Matalikilo 3
3
Kubisha kwa muntu
1 #
Ciyu 12:9; 20:2 Ono nsoka yakalinga kucenjete kwiinda banyama boonse bamuluundu abo Mwaami Lesa mbwaakalenga. Nsoka yakeepusha mwanakashi ayi, “Sa ncakwiila Lesa wakamukasha kulya shisepo sha cisamu cili coonse mumuunda muno?”
2Mwanakashi wakakumbula ayi, “Inga twalya shisepo sha cisamu cili coonse mumuunda, 3sombi kukushakobo cisamu cili pakati ka muunda. Lesa wakatukasha kulyaako shisepo nabibo kucataako. Na twacita boobo, tulaakufwa.”
4Lyalo nsoka yakakumbula ayi, “Tabushi mbocibete ubo, teshi mukafweewo sobwe! 5Lesa ulishi kwaamba ayi na mwalyaako, meenso anu inga acaluka, alimwi ayi inga mwaba mbuli nguwe mukwishiba shibotu ashibiibi.”
6Mwanakashi ndyaakabona cisamu ico mbocakalinga kuboneka kabotu, ashisepo mboshakalinga kuboneka kubota kulya, alimwi ndyaakayeeya ayi inga wacana busongo mukushilya, wakayapaako akulya. Mpeeke wakayapa shimwi akupaako ibaye, alakwe wakalya. 7Ingayi bamanebo kulya, meenso abo akacaluka akubona ayi bali matakosha. Aboobo bakatunga matewu a mukuyu kwaamba ayi bafweke mibili yabo.
8Bushiku bweenka ubo, macolesha, bakanyumfwa Mwaami Lesa kaaendeenda mumuunda, mpeeke bakamuyuba pakati ka shisamu. 9Sombi Mwaami Lesa wakeeta Adamu ayi, “Uli kuli?” 10Alakwe wakakumbula ayi, “Ndamunyumfwa kamweendeenda mumuunda. Ono ndaloonda akuyuba ceebo ndimatakosha.”
11Lesa wakeepusha ayi, “Ngani wakulwiita ayi uli matakosha? Sa walya shisepo nshindakamukasha kulya?”
12Musankwa wakakumbula ayi, “Mwanakashi ngomwakambikaakwe muno wampa cisepo, anebo ndalya.” 13Mwaami Lesa wakeepusha mwanakashi ayi, “Ino wacitilanshi bobulya?” Alakwe wakakumbula ayi, “Ninsoka yambeca, lyalo ndalya.”#2 Koli 11:3; 1 Timo 2:14
Lesa mbwaakabapa mulandu
14Lyalo Mwaami Lesa wakaambila nsoka ayi,
“Ntookushingana paceeci ncewacita.
Pakati ka banyama boonse,
lishingo ili lilisukemebo ndiwe weenka.
Kuswa sunu unanokweendelabo kulifumo,
alimwi ulyeelete kulya bulongo
mubuumi bwako boonsebo.
15Ono ntoolengesha webo amwanakashi kupatana.
Lunyungu lwako alwa mwanakashi bananoolibo balwani lyoonse.
Lakwe ulaakukulyata kumutwi
awebo ulaakumuluma kukashindi.”#Ciyu 12:17
16Mpeeke wakaambila mwanakashi ayi,
“Ndaakulengesha ayi paciindi wakunooba pakati
mapensho ako akafuule.
Ulaakunoonyumfwa kucisa abuumbi pakutumbuka.
Nacibi boobo unanoosunibo ibayo
alimwi ngweshi anookweendelesha.”
17Lyalo wakaambila Adamu ayi,
“Wakakutika mukaako
akulya cisepo ca cisamu ncendakamukasha.
Paceebo ceeci bulongo butooshinganishikwa.
Aboobo mubuumi bwako boonse ulaakunoosebensa cankusu,
kwaamba ayi bukukushile shakulya nshooelete.
18Alimwi mubulongo mulaakunoomena nsaku amyuumfwa.
Webo ulaakunoolya shisepo sha muluundu.#Ebulu 6:8
19Ulaakunoosebensa cankusu akuyuwa
kwaamba ayi muswe shakulya mubulongo,
kushikila ukaboolele kubulongo nkowakaswita.
Mukwiinga wakalengwa kuswa kubulongo,
alimwi ulaakuboolela kubulongo.”
20Mpeeke Adamu wakatumba liina mukaakwe ayi “Efa”, ceebo ngomushali mwanakashi wa bantu boonse. 21Kuswawaawo Mwaami Lesa wakapangila Adamu amukaakwe shakufwala kuswa kushipaya sha banyama, akubafwalika.
Adamu aEfa mbobakatandwa mumuunda ulya
22Lyalo Mwaami Lesa wakaamba ayi, “Ono muntu waba bweenka mbuli ndiswe, washiba bubotu abubi. Teelete kusuminishikwa kuyapa akulya cisepo ciswa kucisamu cipa buumi, kwaamba ayi anoolibo muumi lyoonse.”#Ciyu 22:14 23Aboobo Mwaami Lesa wakamukusha mumuunda wa Edeni akumulengesha ayi anoolima bulongo uko kweenka nkwaakaswita. 24Mpeeke kwicwe lya muunda wakabikaako shilengwalengwa shuumi shiitwa ayi bakelebu amupeeni wakalinga kunyaka mulilo, kwaamba ayi kubule ushika pafwaafwi acisamu cipa buumi.
Արդեն Ընտրված.
Matalikilo 3: BBBLI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Lenje Bible with Deuterocanon © Bible Society of Zambia, 2003.