मेथा 8
8
जेने च्यीकला ढाक्सो़ ॱनाङवा
(मारकु १:४०-४५; लुका ५:१२-१६)
1येशु रीने माला फेई घाङला, मीछोक क्षेक्या खोङबागी स्याम्ला डावालाक। 2धा जेने हो़गीन मी च्यीक, खोङबागी डुङदु होरी पी़मु साला चुक्ती श्यी़वालाक, “चोवो ला, खेराङगी थुक ॱङेना, ङाला चो़गा जेदी चाङमा जे थुक्कीलाक।”
3धेनी येशुगी क्षाक क्याङदी, खोला जुरी सुवालाक, “ङा झ्यीदो़ हो़क। ख्यो़ चाङमा झ्युङ।” धेनी लाम्साङ खी़ जेने दाक्पालाक। 4धेनी येशुगी खोला सुवालाक, “सुलाः दे ॱमास्ये, हीना सोरी राङला क्षो़पो़नक्याचारु तो़न धेनी मीमाङक्याला ख्यो़ चाङमा झ्युजागी पाङपो हुङयेगी क्षीला, मोशेगी का ॱनाङगीन च्योक्रे क्षो़पा पु।”
ग्यापो़नगी ॱयोक्पो चो़पा
(लुका ७:१-१०)
5धेनी येशु काफारनाहुमदु फेप्ती, ग्यापो़न च्यीक खोङबागी डुङदु च्यारती श्यी़वालाक, 6“चोवो ला, ङी ॱयोक्पोला शाने फोक्ती, ॱमीच्यीकी ॱङ्या ङ्युरी नाङदु ङ्यारी धेहो़क।”
7धेनी खोङबागी खोला सुवालाक, “ङा होरी खोला चो़गा झ्यीदु।”
8हीना ग्यापो़नगी श्यी़वालाक, “चोवो ला, ङा खेराङला ङी खीम नाङदु फेप्सु श्युरीन खाये मेक। हीना खेराङगी का च्यीगा सुङना, ङी ॱयोक्पो ढाक्कीलाक। 9घीझ्येरी ॱनाना ङा श्येम्मागी वाङ होकदु हो़क धेनी ङी होक्दुवा ॱमाक्मीक्या हो़तालाक। ङी ॱमाक्मी च्यीकला, ‘सोङ’ ॱनाना खो डोवालाक धेनी श्येम्मा च्यीकला, ‘छुला स्योक’ ॱनाना हुङालाक धेनी ङी ॱयोक्पोला, ‘दे झ्यी’ ॱनाना, खी़ होदे झ्यीदालाक।”
10येशुगी दे सेन्दी, खोङबा याम सावालाक धेनी खोङबागी स्याबाला डागीनक्याला सुवालाक, “ङा खेक्याला धेन्पाराङ ॱनाहीन, ईस्राएलगी नाङदु ङी दे च्योक्रे धेपा थोङ माङ्युङ। 11ङा खेक्याला ॱनाहीन, स्यार धाङ नुप स्योकने मी माङा होरी, आब्राहाम धाङ ईसाक धाङ याकोबमुला नाम्खे ग्यासीदु श्युक्टाला धेगीलाक। 12हीना ग्यासीगी भु याहुदापाक्या, फीदागी मी़नाकला ॱयुक्कीलाक। साजा दुरु मीक्या ङुता ग्याप्ये धाङ सो ढीक्कीलाक।”
13धेनी ग्यापो़नगोला येशुगी सुवालाक, “सोङ। ख्यी़ धेपा झ्यीगीन च्योक्रे डुप्पास्योक।” धेनी होदे धी़लाराङ ॱयोक्पोगी नाजागो ढाक्पालाक।
नेपाक्या ढाक्पा
(मारकु १:२९-३४; लुका ४:३८-४१)
14धेनी येशु पेटोगी नाङला फेप्ती, खी़ केमीगी आमागो छावा फारती, नेरी ङ्यारी धेतागो शीक्पालाक। 15खोङबागी मी़ लाक्पा जी़वालाक धेनी छावागो सेरी, मो लावालाक धेनी खोङबाला श्याप्ची श्यी़वालाक।
16होदे घोमोगो मीक्याई डे जुजा मी ॱमीच्यीकी माङा, खोङबागी डुङदु खेरती होवालाक धेनी खोङबागी कागी थोक्ने, होदे ॱनो़पाक्या तो़न्दा जेपालाक धेनी नेपा घीरीला ढाक्सो़ ॱनावालाक। 17ॱङो़नस्येखेन यस्यायागी सुङगीनगो डुप्येगी क्षीला दे झ्युवालाक,
“खोङबागी होरी नेक्यो़नक्या ॱनुमा जेपालाक धेनी
होरी नाजाक्या चो़गा जेपालाक।”#यस्याया ५३:४
येशुगी स्याबाला डायेगी कोर
