San Marcos 1
1
Juánu itsï atajtsïkpiri,#1.1 Uandakua enga p'urhe jimbo ióni úrakorhekia: Griegu jimbo baptizoon. jimesï enga nónema irekaka
(Mt 3.1-12; Lc 3.1-9,15-17; Jn 1.19-28)
1Jesukristueri ambakiti aiangperakua ísï uénasïndi, [ima enga Diósï uájpeka.]#1.1 Eka íni jásï [...] úrakorhejka, arhixati eska no iápuru griegu jimbo karakatecharhu xarhantasïnga.
2Isaiasï, Diósïri uandari ísï karasti:
“Jucheti uandakua párinikini
urhetatachepaxaka
engakini xanharini
ambantskachentapaaka.#1.2 Mal 3.1.
3Nema uinhachaparini, ísï uandaxati
jimesïsï enga nónema irekaka:
Ambantskarakuntsï je Diósïni
ka jurhimbitku jásï ma
xanhari mítaku je.”#1.3 Is 40.3.
4Ísï jimbo, Juánu itsï atajtsïkpiri jimesï jámaspti enga nónema irekaka, ka arhijtsïkpesïrempti eska uétarhesïrempka Diósïni andarhentani, ka itsï atajtsïni, ka eska ísï jámani Diósï púakuantauaka. 5Judea ka Jerusaleni isï anapuechaksï nirasïrempti kurhajchani. Ka p'amongorhentasïremptiksï, ka Juánu itsï atajtsïkuasïrempti iurhekuarhu enga Jordani arhinhajka. 6Juánueri xukuparhakua kameiueri jauiri jimbo úkatespti,#1.6 2 Ir 1.8; Sak 13.4. sïkuiri jóangorhesïrempti; chóchuechani#1.6 Lb 11.22. ka juátarhu anapu tékua t'iresïrempti. 7Ka ísï arhijtsïkpesïrempti: “Jurhaxati máteru Acheti sánderu k'éri ambe, ima engani ji no jamberi nitatarheka#1.7 Jn 1.15,27,30 naniksï arhisïndi eska no jukanchaspka, o enga no jindeka. kuarhachichani kuerandukuani. 8Jíksïni itsïjkusï atajtsïkuni jaka; ka imaksïni k'óru Espiritu Sántuni jimbo atajtsïkuati.”#1.8 Jn 1.33; Uk 1.5; 2.1-4.
Jesusiri itsï atajtsïkua
(Mt 3.13-17; Lc 3.21-22)#1.9-11 Jn 1.31-34.
9Imani jurhiatekuechani, Jesusi uéakuspti Nasareti enga Galilea isï jaka. Ka niraspti iurhekuarhu enga Jordani arhinhajka ka Juánu jima itsï atajtsïkuspti. 10Uémentani jámani, Jesusi exespti eska auanda mítakorhexapka ka eska Espiritu kétsexapka imani andajtsïkuerani, jipunhini#1.10 naniksï palomasï arhisïndi. jáxespti. 11Ka auandarhu anapu uandakua ma kurhakorhespti, enga ísï uandani jápka: “T'úri jucheti uátsïtiska, engani ji xáni xénhchajka, ka ji t'úngeni jimbo kánekua tsípesïnga.”#1.11 Jen 22.2; Pir 2.7; Is 42.1; Mt 3.17; 12.18; Mk 9.7; Lc 9.35; 2 P 1.17.
Jesusiri ts'éjkukua
(Mt 4.1-11; Lc 4.1-13)
12Ka tátsekua, Espiritu Jesusini jimesï páspti enga nónema irekaka. 13Ka tsimani ekuatse jurhia jarhaspti jima engaksï púkicha ka jiuatsïcha ka akuitsecha irekajka ka Nóambakiti#1.13 Satanasi: Uandatspentati nósesi jásï ambe ka nósesi kámajpiti. Jesusini ts'éjkusïrempti, ka ánjelichaksï marhuakusïrempti.
