Génesis 8
8
I'ech' li pulel ta vo'e
1Li Diose it'ab ta yo'nton ti te tic'ajtic ta barco li Noee xchi'uc li chonbolometique, jech te laj yac' taluc tsots ic' ta banamil, jech lic yaluc li vo'e. 2Te lic macuc sti' noxtoc li vo'etic ti it'oman loq'uel tale, xchi'uc imac noxtoc li vinajele. Jech te ich'abi o li vo'e. 3Ta c'unc'un lic yaluc li vo'e. C'alal ista li lajuneb xvaxacvinic (150) c'ac'ale, te xa lic uluc li vo'e. 4Ta svuclajunebal (17) c'ac'al yochel li svucubal ue, li barcoe te cajal ic'ot ta jun vits te ta Ararat vitsetic. 5Li vo'e yochel ta ulel yalel. Ta sba c'ac'al yochel li slajunebal ue, te xa lic vinajanuc jutuc jolvitsetic ti bu ven toyolique.
6C'alal i'ech' cha'vinic (40) c'ac'ale, li Noee la sjambe li sventanail barco spasoje. 7La scolta batel jcot joj. Li joje te xvilet o yu'un tsmala me oy chtaquij li banamile. 8Ts'acal li Noee lic scolta batel jcot stsumut yu'un tsc'an tsna' me taquin xa li banamile. 9Pero li stsumute isut tal ta barco, yu'un mu'yuc bu xu' ta xluchi yu'un noj to ta vo' li banamile. Li Noee la stsac ochel ta yut barco li stsumute.
10Li Noee laj to smala yan vucub c'ac'al. Ts'acal to lic scolta batel yan velta li stsumute. 11Ta xa'ox x'ic'um osil ti c'alal isut tal li stsumute. Te scats'oj tal jlic yanal oliva te'. Jech te la sna' o Noé ti ta xa xtaquij li banamile. 12Laj to smala yan vucub c'ac'al. Ts'acal la scolta batel yan velta noxtoc li stsumute, pero muc xa sut o tal.
13C'alal ta xa xtaquij batel jutuc li banamile, li Noee yich'oj xa'ox vaquib ciento xchi'uc jun (601) jabil. Ta sba c'ac'al li sliqueb ue, li Noee lic sloq'uesbe smac sjol li barcoe. Te laj yil ti taquin xa jutuc li banamile. 14Ta vucub xcha'vinic (27) c'ac'al yochel li xchibal ue, lec xa'ox taquin li banamile. 15Ja' yu'un li Diose jech laj yalbe li Noee:
16“Loc'anic tal ta barco achi'uc li avajnil anich'nabe xchi'uc li avalibtaque. 17Loq'uesano tal noxtoc scotol li chonbolometic te achi'uque: ja' li mutetique, li chonbolometic ti stac' ts'unele, xchi'uc li chonetic ti xquilet ta banamil chanovique, yu'un ac'o spuc sbaic batel ta scotol banamil. Ac'o bolicuc, ac'o snojesic li banamile”, xut.
18Ja' yu'un li Noee xchi'uc yajnil xnich'nabe, xchi'uc li yalibtaque, iloq'uic ta barco. 19Jech iloq'uic noxtoc scotol li chonbolometic ti stac' ts'unele, xchi'uc li c'usi mu stac' ts'unele, xchi'uc li chonetic ti xquilet chanovique, xchi'uc li c'usitic xvilet chanovique. 20Li Noee te lic spasbe jun scajleb smoton li Muc'ul Diose yu'un chich' ta muc'. Te la stsac tal li lequil chonbolometic ti stac' ti'ele xchi'uc mutetic ti stac' ti'ele, jujucot ta jujuchop sts'unubal la stsac tal. Te la xchic' ta sventa smoton li Muc'ul Diose. 21C'alal ic'ot ta stojol Muc'ul Dios li smuil yic' smotone, jech laj yal: “Mu'yuc xa ta jsoques yan velta banamil ta scoj smul li cristianoetique. Yu'un li cristianoetique ta sbic'talic ono'ox ti ja' no'ox oy ta yo'nton tspasic li c'usi chopole. Jech noxtoc mu'yuc xa ta jtu'pbe sts'unubal yan velta li chonbolometic jech c'u cha'al la jpas li jun velta li'i.
22“Yu'un li' to oy li banamile,
oy ts'unubajel, oy sc'ajel;
oy yorail sic, oy yorail q'uixin;
oy yorail vo', oy yorail q'uepelal;
oy c'ac'altic, oy ac'ubaltic”, xi li Muc'ul Diose.
Արդեն Ընտրված.
Génesis 8: TZE97
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Tzotzil Chenalhó DC Bible © Sociedad Bíblica de México, a. c., 2002.