LUKA 24
24
Thyuheihna
(Mat 28.1-10; Mka 16.1-8; Zhn 20.1-10)
1Hâta noh hmiatua chaipa mydi kari ta, chanôzy cha ropahâhpa amâ chhuanohpazy a cheipa ta, thlâ lâ vawh ei ta. 2Thlâ tawhta alô â pasie hapa hmô ei ta. 3Thlâ chhôh lâ a ngia ei ta, Abeipa Zisu ri cha hmô leipa ei ta. 4Zisu ri a y khao leipa vâta nôpo kawpa ta ama y hai nota, poh diehpa a bupa chyhsa pano ama kiapâh liata a vaw duah ei ta. 5Chanôzy cha chi ngaita ei ta, ama hmia alei lâ a khu ei ta. Chyhsazy chata ama hnohta, “Khazia athihpa hry liata ahrohpa nama tlua? 6#Mat 16.21; 17.22,23; 20.18,19; Mka 8.31; 9.31; 10.33,34; Lka 9.22; 18.31-33He liata y khao vei, a thyu haw. Kâlili liata a y nota nama hnohta bie a reipa kha a thei heih teh u. 7Chyhsa Sawchapawpa cha moleipazy ku ta patusapa châ aw ta, khaipâ aw ei ta, a noh thôhna noh ta a thyu heih aw, a tahpa kha a thei teh u,” tah ei ta. 8Chatanachata a bie reipazy kha a vaw thei heih ei ta, 9thlâ tawhta a lie ei ta, cha hmo zydua cha pahrawh hleikhazy nata mohropazy chho ei ta. 10Mâri Mâdali, Zôanâ, Zâmie nô Mâri nata ama hnohta a ypa chanô hropazy ta a thyuheihna thâtih cha lyuhchâpazy kei chho ei ta. 11Châhrasala lyuhchâpazy ta cha biezy cha, bie thlâhthlipa ta rao ei ta, zo leipa ei ta. 12Pity cha thyu ta, thlâ lâ a râ ta, a bôh ta, za moh ta, pala rih dipa pohzy deita hmô ta. Hmo yzie cha noâh tah ngaitana chôta a o lâ a di ha ta.
Emâsâ lâpi liata Zisu â luah
(Mka 16.12-13)
13Cha noh liana tlai chata ama hry liata chyhsa pano cha khih miakha, Emâsâ ama tahpa lâ sie ei ta. Cha khih cha Zerusale tawhta me sari rachhôh a hlapa a châ. 14Hmo vaw tlôpa zydua cha reih khoh laih lymâ ei ta. 15Bie ama rei hai nota, Zisu cha ano tlai ta âmo vaw pangai ta, ama hnohta sie ta. 16Châhrasala ano a châ tahpa ama pahno lei nawpa ta, ama mozy paliesapa ta y ta. 17Ama hnohta, “Nama sie pâ ta nama reipa bie kha khâpa bie maw?” tah ta. Pachârôhpa ta a duah ei ta. 18Ama hry liata pakha a moh Kaliôpâ ama tahpa ta a chhy ta, “Nâma deita he tahmâ nota Zerusale liata hmo tlôpa a pahno leipa Zerusale khichhai châ khiah chi?” tah ta. 19Ano ta ama hnohta, “Khâpa hmozy maw?” tah ta. Âmo ta a hnohta, “Nâzari Zisu, Khazohpa nata chyhsa zydua mohmô liata bie nata hmotaopa liata hrohsopa thatlô ngaitapa thâtih a châ. 20Eima theihthai beizy nata ryureituhpazy ta ano cha thailei pachâsa ei ta, thie awpa ta a chhi ei ta, ama khaipâna kyhzy kha na eima rei. 21Keimo ta cha ano kha Izarei chatlaituhpa a châ awpa ta eima hnabei a seih thlâ bao na ta, khâpa rai châ sala, cha hmozy tlôna tawhta tanoh he a noh thôhna a châ haw. 22Cha dei châ vei, eima py liata chanô thokha ta eima no miah ama paâhsa ngaita. Tamy kha thlâ lâ vawh ei ta, 23a ri hmô khao leipa ei ta, vâlyuhchâpa a vaw luahpazy ama hmôpa kyh nata, vâlyuhchâpazy chata a hroh ha heihpa thâtih ama chhopa kyhzy vaw reih ei ta. 24Eima hnohta a ypazy hry liata thokha thlâ lâ vawh ei ta, chanôzy reipa hawh tlai ta kei hmô ei ta, ano cha hmô khao veih ei,” tah ei ta. 25Zisu ta ama hnohta, “Hy ahrupa saih u! Hrohsopazy bie reipa zydua a ngiapâ nawpa kyh liata nainôsôpazy saih u! 26Mesia cha, cha hmozy cha pasa taopa ta a rônahna liata â ngia awpa châ vei ma?” tah ta. 27Chatanachata Mawsi nata hrohsopa zydua tawhta pathaopa ta, Biehrai liata ano thâtih ropa zydua cha âmo chhopasia lymâ ta.
