Mateo 19
19
Ri Jesús kak'utun chwi ri jachb'al ib'
(Mt. 5:31; Mr. 10:1-12; Lc. 16:18)
1Echiri' xuk'is ub'i'xik wa' ri Jesús, xel b'i Galilea y xe'ek pa taq ri luwar re Judea y xopon pa taq ri luwar k'o ch'aqa ya' che ri nimaya' Jordán. 2Lik k'ut e k'i ri winaq xeterej b'i chirij y xeb'ukunaj ri yewa'ib' chiri'.
3E k'o k'u jujun chike ri fariseos xeqib' ruk' ri Jesús xa re kakik'am upa y xkitz'onoj che:
—¿Ub'e nawi che juna achi, xa tob' sa' ri kujal wi uchi' ri rixoqil, kuya b'i ruwujil re jachb'al ib' che? —xecha'.
4Ri Jesús xuk'ul uwach:
—¿Na ajilam ta neb'a alaq sa' ri tz'ib'ital kan pa Ruch'a'tem ri Dios? Ma jewa' kub'i'ij:
Che ri jeqeb'al lo ruwachulew
echiri' ri Dios xeb'u'an ri tikawex,
chi achi chi ixoq xeb'u'ano. Gn. 1:27
5Y kub'i'ij:
Ruma k'u ri', rachi echiri' kak'uli'ik,
karesaj rib' chikij ruchu-uqaw
cha' kajeqi' ruk' ri rixoqil
y kikab'ichal k'u ri' keb'u'ana xa e jun chwach ri Dios. Gn. 2:24
6Jek'uri'la' na e ta chi ka'ib', ma xeb'u'ana xa e jun. E uwari'che, ri xeb'ujunimaj ri Dios, na ya'tal ta che ri tikawex kujach upa —xcha'.
7Ek'uchiri', xkitz'onoj che:
—¿Su'chak k'u ri' ri Moisés xub'i'ij we juna achi karaj kujach b'i ri rixoqil, xew chuya'a b'i ruwujil re jachb'al ib' che y jek'ula' na rixoqil ta chik?#Dt. 24:1 —xecha'.
8Ri Jesús xub'i'ij chike:
—Wa' e ruma lik ko ri anima' alaq. Ruma la' ri Moisés xuya luwar kaya'i' ruwujil re jachb'al ib'; no'j che lo ri jeqeb'al ruwachulew na je ta la' ri xraj ri Dios. 9Kamb'i'ij k'u ri'in che alaq: China junoq kuya ruwujil re jachb'al ib' che ri rixoqil tob' ri rixoqil na makuninaq ta chirij ri k'ulanikil, yey kak'uli' tanchi ruk' juna chik ixoq, ri' kamakun chirij ri k'ulanikil. Y china ri kak'uli' ruk' rixoq jachom kanoq, ri' jenela' kamakun chirij ri k'ulanikil —xcha'.
10Ek'u rutijo'n xkib'i'ij che:
—We jela' kuk'ulumaj rachi ruk' ri k'ulanikil, más ne utz ri' we junoq na kak'uli' taj —xecha'.
11Ri Jesús xub'i'ij chike:
—Na konoje ta k'u ri tikawex kakich'ij wa'; ma xew ri ya'tal lo chike ruma ri Dios, kakich'ij u'anik. 12E k'o achijab' na kek'uli' taj ma kalaxib'em pacha' e eunucos. E k'o jujun chik na kek'uli' taj ma 'anom eunucos chike. Yey e k'o ri na kek'uli' taj ma kiya'om kib' che ri chak re rutaqanik ri Dios petinaq chila' chikaj. China ri kach'ijow u'anik wa', chuch'ija k'u ri' —xcha'.
Ri Jesús kuyak kiq'ij rak'alab'
(Mr. 10:13-16; Lc. 18:15-17)
13E k'o jujun raltaq ko ak'alab' xek'am lo chwach ri Jesús cha' kuya ruq'ab' pakiwi' y jela' kutz'onoj che ri Dios keb'uchajij. Yey rutijo'n xekiyaj ri ek'amayom lo ke.
14No'j ri Jesús xub'i'ij chike: «Chiya'a luwar chike ri raltaq ko ak'alab' chepeta na wuk'. Meb'iq'atej; ma ri kaki'an e jela' pacha' rike, ri' ku'an ke rutaqanik ri Dios petinaq chila' chikaj» xcha'. 15Xuya k'u ruq'ab' pakiwi ri raltaq ko ak'alab'. Tek'uchiri', xel b'i pa ri luwar.
Jun b'eyom kach'a't ruk' ri Jesús
(Mr. 10:17-31; Lc. 18:18-30)
16K'o k'u jun k'ak'al achi xk'un ruk' ri Jesús y xutz'onoj che:
—Lal utzilaj tijonel, ¿sa' ri utz kan'ano cha' k'o nuk'aslemal na jinta utaqexik? —xcha'.
