Hch 10
10
Pedro nataq'aen Cornelio
1Di'me noic jo'ne Cesarea na'ña ñe'me jiyaĝaua jo'ne lenaĝat Cornelio, lajoĝola' ga'me coicopi jo'ne qoyenaqateneque ga'me Italia Laje'pi. 2Nach'eñe ñe'me jiyaĝaua jo'ne choĝodenataĝanaĝaic joca'li, jo'ne nalo'ta'ajalo gaa'me mach'e 'lachaqadiaĝa'u da'me 'nonaĝachidegue joñe'me Dios. Nataq'aen jalcote jaga'me naicaua yanegue qaedi lecochaĝanaĝanegueta joga'me judiopi nataq'aen nach'e eta't netametapecot joñe'me Dios. 3'Uo joga'me nolo' ca'li, qalaqach'ele dajeñe jañe'me ajeua, qama'le 'uo ga'me lauanaĝanaĝac: yataqachiñe di'yoqochigui da'me yauana ñe'me piyem le'ec jo'ne lamaĝajec ñe'me Dios da'me yec'ata ga'me jo'ne ue'ta ñe'me qama'le enaac:
—¡Cornelio!
4Cornelio yelo'ta ñe'me piyem le'ec nataq'aen t'oiyapega, qama'le yena't:
—¿Jach'ega, jaliaĝanec?
Joñe'me piyem le'ec enaac:
—Dios naquiaĝatapegalo daa'me anetamenaĝaco joote ueteda'ajop ñe'me Dios, nataq'aen yauanalo gaa'me jo'ne auauo'oe da'me qaedi alecochiyalo gaa'me jo'ne 'uo da'me louenaĝanaĝa'j. 5Chane'eja auamaĝalo qomle gaa'me adamaĝa's di'me noic jo'ne Jope qaedi e'n naequena ñe'me jiyaĝaua jo'ne lenaĝat Simón, nataq'aen da'me qoyateton da'me Pedro. 6Joñe'me ue'ta nayi di'me 'lachaqa' ñe'me nach'e ena'am Simón, jiyac lo'oc lo'o 'me na'ña jo'me loogue ga'me noĝop let'a.
7Ca'li ec jo'me piyem le'ec jo'ne dojetapegue', Cornelio yiyaĝanalo dojolqa lamaĝa's choqoga'me coico le'ec jo'ne yataqachiñe p'etaqadaic nataq'aen nach'eñe jo'ne p'iya'a. 8Ca'li yem da'me yema 'yaĝatema, qama'le yamaĝalo di'me Jope.
9Ca'li nete', qalaqach'ele nolo' joga, mane'e ca'li cha'li ueteda'ague ga'me naq'aec jo'ne yauaqa'a di'me Jope, Pedro yec'adije'ma ga'me p'ajeguem ga'me emec qaedi netamen. 10Yoqouat ca'li qama'le jetaque deque'e, qalaĝaja ca'li cha'li qo'yetetac ga'me yalic, qama'le 'uo ga'me lauanaĝanaĝac: 11yauana queda'me 'nouategue di'me piyem nataq'aen queda'me najeje'ña jena'me aleua ga'me ena'am ta'le ualoq jo'ne qoyecoñe't naa'me laliaqa da'me qonenotaĝañe. 12Ga'me ualoq 'uo ca'li ga'me yodapecache yejidipi jo'ne cuatro naa'me lapia'te, nataq'aen joga'me naqaledelegue jena'me aleua choqoga'me mayodipi. 13Nataq'aen domachiya ga'me nejamaĝa jo'ne enaac:
—Oñijeguem Pedro, aualataĝan nataq'aen aueque'e.
14Pedro 'yateguet:
—Aja'y, Jaliaĝanec; qa'a gamachaqaega ja no'en uotaĝa paĝachigui; ja jauana ta'le jalic.
15Ga'me nejamaĝa yitaĝa dojapegue', qama'le enaac:
—Ga'me jo'ne Dios joote yiyamaĝatetac, ena'te aueetapega paĝachigui.
16Dojo' tres 'viyelaĝalegue ca'li, qama'le yem ga'me ualoq yitaĝa 'viyelaĝaje'ma di'me piyem. 17Pedro diyachitapiye't uenate'ta queda'me jach'e jogamaĝa yelo'teguet joga'me lauanaĝanaĝac, ca'li yovideta ga'me 'nachaqa' gaa'me jiyaĝa'u jo'ne Cornelio lamaĝa's, jo'ne nataĝatedaque ca'li ga'me na'ña ñe'me Simón. 18Ca'li yovi't, yiyaĝadetapegueuo qom ue'ta di'me 'nachaqa' ga'me Simón, nach'eñe jo'ne lenaĝat laqaya Pedro.
