Matiusu 10
10
O Yesusu wahibehehongo ona o hidingoto ma nyawa yangimoi de yahinootoika
Maruku 3:13-19, 6:7-13; Lukasa 6:12-16, 9:1-6
1De o Yesusu iwinii-niiki wahokino abe ona yangimoi de yahinooto. De yomatoomuinoka Unangoka de ahao wahidoaka o kuaha onangika la ahao onangoo ka idadi yakunu o tokata ihititoko o nyawaino de manga popanyakeino yahitogumu. Ho ngaro o nyawa manga badangino ma kangela o kia dika naga ma ona ka idadi yahitogumu onangika ma titi ona naga de manga kuahaka Unangino.
2De naa ona yangimoi de yahinooto manga roma-romanga abe o Yesusu wairiki de wahitagongo la yodadi to Una ai hidingoto ma nyawa. Abe una wohira-hira gea o Simono abe iwihiromangoli o Peturusu. De ahao naga o Andareasa abe o Peturusu ai dodoto, de ahao nagali o Yakobusu to Sebedeusu ai ngofaka, de nagali o Yohanese abe to Yakobusu ai dodoto. 3De nagali o Filipusu, de o Batolomeusu, de o Tomasa, de o Matiusu abe una o pajaka ma tiwi wotobagaho-gahoko, de ahao naga o Yakobusu womatengoli abe to Alefeusu ai ngofaka, de nagali o Tadeusu. 4De nagahi o Simono abe una o Seloto ma doomuino ma nyawa#10:4 Nako o Seloto ma dodoomu, ona gea yoigo yatobalawana o Roma ma poparetaika., de naga o Yudasa Isikarioto, abe una gea ahao wihidoaka o Yesusu o nyawaika la iwitoma. De hokogea to ona yangimoi de yahinooto manga roma-romanga abe o Yesusu wahidingoto la o Abari ma Rorahai yahingahu-ngahu o Yahudi ma nyawaika.
5De ona yangimoi de yahinooto ko wahidingotuahi de o Yesusu wahibehehongohi onangika wato, “Ufa ngini niloiki onangika abe ko o Yahudi ma nyawaua, de ngaro ona o Samaria ma nyawa masara ko idadiuahi niloiki onangika. 6Masara ngini kiani niloiki abe o Isiraele ma nyawaika dika. Abe o Isiraele ma nyawa gea Ngohi tahiromanga onangika tato ona hoka o domba abe imakitingakoka ma dutuoka de aino ho ihihangoka, angamoi onangoo yomakitingakoka de Ma Jou. 7Ho ngini tinihidingoto onangika gea la niahingahu-ngahu abe ma titi itigioka ma oraha abe Ma Jou wato wahikoano ai nyawaika. La ka de yoihene ma abari gea de ka idadi yolioli manga dutuika abe ma titi Ma Jouika yolio.”
8“De ngini nia dodagi ma goronaka de niatobaduhunu o nyawaika, abe ka idadi niahitogumu manga popanyakeino, de abe yohone-honengoka ka idadi niahimomiki manga honengino, de nako yapado-pado gea ka idadi niahitogumu manga padoino, de abe yakokitokata ona gea ka idadi manga tokata nihititoko onangoka. De naa ka tinihidoaka dika ahi kuahaino la ngini niaduhunu o nyawaika, ho abe ma oraha ahi kuaha niapake de ngini ko idadiua o nyawa yofangu nginika, la nia duduhunu onangika gea o hidoakino dika.”
9“De nia dodagi naa ufa nia tiwi nimagao, abe ngaro o gurasino eko o haakaino eko o tabaagaino ma tiwi ma gea ko idadiua nimagao. 10De ngaro ufa dika nia beta-beta niao abe biaha nihilulu nia kiahonanga genangino. De ka idadi nimasandaaliye, de ka idadi nimahinoauku dika nia baju abe ka nia kokiroehoka, masara nako nia doduruuru eko nia sandaala ma duruuru, gea ngaro ufa dika de niao. De ngaro nia tutukunu masara gea moi dika nimagao. De ngaro ufa niao mata-mata gea angamoi ti ngini nia perelu gea ahao Ma Jou winihidailako o wange-wangeiye, abe imaketero hoka o nyawa hahewa la ona yokarajaanga nanga redioka de ngone kiani hahidailako manga karajaanga ma hibalaha abe hoka manga perelu o inomo. Ho hokogenangoo ti ngini nia perelu Una ahao winihidailako angamoi duru Una gea abe winihikarajaanga ngini.”
