LUKE 23
23
Pilate Zülo Jisü Sawu
(Mt 27:1-2,11-14; Mk 15:1-5; Jhn 18:28-38)
1Timi kümtsü no puthughove no pa sasü Pilate zülo wu. 2Panongu no pa nguku thuve, “Timi hipau no ni shiye saküghüzü no Caesar lau zame ghi tsüpe moniye lakha ani, eno pa ampi no Messiah, akükau kepi piani.” 3Pilate no pa vilo iniju, “No ye Jewmi kükau keshea?” Pa no khochile, “Nono pivae.” 4Pilate no achinetomi ngo aqokitikhi vilo pi, “Ni ye timi hipau lau akipimi kiumu phulu amoe.” 5Ikemu panongu no tsüikhomo pi, “Pa no Galilee lono Judea kümtsü eno hi kutolo timiqo xukutho kütsü ani.”
Herod Zülo Jisü
6Kughou Pilate no hi chilu keno, pa no timi huye Galileemi kesheno iniju, 7pa no Jisü ye Herod yepe qholo akemie pi ithive kehu pa pesü Herod lau puwuve. 8Kughou Herod no Jisü ithulu keno, pa ye ighono amloqive, kughengu pa ye ado kushuo lono pa ghili chiluche kehu pa no amchipu kiuala shikeu ithuluni shi cheke. 9Pa no ado lughi Jisü vilo ighikuju tsa iniju akemu Jisü no kiumu khochile moe. 10Achinetomi ngo Ayezah shikükami no akumou pa nguku ae. 11Herod no paw ghüshimi sasü Jisü thaigha eno junuqhi. Tishino aphimini kighiche pa pipe no Pilate lau kighide puwove. 12Hipa züu Herod ngo Pilate pama ye aghümi shi ache kemu tipa tsala lono aküsami shiluve.
13Pilate no achinetomi ngo aqoaho sakiphemi kukütsü, 14eno panongu vilo pi, “Nongu no timi hipau ye timiqo saküghüzü anie pi I lau saghi. I no nongu zülono pa piqhiju kethiu ni ye nongu no pa xube ghi akipimi tsü akeu lakhimu ithumlae. 15Herod ghi phumla no ningu lau kighide puwove tsüae. Timi hipau ye akithi ithulu küzüpu kiumu shi püamoe pi ithilo. 16Ikehu I no pa ghimeve no kuqho pheveni.” 17(Kughengu akhuaye lono Hechekulu ghuloki lo pa no akughumi lakhi khaqhiphe cheke.)
Jisü Yedave Penike Tsüve
(Mt 27:15-26; Mk 15:6-15; Jhn 18:39-19:16)
18Ikemu timi kümtsü no aqoshi ighamku, “Timi hipau pithive lo, eno Barabbas kuqhope ningu tsülo.” 19Barabbas ye aphughi lo yepeka hebide ipeghi no timi ghiqhive kelono akughu shive ke. 20Pilate no Jisü xapheni shi akehu itaghi ghuthu lakhi timiqo vilo pi, 21ikemu panongu no alau ighamku, “Yedave lo, pa yedave lo!” 22Ghuthu aküthüu pa no timiqo vilo pi, “Kushiye kea? Pa ye kiu lhoksa shive akea? Ni ye akithi pa tsü küzüpu kipimi ithulu püamoe. Tighenguno I no pa ghimeve no kuqho pheveni.” 23Ikemu panongu no tsüikhomo ighamku pa ye pithive masae pi khu auve kelo panongu ghügha no ghüsüve. 24Ikehu Pilate no timiqo no khu ketoi tsüni keu shive. 25Pa no timi khuu hekibide eno ghikiqhi ghenguno akughu shipüa keno, timiqo no khu ketoi pa kuqhopheve no Jisü pesü panoqo pulou shivetsü.
Kros lo Yedave
(Mt 27:32-44; Mk 15:21-32; Jhn 19:17-27)
26Timiqo no Jisü sawu chekelo, milakhi Cyrenemi Simon ipikeu aphughi lo ilo cheghi kelono tsüqüpe Jisü thiu no kros xapupe. 27Aqokitikhi kije eno totimi kutomo no pa ghenguno mloqa papeche. 28Ikemu Jisü no tsüghüwo panongu vilo pi, “Jerusalem totimiqo, I ghenguno kumono nongu ampi eno no tianuli ghenguno mlo lo. 29Kughengu ishi pikepu tsala cheni, ‘Totimi khunono atianuli küha, anga kughunu lojiputhu jumo keno akümghapue!’ 30Panongu no naghutoqo vilo pi nani, ‘Ni shou ilu ikughi lo,’ eno atoghiqo vilo, ‘Ni küghütshü lo.’ 31Kughengu asü no aküxü shi aphilo thotsü hikithipu shi aye, tino qhaive aye kishive nani kea?”
