̱nj me ado̱nj. Se̱ chuꞌviꞌ soj maꞌ ―taj Jesús a.
21Cheꞌé dan guun niha̱ꞌ uxrá rá nij soꞌ, ne̱ nu̱ꞌ catúj Jesús rá rihoo, ne̱ nu̱ꞌ cuchiꞌ rihoo tuꞌva na laguaná rej va̱j nij soꞌ a.
Cataj Jesús se vaa ase vaa rachrúún vaa soꞌ rihaan nimán níꞌ a
22Dan me se ꞌó güii me se queneꞌen nij yuvii̱ quináj rej xco̱ na laguaná yoꞌ se vaa taj va̱j ꞌó rihoo chéé rihaan na rej yoꞌ maꞌ. Ma̱an se o̱rúnꞌ rihoo catúj nij síí tucuꞌyón snana̱ Jesús ga̱a caꞌanj nij soꞌ, ne̱ ne catu̱u̱ Jesús rá rihoo yoꞌ ga̱ nij síí tucuꞌyón snana̱ soꞌ, niꞌya̱j nij yuvii̱ a. 23Tza̱j ne̱ caꞌnaꞌ do̱j rihoo cavii chumanꞌ Tiberias tuꞌva na laguaná nichru̱nꞌ rej chá nij yuvii̱ rachrúún ga̱a quisíj cataj Jesús Si̱j ꞌNi̱j Raꞌa man níꞌ guun niꞌya̱j níꞌ rihaan Yaꞌanj cheꞌé rachrúún yoꞌ a. 24Cheꞌé dan ga̱a queneꞌen nij yuvii̱ se vaa taj va̱j Jesús ga̱ nij síí tucuꞌyón snana̱ soꞌ, ga̱a ne̱ catúj nij yuvii̱ rque nij rihoo yoꞌ, ne̱ caꞌanj nij yuvii̱ chumanꞌ Capernaum, nanoꞌ nij yuvii̱ man Jesús a. 25Dan me se nariꞌ nij soꞌ man Jesús chumanꞌ Capernaum, ga̱a ne̱ xnáꞌanj nij soꞌ man soꞌ, cataj nij soꞌ a:
―Aman caꞌnáꞌ so̱ꞌ nihánj, ga̱a maestro̱ꞌ ―taj nij yuvii̱, xnáꞌanj nij soꞌ man Jesús a.
26Ga̱a ne̱ cataj Jesús rihaan nij soꞌ a:
―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa né cheꞌe̱ se queneꞌen soj nij suun sa̱ꞌ noco̱o quiꞌyáá ꞌu̱nj me nanoꞌ soj manj maꞌ. Ma̱an cheꞌé se chá soj rachrúún yoꞌ ne̱ caraa rque soj roꞌ, cheꞌé dan nanoꞌ soj manj na̱nj á.
27’Se̱ guun quiꞌya̱j suun soj cheꞌé ina̱nj se cha̱ soj maꞌ. ꞌO̱ se vaa güii, ne̱ navi̱j nu̱ꞌ nij rasu̱u̱n yoꞌ na̱nj ado̱nj. Cheꞌé dan quiꞌya̱j suun soj cheꞌé se vaa quiꞌya̱j cavi̱i̱ sa̱ꞌ nimán soj, ga̱a ne̱ ga̱a̱ iꞌna̱ꞌ ya̱ nimán soj nu̱ꞌ cavii nu̱ꞌ caꞌanj á. ꞌU̱nj Si̱j Caꞌnéé Yaꞌanj Ni̱caj Yuꞌunj man Yuvii̱ me síí rque̱ se sa̱ꞌ yoꞌ rihaan soj na̱nj ado̱nj. ꞌO̱ se Réj Yaꞌanj me síí cataj se vaa caꞌve̱e qui̱ꞌyáj da̱nj cheꞌé soj ado̱nj ―taj Jesús rihaan nij yuvii̱ a.
