यहून्ना 2
2
काना सैहर मै बिहा
1फिर तीसरे दिन गलील के काना सैहर मै एक बिहा हो, और ईसु की अईया बहाँ ही। 2ईसु और बाके चेलौ को बी बिहा मै नौहतो हो। 3जब बहाँ अंगूर को रस खतम हो गओ, तौ ईसु की अईया नै ईसु सै कैई, “इनके धौंरे अंगूर को रस खतम हो गओ है।” 4तब ईसु नै उस्सै कैई, “हे नारी, मैंकै तेसै का काम? मेरो टैम अबी ना आओ है।” 5उसकी अईया नै सेवकौ सै कैई, “जो कुछ बौ तुमकै कैए, बौई करिओ।” 6बहाँ यहूदिऔं के रिबाज के अनुसार सुद्द कन्नै के ताँई पत्थर के छै मटका रखे हे। हर एक मै कम सै कम अस्सी या एक सौ बीस लीटर पानी आवै हो। 7ईसु नै उनसै कैई, “मटकौ कै पानी सै भरदो।” और उनौनै मटकौ के मौह मौह तक पानी भर दओ। 8तब बानै उनसै कैई, “अब थोड़ो बाहार लिकारकै दाबत को इन्तजाम कन्नै बारे कारन्दा के धौंरे ले जाऔ,” और बे ले गए।
9फिर दाबत के कारन्दा नै बौ पानी चखो जो अंगूर को रस बन गओ हो, और बौ ना जानै हो कै जौ अंगूर को रस कहाँ सै आओ। पर जिन सेवकौ नै पानी लिकारो हो बे जानै हे। तब दाबत के कारन्दा नै दूलाह बुलाओ, 10और उस्सै कैई, “हर एक आदमी पैले बढ़िया अंगूर को रस देवै है, और जब लोग पीकै छक जावै हैं, तौ घटिया बारो। पर तैनै तौ अब तक बढ़िया अंगूर को रस बचाकै रखर खाऔ है।” 11ईसु नै गलील के काना सैहर मै अपनो पैलो चमत्कार को चिन्न दिखाकै अपनी महिमा परकट करी और उसके चेलौ नै उसमै बिसवास करो। 12#मत्ती 4:13इसके बाद ईसु और उसकी अईया और भईया और चेला कफरनहूम मै गए और बहाँ कुछ दिन रैहए।
ईसु नै मन्दर मै सै ब्यापारिऔ कै लिकारो
(मत्ती 21:12,13; मरकुस 11:15–17; लूका 19:45,46)
13यहूदिऔं को फसै को तौहार आनै बारो हो और ईसु ऐरूसलेम गओ। 14उसनै मन्दर के दारे मै डंगरौ, भेड़ौ और कबूतरौं कै बेचनै बारौं और पैसौ को लेन-देन कन्नै बारौं कै बैठे भए देखो। 15तब ईसु नै रस्सिऔं को कोड़ा बनाकै, सब भेड़ौ और डंगरौ कै मन्दर सै लिकार दओ, और लेन-देन कन्नै बारौं के पैसा बिखेर दए, और उनकी पिड़िया पलट दंई, 16और कबूतर बेचनै बारौं सै कैई, “इनकै हिंया सै ले जाऔ, मेरे अब्बा के घर कै बजार मत बनाऔ।” 17तब उसके चेलौ कै याद आई कै पबित्तर सास्तर मै लिखो है, “तेरे घर के ताँई मेरो पियार मैंकै खा जागो।”#2:17 भजन किरतन 69:9
18यहूदिऔं नै ईसु सै कैई, “तू जो कुछ कर रओ है इसको हक साबित कन्नै के ताँई हमकै कौन से चमत्कार दिखागो?” 19#मत्ती 26:61; 27:40; मरकु 14:58; 15:29ईसु नै उनकै जबाब देओ, “इस मन्दर कै ढै दो, और मैं इसकै तीन दिन मै फिर खड़ो कर दंगो।” 20यहूदिऔं नै कैई, “इस मन्दर कै बनाने मै छियालीस साल लगे हैं। का तू इसकै तीन दिन मै खड़ो कर देगो?” 21पर जिस मन्दर के बारे मै ईसु कैरओ हो, बौ अपने सरीर के बारे मै कैरओ हो। 22जब बौ मरे भएऔं मै सै जिन्दो करो तब उसके चेलौ कै याद आई कै ईसु नै जौ कैई ही, इसताँई उनौनै पबित्तर सास्तर और बा बचन मै बिसवास करो जो ईसु नै कैओ हो।
23जब ईसु फसै के तौहार के दिनौ मै ऐरूसलेम मै हो, तौ ईसु के करे भए चमत्कार के चिन्न भौस्से लोगौ नै देखे, और उसके नाम मै बिसवास करो। 24पर ईसु नै अपने आपकै उनके भरोसे मै ना छोड़ो, कैसेकै बौ सबकै जानै हो, 25और उसकै कोई जरूरत ना ही कै कोई आकै उसकै लोगौ के बारे मै बताऐ, कैसेकै लोगौ के मन मै का है, इसकै बौ जानै हो।
Արդեն Ընտրված.
यहून्ना 2: TKB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
New Life Compute Institute [NLCI] - CC BY-NC-ND 4.0