32Tile küsaküghami kini pa gholono pithiveni ke sawuve. 33Kughou panongu no Aboghe ipiche ke-a lo ighi keno, panongu no tile pa yedave, eno küsaküghami pama ghi lakhi no pa u ajeu eno lakhiu no piyiu yedave. 34Jisü no pi, “Apu, panongu ye kiu shi ani keno ithiamo ke akipimi qhive tsülo.” Panongu no pa phimini kije luveni ye asaqhi. 35Timiqo no puthughope jukuto akelo yepemi no pa jukünatha ghi pi, “Pa no Alhouw Messiah, kishekipheu ipi aghi aye, kütami xalu cheke toi pa ampi xaluve pelo!” 36Ghüshimi ghi pa lau ighi no thaigha ghi akiqhi ji pesü tsü, 37eno pi, “Nono Jewmi kükau shiaghi aye, o likhi o xaluve lo!” 38Jisü kütsü sholo atsa ishi yepe qhitsü, “Hi no Jewmi Kükaue.”#23:38 Kiu kipimi ghenguno pithive ani keno kichephe tsüche.
39Küsaküghami lakhi no Jisü thogha ghi pi, “No ye Messiah ke kumo? O xaluve no nikujo ghi xalulo!” 40Ikemu lakhiu no pa sakiyi pi, “Ningu aghime aphiphi shi akeghi no ye Alhou msamo keo? 41Monimo aye nikujo ye ni kümla jume achipi lono ithulu ani, ikemu timi hipau ye kiumu pimi püamoe.” 42Pa no hi ghi pi, “Jisü, kughou nono o yekipe lo iloni keno I kümsülu lo.” 43Jisü no pa vilo pi, “Mtsüqheino I no o vilo piani, no ye ishi no I gholo alokughuno-a lo aniae.”
Jisü Kithi
(Mt 27:45-56; Mk 15:33-41; Jhn 19:28-30)
44Puchomta lono phitsü kutolo#23:44 Momu puchou ayi 12 lono avelau ayi 3 kutolo tipa ghakhu kuchopu aküzü no nhaluve, 45ti ye khetsünhe küvü no hailove. Achineki lo nhaqhiphi no ixü kütüta shive. 46Jisü no asütsa kuloghi lono pi, “I puo, O u lo I ghungu kulhuqhive tsüae!” Tishino pa tuthu kishekhave. 47Aqhe shou zatsüu no ti kümtsü ithulu no Alhou sheqhe, “Mtsüqheino timi hipau ye akipimi küha kena!” 48Kughou aqokitikhi ti juniye ighi keqo no hi kümtsü ithulu keno, kümtsü no amloiju amla kukhu aki lo idewove. 49Pa küsami eno Galilee lono totimi khunoqo pa papeche keno, tipaqo no putou puthugho no ti kümtsü juae.
Jisü Shiqhove
(Mt 27:57-61; Mk 15:42-47; Jhn 19:38-42)
50Jewmiw mishiphu Arimathea lono ighi keu timi kivimi eno amikuchomi lakhi Joseph ipikeu ache, pa ye Jewmi Hoho lo kihimpemi. 51Ikemu pa ye aqomi xakütha lo pulomo no Alhou yekipe laju cheke. 52Pa no Pilate lau wuno Jisü sükumo khuluve. 53Tishino pa no kros peqhi no akumo küküzü phi pesü küzüve no pewo khile atu chitha ilo akumoki shipüa keno, timi khumu qhomphi ke-a lo süve. 54Ti ye Sabbath huthuni ke zülo Akukuto tsala shiae. 55Totimi khunoqo Jisü gholo chekeno, Galilee lono pa pape ighi keqo no Joseph sasü wuno akumoki eno kishi Jisü kumo qhipüa keno ithulu. 56Tithiu panongu no idewo axokütsüngü eno shikipivi tsüni kutope qhive.
Azakütsü kiqi lono panongu no Sabbath loye akulhoqhive.
Արդեն Ընտրված.
LUKE 23: SUMRVBSI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Bible Society of India
© 2023, Used by permission. All rights reserved. More