28Cheꞌé dan cataj nij yuvii̱ rihaan soꞌ a:
―Me suun quiꞌya̱j núj, ga̱a ne̱ cara̱nꞌ rá Yaꞌanj ni̱ꞌyaj Yaꞌanj man núj ga̱ ―taj nij yuvii̱ a.
29Ga̱a ne̱ cataj Jesús rihaan nij yuvii̱ a:
―Nihánj me suun me rá Yaꞌanj quiꞌya̱j soj, se vaa cuchuma̱n rá soj ni̱ꞌyaj soj mán ꞌu̱nj si̱j caꞌnéé soꞌ rihaan soj ado̱nj ―taj Jesús rihaan nij yuvii̱ a.
30Cheꞌé dan cataj nij yuvii̱ rihaan soꞌ a:
―Sese da̱nj vaa, ne̱ me suun sa̱ꞌ noco̱o qui̱ꞌyáá so̱ꞌ queneꞌe̱n núj, ga̱a ne̱ cuchuma̱n rá núj ni̱ꞌyaj núj mán so̱ꞌ ga̱. 31Dan me se quiꞌyaj Yaꞌanj suun sa̱ꞌ noco̱o ga̱a naá, ne̱ xi̱i níꞌ me se chá nij soꞌ se cuꞌna̱j maná ga̱a chéé nij soꞌ rej tacaan, quiꞌyaj Yaꞌanj ga̱a naá a. Dan me se taj Danj Yaꞌanj a: “Rqué Yaꞌanj rachrúún nanij rej xta̱ꞌ chá nij soꞌ ado̱nj” ―taj nij soꞌ rihaan Jesús a.
32Cheꞌé dan cataj Jesús rihaan nij soꞌ a:
―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa se̱ xcaj soj cuentá ina̱nj cheꞌé se vaa rqué Moisés rachrúún nanij rej xta̱ꞌ chá soj maꞌ. Tana̱nj xca̱j soj cuentá se vaa Réj Yaꞌanj me se rqué soꞌ rachrúún ya̱ ya̱ nanij rej xta̱ꞌ chá soj ado̱nj. 33ꞌO̱ se rachrúún rqué Réj Yaꞌanj rihaan soj mé ꞌu̱nj si̱j cavii rej xta̱ꞌ, ne̱ ꞌu̱nj me síí rqué se vaa caꞌve̱e ga̱a̱ iꞌna̱ꞌ ya̱ soj si̱j ma̱n rihaan chumii̱ nihánj nu̱ꞌ cavii nu̱ꞌ caꞌanj ado̱nj ―taj Jesús rihaan nij yuvii̱ a.
34Cheꞌé dan cataj nij yuvii̱ rihaan Jesús a:
―ꞌO̱ rque̱ so̱ꞌ rachrúún yoꞌ rihaan núj, señor ―taj nij yuvii̱ a.