17Ri Jesús xuk'ul uwach:
—¿Su'b'e kab'i'ij la “utz” chwe? Ma xa jun ri lik utz k'olik, wa' e ri Dios. Yey we ka'aj la kok la pa ri k'aslemal na jinta utaqexik ruk' Rire, e taqej la Rutzij Upixab' —xcha'.
18Rachi xub'i'ij che ri Jesús:
—¿Pachike k'u ri' ri tzijpixab'? —xcha'.
Ri Jesús xub'i'ij che:
—“Matkamisanik. Matmakun chirij ri k'ulanikil. Mateleq'ik. Ma'an raq'ub'al chirij junoq. 19Chaloq'oj kiq'ij rachu-aqaw”#Éx. 20:12-16 y “K'ax chana'a rawatz-achaq' jela' pacha' k'ax kana' awib' ri'at”#Lv. 19:18 —xcha'.
20Rachi xub'i'ij che ri Jesús:
—Ronoje wa' nu'anom lo chwi nuch'uti'nal. ¿Sa' k'u ri' ri k'a chirajawaxik chwe kan'ano? —xcha'.
21Ri Jesús xub'i'ij che:
—We ka'aj la e ka'an la janipa ri karaj ri Dios che ri b'inik silab'ik la, k'ayij la ronoje taq ri b'eyomalil la y jacha k'u la chike ri nib'a'ib'; jek'uri'la' k'o b'eyomalil la chila' chikaj. Tek'uchiri', peta la, terej lo la chwij y kuyu la ri k'ax kape pawi' la ruma lal nutijo'n —xcha che.
22Rachi echiri' xuta wa', lik kab'isonik xe'ek ma rire lik rajawal b'eyom.
23Ek'uchiri', xub'i'ij ri Jesús chike rutijo'n:
—Paqatzij wi kamb'i'ij chiwe: Juna b'eyom lik k'ayew che kok chupa rutaqanik ri Dios petinaq chila' chikaj. 24Kamb'i'ij tanchi k'u chiwe: E ne más k'ayew ri kok juna b'eyom chupa rutaqanik ri Dios chwa ri kik'ow juna camello chupa rutel juna akuxa' —xcha'.
25Echiri' xkita wa' rutijo'n, lik xkam kanima' che y xkitz'onoj chikiwach:
—We e ri', ¿china k'u ri' ri kakolob'etajik?#19:25 Chikiwach raj judi'ab', we junoq k'o ub'eyomal e ruma utz u'anom chwach ri Dios. Kakich'ob' k'u ri', we k'ayew chike ri b'eyomab' keb'ok chupa rutaqanik ri Dios, más ne k'ayew ri' chike ri nib'a'ib'. —xecha'.
26Ri Jesús xutzu' kiwach y xub'i'ij chike:
—Ri tikawex na kakikolob'ej ta kib' kitukel ma wa' lik k'ayew chikiwach; no'j ri Dios ronoje ku'ano ma na jinta k'ayew chwach Rire —xcha'.
27Ek'uchiri', xub'i'ij ri Pedro che:
—Qajawal, ri'oj qaya'om kan ronoje y oj teran chi'ij la. ¿Sa' k'u ri' ri kaqak'ul ri'oj? —xcha'.
28Ri Jesús xuk'ul uwach:
—Paqatzij wi kamb'i'ij chiwe: Kopon k'u ri' ri q'ij echiri' ronoje ku'an k'ak', wa' echiri' Ralaxel Chikixo'l Tikawex ke'tz'ula chupa ri chomilaj tz'ulib'al re rutaqanik. Jek'ula' ri'ix kixe'tz'ula chupa kab'lajuj tz'ulib'al re kixtaqan pakiwi ri kab'lajuj tinamit re Israel.#19:28 “Ri kab'lajuj tinamit re Israel”: Wa' e kalk'o'al kan ri kab'lajuj uk'ajol ri Jacob, ri kab'i'x Israel che. Gn. 35:22-26 29Yey china k'u ri uya'om kan rocho, eb'uya'om kan ri ratz-uchaq', ruchu-uqaw, ri rixoqil, ri ralk'o'al o ri rulew ruma ukojom ri nub'i', ri' kuk'ul na jun ciento chik chwa ronoje la' yey kuk'ul k'u ri k'aslemal na jinta utaqexik.
30»Lik k'u e k'i chike ri lik k'o kiwach wo'ora, chwach apanoq na jinta chi kiwach; yey lik e k'i chike ri na jinta kiwach wo'ora, e lik kak'oji' kiwach chwach apanoq.
Արդեն Ընտրված.
Mateo 19: acrN
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2009, Wycliffe Bible Translators, Inc. All rights reserved.