JOHN 8
8
1ikemu Jisü ye Olive Toghi lo wuve. 2Thanau inaqhe itheno pa no achineki lo ideighi. Timi kümtsü no pa lau ighi, pa no iqave no panoqo kütsü. 3Ayezah shikükami ngo Phariseemi no totimi lakhi salha aghi kelono küghape ighi no panongu mta lo qhino 4pa vilo pi, “Shikükau, totimi hipau ye salha aghi kelono küghalue. 5Ayezah lo totimi hikithipu ye atu pesü veqhi lopi Moses no azah ningu tsüpüani. Ike no ye kiu pi nani kea?” 6Panongu no pa vilo hipa tsa pikeu ye pa peju no akipimi pa shou beniye ke. Jisü no pishiqhope pa uloti pesü ayeghi lo yepuku. 7Panongu no pa iniju kichichi auve kehu pa no puthughove no pi, “Nongu gholo khuu no axine shipüamo keno pa paghino li shou atu vepukulo.” 8Pa no itaghi pishiqhope pa uloti pesü ayeghi lo yepuku. 9Ikemu kughou panongu no hipa tsa chilu keno panongu gholo kichimi no atüghü shino lakhikhi no wokhave, eno Jisü likhi atotiu no pa zülo puthughope aghive. 10Jisü no ithughi no li vilo pi, “Totimi, panongu ye khila khave akea? Khumu akipimi o tsümove akeshea?” 11Li no khochile “Ampeu, khumu kühavae.” Tile Jisü no pi, “Imaye ni ghi akipimi o tsüamoe; wovelo, eno axine shikithe kevilo.”
Ni ye Ayeghiqha Küvü
12Jisü no itaghi timiqo vilo pi, “Ni ye ayeghiqha küvüe. Khunono I papeni keno aküzü lo chemo nani ikemu aküxüpu küvü anani.” 13Ikehu Phariseemi no pa vilo pi, “No ye o sala thopi shi auvae, o shepe ye kuchou kumoe.” 14Jisü no khochile, “I no ni ampi shepe shi aghi namu, I shepe ye kuchoue, kughengu ni ye khilano ighi eno khila wucheni keno I no ithi ani. Ikemu ni ye khilano ighi momu khila wucheni keno nongu ye mthae. 15Nongu ye ashi lono küghatha cheni; ni ye khuu shoumu küghatha chemoe. 16Tsala I no küghatha namu, Iw küghakütha ye kuchou, kughengu ti ye I likhino küghatha anike kumoe, ikemu ni eno Apu khuu I puwu keno nikujo noke. 17No Yezah lo mikini no thopi shikeu no kuchoue pi yepüani. 18I no I ghili ashepe shi ani eno Apu I puwu keu no I shepe shitsü ani.” 19Ikehu panongu no pa vilo pi, “O pu ye khile ani kea?” Jisü no khochile, “Nongu ye ni eno I Pu mu mthae. Nongu no ni ithike aye I Pu ghi ithini cheke.” 20Hi kümtsü pa no achineki lo kütsü akelono akümllagho kiqhi-a phivilo no pike; ikemu khunomu pa küghamoe kughengu pa do ye ighi mono ae.
21Pa no itaghi panoqo vilo pi, “Ni ye wuve nani eno nongu no I phuju nani, eno nongu ye no xine lono thive nani. I no khila wucheni keno nongu ye ighimlae.” 22Ikehu Jewmi no pi, “Pa no, ‘I no khila wucheni keno nongu ye ighimlae’ ipi ani keke pa ye pa ampi pithiveni cheni keo?” 23Pa no panoqo vilo pi, “Nongu ye aqhou no ighi, ikemu ni ye kunguu no ighi. Nongu ye hipa yeghi lomie, ikemu ni ye kumoe. 24I no nongu vilo pike nongu ye no xine lono thive nani, kughengu nongu no ni ye Pa kepi pülümo kelo nongu ye no xine lono thive nani.” 25“No ye khu kea?” ipi panongu no pa vilo ighiju. Jisü no pi, “Abothu lono I no nongu vilo pi akeu huke. 26Ni ye nongu ghili pikepu kutomo ani eno küghathabe kepu kutomo ani, ikemu khuu no I puwu keno Pa ye kuchou, eno Pa launo kiu chilu keno tipau pesü I no ayeghiqha lau sheshu cheni.” 27Pa no Apu ghili pesü panoqo vilo piakeu panongu ye vethamlae. 28Ikehu Jisü no pi, “Kughou nongu no Timi Nu ikhiqheni keno, tileno nongu no ni ye Pa kepi ithi nani; eno ni ye kiumu I küka lono shichemo, ikemu Apu no kiu I shika keno ti likhi pichenie pi ithi nani. 29Khuu I puwu keno Pa no I gholo ani, Pa ye I likhi qhive mphie kughengu I no alhokuthu pa lokiqipu shi acheni.” 30Pa no hipaqo pi akelo kutomo no pa shou pülü luve.