11De o Yesusu wogila-gila wahibehehongo onangika wato, “De nia dodagioka abe nimahiadonoka o kapongo eko o kota moiika, de nialingirohi o nyawa abe manga wowango yao itiai de abe yosanangi inidafongo manga tauino. De nako ma nyawa inidafongo irahai, ufa nimaturuuru o tau moiikali, ma onangoka dika nimanoa ka hiadono nihupu ma kapongino gea. 12De ma oraha niwohama manga tauika gea de ona niagahoko ma owa Ma Jouika la Una wahiowa manga wowangoka. 13De nako ona igou-goungu yao itiai manga wowango, ahao nia hiowa ma gogahoko yamake ona gea. Masara nako hiadono ngini niamake abe manga wowango yao ko itiaiua, gea ngini ahao kiani niagahokoli Ma Jouika la to Una ai hiowa gea ko yamakeuali.”
14“De nako ahao idadi abe o tau moioka eko o kapongo moioka de ko moiua inidafongo eko nia demoino de ko initotoihenua, gea nihupu dika onangino. Masara ma oraha nihupu de kiani nia lou niafureere la ma tonaka ma kuhuhunu gea irerouku. De abe nia lou niafureereuku de gea idadioka o hohowono ma dodunguu onangika angamoi ko inidafongua. 15De naa tagou-goungu tinihingahu abe ahao dokengika ma oraha Ma Jou watailako de wahohowono o nyawa, ahao ona gea manga hohowono duru kohadubuho. Abe ngaro o Sodomo de o Gomora ma nyawa abe manga datoro duru itorou, masara ka onangohi abe iniolu-oluku nginika manga hohowono duru itubuho onangika.”
O Yesusu wahitiari abe ahao Ma Jou ai nyawa o kokangela yaohana
Maruku 13:9-13; Lukasa 12:2-9, 21:12-17
16De o Yesusu ka wohigila-gilahi ai behehongo ma demo abe iwitobanii-niiki yangimoi de yahinootoika wato, “De naa abeika nitotoihene to Ngohi ahi demoino, angamoi naa tinihitiari nginika abe ma titi ahao hokokia idadi nginika. De ngini naa tinihidingoto o nyawaika la nihiabari ma titi abe ma oraha itigioka Ma Jou wahikoano ai nyawaika. Masara tinihiketero ngini abe ngade-ngade hoka o domba abe duru imura, de naa tinihidingoto o fuhuku ma kaho ma ngi-ngiika, ho kiani duru ngini nimahidodiai onangoka. Abe kiani nimahidodiai ma titi nia demoino de nia wowango ma datorino la ufa niaruwae onangika abe yototualono, done ahao inihikangela nginika. De gea nia datorino kiani nihidodiai la nia sosawaroino niapake de abe nia hiningaka de duru niabole-bole o nyawaika. 17Ho ngini kiani nimahidodiai angamoi ngaro nimaagoana masara utu ahao idadi abe o nyawa initae-tae de inihidoa-doaka nia hidimonika abe ona gea yotobauru-urusu o nyawa, de marai duru inipoha-poha nia dodotoko ma tau-tauoka. 18De nagali ahao o gogubernuuru de o kokoano manga hima-himangoka nimaokoino angamoi o nyawa initae nginika abe ma titi ngini nihinii-niiki Ngohi. De genangoka ngini ka idadi nimahingahu onangika ma titi nia ngongaku Ngohino. De gea hiadono ona utu ko o Yahudi ma nyawaua abe naga genangoka, onangikaoo ka idadi nimahingahu ma titi Ngohi. 19De abe ma oraha initaokino de iniurusu to ona manga hima-himangoka, gea ngaro ufa nihawana de nimatemo niato, ‘Adoo, done o demo o kia de ahao mitemo onangika?’ Gea koua, masara ma oraha adonoka de o kia dika ipudaiye nia hiningaiye, gea nitemo dika, 20angamoi gea tanu ko nginiua nitemo, masara gea ti ngini nia Baba Ma Jou ai Womaha abe wotemo de wapake ti ngini nia uruino.”