Jesusiri aiangpekua
(Mt 4.12-17; Lc 4.14-15)
14Ísï tátsekua, enga Juánu k'ataperakuarhu ónhanhapka,#1.14 Mt 4.12; Mk 6.17-18. Jesusi Galilea isï niraspti Diósïri ambakiti aiangperakuani uandantani. 15Ka ísï arhijpesïrempti: “Janoxati jurhiatekua, Diósïri juramukua#1.15 Exe: Mt 3.2. janoxatiia. K'uanhatsentsï je Diósïri xanharirhu, ka imeri ambakiti aiangpekuani mintsita jinguni jakajku je.”
Jesusi ióarhiasti t'ámu uarhurichani
(Mt 4.18-22; Lc 5.1-11)
16Enga Jesusi Galilea anapu japundarhu uanamukutini nitamani jápka, Simonini#1.16 Mk 3.16; Mt 16.18. ka erachi jémba Andresïni exeaspti. Imaksï kurucha p'itamani jámaxapti, jimbokaksï kurucha p'itamatispka.#1.16 Kurucha p'itamatisptiksï. 17Ka Jesusi arhiaspti:
–Chúxapujtsïni je, nóterujtsï kurucha p'itamatiuakia, iásïjtsï k'uiripuni tánani jámaakia.
18Imaksï jurarkuaspti kurucha p'itamatarakuechani ka chúxapasptiksï.#1.16-18 Jn 1.35-42.
19Sántku urhepatini, máteru k'éri icharhutarhu, Jesusi Sebedeo uájpechani exeaspti, Santiaguni#1.19 Santiagu: Jakobu, ebreo uandakua jimbo. ka Juánuni, cheremakuechanksï sïriantaani jarhani, 20ióarhiaspti ka imajtuksï chúxapaspti, ka tátjemba Sebedeoni ka imeri jarhojpirichanksï icharhutarhu jurarkuaspti.
Jesusi nósesi jásïni xukaspti
(Lc 4.31-37)
21Tátsekuaksï Kafarnaumi niraspti, ka sábadu jurhiatekua Jesusi k'umanchekua tángorhentskuarhu#1.21 Sinagogarhu: Judiouecheri k'umanchekua tángorhentskua ka k'umanchekua jurhengorhekuesti. inchaspti, ka jurhentpeni uénaspti. 22Ka imeri jurhentperakuani kurharini ísku pakareranhasïrempti, jimboka jarhamekua jinguni uandasïrempka, no ísï eskaksï máteru juramukua jurhentpiricha.#1.22 Juramukua jurhentpiricha: Moisesiri juramukuanksï sési mítespti, imaksï jurhentpesïrempti juramukuani karakatani jimbo ka máteru jurhentpiricheri jurhengua jimbo. Mt 7.28-29. 23Ka acheti ma enga nósesi jásï incharhetini jápka ima k'umanchekua tángorhentskuarhu jarhaspti, ka ima nósesi jásï Jesusini uinhamu arhispti:
24–Jesusi Nasareti anapu ¿Andijtsïnisï inchaakuchejki? ¿K'amajkuntsïni jurhaski? Jíkini míteska eskari Diósïri Sántueska.#1.24 Jn 6.69. Diósïri Sántu: Arhikuekaxati eska Diósïri míngorhekateska.
25Ka Jesusi nósesi jásïni xukaspti, ísï arhiparini:
–¡Pínasku ja! ¡Uérhentsï indeni achetini!
26Ka nósesi jásï, jiuakorheparini uérhentaspti achetini; matsïmatsïtantaspti nóna uérhentani. 27Ka chérakorhenhaspti, ka kurhamarhperasïremptiksï:
–¿Ambeski i ambe? ¡Jimbanhe ambe ka juramukua jinguni jurhentpesïndi! ¡Ka nósesi jásï espirituechantu juramukuasïndi, ka kurhajchasïndiksï!
28Ka sóntku mítekorhespti Jesusiri ambe, Galilea uanondani isï.