Kuchou huno Nongu khaqhiphe nani
31Ikehu Jewmi khunono Jisü pülülu keno tipaqo vilo pa no pi, “Nongu no I tsa papelu aye nongu ye kuchou no I khopemi, 32nongu no kuchou ithi nani eno kuchou huno nongu khaqhiphe nani.” 33Panongu no pa khochile, “Ningu ye Abraham laghami eno khuno qüaxemi mu shimphi. Ike kishino no ye ‘Nongu khaqhiphe nani’ ipi ani kea?”
34Jisü no panoqo vilo pi, “Kuchou no I no nongu vilo piani, khuu no axine shini keno pa ye axine qüaxemi. 35Aqüaxemi ye alholo akibo lo auve chemo, ikemu Anu ye alholo achenie. 36Ikehu Anu no nongu khaqhiphe aye, nongu ye kuchou no kuqho phevae. 37Nongu ye Abraham laghami kepi I no ithi ani, ikeghi nongu lolo I tsa ngokepu küha kehu nongu ye I pithini ke phucheni. 38I Pu no kiu I piye keno I no picheni, ikemu nongu ye nongu papu no kiu piye keno ti shicheni.”
Nongu Papu Tüghami
39Panongu no Jisü khochile, “Ningu papu ye Abraham ke.” Pa no panoqo vilo pi, “Nongu no Abraham tianuli keaye pa no mlakeu nongu ghi shiniche, 40ikemu Alhou launo kuchou kiu chilu keno nongu vilo pikeu timi hu pithiveni ye nongu no phucheni. Abraham ye hitoi shipüamoe. 41Nongu ye nongu papu no shikeu kümla shiani.” Panongu no khochile, “Ningu ye tüqhanu kumoe. Ningu ye Apu lakhi likhi ani, ti ye Alhou ke” 42Jisü no panoqo vilo pi, “Alhou no nongu papu keaye nongu ye I kimiyeni cheke, kughengu ni ye Alhou launo ighi eno ni ye hile ani. Ni ye I kutoshi no ighike kumoe ikemu Pa no I puwuke. 43Kushiye I no pi akeu nongu ye vethamla kea? Ti ye nongu no I no pikeu tsa inini shimo kehue. 44Nongu ye nongu papu tüghami laumi eno nongu papu gho-apulou shitsüni keu no nongu pulou ke. Pa ye abothu lono ghikiqhiu, eno kuchou küdau aju mphi kughengu pa lolo kuchou kühake. Kughou pa no mikini keno ti ye pa lhoaye kuchou piye ani, kughengu pa ye akimkiu eno akimki kümtsü papu ke. 45Ikemu I no kuchou tsa pike ghenguno nongu ye I pülümoe. 46Nongu gholo khuu no akipimi I tsülu nani kea? I no nongu vilo kuchou tsa pi aghi aye kushiye nongu ye I pülümo kea? 47Khunono Alhou laumi keno pa no Alhou tsa chilu cheni. Nongu no chimla keu kiqi ye nongu ye Alhou laumi kumoe.”
Ni ye Abraham Züuno Ache
48Jewmi no pa khochile, “No ye Samariami eno o lolo tüghami anie pi ningu no pikeu ye achipi kumo keshea?” 49Jisü no khochile, “I lolo tüghami kühae, eno ni ye I Pu gihu cheni kemu nongu ye I gihu chemoe. 50Ikeghi ni ye I likhi I jekipi phuchemoe; tipau phu chekeu lakhi ani eno pa ye küghaküthau ke. 51Kuchou no I no nongu vilo piani, khuu no I tsa peluni keno pa ye khilemu thimo nani.” 52Jewmi no pa vilo pi, “No ye tüghami o lolo anie pi itehi ye nino ithivae! Abraham ye thivae, eno tungkupmiqo ghi thivae, ikeghi nono, ‘khuu no I tsa peluni keno khilemu akithi michemo nani’ ipi ani. 53No ye ni sü Abraham nguno akijeu keshea? Pa eno Tungkupmiqo ghi thivae. No ye o küghape khuue piani kea?” 54Jisü no khochile, “I no I jekipipu shi aye I jekipi ye kiumu kumoe, Ikemu nongu no, ‘Pa ye ni Lhou’ ipiche keu I Pu huno I je pipitsü cheni. 55Nongu ye pa mthae ikemu ni ye pa ithi ani. Tsala I no ni ye pa mthae pi aye ni ye nongu toi kimkimi, ikemu ni ye Pa ithi ani eno Pa tsa pape cheni. 56Nongu pasü Abraham ye I tsala ithuluni chenie pi alovi che, eno pa no ti ithulu no amlokiqi shie.” 57Tileno Jewmi no pa vilo pi, “No ye ampe lhopungu mu tomphi püzü Abraham ithuluve akeshea?” 58Jisü no pi, “Kuchou no I no nongu vilo piani, Abraham züuno ni ye acheghivae.” 59Ikelo panongu no pa veniye atu ikhilu, ikemu Jisü no itshüve no achineki lono ipeve.
Արդեն Ընտրված.
JOHN 8: SUMRVBSI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Bible Society of India
© 2023, Used by permission. All rights reserved. More