19Qama'le ca'li Pedro maliaĝa uenatetapega da'me yauana, joñe'me Dios Lepaqal dojapegue':
—Pega, trejolqa jiyaĝa'u am netetedaque. 20Oñijeguem, anenochiñe nataq'aen ja auoqolegue't da'me oqueguelo, qa'a jayem da'me ñamaĝatequena.
21Pedro nenochiñe ca'li, qama'le t'aqataĝanema gaa'me jiyaĝa'u:
—Naqayem jo'ne aueloyitaque; ¿jach'e ga'me ami yeuoĝo'n?
22Jogaa'me 'yadeteguet:
—Jachiyajaqa'a ñe'me coico le'ec lajoĝola' Cornelio, jiyaĝaua jo'ne chimaqachiñe, jo'ne 'nonaĝachigui ñe'me Dios nataq'aen nach'eñe jo'ne ena'uaque ga'me judiopi 'yamaqate'n nataq'aen noqopideta. 'Uo jo'me piyem le'ec jo'ne chiyoĝogue ñe'me Dios t'aqataĝanem qaedi am niyaĝana, qaedi auec'ata di'me 'lachaqa' qaedi naquiaĝana ga'me jo'ne a'uaĝatem.
23Chane'eja Pedro yenoĝonaqatedeuo jogaa'me qama'le nach'e uede'edi ca'li jo'me pi'yaq. Ca'li 'yoĝoñi, Pedro equeguelo jogaa'me, nataq'aen uo'oe gaa'me quetegue lepi'iyaĝa'u jo'ne 'lachaqa't di'me Jope.
24Ca'li nolo' laqaya yovideta di'me Cesarea, nach'edi ua'a da'me Cornelio yauatetapiye choqogaa'me lama'y jo'ne laqaya' nataq'aen gaa'me yataqachiñe naigaĝa'u, jo'ne nach'egaua nepoda'y. 25Ca'li Pedro yovita ga'me 'nachaqa', Cornelio ca'aguet da'me yelo'oguet, qama'le yejoidiñe naa'me leliquetel da'me dajoya'aguet joñe'me qaedi 'nonaĝachigui. 26Qalaĝaja Pedro yañijeguem, dojapegue':
—Anechachiñi, qa'a nach'e ena'am jayem jiyaĝaua, am jena'am.
27Ca'li cha'li dojetapegue' joñe'me, yenoĝoneuo qama'le jalcote ga'me jiyaĝadipi yejomaue da'me yema'a't. 28Pedro enaac:
—Da'me ami auayachiñe ga'me judiopi lepe'e' queda'me ja qoyaje'tem ga'me ja 'lachaqaena ta'le dojapegue' uotaĝa taue ga'me 'lachaqa'. Qalaĝaja Dios jayem yapaĝaguenec queda'me ja jetaque jen 'te aĝanataĝanaĝaic uotaĝa jen paĝachigui gamachaqaega. 29Qo'che', mane'e da'me jayem qot'aqataĝanem, qama'le ja ja'uo 'te yaqalaic da'me ñanaequena. Chane'eja jetaque jayaten queda'me toqoch'e jayem aviyaĝana.
30Cornelio 'yateguet:
—Yenoĝodegue jaajo' cuatro noloqo'ote, qalaqach'ele naq'aeta jañe'me ajeua, joue'ta jenjo' 'yachaqa', tachi'ña tres ga'me javit jo'ne laloqoedi nale jauo'oe gaa'me ñetamenaĝaco, ca'li 'uo ñe'me jiyaĝaua jo'ne jayem naloĝoneguet yatedañe ga'me louo jo'ne 'uo da'me lauaqayaĝa'j. 31Qama'le jayem t'aqataĝanem, enaac: «Cornelio, Dios naquiaĝatapegalo daa'me anetamenaĝaco joote ueteda'ajop ñe'me Dios, nataq'aen yauanalo gaa'me jo'ne auauo'oe da'me qaedi alecochiyalo gaa'me jo'ne 'uo da'me louenaĝanaĝa'j. 32Chane'eja auamaĝalo qomle gaa'me adamaĝa's di'me noic jo'ne Jope qaedi e'n naequena ñe'me jiyaĝaua jo'ne lenaĝat Simón, nataq'aen da'me qoyateton da'me Pedro. Joñe'me ue'ta nayi di'me 'lachaqa' ñe'me nach'e ena'am Simón, jiyac lo'oc lo'o 'me na'ña jo'me loogue ga'me noĝop let'a.» 33Chane'eja ja jayaloĝoden da'me am jelataĝanegue, nataq'aen yataqachiñe 'uo da'me adichoĝodenataĝanaĝac da'me auanaequena. Chane'eja qo'mi uetauelo ñe'me Dios da'me jouaqa'ta jena'me jenjo', nataq'aen jetaque ñaquiaĝanaĝa yema ga'me jo'ne am 'yelopec ñe'me Jaliaĝanec qaedi qo'mi a'uaĝatema.