35Ga̱a ne̱ cataj Jesús rihaan nij yuvii̱ a:
―ꞌU̱nj nihánj me rachrúún, ne̱ aꞌvee ꞌyáj vaa iꞌna̱ꞌ ya̱ yuvii̱ ado̱nj. Sese caꞌna̱ꞌ soj rihanj, ne̱ ꞌo̱ ga̱a̱ xe̱j nimán soj, sese ya̱ uxrá amán rá soj niꞌya̱j soj manj á. 36Tza̱j ne̱ a̱j cataj ꞌu̱nj rihaan soj se vaa nda̱ꞌ se queneꞌen soj manj, tza̱j ne̱ ne amán rá soj niꞌya̱j soj manj a̱ maꞌ. 37Xa̱ꞌ nij síí rqué Réj Yaꞌanj manj, tza̱j ne̱ caꞌna̱ꞌ nij soꞌ rihanj, ne̱ veꞌé caꞌmi̱i̱ ꞌu̱nj ga̱ nij soꞌ a. Ne̱ xa̱ꞌ nij síí ꞌnaꞌ rihanj, tza̱j ne̱ daj chiha̱a̱ míj se̱ quiriꞌíj yaníj ꞌu̱nj man nij soꞌ maꞌ. 38Dan me se caꞌnáꞌ ꞌu̱nj rihaan chumii̱ nihánj, tza̱j ne̱ se̱ guun qui̱ꞌyáá ꞌu̱nj nda̱a vaa me rá ma̱ꞌanj qui̱ꞌyáj maꞌ. Tana̱nj cheꞌé rej qui̱ꞌyáá ꞌu̱nj se vaa me rá Yaꞌanj si̱j caꞌnéé mán ꞌu̱nj qui̱ꞌyáá ꞌu̱nj roꞌ, cheꞌé dan nanij ꞌu̱nj rihaan chumii̱ nihánj ado̱nj. 39Ne̱ nihánj me se vaa me rá Yaꞌanj qui̱ꞌyáj ado̱nj. ꞌO̱ se naꞌvej uxrá rá Yaꞌanj caꞌa̱nj niꞌya̱ a̱ ꞌó nij síí rqué soꞌ manj maꞌ. Dan me se me rá Yaꞌanj cunu̱u iꞌna̱ꞌ uún ta̱ranꞌ nij soꞌ, qui̱ꞌyáj, asa̱ꞌ quisíj güii caꞌa̱nj niꞌya̱ chumii̱ nihánj ado̱nj. 40ꞌO̱ se nihánj me se vaa me rá Réj Yaꞌanj na̱nj á. Me rá soꞌ ꞌo̱ ga̱a̱ iꞌna̱ꞌ ta̱ranꞌ nij síí amán rá niꞌya̱j manj nu̱ꞌ cavii nu̱ꞌ caꞌanj ga̱ soꞌ a. Ne̱ ꞌu̱nj me síí quiꞌya̱j cunu̱u iꞌna̱ꞌ uún nij soꞌ asa̱ꞌ quisíj güii caꞌa̱nj niꞌya̱ chumii̱ nihánj ado̱nj ―taj Jesús rihaan nij yuvii̱ a.
41Dan me se, cheꞌé se cataj Jesús se vaa maꞌa̱n soꞌ me rachrúún nanij rej xta̱ꞌ rihaan chumii̱ nihánj, ne̱ cheꞌé dan caꞌmii nij síí uun chij rihaan nij yuvii̱ israelitá nana̱ nij niꞌya̱j nij soꞌ man Jesús, 42cataj nij soꞌ a:
―Né si̱j cuꞌna̱j Jesús me síí nihánj naꞌ. Né taꞌni̱j síí cuꞌna̱j José me soꞌ naꞌ. Né si̱j neꞌen níꞌ me rej soꞌ do̱ꞌ, me nii soꞌ do̱ꞌ naꞌ. Me cheꞌé guun rá soꞌ cata̱j soꞌ cuano̱ se vaa me soꞌ síí nanij rej xta̱ꞌ rihaan chumii̱ nihánj ga̱ ―taj nij síí uun chij niꞌya̱j nij soꞌ man Jesús a.
43Ga̱a ne̱ cataj Jesús rihaan nij soꞌ a:
―Se̱ caꞌmii soj nana̱ nij ga̱ tuviꞌ soj maꞌ. 44Dan me se caꞌnéé Réj Yaꞌanj manj, ne̱ a̱ ꞌó yuvii̱ se̱ caꞌvee caꞌna̱ꞌ rihanj sese né Réj Yaꞌanj quiꞌya̱j caꞌna̱ꞌ soꞌ rihanj a. Ne̱ xa̱ꞌ síí ꞌnaꞌ rihanj, tza̱j ne̱ cunu̱u iꞌna̱ꞌ uún soꞌ qui̱ꞌyáj asa̱ꞌ quisíj güii caꞌa̱nj niꞌya̱ chumii̱ nihánj ado̱nj. 45Dan me se vaa ꞌo̱ síí nataꞌ snana̱ Yaꞌanj cachrón nana̱ nihánj rihaan yanj ga̱a naá a: “Ne̱ maꞌa̱n Yaꞌanj tu̱cuꞌyón man ta̱ranꞌ nij soꞌ ado̱nj”, taj síí nataꞌ yoꞌ a. Dan me se ta̱ranꞌ nij síí uno rihaan Réj ne̱ nariꞌ snana̱ Réj roꞌ, me síí ꞌnaꞌ rihanj ado̱nj. 46Taj va̱j ꞌó síí queneꞌen man Réj a̱ maꞌ. Tza̱j ne̱ o̱rúnꞌ ꞌu̱nj me síí queneꞌen man soꞌ, cheꞌé se si̱j cavii rihaan soꞌ mej ado̱nj.