21De o Yesusu wogila-gila wato, “De nagaoo ahao idadi hokonaa, abe ngaro o nyawa yomahitaumoi ma, abe utu ko ihingakua Ngohino ho yamusu abe ona ihingaku-ngakuoka. Hoka abe naga o ria-dodoto yahinooto de womatengo abe ko wohingakua wikalaki ai ria-dodoto abe wohingakuoka Ngohino la o nyawa iwitoma. De hokogenangoli idadi abe naga o baba womatengo de wihidoaka ai ngofaka abe wingakuoka o nyawaika. De nagali o ngofa-ngofaka utuoli abe ko ihingakua de ahao yalawa-lawana manga meme de manga babaika abe ona ihingaku-ngakuoka Ngohino. De gea ka hiadono yakalaki ma titi manga dimono ho ma bahauku de o nyawa yatoma manga dimono gea.”
22“De ngini ahao o nyawa mata-mataika ka inidoha-dohatika ma titi ngini nidadioka to Ngohi ahi nyawa, masara abe onagona dika yomatongohono manga ngongakuoka hiadono o dunia ma bobahaika, ona gea ahao Ma Jou wahihohe manga kangelaino.”
23“De nako o kapongo moioka abe inihikangela nginika, de gea nianoaka dika ma kapongo gea de niloiki o kapongo eko o kota utuikali. De gea tagou-goungu tinihingahu abe o Isiraele ma kapongo ko mata-mataikauahi ngini nimahiadono de Ngohi toboali la tomahimatoko ahi kuaha. Abe Ngohi naa o Nyawa ma Ngofaka abe o Horogaka de tauku toboa masara o nyawaino tomaboa.”
24-25De o Yesusu wotemo wato, “De naa tinihingahu nginika abe ahao o nyawa initae-tae abe imaketero hoka Ngohioli ihitaeoka. Abe ma dihiraino de naga abe ihitae Ngohino ato o toka-tokata ma hidimono, ho ngini ngaro ufa niheranga nako nginioo o nyawa initae-tae de manga demo ma dorou dika. Angamoi Ngohi ti ngini nia dutu, de ngini to Ngohi ahi duduhunu. De ngini to Ngohi ahi nyawa abe nimatobadotoko Ngohino angamoi Ngohi ti ngini nia guru. Abe ma titi nako ngini de Ngohi, ma ka Ngohiohi tokurutiye ahi gogere. De ngaro ka Ngohiohi tokurutiye masara ka idadiohi o nyawa ihitae Ngohino. De genangino de duru ka idadi nihioriki abe nginioo ahao o nyawa initae nginika. Angamoi Ngohi hoka o tau ma dutu de gea ngini hoka ahi nyawa ahi tauoka. De nako o nyawa ihitaeoka Ngohino de o demo ma dorou, hongoli manga dadae ma demo ma dorou ahao itagi nginika.”
26“De naa tinihingahu abe ahao naga ma oraha abe o nyawa homoi-homoi manga hininga ma dola Ma Jou wahikokimatoko o nyawa mata-mataika. De ma oraha gea Ma Jou wahimatokoo to ona manga hininga abe inihikangela nginika de gea ona ahao yamake ma hibalaha abe ma oraha Una wahohowono onangika. Ho gea hiadono Ngohi tato ngini ngaro ufa niamodongo onangika abe inihikangela, angamoi ngini naa abe ahao nilaku de ona ahao yokala ma titi manga hohowono amake Ma Jouino. 27Ho ngini kiani nitomoroini hiadono ka ihikaika ahi abari niahingahu-ngahu o nyawa-nyawaika. De ngaro ahi demo abe tinihingahu ko o nyawa manga himangokaua masara ka ngini de Ngohi dika, ma gea ahi demo nihingahu-ngahu. Abe ngaro ahi dodotoko abe ka ngini dika niihene, ma kiani gea nihiabari o nyawa mata-mataika ka hiadono o dunia ma amokika!”