Jesusi ambakerantaspti Simoniri tarhampirini
(Mt 8.14-15; Lc 4.38-39)
29Engaksï k'umanchekua tángorhentskuarhu uéntapka, Jesusiksï Simoni ka Andresïri k'umanchekuarhu niraspti; Santiagu ka Juánu jinguni. 30Ka Simoniri tarhampiri apondikuspti jimboka kánekua tinharaxapka. Eka Jesusi aiangunhapka, 31andarheraspti ka jupijkuspti ka jauatani, ka ima tinharakua jupinapaspti, ka sóntku marhuakuaxaptia.
Jesusi p'amenchatichani ambakerantaasti
(Mt 8.16-17; Lc 4.40-41)
32Tirimarhanduksï Jesusini pérakuaspti uánekua p'amenchatichani ka nóambakiti jukaratichani, 33ka imani k'umanchekuarhu jamukutini uánekua tángorhenhantaspti. 34Ka Jesusi uánekua ka mámaru jásï p'amenchatichani ambakerantaaspti, ka nósesi jásï jukaratichani petarhetantaaspti; ka no jiáretaasïrempti eskaksï nóambakiticha uandapiringa,#1.34 Mémechani uéntani, Jesusi no jiáretpesïrempti eska uandanhapiringa eska ima Diósï Uájpespka o Krístueni: Mk 1.44; 3.11-12; 5.43; 7.36; 8.30; 9.9. jimbokaksï mítespka ima néspki.
Jesusi Diósïri ambakiti aiangperakuani aiangpesti
(Lc 4.42-44)
35Ka k'éri xarheni, sïuapentku, Jesusi jauaraspti, ka niraspti jandiojku uéramani isï uandamukukorheni.#1.35 Mt 14.23; Mk 6.46; Lc 5.16; 6.12. 36Simoni ka imeri pámpirichaksï niraspti Jesusini jirinhantani, 37engaksï na xéntapka arhisptiksï:
“Iámenduechaksïni jirinhantani jámaxati.”
38Ka ima arhiaspti:
“Ju je máteru iretecharhu engaksï ixujku isï jaka uandakua arhijtsïkpeni, jimbokani indeni únisïni juka.”#1.38 Lc 4.43.
39Iámu Galilea isï, Jesusi nirasïrempti iámendu iretecharhu anapu k'umanchekua tángorhentskuecharhu, uandakua arhijtsïkpeparini ka ístu nóambakitichani petarhpeantaparini.#1.39 Mt 4.23; 9.35.
Jesusi xúta jukarhekorhetini ma ambakerantasti
(Mt 8.1-4; Lc 5.12-16)
40Acheti xúta jukarhekorheti#1.40-42 Lepra: Iuani uérhekorhetichaksï no exenhchanhasïrempti. Mt 8.2-3. ma, Jesusini andarheraspti, ka tinguixurhikutini arhispti:
“Engari uékaaka, úakarini p'ikurhentani jucheti p'amenchakuani.”
41Jesusi p'amojkuspti, ka p'árheni ka arhispti:
“Uéksïnga. ¡Ambakentsïa!”
42Ka p'amenchati xúta jimajku iámu uauarhekorhentaspti, ka ambakentaspti. 43Ka Jesusi axantani jámani arhispti:
44“Kurha, ásï nemani aiangu; tátantku ni andarherani, jurajkukini exekorheni eskari ambakentaskia, eskaksï míteaka eska ísïska, ka pa kéjtsïtakua eska Moisesiri juramukua na arhijka.”#1.44 Lb 14.1-32.
45Enga úpka, ima acheti sóntku iámu ambe uandantaspti eska xáni ambe úkorhepka. Ka ísï jimbo Jesusi nóteru úsïrempti iretecharhu inchaakuni, uéramani ísku niárasïrempti, jimajku isï enga nónema jámempka; ka náuejki ísï, jimaksï nirasïrempti iápuru anapuecha exeni.
Արդեն Ընտրված.
San Marcos 1: DKPJ
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia en P´urhépecha, Michoacán, México © Sociedad Bíblica de México, A.C.