47’Ya̱ ya̱ cata̱j xnaꞌanj ꞌu̱nj rihaan soj cuano̱ se vaa síí amán rá niꞌya̱j manj me se ꞌo̱ ca̱yáán soꞌ ga̱ Yaꞌanj nu̱ꞌ cavii nu̱ꞌ caꞌanj na̱nj á. 48Ma̱ꞌanj me rachrúún ꞌyaj se vaa vaa iꞌna̱ꞌ yuvii̱ nu̱ꞌ cavii nu̱ꞌ caꞌanj a. 49Xa̱ꞌ xi̱i soj síí ma̱n ga̱a naá, tza̱j ne̱ chá nij soꞌ se cuꞌna̱j maná ga̱a chéé nij soꞌ rej tacaan, tza̱j ne̱ caviꞌ nij soꞌ a. 50Tza̱j ne̱ vaa ꞌu̱nj nihánj, ne̱ ase vaa rachrúún cavii rej xta̱ꞌ nanij rihaan xi̱i soj vaa ꞌu̱nj ado̱nj. Ne̱ sese cha̱ soj mán ꞌu̱nj ne̱ daj chiha̱a̱ míj se̱ caviꞌ nimán soj maꞌ. 51Dan me se ꞌu̱nj me rachrúún vaa iꞌna̱ꞌ ya̱ nanij rej xta̱ꞌ, ne̱ sese cha̱ ꞌo̱ soꞌ man rachrúún nihánj, ne̱ ꞌo̱ ga̱a̱ iꞌna̱ꞌ soꞌ ado̱nj. Tza̱j ne̱ rachrúún rque̱ ꞌu̱nj cha̱ yuvii̱ roꞌ, nee̱ manj me yoꞌ ado̱nj. Ne̱ yoꞌ me qui̱ꞌyáj, ga̱a ne̱ caꞌve̱e ga̱a̱ iꞌna̱ꞌ ya̱ cunuda̱nj soj si̱j ma̱n rihaan chumii̱ nihánj na̱nj á ―taj Jesús rihaan nij síí uun chij rihaan nij yuvii̱ israelitá a.
52Dan me se nuchruj ra̱a̱ ndoꞌo nij síí uun chij yoꞌ ga̱ tuviꞌ nij soꞌ, ne̱ xnáꞌanj nij soꞌ man tuviꞌ nij soꞌ a:
―Asa̱ꞌ caꞌve̱e rque̱ síí nihánj nee̱ man maꞌa̱n soꞌ cha̱ yuvii̱ ga̱ ―taj nij soꞌ, xnáꞌanj nij soꞌ man tuviꞌ nij soꞌ a.