(लुका ९:५७-६२)
18धा, येशुगी राङगी ॱये-ॱयो़नला मीछोकक्या शीक्पालाक धेनी खोङबागी ङेनेक्याला, छो ॱहाकीनला डोयेगी का ॱनावालाक। 19क्षो़ठीमगी ॱलोपो़न च्यीक खोङबागी डुङदु होरी श्यी़वालाक, “गेन्ला, खेराङ घारु फेप्ना, ङा खेराङगी स्याम्ला डायेहीन।”
20धेनी येशुगी सुवालाक, “स्याल्लाक्याला धेजा फु हो़तालाक धेनी ॱनामगी झ्याक्याला झ्याछाङ हुङालाक हीना मी-भुला गोवा श्याक्सा सा मेतालाक।”
21धेनी ङेने श्येम्मा च्यीकगी खोङबाला ॱनेवालाक, “चोवो, ङी आकीगी फुङबु कुङयेगी क्षीला, एन्ला ङाला डोरु च्युक्रोझ्यी।”
22हीना येशुगी खोला सुवालाक, “ङी स्याबाला स्योक धेनी स्यीम्बुक्याईराङ, खोराङक्याई फुङबु कुङदु च्युक।”
येशुगी ॱलुङछुप ल्हेवी जेपा
(मारकु ४:३५-४१; लुका ८:२२-२५)
23धेनी येशु डु नाङदु फेप्ती, खोङबागी ङेनेक्या खोङबागी स्याबाला डावालाक। 24धेनी ॱहाताक्पाला छो खाला ॱलुङछुप क्षे च्यीक लारी, भालाप ग्याप्ती डुगो क्षुगी खाङये झ्येवालाक हीना येशु शीम्दी श्युक हो़तालाक। 25धेनी खुङक्या येशुचारु सोरी, खोङबाला ॱङी चेदी श्यी़वालाक, “चोवो, होराङक्याला क्योप्रो जे। होराङक्या भीप्कु झ्यीदी।”
26धेनी खोङबागी खुङक्याला सुवालाक, “खे धेपा च्युङाक्या घीझ्येरी जीयाले?” धेनी खोङबा श्येङदी, ॱलुङछुप धाङ भालापला काको़न जेपालाक धेनी होदुरु तीङल्हेवी झ्युवालाक। 27खुङक्या घीरी ॱमीच्यीकी ॱहाङसारी ॱनेवालाक, “दे मी दे घारे च्यीक हीना, ॱलुङ धाङ भालापगीया खोङगी खाला ङेन्दी?”
डे झ्युजा मी ॱङी
(मारकु ५:१-२०; लुका ८:२६-३९)
28छोगी ॱहाकीनला गादेरेनो युला फेप्ती, येशुला डे जुजा मी जीक्टाक्षे ॱङी धी़ठोने थो़न्दी हुङगीनगो थुक्पालाक। मी सुवा होदे लाम्गाने डो ॱमीथुक्वालाक। 29धेनी होदे ॱङीउगी केक ग्याप्ती ॱनेवालाक, “को़न्क्षोकगी से, हीकीमुला खेराङगी घी ढेवा हो़ताले? धी़चो़ ॱमालेप एन्लाराङ, खेराङ हेला दुक्पु ताङदु फेया हीने?”
30धा खुङक्याने ग्याङ चो़ला, फाकख्यु क्षे च्यीक छो़री धे हो़तालाक। 31धेनी डेक्याई खोङबाला श्यी़वालाक, “खेराङ हेक्याला तो़न्ये हीन्ना, हेक्याला फाकख्यु नाङला ताङरो जे।”
32धेनी येशुगी खुङक्याला, “सोङ” ॱनेरी सुवालाक। होझ्येरी खुङक्या होदेने थो़न्दी, फाकक्या नाङदु जुवालाक धेनी फाकख्यु घीरी छोगी डाम शारपो माला छाङगा ग्याप्ती, क्षु नाङदु ल्हीम्दी बीप्पालाक।
33धा फाक-झीक्या ढेला झ्येरी ग्याजाक्याला सोरी, लाब घीरी स्येपालाक धेनी होदे डे जुजा मी ॱङीउला झ्युङगीन घीरी स्येपालाक। 34धा ग्याजागी मी घीरी येशुला ज्यारु होवालाक धेनी खोङबाला ज्याली घाङला, खोङबाला खुङक्याई युछोकने फेप्रोझ्यी ॱनेरी श्यी़वालाक।
Արդեն Ընտրված.
मेथा 8: LOY
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2023, Wycliffe Bible Translators, Inc. and Nepal Bible Society