Gn 19
19
Eb' li tenamit Sodoom ut Gomoor ke'sache'k
1Li wiib' chi ánjel ke'wulak ewu Sodoom. K'ojk'o laj Lot sa' rokeb'aal li tenamit. Naq kirileb', kixaqliik ut koho chi xk'ulb'aleb'. Kixhupub' rib' 2ut kixye: “Ex qaawa', b'aanuhomaq usilal, okanqex sa' rochoch laj k'anjel a'in. Tuleenumsi li q'oqyink arin, teech'aj leeroq ut wulaj eq'la teechap wi' chik leeb'e”, chan reheb'. “Ink'a', tqanumsi li q'oqyink sa' li k'ayiil”, chankeb' li ula'. 3A'ut laj Lot kirelaji ruheb' toj reetal ke'hilank sa' rochoch. Ut kixk'uub' xtzekemqeb', kixyiib' xwaheb', ut ke'wa'ak.
4Toj maji' ajwi' neke'yoklaak naq chixjunileb' li saaj winq ut eb' li tiixil winq aj Sodoom ke'xsut li kab'l 5ut ke'xjap re chi xb'oqb'al laj Lot: “B'ar wankeb' li winq li xe'ok sa' laawochoch chiru li q'oqyink a'in? Isiheb' chaq re naq toomaakob'q rik'ineb'”, chankeb'.
6Ki'elk ut laj Lot chirix kab'l, kixtz'ap li okeb'aal chirix 7ut kixye: “B'aanuhomaq usilal, ex was wiitz'in, meeb'aanu li maa'usilal a'in. 8Ab'ihomaq: wankeb' wiib' inrab'in li toj maji' neke'wank rik'in winq. Te'wisi chaq ut b'aanuhomaq reheb' li k'aru teeraj; a'ut mik'a' eeb'aanu reheb' li winq a'in li xe'ok rub'el linmuheb'aal”, chan laj Lot. 9A'ut eb' a'an ke'chaq'ok: “Elen arin! Junaq chalenaq sa' jalan tenamit ma taaraqoq aatin sa' qab'een? Anaqwan q'axal ra chik taak'ul laa'at chiruheb' a'an”, chankeb'.
Tikto ke'xtiikisi laj Lot ut ke'xyal xweqb'al li kab'l; 10ab'anan eb' li ula' ke'xye' li ruq'eb', ke'xkelo chaq, ke'roksi laj Lot sa' kab'l rik'ineb' ut ke'xtz'ap li okeb'aal. 11Chixjunileb' li wankeb' chirix kab'l ke'mutz'o'k xb'aaneb', jo' saajeb' ut cheekeb', ut ink'a' chik ke'xtaw li okeb'aal.
12Toja' naq ke'xye eb' li wiib' chi winq re laj Lot: “Anihatqeb' chik wank aawe arin? Isiheb' laahi' sa' li na'ajej a'in, eb' laawalal, eb' laarab'in ut yalaq ani wank aawe sa' li tenamit, 13xb'aan naq ok qe chi xsachb'al li na'ajej a'in. Jwal kaw li xyaab' kuxej neke'jite'k wi' chiru li Qaawa', ut A'an xooxtaqla chaq chi xsachb'aleb'”, chankeb'.
14Ki'elk ut laj Lot ut koxye chaq reheb' li te'k'amoq reheb' li xrab'in: “Waklinqex, elenqex sa' li na'ajej a'in xb'aan naq li Qaawa' ok re chi xsachb'al li tenamit”. A'ut eb' li hi'b'ej ke'xk'oxla naq yal b'atz'unk re.
15Naq kihik'e'k, eb' li ánjel ke'xseeb'a laj Lot: “Waklin, k'am laawixaqil ut chi xkab'ichaleb' laarab'in li wankeb' arin: mare anchal tatkamsiiq xmaak li tenamit a'in”, chankeb' re laj Lot. 16A'ut laj Lot toj yo chi xk'oxlankil. Jo'kan naq li wiib' chi winq xb'aan xnimal ruxtaan li Qaawa' ke'xchap chi ruq'; ke'xchap ajwi' li rixaqil ut xkab'ichaleb' li xrab'in, ut chixjunileb' ke'isiik chirix li tenamit.#19,16 2 P 2,7. 17Naq yo risinkileb', jun reheb' li ánjel kixye: “Elelin, kol aawib'! Mat-ilok chawix chi moko tatxaqliiq sa' li taq'a; ayu b'an sa' li tzuul re naq ink'a' tat-oso'q”, chankeb' li ánjel.