53Cheꞌé dan cataj Jesús rihaan nij soꞌ a:
―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa sese se̱ chá soj nee̱ mán ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ sese se̱ coꞌo soj ton manj, ne̱ se̱ caꞌvee ga̱a̱ iꞌna̱ꞌ nimán soj a̱ maꞌ. 54Tza̱j ne̱ síí chá nee̱ manj ne̱ coꞌo ton manj me se ꞌo̱ ga̱a̱ iꞌna̱ꞌ soꞌ nu̱ꞌ cavii nu̱ꞌ caꞌanj, ne̱ asa̱ꞌ quisíj güii caꞌa̱nj niꞌya̱ chumii̱ nihánj, ne̱ cunu̱u iꞌna̱ꞌ uún soꞌ, qui̱ꞌyáj ado̱nj. 55Xa̱ꞌ nee̱ manj, tza̱j ne̱ nee̱ chá ya̱ ya̱ me yoꞌ, ne̱ ton manj me se na coꞌo ya̱ me yoꞌ na̱nj ado̱nj. 56Ne̱ síí chá nee̱ manj ne̱ coꞌo ton manj me se ꞌo̱ ca̱yáán soꞌ ga̱ ꞌu̱nj, ne̱ ꞌo̱ ca̱yáán ꞌu̱nj ga̱ soꞌ chugua̱nj. 57Ase vaa vaa iꞌna̱ꞌ Réé ꞌu̱nj síí caꞌnéé mán ꞌu̱nj rihaan chumii̱ nihánj roꞌ, da̱nj vaa vaa iꞌna̱ꞌ ꞌu̱nj, ꞌyaj Réé ꞌu̱nj a. Ne̱ xa̱ꞌ síí chá mán ꞌu̱nj, tza̱j ne̱ ꞌo̱ ga̱a̱ iꞌna̱ꞌ nimán soꞌ, qui̱ꞌyáá ꞌu̱nj a. 58ꞌU̱nj nihánj me se rachrúún ꞌnaꞌ rej xta̱ꞌ nanij rihaan yoꞌóó nihánj mé ꞌu̱nj na̱nj á. Tza̱j ne̱ ino̱ uxrá vaa ꞌu̱nj ga̱ se cuꞌna̱j maná chá xi̱i soj ga̱a naá na̱nj ado̱nj. ꞌO̱ se caviꞌ cunuda̱nj nij soꞌ na̱nj á. Tza̱j ne̱ síí chá manj me se ꞌo̱ ga̱a̱ iꞌna̱ꞌ nimán soꞌ ado̱nj ―taj Jesús a.
59Nana̱ nihánj me nana̱ tucuꞌyón Jesús rihaan nij yuvii̱ cunuu chre̱ꞌ rá veꞌ tucuꞌyón nij síí israelitá stucua̱nj Moisés veꞌ ya̱nj chumanꞌ Capernaum a.
Tanáj xco̱ taꞌa̱j nij síí noco̱ꞌ man Jesús a
60Queꞌe̱e̱ nij síí tucuꞌyón snana̱ Jesús cuno nana̱ nihánj nana̱ caꞌmii Jesús, ga̱a ne̱ cataj nij soꞌ a:
―Sayu̱u̱n uxrá vaa nana̱ nihánj chugua̱nj. Daj chiha̱a̱ míj se̱ cuno níꞌ nana̱ tuꞌva soꞌ a̱ maꞌ ―taj nij soꞌ rihaan tuviꞌ nij soꞌ a.
61Queneꞌen maꞌa̱n Jesús se vaa caꞌmii taꞌa̱j nij síí tucuꞌyón snana̱ soꞌ nana̱ nij yoꞌ, ga̱a ne̱ cataj Jesús rihaan nij soꞌ a:
―Quiriꞌ rá soj, quiꞌyaj nana̱ nihánj naꞌ. 62Xraj, ne̱ sese queneꞌe̱n soj mán ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ se vaa cavi̱i̱ uún ꞌu̱nj quina̱nꞌ ꞌu̱nj rej cayáán ꞌu̱nj asi̱j rque̱, ne̱ cuchuma̱n rá soj a. 63Dan me se Nimán Yaꞌanj me síí ꞌyaj vaa iꞌna̱ꞌ nimán yuvii̱ ado̱nj. Tza̱j ne̱ taj se gúnꞌ man nee̱ man yuvii̱ quiꞌya̱j yoꞌ ga̱a̱ iꞌna̱ꞌ yuvii̱ a̱ maꞌ. Xa̱ꞌ nana̱ caꞌmij rihaan soj, tza̱j ne̱ nana̱ cavii Nimán Yaꞌanj me nana̱ yoꞌ, ne̱ caꞌve̱e ga̱a̱ iꞌna̱ꞌ nimán soj, quiꞌya̱j snana̱j ado̱nj. 64Tza̱j ne̱ taꞌa̱j soj me síí ne amán rá uno snana̱j a̱ maan ado̱nj ―taj Jesús rihaan nij síí tucuꞌyón snana̱ soꞌ a.