28Ama sie nawpa khih tlô daihmâ ha ei ta. Ano cha â hla via sie a chhuahpa hawhta y ta. 29Châhrasala thlyu ei ta, “Eima o liata tlô mah y, zâlâ ha ta, noh chhao a tla daihmâ ha hih,” tah ei ta. Chatanachata ama o liata tlô awpa ta a ngia ta. 30Pati nie awpa ta ama hnohta tlâhkhai liata a dôh nahta, viahchhâ la ta, byhnâ aw ta, pachhaih ta, ama hnohta pie ta. 31Chatawhcha ama mo vaw pavâ ta, Zisu a châ tahpa pahno ha ei ta. Zisu cha ama mohmô tawhta lei ha ta. 32“Lâpi liata bie miah a chho ta, Biehrai biezy miah a chhopasia nona kha, eima pathipalôh a kâ ngâ kaw tlai vei ma kha?” tah ei ta. 33Cha dawh lia tlai chata thyu ei ta, Zerusale lâ a lie ei ta. Pahrawh hleikhazy nata ama viasazy cha hmaohkha ta ama ypakhypa hmô ei ta. 34Pahrawh hleikhazy chata, “Abeipa cha a thyu ha tlai, Saimaw hnohta â luah haw!” tah ei ta. 35Âmo chhao ta, lâpi liata hmo a vaw tlôpa nata viahchhâ a pachhaih nota a hmia ama pahno hanazie zy chho hra ei ta.
A pachupazy hnohta Zisu â luah
(Mat 28.16-20; Mka 6.14-18; Zhn 20.19-20)
36Cha biezy cha ama rei hai nota, Zisu cha ama hry liata a vaw duah ta, ama hnohta, “Nama chô liata thlahlôhna y mawh sy,” tah ta. 37Châhrasala a pahlawpa ta chi ngaita ei ta, thlahpa a hmôpa ta a pachâ ei ta. 38Zisu ta ama hnohta, “Khazia tymâpa ta nama y? Khazia nama palôh liata a lôh leina a y? 39Ei kuzy ei pheizy he moh tua u, keima tlai kha ei châ hih. Na vaw hria u la, na moh teh u. Keima eina hmôpa hawhna ei chi heta, thlahpa cha sapa nata rupa hnei vei,” tah ta. 40Cha bie cha a rei khai nahta, a ku nata a pheizy cha âmo pahmô ta. 41Amâ ly tupa vâta zo leipa ta y ei ta, noâhpa ta ama y hai nota, ama hnohta, “Nie awpa nama hnei ma?” tah ta. 42Ngasa rao chiehpa miakha nata kheihthlawh#24.42 He liata “Kheihthlawh” he hlâno kuropa Biehrai thokha liata y vei. pie ei ta. 43Chazy cha la ta, ama hmiakô liata nie ta.
44Chatawhcha ama hnohta, “Hezy he ei rei tyhpa, Mawsi Ryhpa liata nata Hrohsopazy Châbu liata nata Hlazy liata ei thâtih ropa zydua a vaw tlô khai awpazie nama hnohta ei y nota ei cha chho tyhpa ei kha a châ,” tah ta. 45Biehrai biezy ama pahno thei nawpa ta, ama palôh pahy ta, 46ama hnohta, “Hetana heta ropa a châ: ‘Mesia cha riethei tao aw ta, a noh thôhna noh ta athihpa hry tawhta thyu heih aw ta, 47ano moh ta rona nata molei ngiahthaina thâtih cha, Zerusale tawhta pathaopa ta, phopi to hnohta chhopa a châ aw.’ 48Cha hmozy cha a pahnotuhpa nama châ. 49#Hmt 1.4Pachâ teh u, ei Paw bietaipa cha nama chô liata vaw tuah aw na ta, chô lâ tawhta hmotaotheina ta tobipa nama châ hlâta deikua cha, khihpi liana heta y thlâh ha muh vy,” tah ta.
Vârâh lâ kiana
(Mka 16.19-20; Hmt 1.9-11)
50 #
Hmt 1.9-11
Bethâni khih kiapâh taihta a pachupazy cha a chhi ta, a bâh pazawh ta âmo cha byhnâ awpa ta. 51Byhnâ a awpa khai nah ei ta, a pachupazy cha a chhaih ta, vârâh lâ a chhipa ta y ha ta. 52A pachupazy ta Zisu cha a naoh ei ta, a ly ngaitapa ta Zerusale lâ a lie ei ta, 53Achhyna o liata khâ y ei ta, Khazohpa ama reithai tyh.
Արդեն Ընտրված.
LUKA 24: MARVBSI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Bible Society of India
© 2023, Used by permission. All rights reserved.