28De to Una ai demo o Yesusu wohigila-gilahi wato, “De naa tohigalioli ahi demo abe tato ufa niamodongo o nyawaika. Angamoi ngaro o nyawa inihikangela nginika de inihidee la ato initoma, ma gea ti ngini nia badanga dika abe ka idadi yatoma. De nako ti ngini nia jiwa, gea o nyawa ko yakunua yahohonenge enangika, masara abe nako Ma Jou, Una dika ka idadi wahibinaaha o nyawa manga badangoo de manga jiwaoo o Naraka ma ukuika. Ho koaho niwimodongo Unangika dika de niwihoromati ma titi ai kuaha kohaamoko gea.”
29“De naa tinihigaro la tato ufa niamodongo o nyawaika. Angamoi abeika homahohiningahi ma titi Ma Jou ai dora de ai baliara ngoneino. Abe ngaro o totaleo duru ma hohumuduru abe duru ko kia-kiaua ma ija adaene, masara Ma Jou wagoana. Abe ko wohigunoaua ma totaleo moi dika de ihonenge, nako gea ko imakiniikua de to Una ai mau. 30De hongoli to Una ai hininga itagi nginika nako de o totaleo ma hohumuduru! Abe ngini naa winidora ka hiadono ngaro nia tadauru masara Una duru wohioriki nia tadauru ma ngoe abe naga nia pea homoi-homoioka! Ho gea womahitaana abe duru ai hininga ma dora itagi nginika!”
31“De mangale ai dora gea nginika hiadono Ngohi tato ufa ngini nihawana, angamoi nako ngini de o totaleo ma hohumuduru abe ngaro o duduono moi, masara duru ka nginiohi nia gogere ikurutiye Ma Jou ai himangoka. De ma titi Una duru winigoana de winipaliara irahai ngini, ho ufa hiadono ti ngini nia hawana ilaku nia hiningaka abe ngaro inihikangela nginika.”
32De o Yesusu wahingahu onangika wato, “De onagona dika o duniaka naa de yomahingahu o nyawa manga hima-himangoka ato, ‘Ngohi naa tingaku o Yesusika,’ de ona gea ahao dokena manga wowango ma bahaika abe ahi Baba o Horogaka ai himangoka de tadafongo onangika. Abe ma oraha gea tadafongo de tatemo tato, ‘Igoungu ngona naa nagau ani gogao de de Ngohi.’ 33Masara abe onagona dika o duniaka naa de ona yotemo ato ko ihihiorikua de ko iwa manga gogao Ngohino, de ona gea ahao ma oraha gea ahi Baba ai himangoka o Horogaka de Ngohioo totemo tato ko tahiorikua ho ko iwa manga gogao Ngohino.”
O Yesusu wahingahu abe ahao o nyawa yomaketeribuutu ma titi Una
Lukasa 12:51-53, 14:26-27
34De o Yesusu ka wotemohi onangika wato, “De ngini ufa niataoko ihowono abe ma titi ahi boa o duniauku naa. Abe ufa niataoko niato bote mangale ma titi Ngohi toboaino hiadono o nyawa mata-mata yomahikokadameoka o dunia ma amokika. Masara tanu ma titi Ngohi ahi boa la hiadono o nyawa yomaketeribuutu de hiadono yomakalawana ona de manga gogianongoru. 35De mangale ma titi Ngohi toboaino ho hiadono o nyawa yomaketeliliara de to ona manga dutu angamoi womatengo wohingaku Ngohino masara ai dutu ko ihingakua. Abe utu o giangofakoka de ai ngofaka wilawana ai babaika, de utu o ngofeka momilawana ngomi memeika, de utuoli naga abe momatengo de ngomi hunungu yomaketeliliara ma titi Ngohi ka hiadono yomakalawana. 36De barikua ona abe ti ngini ma hirete nia tau-tauoka masara naga utu ahao yodadi nia musu.”#10:36 Mika 7:5-6
37De Una wotemohi iwinii-niikika wato, “De onagona dika yoigo ihitobanii-niiki Ngohi, ona gea kiani manga dora duru ilamoko Ngohino. Abe ngaro manga dora abe itagi manga dimonika, masara manga dora abe Ngohino kiani ka enangohi ilamoko. De hokogenangoo manga hininga ma dora manga ngofakika. Abe nako manga dora manga ngofakika de manga dora Ngohino masara kiani ka enangohi ilamoko abe itagi Ngohino. Ho nako Ngohino manga dora ko ilamokua nako de manga dutuika, gea ko yagou-goungua ihiniiki Ngohi.”