ꞌO̱ se asi̱j guun cheꞌe̱ Jesús tucuꞌyón soꞌ snana̱ soꞌ man yuvii̱, ne̱ a̱j neꞌen soꞌ me síí ne amán rá niꞌya̱j man soꞌ, ne̱ a̱j neꞌen soꞌ me síí me síí ta̱cuachén man soꞌ rihaan nij síí ta̱j riꞌyunj man soꞌ ado̱nj. 65Ga̱a ne̱ cataj uún Jesús a:
―Cheꞌé se ne amán rá soj roꞌ, cheꞌé dan cataj xnaꞌanj ꞌu̱nj rihaan soj se vaa a̱ ꞌó síí se̱ guun nucua̱j caꞌna̱ꞌ rihaan ꞌu̱nj, sese né Réj Yaꞌanj me síí quiꞌya̱j caꞌna̱ꞌ soꞌ rihaan ꞌu̱nj maꞌ ―taj uún Jesús a.
66Cheꞌé dan canica̱j queꞌe̱e̱ nij síí tucuꞌyón snana̱ soꞌ, ne̱ caꞌneꞌ rá nij soꞌ ga̱ suun chéé ga̱ Jesús a.
67Cheꞌé dan xnáꞌanj Jesús man chuvi̱j nij síí tucuꞌyón snana̱ soꞌ, cataj soꞌ a:
―Soj do̱ꞌ me rá ta̱náj manj naꞌ ―taj Jesús, xnáꞌanj soꞌ man chuvi̱j nij síí tucuꞌyón snana̱ soꞌ a.
68Ga̱a ne̱ cataj síí cuꞌna̱j Simón Pedró rihaan soꞌ a:
―Taj ꞌó síí cuchi̱ꞌ núj rihaan, maan Señor. ꞌO̱ se so̱ꞌ me síí aꞌmii nana̱ quiꞌya̱j ga̱a̱ iꞌna̱ꞌ núj rihaan Yaꞌanj nu̱ꞌ cavii nu̱ꞌ caꞌanj ado̱nj. 69Ne̱ cuchumán rá núj ne̱ neꞌen núj se vaa Síí Sa̱ꞌ Ina̱nj cavii rihaan Yaꞌanj mé so̱ꞌ ado̱nj ―taj Simón Pedró rihaan Jesús a.
70Ga̱a ne̱ cataj Jesús rihaan chuvi̱j nij soꞌ a:
―Dan me se ꞌu̱nj me síí narii man chuvi̱j nij soj se vaa canoco̱ꞌ soj manj, tza̱j ne̱ ase vaa maꞌa̱n Síí Chre̱e vaa ꞌo̱ nij soj ado̱nj ―taj Jesús rihaan chuvi̱j nij soꞌ a.
71Nana̱ yoꞌ caꞌmii Jesús niꞌya̱j Jesús man síí cuꞌna̱j Judas Iscariote taꞌníí síí cuꞌna̱j Simón a. ꞌO̱ se Judas yoꞌ, nda̱ꞌ se ꞌo̱ nij chuvi̱j nij síí tucuꞌyón snana̱ Jesús me soꞌ, tza̱j ne̱ soꞌ me síí ta̱cuachén man Jesús rihaan nij síí ta̱j riꞌyunj man Jesús a.
Արդեն Ընտրված.
San Juan 6: trc
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. 2024 segunda versión electrónica