Takwiin 4
4
Gaabiil wa Haabiil
1Wa Adam lamma maʼa martah Hawwa. Wa hi bigat khalbaane wa wildat wileed wa sammooh Gaabiil.#4:1 Gaabiil Usmah al-aakhar kamaan Khaayiin. Wa gaalat : «Allah saaʼadaani wa razakhaani wileed.» 2Wa hi wildat battaan wileed usmah Haabiil, akhuuh le Gaabiil. Wa Haabiil bigi raaʼi hana khanam wa Gaabiil bigi harraati.
3Wa yoom waahid, Gaabiil gaddam hadiiye le Allah min al-khadaar al-haratah. 4Wa Haabiil kula gaddam hadiiyat khurfaan awlaad al-bikir min khanamah be chahamhum. Wa Allah khibil hadiiyat Haabiil 5wa laakin ma khibil hadiiyat Gaabiil. Wa Gaabiil ziʼil zaʼal chadiid wa karcham wijhah. 6Wa Allah gaal le Gaabiil : «Maalak inta zaʼlaan wa mukarchim wijhak ? 7Kan amalak adiil, ma narda beek walla ? Laakin kan amalak ma adiil, al-zanib jaahiz fi khachum al-baab wa yidoor yakurbak. Laakin inta kamaan agdar foogah !»
8Wa baʼad da, Gaabiil gaal le akhuuh Haabiil : «Taʼaal, namchu al-kadaade.» Wa min macho fi l-kadaade, Gaabiil hajam akhuuh wa katalah.
9Wa khalaas, Allah gaal le Gaabiil : «Ween akhuuk Haabiil ?» Wa hu radda leyah wa gaal : «Ana ma naʼarfah. Ana haras hana akhuuyi walla ?» 10Wa Allah gaal leyah : «Chunu al-sawweetah da ? Ana gaaʼid nasmaʼ hiss damm akhuuk al-daffagtah, gaaʼid yasrakh leyi min al-turaab. 11Min hassaʼ da, inta tabga malʼuun wa matruud fi l-turaab al-chirib damm akhuuk, al-inta daffagtah. 12Kan inta haratt al-turaab kula, ma talga minnah maʼaach. Wa tabga naadum laayij wa matruud fi kulla l-ard.»
13Wa Gaabiil gaal le Allah : «Ikhaabi da bigi leyi tagiil. Ma nagdar nahmalah. 14Wa daahu inta taradtini baʼiid min al-turaab da. Wa ana nukuun baʼiid min wijhak. Wa nabga laayij wa matruud fi kulla l-ard. Wa ayyi naadum al-ligaani yaktulni.» 15Wa Allah gaal : «Ana niʼakkid leek kan naadum katal Gaabiil, taarah yukuun sabʼa marraat.»
Wa Allah khatta alaama fi Gaabiil achaan ayyi naadum kan ligiih, ma yaktulah. 16Wa khalaas, Gaabiil macha baʼiid min Allah wa sakan fi balad usumha Nuud, sabaah min jineenit Adin.
Zurriiyit Gaabiil
17Wa Gaabiil lamma maʼa martah wa bigat khalbaane wa wildat wileed wa sammooh Hanuuk. Wa Gaabiil bana hille waahide wa sammaaha be usum wileedah Hanuuk. 18Wa Hanuuk wilid wileed wa sammooh Iraad. Wa Iraad wilid Mahuyaayil. Wa Mahuyaayil wilid Matuchaayil. Wa Matuchaayil wilid Laamak.
19Wa Laamak akhad awiin itneen. Al-waahide usumha Aada wa l-taaniye usumha Silla.
20Wa Aada wildat Yaabal. Wa Yaabal bigi jidduhum le l-naas al-yaskunu fi l-kheemaat wa yasraho be l-bahaayim. 21Wa akhuuh usmah Yuubal. Wa Yuubal hu jidduhum le kulla l-naas al-yuduggu jigindiiye wa yadurbu suffaara.
22Wa Silla hi kula wildat wileed usmah Tuubal Khaayiin. Wa Tuubal Khaayiin hu bas jidduhum le kulla l-naas al-yasnaʼo wa l-yitarrugu aalaat min nahaas wa hadiid. Wa akhut Tuubal Khaayiin usumha Naʼama.
23Wa yoom waahid, Laamak gaal le awiinah Aada wa Silla : «Asmaʼanni. Ya awiin Laamak, fukkan udneekan adiil wa asmaʼan kalaami. Ana katalt raajil achaan jarahaani wa katalt wileed achaan halbab jildi. 24Wa kan Gaabiil yikaffu taarah sabʼa marra, Laamak yikaffu taarah 77 marra.»
25Wa battaan Adam lamma maʼa martah wa jaabat wileed. Wa hi sammatah Chiit wa gaalat : «Al-Rabb antaani zurriiye aakhara fi gadd Haabiil al-Gaabiil katalah.» 26Wa khalaas, Chiit kula wilid wileed wa sammaah Anuuch. Wa min al-wakit da, khalaas al-naas bado yaʼabudu Allah.
Արդեն Ընտրված.
Takwiin 4: ADT19
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Arabe tchadien (alphabet latin) Bible © Alliance Biblique du Tchad, 2019.