18Ut laj Lot kixye reheb': “Chekuy inmaak, ex Qaawa'. Ink'a' truuq. 19Laa'in xintaw usilal cheru ut xnimal usilal xeb'aanu we naq xekol linyu'am; ab'anan ink'a' truuq tinxik sa' li tzuul. Mare anchal tinxtaw li rahilal ut li kamk. 20Chek'e reetal, nach' ajwi' wank li tenamit tin'eleliq wi', ut kach'in. Aran tinkol wib'. Pe' yaal naq kach'in? Aran tinkol wib'!”. 21Kisumeek: “Us, tink'e ajwi' a'an: ink'a' tinsach li tenamit li xaye. 22Seeb'a aawib', ayu aran, xb'aan naq maak'a' truuq tinb'aanu wi toj maji' tat-ok aran”. Jo'kan naq Sohar kixk'ab'a'in li tenamit a'an.
23Ak yo chi elk li saq'e naq laj Lot kiwulak Sohar. 24Toja' naq li Qaawa' kixtaqla chaq asuupr ut xam sa' xb'een Sodoom ut Gomoor 25ut kixsacheb' li tenamit a'an;#19,24-25 Sab 10,6-8; Mt 10,15; 11,23-24; Lk 10,12; 17,29; 2 P 2,6; Jdt 7. kixsach ajwi' li ru taq'a, chixjunileb' li wankeb' sa' li tenamit ut chixjunil li che'k'aam. 26Li rixaqil laj Lot#19,26 Sab 10,7; Lk 17,32. ki'ilok chirix ut kikanaak cho'q xpekul atz'am.
27Eweraq chik kiwakliik toj eq'la laj Abrahán ut koho sa' li na'ajej b'arwi' kiwank chiru li Qaawa'. 28Ki'ilok sa' xjayal Sodoom ut Gomoor ut sa' xjayal li xsutamil li ru taq'a; ut kiril naq nab'uquqnak xsib'el li ch'och' chi taqe'k chanchan xsib'el junaq oorn. 29Jo'ka'in naq li Yos kixsacheb' li tenamit sa' li taq'a. Ab'an kijultiko'k re laj Abrahán ut kixkol laj Lot chiru li nimla rahilal, naq kixsacheb' li tenamit kiwank wi' laj Lot.
Xtiklajik eb' laj Mohab ut eb' laj Amón
30Ki'elk chaq laj Lot toj Sohar ut kikanaak sa' li tzuul rochb'een xkab'ichaleb' li xrab'in, xb'aan naq naxiwak chi wank Sohar. Aran kikanaak sa' jun li ochoch pek rochb'een xkab'ichaleb' li xrab'in. 31Sa' jun kutan kixye li chaq'na'b'ej re li riitz'in: “Li qayuwa' ak xtixk ut maajun winq wank sa' li na'ajej a'in li taak'amoq qe, jo' na'uxmank yalaq b'ar. 32Kim, qakaltesihaq li qayuwa' ut toowarq rik'in; chi jo'kan taawanq ralal qik'in”, chan.
33Sa' ajwi' li q'oqyink a'an ke'xk'e b'iin re li xyuwa'eb', ut ki'ok chi wark li chaq'na'b'ej rik'in li xyuwa', chi ink'a' kixnaw a'an jo'q'e xyoklaak ut jo'q'e xwakliik li xrab'in. 34Sa' li kutan jun chik, li chaq'na'b'ej kixye re li riitz'in: “Ab'i, ewer chi q'eq laa'in xinwark rik'in linyuwa'. Qakaltesihaq ajwi' chiru li q'oqyink a'in, ut laa'at chik tatwarq rik'in: chi jo'kan taawanq ralal aawik'in”, chan.
35Sa' ajwi' li q'oqyink a'an ke'xk'e wi' chik b'iin re li xyuwa'; ut ki'ok chi wark li iitz'inb'ej rik'in li xyuwa', chi ink'a' kixk'e reetal jo'q'e xyoklaak ut jo'q'e xwakliik li xrab'in. 36Eb' li xrab'in laj Lot ke'kanaak chi xkab'ichaleb' sa' yu'am xb'aan li xyuwa'eb'. 37Li chaq'na'b'ej kiwank jun xk'uula'al, ut aj Mohab kixk'e cho'q xk'ab'a': a'an xyuwa'ileb' laj Mohab chalen toj anaqwan. 38Jo'kan ajwi' li iitz'inb'ej kiwank jun xk'uula'al, ut aj Ben-Amí kixk'e cho'q xk'ab'a': a'an xyuwa'ileb' laj Amón chalen toj anaqwan.
Արդեն Ընտրված.
Gn 19: QQC
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Q'eqchi DC Bible © Bible Society in Guatemala, 2005.