Pedro ya'uo 'laqatac ca'li ue'ta di'me Cornelio 'lachaqa'
34Chane'eja Pedro paja'a doje ca'li, qama'le enaac:
—Nayi male jayaten queda'me Dios ja en 'te yaqa'a ga'me jiyaĝaua nataq'aen ga'me laqaya, 35dite da'me gamachaqaega jena'me aleua yaconeguet ga'me jo'ne p'iya'a nataq'aen yauote da'me 'noota. 36Dios dojapegue'to ca'li jogaa'me israelpi c'oĝo'tepi, yechoĝotetapema da'me 'naqataĝanaĝac jo'ne 'nemaĝac 'me chiyaqayi ñe'me Jesucristo, mach'e Lejaliaĝane'j yema ga'me jiyaĝadipi. 37Ami yataqachiñe auayachiñe ga'me 'uo ca'li yema di'me aleua jo'ne judiopi 'lachaqa', choyoqochi'ña di'me Galilea ca'li joote yoĝo'yi da'me Juan 'yaĝatetac da'me youetaque da'me qonachilaĝan. 38Auayachiñe queda'me Dios en nejaqachigui da'me lañoqotaĝanaĝac nataq'aen ñe'me Lepaqal 'me yanem ñe'me Jesús jo'ne Nazaret le'ec, nataq'aen queda'me Jesús ya'uo da'me 'noota ca'li, nataq'aen en yemedegue ga'me jiyaĝadipi ena'uaque ga'me jo'ne 'uo da'me lachoĝode'j 'me yepataqatedañe da'me lañoqotaĝanaĝac ñe'me payac. Dojo' yaqanatet da'me ya'uo qa'a ue'tajop joñe'me Dios. 39“Qama'le qo'mi mach'e choqotaĝanaĝayaqa ena'uaque jodaa'me yauo'oe ca'li ñe'me Jesús ca'li ue'ta di'me Judea nataq'aen Jerusalén. Yem qama'le qoyalat ca'li, qoyanetaye jaga'me sodoso. 40Qalaĝaja tres noloqo'ote ca'li qama'le Dios 'niyelaĝachijeguem, choqoda'me 'yetem da'me qaedi qo'mi naloĝonegueta. 41Ja yema naloĝonegueta gaa'me noyaqa, dite qo'mi, jo'ne nach'e qo'mi liquiyaqa jo'ne e'n 'uaediñe qaedi choĝotaĝanaĝayaqa. Qo'mi ñeuanaqa'ta'y joñe'me da'me jeque'yaq nataq'aen da'me ñiyomaq ca'li joote 'niyelaĝajeguem. 42Nataq'aen ñe'me qo'mi yamaĝalo'te da'me qaedi ja'aqataĝanaĝama gaa'me noyaqa da'me Dios nach'eñe en nec'atenoqo't ga'me nec'aletedaye nataq'aen ga'me napa'l. 43Ena'uaque dia'me Dios 'laqataĝanaĝanaqa joote 'yaĝatetedac ca'li ñe'me Jesús, nataq'aen joote 'yaĝate'tape gaa'me jo'ne p'iida'a ñe'me Jesús queda'me joñe'me nach'eñe yapalaĝa't jodaa'me loeco.”
Joga'me ja judiopi qoyanema joñe'me Dios Lepaqal 'me ja 'nalegue
44Maliaĝa dojetac ñe'me Pedro ca'li ñe'me Dios Lepaqal nenochi'ñalo ena'uaque gaa'me jo'ne naquiaĝatedapega da'me 'naqataĝanaĝac. 45Qama'le jogaa'me p'etaqadayaqa jo'ne uetedaje'mec da'me judiopi lepe'e jo'ne naequetedapegue' ñe'me Pedro ca'li novi't, yataqachiñe yoqochetem queda'me nataq'aen qoyanema ñe'me Dios Lepaqal jogaa'me jo'ne ja judiopi, 46qa'a domachiyalo da'me yadenaĝa't gaa'me 'naqataqa jo'ne 'yoda'alo qama'le 'nonaĝachidegue joñe'me Dios. 47Chane'eja Pedro enaac:
—¿Jeele qoyaqanatet ta'le ja qonajenegueta da'me nach'e ena'am qonachilaĝa'n naajo' jiyaĝa'u jo'ne male yacoteguet ñe'me Dios Lepaqal, nach'e naq'aeta da'me qo'mi?
48Chane'eja damaĝajoĝolegue da'me qaedi qonachilaĝa'n jogaa'me, qodachilaĝanaĝana da'me lenaĝat joñe'me Jesucristo. Ca'li yem qama'le nachoĝodetot ñe'me Pedro qaedi cha'li uo'oe gaa'me noloqo'ote da'me uetauelo jogaa'me.
Արդեն Ընտրված.
Hch 10: TSN
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nuevo Testament Toba del Oeste © 2010 Sociedad Bíblica Argentina