38“Abe onagona dika yoluku yomahidoaka manga wowango la ihitobaniiki de ihihingounu Ngohi, ona gea ko idadiua yodadi to Ngohi ahi nyawa.”
39“De onagona dika abe ihioluku Ngohi mangale ma titi ko yoigoua o kangela yohimanga manga wowangoka, ona gea tahiromanga tato ona duru yomagoana manga wowango done o kangela yadaene. De ngaro ona ato duru yomagoana manga wowango, masara ma bahauku de ona gea ko yamakeua o wowango ma gou-goungu Ngohioka. Masara onagona dika nginioka abe nia wowango o duniaka nimahidoaka dika la nihileleani Ngohino, gea ahao o wowango ma ngango tinihidoaka nginika.”
Onagona dika yaduhunu o Yesusu iwitobanii-niikika ona gea ahao yamake ma owa Ma Jouino
Maruku 9:41
40De o Yesusu ka wotemohi onangika wato, “De naa tinihingahu nginika abe o nyawa onagona dika inidafongo ngini, gea imaketero Ngohioo ona ihidafongoka. De hokogenangoo nako ona ihidafongoka Ngohi, gea ka Ngohiua dika ona ihidafongo masara o Baba abe wohihidingotino, Unangoo iwidafongoka.”
41“De onagona dika iwidafongo womatengo Ma Jou ai uru ma dodofanga ma titi yosanangi Ma Jou ai Demo-demoika, ona ahao yamake ma owa Ma Jouino. De ma owa gea abe ona yamake gea ka imaketero dika ma hohailoa de ma owa abe Ma Jou wahidoaka ai uru ma dodofangikali.”
“De abeika nako naga womatengo abe ai wowango ma datoro itotiai Ma Jou ai himangoka. Naa tinihingahu tato, onagona dika abe iwimake womatengo gea de iwidafongo mangale ma titi yosanangi Ma Jou ai totiaiika, onangoo ahao yamake ma utumu Ma Jouoka. De manga utumu gea ahao duru imaketero hoka unangoli ahao wamake abe ai wowango wao itiai.”
42“De naga o nyawa utuoli abe ahao yamake ma owa Ma Jouoka. De gea o nyawa abe iniduhunu ngini ma titi inihioriki abe ngini nihinii-niiki Ngohi. Abe ngaro manga duduhunu nginika hoka o akere ka o mangko moi dika inihidoaka, masara ona gea ahao kiani yamake ma owa Ma Jouoka. De gea ngaro ngini nia gogere ko ikurutiyeua nako de nia dodiawo utu abe ngini mata-mata nihitobanii-niiki Ngohi, masara nako o nyawa iniduhunu nginika hokogea, ona gea ahao manga utumu yamake.”
De hokogea o Yesusu ai behehongo ma demo iwitobanii-niikika ma titi abe ngade-ngade yosobo. Abe wahidingoto ona la yahingahu-ngahu o Yahudi ma nyawaika o kapongo homoi-homoiika ma titi abe hokokia ahao Ma Jou wahikoano ai nyawaika. De wahibehehongo ibooto de ona yosoboka yotagi-tagi o Isiraele ma tonaka ma kapo-kapongika.
Արդեն Ընտրված.
Matiusu 10: MJDD
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Gereja Firman Allah, Yayasan Misi Masyarakat di Pedalaman